NAKOAIA IBONGA

1 Ao Iehova e wetea Mote ao e taetae nakoina man te umwa ni botaki+ ni kangai: 2 “Taetae nakoia tibun Iteraera, ao tuangia ni kangai: ‘Ngkana e na anga te karea te aomata temanna mai buakomi nakon Iehova mai buakon te nanai ni man, ao kam riai n anga ami karea mai buakon taiani kao, tiibu, ao kooti.+

3 “‘Ngkana e na anga ana karea ae te karea ni kabuekaki man te nanai, e riai n anga te man ae te mwaane ae marurung raoi.+ E riai n anga ma nanona ni kan anga+ i matan Iehova i rarikini mataroan te umwa ni botaki. 4 E na katokaa baina i aon atun te man are te karea ni kabuekaki, ao e na butimwaeaki te karea ibukini karekeani kabwaraan ana bure.

5 “‘Ao e riai ni kamateaki te kao mwaane ae ataei i matan Iehova, ao a na anga raraana natin Aaron aika mwaane, ake ibonga,*+ ao a na katimtimmwa i aon rarikin te baonikarea ni kabutaa,+ ae mena i rarikini mataroan te umwa ni botaki. 6 E riai ni kuotaki kunin te karea ni kabuekaki anne ma ni korokoreaki.+ 7 A na uota te ai nakon te baonikarea+ natin Aaron aika mwaane, ake ibonga, ao a na bairei taian aia i aon te ai. 8 Ao natin Aaron aika mwaane, ake ibonga, a na bairei mwakorokoron te karea+ ma matanriana ao mwaeteni kirinena i aon te aia are i aon te ai, are mena i aon te baonikarea. 9 A na tebokaki kanoannanona ma waena* n te ran, ao e na kabanei ni kabueki ni kabubui te ibonga i aon te baonikarea bwa te karea ni kabuekaki ae kareanaki n te ai, ae te boi ae boiarara* iroun Iehova.+

10 “‘Ngkana e na anga ana karea ae te karea ni kabuekaki man te nanai+ mai buakoia tiibu mwaane aika ataei ke kooti, e riai n anga te man ae te mwaane ae marurung raoi.+ 11 E na kamateaki i meangin te baonikarea i matan Iehova, ao a na katimtimwa raraana natin Aaron aika mwaane, ake ibonga, i aon rarikin te baonikarea ni kabutaa.+ 12 E na korokoreaki rabwatana iroun te ibonga n ikotaki ma matanriana ao mwaeteni kirinena, ao e na bairei i aon te aia are i aon te ai, are mena i aon te baonikarea. 13 E na teboki kanoannanona ma waena n te ran, ao e na kabanei n anga te ibonga ma ni kabueki ni kabubui i aon te baonikarea. Bon te karea ni kabuekaki ae kareanaki n te ai te baei, ae te boi ae boiarara* iroun Iehova.

14 “‘Ma ngkana e na anga mannikiba bwa te karea ni kabuekaki nakon Iehova, ao e na anga ana karea mai buakoia taobe ke bitin aika ataei.+ 15 E na anga te mannikiba te ibonga i aon te baonikarea ao e na kinika roroana ni kanakoa* ao e na kabuekia ni kabubua i aon te baonikarea, ma e riai ni kawawaeaanako raraana i aon oon rarikin te baonikarea. 16 E riai ni kouta nneni kanana are i buuana ma buraena ma ni karenakoi i rarikin te baonikarea i mainikuna, ni nnen te mannang.*+ 17 E na bwenaia mai baina ni kiba ma e na aki kamaenakoa rabwatana nakon uoua. Ao e na kabuekia ni kabubua te ibonga i aon te baonikarea i aon te aia are i aon te ai. Bon te karea ni kabuekaki ae kareanaki n te ai te baei, ae te boi ae boiarara* iroun Iehova.

2 “‘Ngkana e anga te karea te aomata*+ nakon Iehova, ae te karea ae te amwarake,* e riai ni kareana te burawa ae mte, ao e riai ni kabwaroa te oera i aona ao e na kaaki te ribano* i aona.+ 2 Ao e na uotia nakoia natin Aaron aika mwaane, ake ibonga,* ao te ibonga e na abuta mai iai te burawa ae mte ma te oera, ma ribano ni kabane ake iai, ao e na kabueki ni kabubui+ i aon te baonikarea bwa e na tei ibukin te karea anne ae kareanaki n te ai, ae te boi ae boiarara* iroun Iehova. 3 Bon tibwangan Aaron ma natina mwaane nikiran te karea ae te amwarake,+ ae te bwai ae moan te tabu+ mai buakoni karea ake a kareanaki n te ai nakon Iehova.

4 “‘Ngkana ko anga te karea ae te amwarake ae umunaki n te ai n umum, e riai ni karaoaki man te burawa ae mte, bwerena aika mronron aika aki karikaki aika renganaki ma te oera, ke bwerena aika mmani aika aki karikaki aika kabiraki aoia n te oera.+

5 “‘Ngkana ko anga am karea man te baan, ae te karea ae te amwarake,+ e riai ni karaoaki man te burawa ae aki karikaki ae mte ae renganaki ma te oera. 6 E riai n ototeaki, ao ko na kabwaroa te oera i aona.+ Bon te karea ae te amwarake te baei.

7 “‘Ngkana ko anga am karea ae te karea ae te amwarake ae katauraoaki n te baan, e riai ni karaoaki man te burawa ae mte ao te oera. 8 Ko riai n uota te karea ae te amwarake ae karaoaki mani baikai nakon Iehova, ao e na anganaki te ibonga are e na uotia nako rarikin te baonikarea. 9 Ao e na anaa teutana te karea ae te amwarake te ibonga bwa e na tei ibukin te karea anne,+ ao e na kabuekia ni kabubua i aon te baonikarea bwa te karea ae kareanaki n te ai ae te boi ae boiarara* iroun Iehova.+ 10 Bon tibwangan Aaron ma natina mwaane nikiran te karea ae te amwarake, ae te bwai ae moan te tabu mai buakoni karea ake a kareanaki n te ai nakon Iehova.+

11 “‘Kam na aki anga te amwarake ae renganaki ma te iiti bwa te karea nakon Iehova,+ bwa kam na aki kabueka te burawa ae karikaki* ke aia karewe manibeeru* ni kabubua bwa te karea ae kareanaki n te ai nakon Iehova.

