1 Tamuera
6 E tiku ana Ati+ Iehova n aononi Biritia i nanon itiua namwakaina. 2 Ao a weteiia ibonga ma taani kaiwa I-Biritia+ ao a titirakinia ni kangai: “Tera ae ti riai ni karaoia ma ana Ati Iehova? Tuangira arora ae ti riai ni kaokia iai nakon ana tabo.” 3 A kaeka ni kangai: “Ngkana kam kanakoa ana ati ni berita Iehova ae Atuan Iteraera, ao tai kaokia n akea te karea. Kam bon riai ni kaoka nakoina te karea ni kabooa mwin te bure.+ Tii anne aromi ni kamarurungaki, ao e na kaotaki nakoimi bukina ae e tuai mani kanakoa iai baina mairoumi.” 4 Mangaia are a titiraki ni kangai: “Tera te karea ni kabooa mwin te bure ae ti na kanakoa nakoina?” A taku: “Kam na kanakoa nimaua te tine* aika karaoaki man te koora ao kimoa aika niman aika karaoaki man te koora, ni kaineti ma mwaitiia aia toka I-Biritia,+ ibukin te rekenikai ae tii teuana are kam karawawataaki iai ni kabane ma ami toka. 5 Kam riai ni karaoa katotongan tinemi ao katotongaia ami kimoa+ ake a urua te aba, ao kam riai ni karinea Atuan Iteraera. Tao ane e na kabebetea rawawatani baina ane i aomi ao i aon atuami ao i aon abami.+ 6 E aera ngkai kam a kamatoatoai nanomi n aroia kaain Aikubita ma Barao ake a kamatoatoai nanoia?+ A a tibwa kanakoia tibun Iteraera ngke E katuuaaeia,+ ao a bon nako.+ 7 Katauraoa ngkai te kaa ae boou ao kaao aika uoman aika iai bunia ao aika a tuai man toka i aoia te amo mai mwaina. Ao kabaeia ma te kaa, ma anai bunia mairouia ni kaokiia nakoni mwengaia. 8 Anaa ana Ati Iehova ao katokaa i aon te kaa, ao nnei n te bwaoki i rarikina+ bwaai ake a karaoaki man te koora ake kam na kanakoi nakoina bwa te karea ni kabooa mwin te bure. Ao kanakoa, 9 ao kam na mataku: Ngkana e waerake n te kawai are nako Betatemeti+ nakon oin ana aono, ao boni ngaia ae e a tia ni karaoa te bwai ae rangi ni buakaka aei nakoira. Ma ngkana e aki, ao ti na ataia bwa bon tiaki bain teuarei ae oreira, e boni manennanti rikina nakoira.”
10 Ao a karaoa arei mwaane akekei. A anai kaao aika uoman aika iai bunia ao a kabaeia ma te kaa, ao a ooiia bunia ni mwengaia. 11 A katokaa ngkanne ana Ati Iehova i aon te kaa, ma te bwaoki are kanoana kimoa aika karaoaki man te koora ao baike katotongan tineia. 12 Ao a kaineta kawaia kaao akekei nako Betatemeti.+ A a bon titiku naba i aon te kawai teaina ae totouaki, ao a tangitang ngke a boonako, a aki rarairaki nakon te angaatai ke nakon te angamaing. N te tai anne ao aia toka I-Biritia a rianna n ririmwia ni karokoa rokoia n tiani Betatemeti. 13 A tabe kaaini Betatemeti n taia te uita n te tabo ae aoraoi.* Ngke a euti mataia ao a nora te Ati, ao a a rangi ni kimwareirei ngke a noria. 14 E nako te kaa arei nakon ana tawaana Iotua ae te I-Betatemeti, ao e tei ikekei i rarikin te atibu ae bubura. Mangaia are a a korokorea kain te kaa arei, ao a kareania kaao+ akekei bwa te karea ni kabuekaki nakon Iehova.
15 A karuoa ana Ati Iehova tibun Rewi+ ma te bwaoki are raona, are kanoana bwaai ake a karaoaki man te koora, ao a katokai i aon te atibu are bubura. Ao a anga taiani karea ni kabuekaki mwaaneni Betatemeti+ ao a angakarea n te bong anne nakon Iehova.
16 Ngke a nora aei tokani Biritia ake niman ao a oki rikaaki nako Ekiron n te bong anne. 17 Aikai ngkanne taian tine ake a karaoaki man te koora ake a kanakoi I-Biritia bwa te karea ni kabooa mwin te bure nakon Iehova:+ teuana ibukin Atoto,+ teuana ibukini Kaata,+ teuana ibukin Atikeron, teuana ibukini Kate, ao teuana ibukin Ekiron.+ 18 Ao a boraoi mwaitiia kimoa ake a karaoaki man te koora ma mwaitin aia kaawa ni kabane I-Biritia ake aia kaawa tooka ake niman, ae taekani kaawa aika nonoaki ao kaawa ake a mena n te aba ae aki nonoaki.
Ao e a riki te atibu are bubura are a kaaki i aona ana Ati Iehova, bwa te bwai ni kakoaua ni karokoa te bong aei n ana tawaana Iotua are te I-Betatemeti. 19 Ma e kamateia mwaaneni Betatemeti te Atua, ibukina bwa a karekea taraan ana Ati Iehova. E kamateia 50,070* mai buakoia aomata, ao a a tanginiwenei aomata ibukina bwa e kamateia Iehova n te kamamate ae korakora.+ 20 Mangaia are a titiraki mwaaneni Betatemeti ni kangai: “Antai ae e nang kona n tei imwain Iehova, ae te Atua ae tabu aei,+ ao e na kitanira nakoia antai?”+ 21 Mangaia are a a kanakoia taan uataeka nakoia kaaini Kiriataearim+ ni kangai: “A a tia I-Biritia ni kaoka ana Ati Iehova. Nakomai ruuo bwa kam na anaia ni waerake ma ngaia.”+