Iobi
40 E reita ana kaeka Iehova nakon Iobi ni kangai:
2 “E riai te aomata n tiriburea Teuare Moan te Mwaaka ao ni kaitaraa?+
Ke e kaeka ane e kani boaa te Atua.”+
3 E kaeka Iobi nakon Iehova ni kangai:
4 “Noria! I aki tau.+
Tera ae I kona ni kaekako iai?
I kaaki baiu i aoni wiu.+
5 I a tia n taetae n te moantai, ma N na aki manga kaeka,
Ao n te kauatai, ma akea te bae N na manga taekinna.”
6 Ao Iehova e kaekaa Iobi man te angibuaka+ ni kangai:
7 “Katauraoiko taiaoka n aron te mwaane,
N na titirakiniko ao ko na tuangai.+
8 Ko na nanououa n* au kaetitaeka ae riai?
Ko na kabuakakaai bwa ko aonga n eti?+
9 Iai baim ae mwaaka n aroni bain te Atua ae koaua,+
Ke e kona bwanaam n rebwe n aron te baa n ai aroni bwanaana?+
10 Katamaroako taiaoka n te neboaki ma te mimitong,
Kunnikaiko n te karineaki ma te tamaroa.
11 Kaotinakoa unim ae korakora,
Ao taraiia aomata nako aika kainikatonga ao karinanoia.
12 Taraiia aomata nako aika kainikatonga ao kananorinanoia,
Ao toutouia akana buakaka n te tabo are a tei iai.
13 Karabaia ni kabane n te tano,
Ao kabaeia* n te tabo ae raba,
14 Ao ngai naba N na kaotia nakoim,*
Bwa e kona ni kamaiuko baim are te atai.
15 Taraa ngkai te ibobatemati,* ae I karaoia n aron ae I karaoiko naba.
E kaakang uteute n aron te kao mwaane.
16 Taraa te korakora are ni bebeena,
Ao te korakora are ni mwatiretini birotona!
17 E katika bukina ao e tiki n ai aron te kai ae te tiira,
A ikotaki n rarangaaki tenton* ake ni boton rangana.
18 Riina kaanga bwaibu aika taiani buraati,
Ao baina ma waena ai aroni kaai aika karaoaki man te biti.
19 E moanibaa* i buakoni bwaai ake e karaoi te Atua,
Ao bon tii te tia Karaoia ae kona ni kaania ma ana kabaang.
20 Bwa a kakarekei kanana taiani maunga,
Ike a tatakaakaro iai maan ni kabane aika moaanti.
21 E wene i aan aroka aika kateketeke,
Ni katanna i aani maunei aika mena n te neinei.
22 A anga nuuia aroka aika kateketeke nako aona,
Ao a otabwaninia aroka aika taiani bobura aika maiu i rarikin te karaanga.*
23 Ngkana e buaka te karaanga, ao e aki nako nanona.
E aki bwerengaki e ngae ngke e a raanga te Ioretan+ nakon ubuna.
24 Iai te aomata ae kona n raweia ngkana e bon taratara?
Ke n ewara bwairina n te matau?*