12 “‘Kam kona n anga baikai nakon Iehova bwa te karea ae te moan uaa,+ ma kam na bon aki kabueki i aon te baonikarea bwa te boi ae boiarara.*

13 “‘Ko na taorona am karea ae te amwarake ni kabane n te taoro are kauringko taekan ana berita te Atua, ao tai kariaia bwa ko na aki taoronna. A na bane n taoronaki am karea ake ko anga.+

14 “‘Ngkana ko anga te karea ae te amwarake mai buakoni moan uaanikai aika tawaa nakon Iehova, ko riai n anga amwi ni uita* aika menaai aika umunaki n te ai ma koraaia aika manti, bwa te karea ae te amwarake mai buakoni moan am uaanikai aika tawaa.+ 15 Ko na kabiri n te oera ma ni kaaki te ribano i aoia. Bon te karea ae te amwarake te baei. 16 E na kabuekia ni kabubua te ibonga bwa e na tei ibukin te karea aei,+ ae taekan teutana te koraa ae manti ao te oera, n ikotaki ma ribano ni kabane ake iai, bwa te karea ae kareanaki n te ai nakon Iehova.

3 “‘Ngkana e na anga ana karea ae te karea n raoi,*+ ao ngkana e anaia mai buakon te nanai ae tao te mwaane ke te aine, e riai n anga te man ae marurung raoi i matan Iehova. 2 E na katokaa baina i aon atun te man are ana karea, ao e na kamateaki i rarikini mataroan te umwa ni botaki, ao a na katimtimwa raraana i aon rarikin te baonikarea ni kabutaa natin Aaron aika mwaane, ake ibonga.* 3 E na anga teutana te karea n raoi bwa te karea ae kareanaki n te ai nakon Iehova,+ ae te mwaete+ are rabuna te kanoannano, ake mwaete ni kabane ake a katobibia te kanoannano, 4 ao kirine ake uoua ma mwaete ake i aoia ake i rarikin te bebee. E na anaa naba te mwaete are i aon te ato n ikotaki ma taiani kirine.+ 5 A na kabueki ni kabubui baikanne ni kabane i aon te baonikarea natin Aaron aika mwaane, i aon te karea ni kabuekaki are katokaaki i aon te aia are i aon te ai,+ bon te karea ae kareanaki n te ai, ae te boi ae boiarara* iroun Iehova.+

6 “‘Ngkana e na anga ana karea ae te karea n raoi nakon Iehova man te nanai, e na anga te man ae te mwaane ke te aine ae marurung raoi.+ 7 Ngkana e anga te tiibu mwaane ae ataei bwa ana karea, ao e na anga i matan Iehova. 8 E na katokaa baina i aon atun te man are ana karea, ao e na kamateaki i moan te umwa ni botaki. A na katimtimwa raraana i aon rarikin te baonikarea ni kabutaa natin Aaron aika mwaane. 9 E na anga mwaeten te man are te karea n raoi bwa e na kareanaki n te ai nakon Iehova.+ E na anaa bukina ae te mwaete ni kabane are i rarikin riin nukana, ma te mwaete are rabuna te kanoannano, ake mwaete ni kabane ake a katobibia te kanoannano, 10 ao kirine ake uoua ma mwaete ake i aoia, ake i rarikin te bebee. E na anaa naba te mwaete are i aon te ato n ikotaki ma taiani kirine.+ 11 Ao e na kabueki ni kabubui baikanne ni kabane te ibonga i aon te baonikarea bwa te amwarake,* ae te karea ae kareanaki n te ai nakon Iehova.+

12 “‘Ngkana e na anga ana karea ae te kooti, ao e na anga i matan Iehova. 13 E na katokaa baina i aon atun te man, ao e na kamateaki i matan te umwa ni botaki, ao a riai ni katimtimwa raraana i aon rarikin te baonikarea ni kabutaa natin Aaron aika mwaane. 14 Baike e na anga bwa ana karea ae kareanaki n te ai nakon Iehova bon te mwaete are rabuna te kanoannano, ake mwaete ni kabane ake a katobibia te kanoannano,+ 15 ao kirine naba ake uoua ma mwaete ake i aoia, ake i rarikin te bebee. E na anaa naba te mwaete are i aon te ato n ikotaki ma taiani kirine. 16 E na kabueki ni kabubui baikanne ni kabane te ibonga i aon te baonikarea bwa te amwarake,* ae te karea ae kareanaki n te ai bwa te boi ae boiarara.* Ana bwai Iehova mwaete ni kabane.+

17 “‘Aio te tua ae teimatoa nakoia ami roro nako, n ami tabo ni maeka ni kabane: Kam na tai kana naba teutana te mwaete ke te raraa.’”+

4 E reitia ni kangai Iehova nakoni Mote: 2 “Tuangia tibun Iteraera ni kangai, ‘Ngkana e bure te aomata* n tiaki nanona+ n arona ni karaoa te bwai teuana ni baike e tua Iehova bwa a aki riai ni karaoaki, ao aio te bwai ae e na karaoaki:

3 “‘Ngkana e bure+ te ibonga* are kabiraki*+ ao e a karekeia aomata n te bure, ao e riai n anga te kao mwaane ae ataei ae marurung raoi nakon Iehova bwa te karea ni kabwarabure, ibukin te bure are e karaoia.+ 4 E na kaira te kao mwaane nako rarikini mataroan te umwa ni botaki+ i matan Iehova, ao e na katokaa baina i aon atun te kao mwaane, ao e na kamatea te kao mwaane i matan Iehova.+ 5 E na anaa ngkanne teutana raraan te kao mwaane te ibonga are kabiraki,+ ao e na uotia nako nanon te umwa ni botaki, 6 ao e na kateboa tabonibaina te ibonga n te raraa+ ao e na katimtimwa teutana te raraa anne itiua te tai+ i matan Iehova, i moan te keeten* n te tabo ae tabu. 7 E na anaa naba te raraa teutana te ibonga ni kabiri kooro ake ni baonikareani baika boiarara+ are mena i matan Iehova n te umwa ni botaki, ao e na kabwaroa ni kabane nikiran raraan te kao mwaane i oini baonikarean te karea ni kabuekaki,+ are mena i rarikini mataroan te umwa ni botaki.

8 “‘Ao e na anai mwaeten nako te kao mwaane are te karea ni kabwarabure, n ikotaki ma te mwaete are rabuna te kanoannano ao te mwaete are katobibia te kanoannano, 9 ao kirine ake uoua ma mwaete ake i aoia, ake i rarikin te bebee. Ao e na anaa te mwaete are i aon te ato n ikotaki ma taiani kirine.+ 10 E na titeboo aei ma are e anaaki man te kao mwaane are te karea n raoi.+ Ao e na kabueki ni kabubui baikanne ni kabane te ibonga i aoni baonikarean te karea ni kabuekaki.

