1 Tamuera
7 Mangaia are a a roko mwaaneni Kiriataearim ao a anaa ana Ati Iehova ni waerake nako nanon ana auti Abinataba+ i aon te tabuki, ao a katabua* natina are Ereata bwa e na kawakina ana Ati Iehova.
2 E a rangi ni maan te tai man te bong are e roko iai te Ati i Kiriataearim, bwa ai 20 te ririki, ao a a bane tibun Iteraera n ukoukora* Iehova.+ 3 E taku ngkanne Tamuera nakoia tibun Iteraera ni kabane: “Ngkana kam a okira Iehova ma nanomi ni kabane,+ ao kaaki atua aika ianena+ ao bouannantin nako Nei Atitoreta+ mai buakomi, ao kabanei nanomi nakon Iehova ao tooro irouna n tii ngaia,+ ao e na kamaiuingkami mai nanoni baia I-Biritia.”+ 4 Ao tibun Iteraera a kaakiia taiani Baara ma bouannantin nako Nei Atitoreta ao a toro iroun Iehova n tii ngaia.+
5 E taku ngkanne Tamuera: “Ikotiia tibun Iteraera ni kabane i Mitiba,+ ao N na tataro nakon Iehova ibukimi.”+ 6 Mangaia are a ikotaki i Mitiba, ao a itia te ran ao a kabwaroa i matan Iehova ao a aki mamatam n te bong anne.+ Ao a taku ikekei: “Ti a tia ni bure nakon Iehova.”+ Ao e a moana ana beku Tamuera bwa te tia motikitaeka+ i aoia tibun Iteraera i Mitiba.
7 Ngke a ongo I-Biritia ae a ikotaki tibun Iteraera i Mitiba, ao a waerake aia toka I-Biritia+ n ekiianako tibun Iteraera. Ngke a ongo taekan aei tibun Iteraera ao a a maakuia I-Biritia. 8 Mangaia are a taku tibun Iteraera nakon Tamuera: “Tai katoka wetean Iehova ae Atuara bwa e na buokira+ ao ni kamaiuira mai nanoni baia I-Biritia.” 9 E anaa ngkanne te tiibutetei ae mamma Tamuera ao e kareanna bwa te karea ni kabuekaki ae bwanin+ nakon Iehova, ao Tamuera e wetea Iehova ibukin te ibuobuoki nakoia tibun Iteraera, ao Iehova e kaekaa teuaei.+ 10 Ngke e anga te karea ni kabuekaki Tamuera, ao a kekerake I-Biritia bwa a na buakania tibun Iteraera. E a karebwea ngkai te baa Iehova ae rangi ni karongoa+ n te bong anne n ekiianako iai I-Biritia ao E karokoa te mangaongao i aoia,+ ao a a konaaki i mataia tibun Iteraera.+ 11 Ao a otinako mwaane ake tibun Iteraera mai Mitiba ao a kakioia I-Biritia, ao a oreiia ni karokoa maiakini Betaka. 12 E anaa ngkanne te atibu Tamuera+ ao e kateia i marenani Mitiba ma Ietana ao e aranna bwa Ebenetera,* bwa e kangai: “E buokira Iehova ni karokoa ngkai.”+ 13 Mangaia are a a konaaki I-Biritia, ao a aikoa manga roko n aonon Iteraera,+ ao e teimatoa bain Iehova n ekiianako I-Biritia n ana bong Tamuera ni kabane.+ 14 Ao a a okiriia naba tibun Iteraera kaawa ake a anai ngkoa I-Biritia mairouia tibun Iteraera, mai Ekiron nako Kate, ao tibun Iteraera a a manga kaoki aia aono mai nanoni baia I-Biritia.
E a reke naba te rau i marenaia tibun Iteraera ma taian Amoraite.+
15 E teimatoa Tamuera ni motiki taekaia tibun Iteraera i nanoni maiuna ni kabane.+ 16 E mwamwananga teuaei ni katoa ririki n okiokira Betaera,+ Kirekara,+ ao Mitiba,+ ao e momotiki taekaia tibun Iteraera n taabo aikai ni kabane. 17 Ma e okioki nako Rama+ ibukina bwa e mena ana auti ikekei, ao e momotiki naba taekaia tibun Iteraera ikekei. E katea te baonikarea ikekei nakon Iehova.+