Iobi
2 Ko kona ni karina te roobu* ni bwangabwangani bwairina,
Ke n ewara mwangaina n te matau?
3 E na kabatiaa ana onnon nakoim,
Ke e na taetae ma te aamarau nakoim?
4 E na karaoa ana berita ma ngkoe,
Bwa ko aonga ni karikia bwa am toro n uaa tokini maiuna?
5 Ko na takaakaro ma ngaia n aron ae kaanga te mannikiba?
Ke ko na kabaea roona bwa a na takaakaro ma ngaia natim aine?
6 A na iokinibwai iai taani boobwai?
A na tibwatibwaia i marenaia taan iokinibwai?
8 Kaaki baim i aona,
Ao ane ko na uringa te buaka, ao ko na aki manga karaoia!
9 Bon akea manenan iangoan te tokanikai i aona,
E a taonikonako* naba tii taraana.
10 Akea temanna ae ninikoria ni kaunna,
Mangaia are antai ae kona n tei ni kaitaraai?+
11 Antai ae e a tia n anganai moa te bwai teuana, ae e riai bwa N na anganna booni mwina?+
Au bwai bwaai ni kabane aika i aani karawa.+
12 N na aki kainabwabu ibukini baina ma waena,
Ke ibukini korakorana ma rabwatana ae kateaki raoi.
13 Antai ae e a tia ni kanakoa rabunan aona?
Antai ae e na rin i nanoni wina ae uki?
14 Antai ae kona ni kauki ma te matoa mataroani wina?*
A kakamaaku wina.
15 A rinan rikaaki inana i nukana,*
Aika a kamatoaaki ni kanimwaki ni kabane.
16 A itenatena,
N te aro ae akea naba te ea n rin i marenaia.
17 E toma teuana ma teuana,
Ao a bane n nim ma n aki kona ni kamaenakoaki.
18 Ringongona e kaotinakoa te oota,
Ao matana ai aron ootan tabwenani mainiku.
19 E otinako itiruan te iti mai nanoni wina,
Ao a kibakibanako taian taukaro n ai.
20 E otinako te bubu mani bwangabwangani bwairina,
Kaanga ai aroni nnen te ai ae kanaaki n taian uteute.
21 E kaurai taiani mwaakaro n ikeikena,
Ao e otinako te ai mai nanoni wina.
22 E rangi ni korakora roroana,
Ao e biribiri te maaku imwaina.
23 A bane n nim kunin birotona,
Ao a aki kona ni koutaki, kaanga ai aron te biti.
24 E matoatoa buroona n ai aron te atibu,
Eng, e matoatoa n ai aron te atibu ni kamantinti.*
25 Ngkana e teirake, ao a maakunrang naba aomata aika korakora,
Ao e karika te buannano ngkana e kakammwakuri.
26 Akea te kabaang ae oreia ae e na tokanikai,
Ke te kainiwai, te kai ni kareteke, ke kanoan te kainikatebe.+
27 E taraa te biti bwa te uteute ae mwau,
Ao te buraati bwa te kai ae mka.
28 E aki kona kanoan te kainikatebe ni kabirinakoa,
Ao a bitaki taiani bana nakon uteute aika mwau ngkana a bakarereia.
29 E taraa te kai n oro bwa te uteute ae mwau,
Ao e ngareakina kekeruaatain te koro.
30 Titeboo aana ma maibibi ni kaatibu aika kakang,
Ao e aroria n te bokaboka, kaanga te kaa ni kaaki kun ni uita ae katikitikaki.+
31 E kaburoa marawa n ai aron te ran i nanon te bwaata,
Ao e kamarebua taari* n ai aron te kabira i nanon te bwaata.
32 A raneanea naoni kawaina imwina.
Ao e na iangoia temanna bwa e iaia irani marawa.
33 Akea n ai arona n te aonnaba,
Bon te man ae karikaki bwa e na akea maakuna.
34 E kamwataua taraaia maan aika kainikatonga ni kabane,
Ao e uea i aoia maan aika tiritiri aika totoa.”