11 “‘Ma ni kaineti ngkanne ma kunin te kao mwaane ma irikona ni kabane ma matanriana, waena, kanoannanona, ao nakotaarina,+ 12 ake nikirani bwain rabwatan nako te kao mwaane, a na uotaki nako tabon te kaembwa nakon te tabo ae itiaki are e kakabwaroaki iai te mannang,* ao e na kabueki i aon te aia are n te ai.+ A riai ni kabuekaki n te tabo are e kabwaroaki iai te mannang.

13 “‘Ao ngkana a karaoa ae kairua n tiaki nanoia te botaki n aomata aika tibun Iteraera bwa a karaoa te bure teuana,+ ma e aki ataia te botaki n aomata bwa a a tia ni karaoa te bwai teuana are e tua Iehova bwa a na aki karaoia,+ 14 ao e a ataaki imwina te bure anne, e riai te botaki n aomata n anga te kao mwaane ae ataei bwa te karea ni kabwarabure ao n uotia nako matan te umwa ni botaki. 15 A na katokai baia aia unimwaane te botaki n aomata i aon atun te kao mwaane i matan Iehova, ao e na kamateaki te kao mwaane i matan Iehova.

16 “‘Ao e na uota teutana raraan te kao mwaane te ibonga are kabiraki, nako nanon te umwa ni botaki. 17 E na kateboa tabonibaina te ibonga i nanon te raraa ao e na katimtimwa teutana mai iai itiua te tai i matan Iehova, i moan te keeten.+ 18 E na anaa ngkanne te raraa teutana ni kabiri kooro ake n te baonikarea+ are i matan Iehova, are mena n te umwa ni botaki, ao e na kabwaroa nikiran te raraa ni kabane i oini baonikarean te karea ni kabuekaki, are mena i rarikini mataroan te umwa ni botaki.+ 19 E na anaa mwaeten nako te kao mwaane anne, ao e na kabueki ni kabubua i aon te baonikarea.+ 20 E na karaoa ae titeboo ma are e karaoia nakon te moani kao mwaane are te karea ni kabwarabure. Anne arona ni karaoia, ao e na karaoia te ibonga ibukini karekeani kabwaraan aia bure,+ ao a na kabwaraaki aia bure. 21 E na uotakinako te kao mwaane nako tabon te kaembwa ao e na kabuekaki iai, n aroni kabuekan te kao mwaane are te moan.+ Bon te karea ni kabwarabure te baei ibukin te botaki n aomata.+

22 “‘Ngkana e bure te mataniwi+ n tiaki nanona n arona ni karaoa te bwai teuana mai buakoni bwaai ni kabane ake e tua Iehova ae Atuana bwa a aki riai ni karaoaki, ao e boni bure iai, 23 ke ngkana e a ataa te bure are e karaoia ni kaitaraa te tua, ao e riai ni kaira te kooti mwaane ae ataei ae marurung raoi bwa ana karea. 24 E na katokaa baina i aon atun te kooti ae ataei ao e na kamatea n te tabo are e kamateaki iai te karea ni kabuekaki i matan Iehova.+ Bon te karea ni kabwarabure te baei. 25 E na anaa te ibonga teutana raraan te karea ni kabwarabure n tabonibaina, ao ni kabiri iai kooro+ ake ni baonikarean te karea ni kabuekaki, ao e na kabwaroa nikiran raraana i oini baonikarean te karea ni kabuekaki.+ 26 E na kabueki ni kabubui mwaetena ni kabane i aon te baonikarea n aroni kabuekani mwaeten te karea n raoi,+ ao e na karaoia te ibonga ibukini karekeani kabwaraan ana bure te aomata anne, ao e na kabwaraaki ana bure.

27 “‘Ngkana e bure te aomata* temanna mai buakoia kaain te aba n tiaki nanona, ao e a reke n te bure n arona ni karaoa te bwai teuana mai buakoni baike e tua Iehova bwa a aki riai ni karaoaki,+ 28 ke ngkana e a ataa te bure are e karaoia, e na kaira ngkanne te kooti aine ae ataei ae marurung raoi bwa ana karea, ibukin te bure are e karaoia. 29 E na katokaa baina i aon atun te man are te karea ni kabwarabure, ao e na kamatea te man are te karea ni kabwarabure n te tabo are e kamateaki iai te man are te karea ni kabuekaki.+ 30 E na anaa raraana teutana te ibonga n tabonibaina, ao ni kabiri iai kooro ake ni baonikarean te karea ni kabuekaki, ao e na kabwaroa nikiran raraana ni kabane i oin te baonikarea.+ 31 E na anai mwaetena ni kabane+ n aron anaakini mwaeten te karea n raoi,+ ao e na kabueki ni kabubui te ibonga i aon te baonikarea bwa te boi ae boiarara* iroun Iehova, ao e na karaoia te ibonga ibukini karekeani kabwaraan ana bure te aomata anne, ao e na kabwaraaki ana bure.

32 “‘Ma ngkana e anga te tiibutetei bwa ana karea ni kabwarabure, e riai ni kaira te tiibutetei ae te aine ae marurung raoi. 33 E na katokaa baina i aon atun te man are te karea ni kabwarabure, ao e na kamatea bwa te karea ni kabwarabure n te tabo are e kamateaki iai te karea ni kabuekaki.+ 34 E na anaa teutana raraan te karea ni kabwarabure te ibonga n tabonibaina, ao ni kabiri iai kooro ake ni baonikarean te karea ni kabuekaki,+ ao e na kabwaroa nikiran raraana ni kabane i oin te baonikarea. 35 E na anai mwaetena ni kabane n aron anaakini mwaeten te tiibu mwaane ae ataei are te karea n raoi, ao e na kabueki ni kabubui te ibonga i aon te baonikarea i aoni karea ake a kareanaki n te ai nakon Iehova,+ ao e na karaoia te ibonga ibukini karekeani kabwaraan te bure are e karaoia te aomata anne, ao e na kabwaraaki ana bure.+

5 “‘Ngkana iai temanna* ae bure ibukina bwa e ongo te wewete nakoia aomata nako bwa a na anga te kakoaua,*+ ao boni ngaia te tia kakoaua bwa e nora ke e ongo te bwai ae riki ma e aki kaotia, ao ngkanne e na katuuaaeaki ibukin ana bure.

2 “‘Ke ngkana e ringa te bwai ae kamwara te aomata,* ae rabwatan te man ae aki itiaki ae moaanti ae mate, te man ae aki itiaki ae manana, ke te man temanna ae aki itiaki mai buakon te nna ni man* aika mwamwae,+ ao e bon aki itiaki iai ao e bure iai e ngae ngke e aki ataia. 3 Ke ngkana iai ae e ringa te bwai ae kamwara e ngae ngke e aki ataia, ae irekereke ma bwain rabwatan te aomata+ ke te bwai ae aki itiaki are e kona ni kamwara iai, ao e a tibwa ota n te bwai are e karaoia, ao e boni bure iai.

