Iobi
11 E kaeka ni kangai Toba+ are te I-Naama:*
2 “Te koaua bwa a na aki bane ni kaekaaki taeka aikai,
Ke e na eti te aomata man ana bwarantiko ae bati?*
3 E na kainabwabuia aomata am taeka aika akea uaaia?
Ao te koaua bwa akea ae e na kamaamaeko ibukin am taeka ni kakaniko?+
5 Ma tera ngke e taetae te Atua
Ao ni kaurea wina nakoim!+
6 Ao ane e na kaota nakoim aron reken te wanawana,
Ngkai a kakaokoro nako iteran te wanawana.*
Ao ko na ataia ngkanne bwa e kariaia te Atua bwa e na mwanuokin am kairua tabeua.
7 Ko kona ni kunei ana bwai te Atua aika nano,
Ke ko kona ni kunei ni kabane taekan* Teuare Moan te Mwaaka?
8 E rietata riki nakoni karawa. Iai te bae ko kona ni karaoia?
Ao e nano riki nakon te Ruanimate.* Iai te bae ko kona n ataia?
9 E abwabwaki riki nakon te aonnaba,
Ao e raababa riki nakon taari.
10 Ao ngkana e rirarikin te aomata ao e a katikia naba ma ni kateia n te boowi,
Ai antai ae kona n tukia?
11 Bwa e ataiia aomata ngkana a mwamwanaa te aba.
Ao ngkana e nora te bae buakaka, tiaki e na bon tabe iai?
12 Ma e na reke otan te aomata ae nanobaba,
N te tai are e kona iai te taongki ae moaanti ni bungia te aomata.*
13 Ngke arona bwa ko tii kaeta nanom,
Ao n arori baim nakoina,
14 Ngkana e karaoa ae kairua baim, ao kaaki i kiraroa,
Ao tai kariaia te buakaka bwa e na maeka n am umwanrianna nako.
15 Ko a kona ngkanne n euta matam bwa akea baarekam,
Ao ko a kona n tei n nene n aki maaku.
16 Bwa ko na mwanuokina ngkanne am kangaanga,
Ao n am ururing e na riki n ai aron te ran ae raanganako.
17 Ao e na oota riki maium nakon te tawanou,
Ao rotongitongina naba e na titeboo ma te moaningabong.
18 Ko na bon aki nanokokoraki bwa iai te kantaninga,
Ao ko na tarataraa rarikim ao ni wene ma te mweraoi.
19 Ko na wene ao e na akea temanna ae e na kakamaakuko.
Ao a na ukera akoaia iroum aomata aika bati.