Itaia
41 “Ongora irou ma te kainabwabu,* ngkami aika abamwakoro.
Ke e a manga oki korakoraia natannaomata.
Ke a keerake ao ke a taetae.+
Ti na ikotaki n roko ibukin te motikitaeka.
2 Antai ae e a tia ni kateirakea temanna man otin taai,*+
Ae e weteia n te raoiroi nakoni Waena*
Bwa e na anga natannaomata nakoina
Ao e na karaoia bwa e na kataenikaiia ueea?+
Antai ae karikiia bwa bubun te tano imwain ana kabaang,
N aron te uteute ae mwau ae ukakinako n te ang imwain ana kainikatebe?
3 E kaeiia ao e mwananga n aki tutukaki
I nanoni kawai aika a tuai man totoui waena.
4 Antai ae mwakuri ao ni karaoa aei,
Ae e weteiia rooro ake man te moantai?
5 A a tia n nora aei abamwakoro ao a maaku.
A a mwaeiei tabon aonnaba.
A keerake ao a kanenei.
6 E buoka raona temanna ma temanna
Ao e taku nakon tarina: “Ko na korakora.”
7 Ai ngaia are te tia karaobwai ae mwaatai e kakorakoraa te tia mwakuria te biti.+
Ao teuare te tia ororei bwaai ni kaborababaui n te aama
E kakorakoraa te tia ororei bwaai i aon te nangoa.
E taekina ae kangai ni kaineti ma te tomabiti: “E raoiroi.”
Ao e a kanimwaki n taian neera bwa e aonga n aki bwaka.
8 “Ma bon au toro ngkoe ae Iteraera,+
Ao boni ngkoe ae I rineiko Iakoba,+
Ae kanoan* Aberaam are raoraou,+
9 Boni ngkoe are I anaiko mai tabon nako aonnaba,+
Ao boni ngkoe are I weteiko man taabo ake taiani kabanea n raroa ake iai.
I taku nakoim, ‘Bon au toro ngkoe.+
I rineiko ao I aki kaaki taekam.+
10 Tai maaku bwa I memena iroum.+
Tai raraoma bwa bon Atuam ngai.+
N na kakorakorako, eng, N na buokiko.+
N na boni boutokaiko raoi ni baiu ae te atai ae raoiroi.’
11 Noria! A na bane ni kamaamaeaki ao ni bwaibwainrang te koraki ake a urarake unia iroum.+
A na kamaunaaki te koraki ake a un ma ngkoe ao a na mate.+
12 Ane ko na kakaaeia mwaane aika boo n un ma ngkoe, ma a na aki reke iroum.
A na riki bwa kaanga te bwai ae tuai n riki mwaane ake a buaka ma ngkoe, kaanga te bwai ae bon akea naba teutana.+
13 Bwa I rawea baim ae te atai ngai ae Iehova ae Atuam,
Are Teuare kangai nakoim, ‘Tai maaku. N na buokiko.’+
14 Tai maaku ngkoe ae te mwata* ae Iakoba,+
Ngkami aika mwaane aika tibun Iteraera, N na boni buokingkami,” bon ana taeka Iehova ae te tia Manga Kabooko,+ are Teuare Tabu iroun Iteraera.
15 “Noria! I karaoa ibukim te kaa ni kaaki kun ni uita ae katikitikaki,+
Ae te bwai ni mwakuri ae boou ae te bwai ni kaaki kun ni uita ae uaitera wina.
Ane ko na toutoui maunga ao ni kamanatuai,
Ao ni karikii tabuki bwa kaanga kunin te uita.
16 Ane ko na kaaki kunia
Ao e na ukiianako te ang,
Ao e na kamaenakoia te angibuaka.
17 “A ukoukora te ran akana kainnano ao akana maiu ni kainnano, ma bon akea.
E a bwatakataka neweia ibukin te taka.+
N na kaekaia ngai ae Iehova.+
N na aki kitania ngai ae Atuan Iteraera.+
18 N na karaangai karaanga n taian tabuki aika akea aroka iai,+
Ao koburake n ran n taabo aika aoraoi.+
N na onika te rereua nakon te nei ni maunei ae mena iai te ran,
Ao te aba ae akea te ran iai nakon taiani koburake n ran.+
19 N na unika te kai ae te tiira n te rereua,
Te kai ae te aketia, te aroka ae te motere, ma te aroka ae te bwaain.+
N na unika te kai ae te mwaiango n te rereua ae aoraoi
N ikotaki ma te aroka ae te bureen* ao te aroka ae te teatura,+
20 Bwa a aonga ni bane n noria aomata ma n ataia,
Ao ni kakauongo ma n oota,
Bwa e karaoa te baei bain Iehova,
Ao e karikia+ Teuare Tabu iroun Iteraera.”
21 “Tabeka ami tangitang,” bon ana taeka Iehova.
“Tabeki ami kauntaeka,” bon ana taeka ana Uea Iakoba.
22 “Karekea te bwai ni kakoaua ao tuangira baika a na riki.
Ke taekin nakoira baika a tabe n roko.+
23 Tuangira te bwai ae e na riki n te tai ae e na roko,
Bwa ti aonga n ataia ae bon atua ngkami.+
Eng, karaoa te bwai teuana, ae raoiroi ke ae buakaka,
Bwa ti aonga ni kubanrou iai ngkana ti noria.+
24 Noria! Bon te bwai ae tuai n riki ngkami,
Ao bon akea uaani baika kam karaoi.+
E riribaaki ane e rineingkami.+
25 I a tia ni kateirakea temanna mai meang ao ane e na roko,+
E na toutouia taan tautaeka* n aron ae kaanga bokaboka ngaiia,+
N aron te tia karaomwangko ae toutoua te bokaboka ae aomwaimwai.
26 Antai are karakina te baei man te moantai bwa ti aonga n ataia,
Ke man taai aika bwakanako bwa ti aonga ni kangai, ‘E eti teuanne’?+
Ni koauana bon akea ae e katanoataa!
Akea ae e taekinna!
Akea temanna ae ongo te bwai teuana mairoumi!”+
27 Boni ngai ae I moani kangai nakon Tion: “Noria! Ao aikai baikai!”+
Ao N na kanakoa te tia uota te rongorongo ae raoiroi nako Ierutarem.+
28 Ma I teimatoa n taratara, ao akea te aomata temanna.
Bon akea naba temanna i buakoia ae e na anga te taeka n reirei.
Ao I teimatoa n titirakinia bwa a na kaeka.
29 Noria! Boni baika kewe* ngaiia ni kabane.
Akea uaan aia mwakuri.