4 “‘Ke ngkana iai temanna* ae taetae n tuea n aki iango moa, ni kaineti ma karaoan te bwai teuana ae tao ae raoiroi ke ae buakaka, n aki ongeia bwa tera, ao e aki ataia, ma e a ataia imwina ae e taetae n tuea n aki iango moa, ao e boni bure* iai.+

5 “‘Ngkana e bure n te bwai teuana mai buakoni baikai, ao e na kaota+ te aro are e bure iai. 6 E na kaira naba ana karea nakon Iehova ibukin te bure are e karaoia+ ae te karea ni kabooa mwin te bure, ae te man ae te aine man te nanai, ae te tiibutetei ae te aine ke te kooti aine ae ataei, ibukin te karea ni kabwarabure. Ao e na karaoia te ibonga* ibukini karekeani kabwaraan ana bure te aomata anne.

7 “‘Ma ngkana e aki kona ni kabooa te tiibu, e riai n uotii taobe aika uoman ke bitin aika uoman aika ataei+ nakon Iehova bwa ana karea ni kabooa mwin te bure, temanna ibukin te karea ni kabwarabure ao are temanna ibukin te karea ni kabuekaki.+ 8 E na uotii nakon te ibonga, are e na anga moa temanna bwa te karea ni kabwarabure ao ni kinika roroana ni kanakoa, ma e aki riai ni kouta matanriana. 9 E na katimtimwa teutana raraan te karea ni kabwarabure i aon oon rarikin te baonikarea, ma e na kawawaeaanako nikirana i oin te baonikarea.+ Bon te karea ni kabwarabure te baei. 10 E na anga are temanna bwa te karea ni kabuekaki n aron tuana,+ ao e na karaoia te ibonga ibukini karekeani kabwaraan te bure are e karaoia te aomata anne, ao e na kabwaraaki ana bure.+

11 “‘Ma ngkana e aki kona ni kabooi taobe aika uoman ke bitin aika uoman aika ataei, ao e riai n uota te burawa ae mte ae teuana katebwinani mwakoron te eba*+ bwa te karea ni kabwarabure ibukin ana bure. E aki riai ni kabwaroa te oera i aona ke ni kaaki te ribano* i aona, bwa bon te karea ni kabwarabure te baei. 12 E na uotia nakon te ibonga, ao e na anaa te abutana mai iai te ibonga bwa e na tei ibukin te karea anne, ao e na kabuekia ni kabubua i aon te baonikarea i aoni karea ake a kareanaki n te ai nakon Iehova. Bon te karea ni kabwarabure te baei. 13 E na karaoia te ibonga ibukini karekeani kabwaraan te bure are e karaoia te aomata anne, ae teuana mai buakoni buure aikai, ao e na kabwaraaki ana bure.+ Bon tibwangan te ibonga nikiran te karea ni kabwarabure+ n aron naba te karea ae te amwarake.’”+

14 E reitia ni kangai Iehova nakoni Mote: 15 “Ngkana iai temanna* ae aki kakaonimaki n arona ni karaoa te bure n tiaki nanona ni kaineti ma ana bwai Iehova aika tabu,+ e na kaira ana karea nakon Iehova ae te karea ni kabooa mwin te bure, ae te tiibu mwaane ae marurung raoi man te nanai,+ ae botau boona ma ae katauaki n taian tiekera* n tirewa, ae te tiekera ae kakabonganaaki n te tabo ae tabu.*+ 16 Ao e na kabooa mwin te bure are e karaoia ni kaineti ma te tabo ae tabu ao e na raonna naba ni kanimamwakoroni boona.+ E na angan te ibonga, bwa e aonga ni karaoia te ibonga ibukini karekeani kabwaraan ana bure te aomata anne,+ n te tiibu mwaane ae te karea ni kabooa mwin te bure, ao e na kabwaraaki ana bure.+

17 “Ngkana iai temanna* ae bure n arona ni karaoa te bwai teuana mai buakoni bwaai ni kabane ake e tua Iehova bwa a aki riai ni karaoaki, ao e boni bure iai e ngae ngke e aki ataia, ao e na katuuaaeaki ibukin ana bure.+ 18 E riai ni kaira nakon te ibonga te tiibu mwaane ae marurung raoi man te nanai ae botau ma boona ae katautauaki, bwa te karea ni kabooa mwin te bure.+ Ao e na karaoia te ibonga ibukini karekeani kabwaraan te bure are e karaoia te aomata anne n tiaki nanona, ma e aki ataia, ao e na kabwaraaki ana bure. 19 Bon te karea ni kabooa mwin te bure te baei. E boni bure iai nakon Iehova.”

6 E reitia ni kangai Iehova nakoni Mote: 2 “Ngkana iai te aomata* ae bure ao e aki kakaonimaki nakon Iehova+ n arona ni mwamwanaa raona ni kaineti ma te bwai ae e tararuaia ke ae e mwiokoaki iai,+ ke e iraei ana bwai raona n aomata ke e babakanikawaia, 3 ke e kunea te bwai ae bua ao e mwamwanaa te aba iai, ao ngkana e taetae n tuea ni kewe ni kaineti ma te bure teuana ae tao e karaoia+ ao aio te bwai ae e riai ni karaoia: 4 Ngkana e karaoa ae bure ao e a reke n te bure, e riai ni kaoka te baere e iraea, te bwai are e aonikaia n te babakanikawai, te bwai are e onimakinaki bwa e na tararuaia, ke te bwai are bua are e kunea, 5 ke te bwai teuana ae e taetae n tuea ni kewe iai, ao e na kabooa mwina ni kakoroa raoi mwaitina,+ ao e na raonna riki ni kanimamwakoroni boona. E na angan te aomata are bon ana bwai n te bong are e a kakoauaaki iai bwa e boni bure. 6 Ao e na kaira ana karea nakon te ibonga* bwa ana karea ni kabooa mwin te bure nakon Iehova, ae temanna te tiibu mwaane ae marurung raoi mai buakon te nanai, ae botau ma boona ae katauaki ibukin te karea ni kabooa mwin te bure.+ 7 E na karaoia te ibonga ibukini karekeani kabwaraan ana bure te aomata anne i matan Iehova, ao e na kabwaraaki ana bure ni kaineti ma baike tao e karaoi are e reke iai n te bure.”+

