1 Tamuera
11 Ao e waerake Naati ae tibun Ammon+ ao e kaembwa ni kaitaraa Iabeti+ i Kireata. A taku mwaanen Iabeti ni kabane nakon Naati: “Karaoa te berita* ma ngaira ao ti na toro iroum.” 2 E taku Naati are tibun Ammon nakoia: “N na karaoia ma ngkami, tii n te aro aei: ae a na bane n autaki kanoani matami ane te angaatai. N na karaoa aei ni kabwainrangia iai tibun Iteraera ni kabane.” 3 Ao a kaekaa unimwaanen Iabeti ni kangai: “Anganira ara tai ae itibong, bwa ti aonga ni kanakoia taan uataeka nakon aonon nako Iteraera. Ao ngkana akea ae e na kamaiuira, ao ti na taenikai nakoim.” 4 Imwina riki ao a a roko taan uataeka i Kibea+ are ana kaawa Tauro, ao a taekin taeka aikai nakoia aomata, ao a a kabanei takaruaia aomata n tang.
5 Ma e a oki Tauro man te tawaana ao e ririmwin te nanai, ao e taku Tauro: “Tera ae riki irouia aomata? E aera ngkai a a tang?” Mangaia are a a karakin nakoina aia taeka mwaanen Iabeti akekei. 6 Ao taamnein te Atua e kakorakoraa Tauro+ ngke e ongo taeka aikai, ao e a rangi n un. 7 Mangaia are e anaiia kaao mwaane aika uoman ao e korokorei, ao e kanakoi baikai nakon aonon nako Iteraera ni baia taan uataeka, ao a kangai: “Ane e aki ira Tauro ao Tamuera ao e na kantaningaia bwa e na karaoaki aei nakoia ana kao!” Ao a bwakaraki aomata ni maakakin Iehova mangaia are a a nanoteuana* n otinako. 8 Ao e warekiia i Beteka, ao iai 300,000 mwaitiia tibun Iteraera, ao 30,000 mwaitiia mwaane aika tibun Iuta. 9 Ao a taku nakoia taan uataeka ake a roko: “Aio te bwai ae kam riai n taekinna nakoia mwaanen Iabeti i Kireata, ‘Kam na kamaiuaki ningabong ngkana e a riringa taai.’” Ao a roko taan uataeka ao a tuangia mwaanen Iabeti, ao a rangi ni kimwareirei. 10 Mangaia are a taku mwaanen Iabeti: “Ningabong ao ti na taenikai nakoimi, ao kam kona ni karaoa nakoira ane kam taku bwa e raoiroi iroumi.”+
11 N te bong are imwina ao e a bwenauaia aomata nakon tenikoraki Tauro, ao a a mwananga nako nukan te kaembwa n te tai n tei n tantani n te ingabong,* ao a kamateia tibun Ammon+ ni karokoa ae e a korakora te riringa. A maeinikun ake a reke maiuia n te aro ae akea i buakoia ae tiku ni kaka uoman. 12 Ao a taku aomata nakon Tamuera: “Antai ngkoa ake a kangai, ‘E na uea Tauro i aora?’+ Kanakomaiia mwaane akanne ao ti na kamateia.” 13 Ma e taku Tauro: “Akea te aomata ae e na kamateaki n te bong aei,+ bwa e kamaiuia tibun Iteraera Iehova n te bong aei.”
14 Imwina riki ao e taku Tamuera nakoia aomata: “Nakomai ao ti na nako Kirekara+ bwa ti na manga kamatoaa riki te nakoa n uea.”+ 15 Mangaia are a a bane n nako Kirekara aomata, ao a kaueaa Tauro i Kirekara i matan Iehova. Imwina ao a anga taiani karea n raoi ikekei i matan Iehova,+ ao a bukamaru ma te kimwareirei ae bati Tauro ma mwaane ni kabane aika tibun Iteraera.+