2 I-Korinto

10 Ao ngai ae Bauro, I butiingkami n te nimamannei ma te akoi are e kaotiotaki iroun te Kristo+ e ngae ngke I taraaki iroumi bwa I mangori i buakomi,+ ma ngkana I aki mena i buakomi ao a mamatoa au taeka.+ 2 I onnon nakoimi bwa ngkana I mena i buakomi, ao N na aki rangi ni matoatoa ma ni kairimatoa n aron ae I kariaa nakoia tabeman, ake a iangoira bwa aongkoa ti nakonako n ai aron nanon te rabwata. 3 Bwa e ngae ngke ti maiu n te aro n rabwata, ma ti aki buaka n ai aron nanon te rabwata. 4 Bwa tiaki bwain te rabwata ara bwai ni buaka,+ ma a korakora mairoun te Atua,+ n urui baika nene wakaaia. 5 Bwa ti urui iango n rarabakau ma aaro ni kainikatonga nako ake a kauntabaa te atatai ibukin te Atua,+ ao ti kataenikai iango ni kabane bwa a na ongeaba iroun te Kristo. 6 Ao ti tauraoi ni katuuaaeia aomata nako ake a kaotiotii aeka n aki ongeaba nako,+ ngkana kam a tia n ongeaba.

7 Kam bairei taekani bwaai n aron taraakia. Ngkana iai ae e onimakinna i bon irouna bwa te tia rimwini Kristo ngaia ao ke e manga iaiangoa riki te koaua aei: Ngkai ana bwai Kristo ngaia, ao ai arora naba. 8 Bwa e ngae ngke I kabatiaa teutana au kamoamoa nakon ae riai ni kaineti ma te mwioko are e anganira te Uea, are ti na kateimatoaingkami n aki kabwakaingkami,+ ma N na bon aki kamaamaeaki iai. 9 Bwa I aki tangiria bwa kam na taku bwa I kani kakamaakuingkami n au reta. 10 Bwa a taku tabeman: “A kaakanoa ana reta ao a orobuki, ma ngke e mena i buakora ao moan te mangori taraana, ao akea manenan ana taeka.” 11 A riai n ataia aeka n aomata aikai bwa arora n taetae n ara reta ngkai akea ngaira i buakomi ao ai bon arora naba ae ti na karaoia ngkana ti mena i buakomi.+ 12 Bwa ti maaku n atongira bwa raoia te koraki ake a kamoamoaia i bon irouia,+ ke ni kabotauira ma ngaiia. Ma a kaotia bwa a aki ota, n aroia ni baireiia ni kaineti ma oin aia kaetieti, ao n aroia ni kabotauia i bon irouia.+

13 Ma ti na aki kamoamoa n ae riaon ae riai, ma ti na kamoamoa ni kaineti ma baike ti kona ni karaoi i nanon te aono are ti mwiokoaki iai ae e baireaki tiana iroun te Atua, are te aono are kam mena naba iai.+ 14 Ni koauana, ti aki riaon tian ara aono, bwa aongkoa kam aki mena i nanon ara aono, bwa bon taani moan roko naba ngaira iroumi n tataekina te rongorongo ae raoiroi ae taekan te Kristo.+ 15 Ti aki kamoamoa n ana mwakuri temanna ae karaoia i tinanikun te aono are ti mwiokoaki iai, ma bon ara kantaninga bwa ngkana e a ririkirake ami onimaki ao e na ririkirake naba ara mwakuri are ti karaoia n ara aono. Ao ti na karababaa riki ngkanne 16 tataekinan te rongorongo ae raoiroi nakon aaba ake a raroa riki nakoimi, bwa ti aonga n aki kamoamoa n te bwai ae e a tia ni karaoaki n ana aono temanna. 17 “Ma ane e kamoamoa ao ke e kamoamoa iroun Iehova.”*+ 18 Bwa e aki tau te aomata ae kamoamoaa i bon irouna,+ ma e tau ane e kamoamoaaki iroun Iehova.*+