8 E reitia ni kangai Iehova nakoni Mote: 9 “Ko na tua nakon Aaron ma natina mwaane ni kangai, ‘Aio tuan te karea ni kabuekaki:+ E na mena te karea ni kabuekaki ni nnen te ai i aon te baonikarea man te tairiki ni karokoa ae ingabong, ao e na kauraaki nako naba ain te baonikarea. 10 E na kunnikaia te ibonga n ana kunnikai n ibonga ae te rinen+ ao e na karina te kawaerake* ae te rinen.+ Ao e na anaa mannangin*+ te karea ni kabuekaki are kakabuekaki n te ai i aon te baonikarea, ao e na katikua i rarikin te baonikarea. 11 E na buutii ngkanne ana kunnikai+ ao e na karini kunnikai ake tabeua, ao e na uota te mannang nakon te tabo ae itiaki i tinanikun te kaembwa.+ 12 E na reitinako uran te ai i aon te baonikarea. E na aki mamate. E na kabueka te aia+ i aona ni katoa ingabong te ibonga, ao e na bairea te karea ni kabuekaki i aona, ao e na kabueki mwaeten taiani karea n raoi i aona ni kabubui.+ 13 E na reitinako uran te ai i aon te baonikarea. E na aki mamate.

14 “‘Aio tuan te karea ae te amwarake:+ Kam riai n anga ngkami aika natin Aaron aika mwaane i matan Iehova i moan te baonikarea. 15 E na abuta te burawa ae mte temanna mai buakoia, man te karea ae te amwarake ao teutana te oera mai iai ao ribano* ni kabane ake i aon te karea ae te amwarake, ao e na kabueki ni kabubui i aon te baonikarea bwa te boi ae boiarara* bwa e na tei ibukin te karea anne nakon Iehova.+ 16 A na kana nikirana Aaron ma natina mwaane.+ E na karaoaki bwa bwerena aika aki karikaki ma ni kanaki n te tabo ae tabu. A na kanna ni katawanangin te umwa ni botaki.+ 17 E aki riai n umunaki ao e karikaki.+ I angania bwa tibwangaia mai buakoni karea ake a kareanaki n te ai nakoiu.+ Bon te bwai ae moan te tabu+ n aron te karea ni kabwarabure ao te karea ni kabooa mwin te bure. 18 A na bane ni kanna natin Aaron aika mwaane.+ Bon tibwangaia ae teimatoa n ami roro nako mai buakoni karea ake a kareanaki n te ai nakon Iehova.+ A na bane n tabu bwaai ake a boo ma baikai.’”*

19 E a manga taku riki Iehova nakoni Mote: 20 “Aio te karea ae a na anga Aaron ma natina mwaane nakon Iehova ni katoaa te bong are a kabiraki iai:+ teuana katebwinani mwakoron te eba*+ ni burawa ae mte bwa te karea ae te amwarake,+ iterana n te ingabong ao iterana n te moantairiki. 21 E na karaoaki ma te oera i aon te baan.+ Ko na uota ae e kaboboaki raoi ma te oera ao aanga mwakorokoroni baika umunaki man te karea ae te amwarake, bwa te boi ae boiarara* iroun Iehova. 22 E na karaoia te ibonga are kabiraki, are oneani mwin Aaron mai buakoia natina mwaane.+ Aio te tua ibukin te tai ae teimaan: E na kabuekaki ni kabubuaki te karea anne ni kabane nakon Iehova. 23 A riai ni bane ni kabuekaki ana karea te ibonga ae te karea ae te amwarake. E na tai kanaki.”

24 E a manga taetae riki Iehova nakoni Mote ao e taku: 25 “Tuangia Aaron ma natina mwaane ni kangai, ‘Aio tuan te karea ni kabwarabure:+ E na kamateaki te karea ni kabwarabure i matan Iehova n te tabo are e kamateaki naba iai te karea ni kabuekaki.+ Bon te bwai ae moan te tabu te baei. 26 E na kanna te ibonga are anga te karea anne ibukin te bure.+ E na kanaki n te tabo ae tabu ni katawanangin te umwa ni botaki.+

27 “‘A na bane n tabu bwaai ake a boo ma irikon te man anne, ao ngkana e timraki ana kunnikai temanna n teutana raraan te man, ko riai ni kaitiaka te baere e timraki n te raraa n te tabo ae tabu. 28 E na ibeaki te bwaata ae te kaatibu are e kaburoaki iai. Ma ngkana e kaburoaki n te bwaata ae te buraati, ao e riai n ireaki te bwaata anne ma ni kaitiakaki n te ran.

29 “‘A na bane ni kanna mwaane ake ibonga.+ Bon te bwai ae moan te tabu te baei.+ 30 Ma e na aki kanaki te karea ni kabwarabure ngkana e uotaki raraana teutana nakon te umwa ni botaki, ibukini karekeani kabwaraan te bure n te tabo ae tabu.+ E na kabuekaki n te ai.

7 “‘Aio tuan te karea ni kabooa mwin te bure:+ Bon te bwai ae moan te tabu te baei. 2 A na kamatea te man ae te karea ni kabooa mwin te bure n te tabo are a kamateia iai maan ake karea ni kabuekaki, ao e riai ni katimtimwaki raraana+ i aon rarikin te baonikarea ni kabutaa.+ 3 E na anga mwaetena ni kabane+ n ikotaki ma bukina ae te mwaete, ao te mwaete are rabuna te kanoannano, 4 ao kirine ake uoua ma mwaeteia ake i rarikin te bebee. E na anaa naba te mwaete are i aon te ato n ikotaki ma taiani kirine.+ 5 E na kabueki ni kabubui te ibonga* i aon te baonikarea bwa te karea ae kareanaki n te ai nakon Iehova.+ Bon te karea ni kabooa mwin te bure te baei. 6 A na bane ni kanna mwaane ake ibonga+ ao e riai ni kanaki n te tabo ae tabu. Bon te bwai ae moan te tabu te baei.+ 7 E kaineti naba te tua ibukin te karea ni kabwarabure nakon te karea ni kabooa mwin te bure. Bon ana bwai te ibonga are karaoia ibukini karekeani kabwaraani buure.+

8 “‘Ngkana e anga te karea ni kabuekaki te ibonga ibukin temanna, ao e na riki bwa tibwangan te ibonga kunin+ te karea ni kabuekaki are e anganaki.

9 “‘E na riki te karea ae te amwarake n tatabeua nako are e umunaki n te ai n umum ke e katauraoaki n te bwaata ke i aon te baan,+ bwa ana bwai te ibonga are anga te karea. E na riki bwa tibwangan te ibonga.+ 10 Ma e na riki bwa aia bwai natin Aaron aika mwaane te karea ae te amwarake n tatabeua nako ae renganaki ma te oera+ ke ae mwau.+ A na titeboo mwaitin tibwangaia n tatabemania nako.

