Iobi
5 “Wewete taiaoka! Iai ae e kaekako?
Antai i buakoia akana itiaki* ae ko na rairaki nakoia?
2 Bwa e na tiringa ane e nanobaba te marakinnano,
Ao e na kamateia akana ronnano te bakantang.
3 I a tia n nora ane e nanobaba bwa e ribu wakaana,
Ma e rina ni kamaraiaaki ana tabo ni maeka.
4 E raroanako kamanoaia natina,
Ao a kamanatuaaki ni mataroan oon te kaawa+ ao akea ae e kamaiuia.
5 E kana ae e taia te aomata ae baki,
E anaia naba mai buakon aroka aika kateketeke,
Ao a kai kabwaruaki aia bwai irouia taani kamwane.
6 Bwa a aki bwebwerake man te tano baika karuanikai,
Ao e aki rikirake mai aontano te kangaanga.
7 A boni bae ni kibakibarake mwaakaron te ai ae ura,
Ao ai aron naba maiun te aomata bwa e na onrake n te kangaanga.
8 Ma N na bubutiia te Atua,
Ao N na kabaea tangiu ae e na tabeakinna te Atua,
9 Are Teuare karaoi baika rangi ni kakawaki ma ni kangaanga ukeraia,
Aika baika kamimi aika aki kona ni warekaki.
10 E kabwakaa te karau n te aonnaba
Ao e karokoa te ran n taian tawaana.
11 E karietataia aika mangori,
Ao e karietataia aika rawawata nakon te kamaiuaki.
12 E kamangaoi aia babaire akana nanowanawana,
Bwa e aonga ni matebuaka aia mwakuri baia.
13 E kamwaneia akana wanawana n oin aia bwai ni kamwane,+
Ngaia are e a tokobitoaki aia babaire akana nanowanawana.
14 E ngaina ma a otabwaniniaki n te rotongitong,
Ao a riki n ai aroia aomata aika kua ni kakaaea aia bwai n te rotongitong ma e aki reke.
15 E kamaiuia aomata man te kabaang are otinako mai wia ake a nanowanawana,
E kamaiuia aika maiu ni kainnano mai nanoni baia akana korakora,
16 Mangaia are iai te kantaninga ibukia aika mangori,
Ma a in wia aomata aika aki raoiroi.
17 Noria! E a kukurei te aomata ae e boaia te Atua.
Ngaia are tai rawa nakon ana reirei ni kaetieti Teuare Moan te Mwaaka!
18 Bwa e kammarakiia aomata, ma e a manga bautii ikoakia.
E kaikoakiia aomata, ma e a manga kamarurungia n oini baina.
19 E na kamaiuko mani kabuanibwai aika onoua,
Ao ko na aki naba rotakibuaka n te kaitiua.
20 E na manga kabooko man te mate n tain te rongo,
Ao mani mwaakan te kabaang n tain te buaka.
21 Ko na kamanoaki man te newe ae ai aron te kai ni kataere,+
Ao ko na aki maaka te kabuanibwai ngkana e roko.
22 Ko na ngare n te kabuanibwai ao n te matenibaki,
Ao ko na aki maakuia manin te aonnaba aika kaakang.
23 Bwa ko na aki ruanikai n* atibun te tawaana,
Ao a na maeka n rau ma ngkoe manin te tawaana aika moaanti.
24 Ko na ataia bwa e boni mano raoi* am umwanrianna,
Ao akea te bwai ae e na bua ngkana ko tuoa am tawaana.
25 Ane ko na karikiia natim aika bati,
Ao e na mwaiti kanoam n ai aron uteuten aontano.
26 Ko na teimatoa ni korakora ni karokoa matem,
N aron taiani bwabwati ni uita* aika tawaa aika taiaki n taia ae riai.
27 Noria! Ti a tia n neneria, ao boni ngaia.
Ongora ao butimwaeia.”