2 Tamuera

4 Ngke e a ongo natin Tauro are Itiboteta*+ ae e a mate Abenera i Eberon,+ ao e a kerikaaki ninikoriana* ao a a bane n aki rau tibun Iteraera. 2 Ao iai mwaane aika uoman aika mataniwi i aoia taani kuribwai ake ana aomata natin Tauro, ao aran temanna Banaa ao are temanna Rekaba. Naakai bon natin Rimmon are te I-Beerota, man te baronga are Beniamin. (E araranaki naba Beerota+ bwa mwakoron abani Beniamin ngkoa. 3 A birinako I-Beerota nako Kitaim,+ ao a maeka n iruwa ikekei ni karokoa te bong aei.)

4 Ao Ionatan+ are natin Tauro iai natina te mwaane ae a mwauku waena.+ Bon nimaua ana ririki ngke e roko te rongorongo mai Ietireera+ ibukin Tauro ma Ionatan, ao e tabekia te tia tobwaia ao e birinako, ma ngke e takaka neiei ni birinako, ao e a bwaka naba te teei aei ao e a mwauku. Arana boni Mebiboteta.+

5 Ao natin Rimmon are te I-Beerota ake Rekaba ma Banaa, a nakon ana auti Itiboteta n taini kabuebuen te ngaina anne, ngke e tabe teuaei ni motika rawana n te tawanou. 6 A rinnako n te auti bwa aongkoa a na anaa te uita, ao a a ewara naba birotona, ao imwina e a rabanako Rekaba ma tarina are Banaa.+ 7 Ngke a rin n te auti, ao e wene teuaei i aoni nnena ni wene n ana ruu ni matu, ao a a ewaria naba ni kamatea, ao imwina a kabakua roroana. Ao a anaa atuna ao a riannanako ni kangainaa i nanon te kawai nakon te Arabaa.* 8 Ao a uota atun Itiboteta+ nakon Tawita i Eberon ao a taku nakon te uea: “Ao aei atun Itiboteta are natin Tauro are te tia kairiribai nakoim+ are e kani kamateko.+ E a tia Iehova ni karaoa te irantanga ni karekekai i aon Tauro ma kanoana nakon au toka ae te uea n te bong aei.”

9 Ma Tawita e kaekaa Rekaba ma tarina are Banaa, ake natin Rimmon are te I-Beerota, ao e taku nakoia: “Ngkai bon iai Iehova, are teuare kamaiuai man taiani karawawata ni kabane,+ 10 ao ngke e kaongoai ngkoa temanna ni kangai, ‘Akea bwa e a mate Tauro,’+ ao n ana iango e uota te rongorongo ae kakukurei nakoiu, ma I taua ao ni kamatea+ i Tikeraka. Anne kaniwangan te tia uataeka arei ae e karekea mairou! 11 Ao ai batira riki ae e na reke irouia mwaane aika buakaka aika kamatea te aomata ae raoiroi n oin ana auti i aoni nnena ni wene! Tiaki I riai n anaa boon raraana mai baimi,+ ma ni kamaunaingkami mai aon te aba?” 12 Ao e tua Tawita nakoia rorobuaka n ataei bwa a na kamateia naakai.+ A koreinako baia ma waeia ao a tauriia+ i rarikin te nei i Eberon. Ma a anaa atun Itiboteta ao a taunna ni nneni kawenean Abenera i Eberon.