11 “‘Aio tuan te karea n raoi+ are e na anga te aomata nakon Iehova: 12 Ngkana e anga bwa kaotan te katituaraoi,+ ao e na anga bwa raon te karea ni katituaraoi bwerena aika mronron aika aki karikaki aika renganaki ma te oera, ao bwerena aika mmani aika aki karikaki aika kabiraki aoia n te oera, ao kariki aika mronron aika karaoaki man te burawa ae mte ae renganaki raoi ao ni kaboboaki ma te oera. 13 E na raona ana karea n raoi ake e anga ibukini kaotan te katituaraoi, ni kariki aika mronron aika karikaki. 14 E na anga kaka teuana mai buakoni baikai bwa te tibwanga ae tabu nakon Iehova, ao e na riki bwa tibwangan te ibonga are katimtimwi raraan taiani karea n raoi.+ 15 E na kanaki irikon te man ae te karea ni katituaraoi are ana karea n raoi n te bong are e anga iai. E aki riai ni kawakina teutana mai iai ni karokoa ae ingabong.+

16 “‘Ngkana e na anga ana karea ae te taetae ni bau+ ke te karea ni kan anga,+ e na kanaki n te bong are e anga iai ana karea, ao e kona ni kanaki naba nikirana n te bong are imwina. 17 Ma e na kabuekaki n te ai nikiran irikon te karea anne n te katenua ni bong.+ 18 Ma ngkana e kanaki irikon te karea n raoi n te katenua ni bong, ao e na aki butimwaeaki iroun te Atua te aomata are anga te karea. E na aki reke akoana. Bon te bwai ae kamatauninga te baenne, ao e na katuuaaeaki ibukin ana bure te aomata* are kanna teutana.+ 19 E na aki kanaki irikon te karea ae boo ma te bwai ae kamwara. E na kabuekaki n te ai. A na kana nikiran irikona ae itiaki aomata nako aika itiaki.

20 “‘Ma e na kamateaki te aomata* are kana irikon te karea n raoi are ibukin Iehova n ana tai ni kamwara.+ 21 Ngkana e ringa te bwai ae kamwara te aomata,* ae te bwai ae kamwara ae irekereke ma rabwatan te aomata,+ ke te man ae aki itiaki,+ ke te bwai ae koro n ribaaki ae kamwara,+ ao e kana irikon te karea n raoi teutana are ibukin Iehova, ao e na kamateaki te aomata* anne.’”

22 E reitia ni kangai Iehova nakoni Mote: 23 “Tuangia tibun Iteraera ni kangai, ‘Kam na tai kana mwaeten+ te kao mwaane ke te tiibu mwaane ae ataei ke te kooti. 24 E kona ni kabonganaaki mwaeten te man ae kuneaki ni mate ao mwaeten te man ae kamateaki iroun te man temanna, ibukini bwaai ake tabeua, ma kam aki riai ni kanna.+ 25 Bwa e na kamateaki te aomata* ae kana mwaeten te man are e anga bwa te karea ae kareanaki n te ai nakon Iehova.

26 “‘Kam na tai kana te raraa+ n taabo nako ake kam maeka iai, ae tao raraaia mannikiba ke maan. 27 E na kamateaki te aomata* ane kana te raraa.’”+

28 E reitia ni kangai Iehova nakoni Mote: 29 “Tuangia tibun Iteraera ni kangai, ‘Ane e anga ana karea n raoi nakon Iehova, e na angan Iehova mwakoron ana karea n raoi.+ 30 E na uota mwaeten te man i baina+ ma bwabwaan te man bwa te karea ae kareanaki n te ai nakon Iehova, ao e na katiotioi bwa te karea ni katiotioaki+ i matan Iehova. 31 E na kabueka te mwaete te ibonga i aon te baonikarea ni kabubua,+ ma e na riki bwabwaan te man bwa tibwangan Aaron ma natina mwaane.+

32 “‘Kam na anga te ranga are te atai mai buakon ami karea n raoi bwa te tibwanga ae tabu nakon te ibonga.+ 33 E na riki te ranga are te atai bwa tibwangan natin Aaron te mwaane are anga raraan taiani karea n raoi ao mwaeteia.+ 34 Bwa I anaa bwabwaan te man are te karea ni katiotioaki ao te ranga are te tibwanga are tabu man aia karea n raoi tibun Iteraera, ao I angan Aaron ae te ibonga ma natina aika mwaane, bwa te tua ae teimatoa ibukia tibun Iteraera.+

35 “‘Aio bon te tibwanga mai buakoni karea ake a kareanaki n te ai nakon Iehova ae e na kaokoroaki ibukia ibonga, aika Aaron ma natina mwaane, n te bong are e anga iai naakai bwa a na beku bwa ana ibonga Iehova.+ 36 E tua Iehova bwa a na anganaki naakai te tibwanga aei mairouia tibun Iteraera n te bong are e kabiriia iai.+ Bon te tua ae teimatoa n aia roro nako.’”

37 Aio te tua ni kaineti ma te karea ni kabuekaki,+ te karea ae te amwarake,+ te karea ni kabwarabure,+ te karea ni kabooa mwin te bure,+ te karea ae kareanaki ibukin te kateirake nakon te nakoa n ibonga,+ ao te karea n raoi,+ 38 n aron are e tua Iehova nakoni Mote n te Maunga ae Tinai,+ n te bong are e tua nakoia tibun Iteraera bwa a na anga aia karea nakon Iehova n rereuan Tinai.+

8 E reitia ni kangai Iehova nakoni Mote: 2 “Kaira Aaron ma natina mwaane,+ ma te kao mwaane ae te karea ni kabwarabure, ao tiibu mwaane aika uoman, ao uotii kunnikai,+ ao te bwaa ae tabu,*+ ao te bwaene ae kanoana bwerena aika aki karikaki,+ 3 ao ikotiia te botaki n aomata i rarikini mataroan te umwa ni botaki.”

4 E karaoi ngkanne Mote baike e tua Iehova nakoina, ao a a ikotaki te botaki n aomata i rarikini mataroan te umwa ni botaki. 5 Ao e taku Mote nakon te botaki n aomata arei: “Aio te bwai ae e tua Iehova nakoira bwa ti na karaoia.” 6 Mangaia are e kaira Aaron ma natina mwaane Mote ni kaania, ao e tebokiia n te ran.+ 7 Imwin anne e karina te kamwarai+ Mote i aon Aaron ao e kabaea nukana n te kabaea n nuka,+ ao e karina ana kunnikai ae akea baina+ ao e katokaa te ebota i aona,+ ao e kabaea te roo* ae rarangaaki+ ibukin te ebota, ni kakooa raoi i aona. 8 Imwina ao e katokaa te uba+ i aon Aaron ao e karina te Urim ao te Tummim+ i nanon te uba. 9 E katokaa ngkanne te bwara ae te kunnikai+ i aon atuna ao e kaaki te mwakoro ni biti ae raneanea ae te koora i moan te bwara anne, ae te kanikina ae tabu ibukin te katabu,*+ n aron are e tua Iehova nakoni Mote.

