2 I-Korinto
3 Iai kainnanoan ae ti na manga moani kaotiira bwa antai ngaira nakoimi? Ke tao ti kainnanoi reeta ibukini kakoauaani mwiokoara nakoimi ke mairoumi, n aroia tabeman? 2 Bon ara reta ngkami+ ae koreaki i nanora, ae ataaki ma ni warekaki irouia aomata ni kabane. 3 Bwa kam kaotaki bwa ana reta Kristo ngkami ae koreaki iroura, ngaira aika minita.+ E aki koreaki n te ingke, ma n taamnein te Atua ae maiu, ao e aki koreaki i aoni baaba+ aika atibu ni koaua, ma i aoia atibu aika aomata, ae i aon nanoia+ aomata.
4 Iai iroura te aeka n aki nanokokoraki aei ni kaineti ma te Atua, rinanon te Kristo. 5 Tiaki nanona bwa ti tau nako iai ibukini baike ti karaoi, ke tao man oini korakorara, ma e nako katauara mairoun te Atua,+ 6 are ngaia are e boni katauira bwa minita n te berita ae boou,+ ae tiaki n te tua are koreaki,+ ma n te taamnei, bwa e karekea te mate+ te tua are koreaki, ma e anga te maiu te taamnei.+
7 Ngkana e irianaki reken te Tua n te mimitong, are te Tua are e karekea te mate ao are e kaaraki ni kataneaki ni manin te koroboki i aon taian atibu,+ n te aro are a aikoa kona tibun Iteraera ni karekea taraan ubuni Mote ibukin raneanean ubuna,+ ae te mimitong ae e na mauna, 8 ao tiaki e riai ni mimitong riki+ are e karekeaki n te taamnei?+ 9 Bwa ngkana e mimitong+ te Tua are karekea te kabuakakaaki,+ ao ai batira riki mimitongin are e karekeaki n te raoiroi!+ 10 Ni koauana, e a tia n anaaki mimitongin are e kamimitongaki ngkoa, ibukin te mimitong ae tamaroa riki nakoina.+ 11 Bwa ngkana e kamaunaaki are e karekeaki n te mimitong+ ngkoa, ao ai batira riki mimitongin are e tiku!+
12 Kioina ngkai iai iroura te kantaninga+ anne, ao ti a taetae n aki maaku naba teutana, 13 ao ti aki karaoa aroni Mote ngke e rabuna ubuna+ n te rabuna ni mata, bwa a aonga n aki taraa tokin te baere e na kamaunaaki tibun Iteraera. 14 Ma e a manga aki ota aia iango.+ Bwa e tiku te rabuna ni mata anne n aki ietaki ni karokoa te bong aei ni warekan te berita nikawai,+ ibukina bwa e kamaunaaki rinanoni Kristo.+ 15 Ni koauana, ngkana e warekaki ana koroboki Mote,+ ao e mena te rabuna ni mata i aon nanoia, ni karokoa te bong aei.+ 16 Ma e na uotakinako te rabuna ni mata ngkana e rairaki temanna nakon Iehova.*+ 17 Ma bon te Taamnei Iehova,*+ ao ike e mena iai taamnein Iehova* ao iai te inaomata+ iai. 18 Ao ngaira ni kabane ake akea rabunan ubura ake ti tabe ni kaotiota mimitongin Iehova* n aron te tirotaam, ti onikaki nakoni katotongana man te mimitong teuana nakon teuana, n aron are e karaoira iai Iehova* ae te Taamnei.*+