Te Minita
4 I a manga rairaki riki nakoni mwakuri ni kabane aika karawawata aika waakinako i aan taai. I nori rannimataia akana karawawataaki, ao akea temanna ae e na kabebeteia.+ Iai mwaakaia taani karawawataia, ao akea temanna ae e na kabebeteia. 2 Ao I ataia bwa a kabwaia riki akana kamani mate nakoia akana maiu aika a tuai ni mate.+ 3 Ao ae e kabwaia riki nakoia koraki aikai bon te aomata ae tuai ni bungiaki,+ ae e tuai n nori mwakuri aika karawawata aika karaoaki i aan taai.+
4 I a tia n nora te kakorakora* ae bati ao te mwakuri n te aro n rabakau bwa e reke man te kaiangatoa i marenaia aomata.+ Bon akea naba manenan te baei, boni kaean te ang.
5 E botii baina te aomata ae nanobaba ao e karokoa te kabuanibwai bon nakoina.*+
6 E raoiroi riki te motirawa ae uarereke* nakon te mwakuri korakora ae bati* ao kaean te ang.+
7 I rairaki nakon te katoto riki teuana ibukin te bwai ae akea manenana i aan taai: 8 Iai te aomata ae akea raona. Akea natina te mwaane ke tarina, ma bon akea tokin ana mwakuri korakora ni kabane. A aki kona n rauaki matana n te kaubwai.+ Ma e titirakinna i bon irouna ni kangai, ‘Antai ae I mwakuri korakora ibukina ao ae I taui baika raraoi mairou ibukina’?+ Bon akea naba manenan te baei, ao bon te mwakuri ae karawawata.+
9 A raoiroi riki uoman nakon temanna,+ ibukina bwa iai kaniwangaia* ae raoiroi ibukin aia mwakuri korakora. 10 Bwa ngkana e bwaka temanna irouia, ao e kona are temanna ni buoka raona ni kateirakea. Ma tera ae e na riki nakon te aomata ae bwaka ao akea ae e na buokia ni kateirakea?
11 Irarikin anne, ngkana a uaia ni wene aomata aika uoman, ao a na abue, ma e na kangaa n abue ae tii temanna? 12 Ao e kona te aomata n tokanikai i aon ae tii temanna, ma a kona aika uoman n tei ni kaitaraa te aomata anne. Ao e aki waekoa ni* moti te karai ae te nano tennai.
13 E raoiroi riki te teei ae maiu ni kainnano ma e wanawana, nakon te uea ae e a kara ma e nanobaba,+ ae e a aki tau wanawanana ni kona ni mutiakina te kauring.+ 14 Bwa e* otinako man te karabuuti bwa e na riki bwa te uea,+ e ngae ngke e bungiaki bwa te aomata ae maiu ni kainnano i aan te tautaeka anne.+ 15 I iangoiia te koraki nako aika maiu aika ririaki i aan taai, n ikotaki naba ma aron te tia onomwi ae ataei ae teirake n onea mwin are temanna. 16 E ngae ngkai a bane ni boutokaia aomata, ma ane a na aki kukurei irouna te koraki ake a kaoti rimwi.+ Bon akea naba bongan te baei, boni kaean te ang.