10 E anaa ngkanne te bwaa ae tabu Mote ao e kabira iai te umwanrianna ae tabu* ma bwaai ni kabane ake iai+ ao e katabui. 11 Imwin anne ao e katimtimwa teutana mai iai itiua te tai i aon te baonikarea, ao e kabira te baonikarea ma bwaai ni mwakuri nako ake iai, ao te taabu ma kainteina bwa e aonga ni katabui. 12 Ni kabaneana e a kabwaroa teutana te bwaa ae tabu i aon atun Aaron, ao e kabiria ni katabua.+

13 E kairiia ngkanne natin Aaron aika mwaane Mote ni kaania, ao e karin aia kamwarai ao e kabaei nukaia n te kabaea n nuka ao e katokai* bwaraia ae te kunnikai,+ n aron are e tua Iehova nakoni Mote.

14 E kaira ngkanne te kao mwaane are te karea ni kabwarabure, ao a katokai baia Aaron ma natina mwaane i aon atun te kao mwaane are te karea ni kabwarabure.+ 15 E kamatea te kao mwaane Mote ao e anaa raraana+ n tabonibaina ao e kabiri kooro ake n iteran nako te baonikarea, ao e kaitiaka te baonikarea man te bure, ma e kabwaroa nikiran te raraa i oin te baonikarea, bwa e aonga ni katabua ibukini karekeani kaitiakan te bure are i aona. 16 Imwin anne ao e anai mwaete ni kabane Mote ake i aon te kanoannano, te mwaete are i aon te ato, ao kirine ake uoua ma mwaete ake iai, ao e kabueki ni kabubui i aon te baonikarea.+ 17 Ao e kabuekaki nikiran te kao mwaane, ae kunna ma irikona ma nakotaarina n te ai i tinanikun te kaembwa,+ n aron are e tua Iehova nakoni Mote.

18 E kaira te tiibu mwaane are te karea ni kabuekaki ni kaania, ao a katokai baia Aaron ma natina mwaane i aon atun te tiibu mwaane.+ 19 E kamatea ngkanne te tiibu Mote ao e katimtimwa raraana i aon rarikin te baonikarea ni kabutaa. 20 E korokorea te tiibu mwaane Mote, ao e kabueki ni kabubui matanriana, mwakorokorona, ao mwaeteni kirinena. 21 E teboki kanoannanona ma waena n te ran, ao e kabueka te tiibu mwaane ni kabane Mote ni kabubua i aon te baonikarea. Bon te karea ni kabuekaki te baei ibukin te boi ae boiarara.* Bon te karea ae kareanaki n te ai nakon Iehova, n aron are e tua Iehova nakoni Mote.

22 E kaira ngkanne te tiibu mwaane are te kauoman are te tiibu mwaane are baireaki bwa e na kareanaki ibukin te kateirake nakon te nakoa n ibonga,*+ ao a katokai baia Aaron ma natina mwaane i aon atun te tiibu mwaane.+ 23 E kamatea te tiibu mwaane Mote ao e anaa raraana teutana, ao e kabira iai aon reben taningan Aaron are te atai, ao aoni waebuani baina are te atai, ao aoni waebuani waena are te atai. 24 Imwina ao e kairiia natin Aaron aika mwaane Mote ni keerake, ao e kabiri aon reben taningaia ake ataia n te raraa teutana, ao aoni waebuani baia ake ataia, ao aoni waebuani waeia ake ataia, ao e katimtimwa nikiran te raraa Mote i aon rarikin te baonikarea ni kabutaa.+

25 E anaa ngkanne te mwaete, bukina are te mwaete, mwaete ni kabane ake i aon te kanoannano, te mwaete are i aon te ato, kirine ake uoua ma mwaete ake iai, ao te ranga are te atai.+ 26 E anaa teuana te bwerena ae mronron ae aki karikaki,+ ao teuana te bwerena ae aki karikaki ae mronron ae renganaki ma te oera,+ ao teuana te bwerena ae mmani, man te bwaene are mena i matan Iehova ae kanoana bwerena aika aki karikaki. Ao e katokai i aoni mwakorokoro ni mwaete ao te ranga are te atai. 27 Imwin anne ao e kaaki baikai ni kabane i bain Aaron ao i baia natina mwaane, ao e katiotioi bwa te karea ni katiotioaki i matan Iehova. 28 E anai ngkanne Mote mai baia ao e kabueki ni kabubui i aon te karea ni kabuekaki are i aon te baonikarea. Boni kanoan te karea ae kareanaki ibukin te kateirake nakon te nakoa n ibonga baikai ibukin te boi ae boiarara.* Bon te karea ae kareanaki n te ai te baei nakon Iehova.

29 E anaa ngkanne te bwabwaa Mote ao e katiotioa bwa te karea ni katiotioaki i matan Iehova.+ E a riki bwabwaan te tiibu mwaane are kareanaki ibukin te kateirake nakon te nakoa n ibonga bwa tibwangani Mote, n aron are e tua Iehova nakoni Mote.+

30 Ao e anaa teutana te bwaa ae tabu Mote+ ao teutana te raraa are i aon te baonikarea, ao e katimtimwi i aon Aaron ma kunnikaina ao i aoia natina ake raona ma kunnikaia.+ Mangaia are e katabua Aaron ma kunnikaina ao natin Aaron ma kunnikaia.+

31 E taku ngkanne Mote nakon Aaron ma natina mwaane: “Kaburoa+ irikona i rarikini mataroan te umwa ni botaki, ao kam na kanna ikanne ma te bwerena are mena i nanon te bwaene, n aron are I tuangaki ni kangai, ‘A na kanna Aaron ma natina mwaane.’+ 32 Kam na kabueki n te ai nikiran irikona ma nikiran te bwerena.+ 33 Ko na aki kararoako mai rarikini mataroan te umwa ni botaki i nanon itibong, ni karokoa baneni boong ake kam kateirakeaki iai, ibukina bwa bon itibong ami bong ni kateirakeaki nakon te nakoa n ibonga.*+ 34 E tua Iehova bwa ti na karaoa ae ti a tia ni karaoia n te bong aei ibukini karekeani kabwaraan ami bure.+ 35 Kam na tiku i rarikini mataroan te umwa ni botaki n te ngaina ao n te bong i nanon itibong,+ ao karaoi tabemi ibukin Iehova,+ bwa kam aonga n aki mate, bwa anne ae I tuangaki.”

