Naum
2 E a roko n ekikonako* te tia kamaenakoia aomata.+
Tantani n taian nono.
Teimatoa n tarataraa te kawai.
Katauraoingkami* ao kabatiai korakorami.
2 Bwa Iehova e na manga kaoka tamaroan Iakoba,
N ikotaki ma tamaroan Iteraera,
Bwa a a tia taan urubwai n uruia naakai,+
Ao a a tia ni kamatei bwebweia.
3 A kaurauraaki aia otanga ana rorobuaka aika korakora,
Ao a kunnikainia ana tia buaka n te uraroo.
A takiakia n ai aron te ai biiti aika bwain ana kaa ni buaka
N te bong are e katauraoia iai nakon te buaka,
Ao a katiotioaki kainiwai aika karaoaki man te kai ae te mwaiango.
4 A buti kaa ni buaka ni kabutimwaakaia rinanoni kawai.
A kabutimwaakaia ni waerake ao n ruo rikaaki ni maraen nako te kaawa.
A oota n aron taian oi ao a itirua n aron te iti.
5 E na weteiia ana aomata aika mataniwi.
A na tatanako ngkana a keerake.
A ienikuri nakon ana oo neiei.
A katei bwaai n tutuki.
6 A na kaukaki mataroan oon taiani karaanga,
Ao e na ran* te baareti.
7 E a tia ni motikaki* aei: E kaotaki bwain rabwatan neiei ae riai ni karabaaki,
E a uotakinako ao a bwaebwaeti ana toro aika aine,
Ao titeboo karongoaaia ma taobe ngkai a ororei bwanibwania.*
8 N ana bong neiei ao titeboo Ninewe+ ma te nei n ran,
Ma a a birinako ngkai.
A takarua tabeman ni kangai: “Teei n aki kakammwakuri! Teei n aki kakammwakuri!”
Ma akea temanna ae rairaki.+
9 Kuribwaia te tirewa, kuribwaia te koora!
A aki kona ni bane baika kakawaki.
E onrake ni baika rangi ni kakawaki n aekaia nako.
10 Ai akea kanoan te kaawa, e a kamaroaeaki, e a uruaki!+
A bwara nanoia n te maaku, a mamaara bubuaniwaeia, ao a ruru bebeeia.
A bane n ubu n tabeaianga.
11 E nga bwangaia raian,+ ike a amwamwarake iai raian aika ataei,
Ike e otinako mai iai te raian ni kairiia bunna,
Ao akea temanna ae e na kakamaakuia?
12 E raebitia konana ae bon tau te raian ae te mwaane ibukia bunna,
Ao e koonroroa ibukia ana raian aika aine.
Ao e kaonrakei ana tabo ni konana,
Ao bwangana ni maan aika raebitiaki.
13 “Noria! I a ekikonako,” bon ana taeka Iehova ae Atuaia taanga ni buaka,*+
“N na kabueki ana kaa ni buaka neiei ni kabubui,+
Ao te kabaang e na kabwautiia am raian aika ataei.
N na kamaunaia konam mai aon te aba,
Ao e na aki manga ongo te aba karongoaaia am tia uataeka.”+