36 Ao a karaoi bwaai ni kabane Aaron ma natina mwaane ake e tua Iehova rinanoni Mote.

9 N te kawanibong+ ao Mote e wetea Aaron ma natina mwaane ao aia unimwaane tibun Iteraera. 2 E taku nakon Aaron: “Anaa te kao te teei ae te mwaane ibukim bwa te karea ni kabwarabure+ ao te tiibu mwaane bwa te karea ni kabuekaki. Anai aika marurung raoi ao aanga i matan Iehova. 3 Ma ko na kangai nakoia tibun Iteraera, ‘Anaa te kooti mwaane bwa te karea ni kabwarabure, ao te kao te teei ae te mwaane ao te tiibu mwaane ae ataei ae kaka teuana aia ririki aika marurung raoi bwa te karea ni kabuekaki, 4 ao te kao mwaane ao te tiibu mwaane bwa taiani karea n raoi+ bwa kam na karean i matan Iehova, ao te karea ae te amwarake+ ae renganaki ma te oera, bwa e na kaoti Iehova nakoimi n te bong aei.’”+

5 Mangaia are a anai baike e tua Mote nako matan te umwa ni botaki. Ao e keerake te botaki n aomata ao e tei i matan Iehova. 6 Ao e taku Mote: “Aio te bwai ae e tua Iehova bwa kam na karaoia, bwa e aonga n oti mimitongin Iehova nakoimi.”+ 7 E taku ngkanne Mote nakon Aaron: “Kaania te baonikarea ao aanga am karea ni kabwarabure+ ao am karea ni kabuekaki, ao karaoia ibukini karekeani kabwaraan am bure+ ao aia bure kaaini batam, ao aanga te karea ae aia karea aomata+ ao karaoia ibukia ibukini karekeani kabwaraan aia bure,+ n aron are e tua Iehova.”

8 E waekoa Aaron ni kaania te baonikarea ao e kamatea te kao te teei ae te mwaane are te karea ni kabwarabure ibukin ana bure.+ 9 Ao a anga te raraa natin Aaron aika mwaane+ nakoina ao e kateboa tabonibaina n te raraa ao e kabiri iai kooro ake n te baonikarea, ao e kabwaroa nikiran te raraa i oin te baonikarea.+ 10 E kabueka te mwaete ma kirine ma te mwaete are i aon te ato ake man te karea ni kabwarabure i aon te baonikarea ni kabubui, n aron are e tua Iehova nakoni Mote.+ 11 Ao e kabueka irikona ao kunna n te ai i tinanikun te kaembwa.+

12 E kamatea ngkanne te karea ni kabuekaki Aaron ao a anganna te raraa natina mwaane, ao e katimtimmwa i aon rarikin te baonikarea ni kabutaa.+ 13 A anganna mwakorokoron te man are te karea ni kabuekaki ma matanriana, ao e kabueki ni kabubui i aon te baonikarea. 14 Ao e teboki kanoannanona ma waena ao e kabueki ni kabubui i aon te karea ni kabuekaki are i aon te baonikarea.

15 E anga ngkanne te karea ae aia karea aomata ao e anaa te kooti are te karea ni kabwarabure ibukin aia bure aomata, ao e kamatea ao e anga bwa te karea ni kabwarabure n aron are e karaoia nakon are te moan. 16 Ao e anga te karea ni kabuekaki ao e karaoia n aron tuana.+

17 Imwina ao e anga te karea ae te amwarake+ ao e abuta teutana mai iai ni kaona baina ao e kabuekia ni kabubua i aon te baonikarea, are e anga iai te karea ni kabuekaki n te ingabong anne.+

18 Imwin anne ao e kamatea te kao mwaane ao te tiibu mwaane Aaron, ake ibukin te karea n raoi ibukia aomata. Ao a anganna te raraa natina mwaane ao e katimtimmwa i aon rarikin te baonikarea ni kabutaa.+ 19 Ni kaineti ngkanne ma mwakorokoroni mwaeten te kao mwaane,+ bukin te tiibu mwaane ae bukina ae te mwaete, te mwaete are rabuni kanoan nanona nako, taiani kirine, ao te mwaete are i aon te ato,+ 20 a kaaki mwakorokoro ni mwaete ni kabane aikai natin Aaron aika mwaane i aoni bwabwaaia maan, ao imwina e a kabueki ni kabubui mwakorokoro ni mwaete aikai Aaron i aon te baonikarea.+ 21 Ma e katiotioi taiani bwabwaa ma te ranga are te atai Aaron bwa te karea ni katiotioaki i matan Iehova, n aron are e tua Mote.+

22 E tabeki baina ngkanne Aaron nakoia aomata ao e kakabwaiaia,+ ao e ruo rikaaki mani karaoan te karea ni kabwarabure ao te karea ni kabuekaki ao taiani karea n raoi. 23 Ni kabaneana e rin Mote ma Aaron i nanon te umwa ni botaki, ao a otinako ao a kakabwaiaia aomata.+

E a oti ngkai mimitongin Iehova nakoia aomata ni kabane,+ 24 ao e roko te ai mairoun Iehova+ ao e kabueka te karea ni kabuekaki ma mwakorokoro ni mwaete ake i aon te baonikarea. Ngke a nora aei aomata ni kabane, ao a a tatakarua ni kukurei ao a katorobubua ni bobaraaki i aontano.+

10 Imwina riki ao a anai baan aika nneni mwaakaron te ai natin Aaron aika mwaane aika Nataba ao Abiu+ n tatabemania, ao a kaaki te ai iai ao a katokai baika boiarara i aona.+ Ao a kareana te bwai ae boiarara n te ai ae aki kariaiakaki i matan Iehova+ ae e aki tua nakoia bwa a na karaoia. 2 Ibukin aei ao e roko te ai mairoun Iehova ni kamaunaia,+ mangaia are a a mate i matan Iehova.+ 3 E taku ngkanne Mote nakon Aaron: “E kangai ana taeka Iehova, ‘N na katabuaki i buakoia akana kaaniai,+ ao N na neboaki i mataia aomata ni kabane.’” Ao e teimatoa ni kainabwabu Aaron.

4 Ngaia are e wetea Mitiaera ao Eretaban Mote, ake natin Utiera+ are ai taman Aaron, ao e taku nakoia: “Nakomai ikai, ao uotiia tarimi mai matan te tabo ae tabu nako tinanikun te kaembwa.” 5 Mangaia are a keerake ao a uotiianako mwaane akekei ma aia kamwarai ake i aoia nako tinanikun te kaembwa n aron are e tuangia Mote.

6 Ao e taku Mote nakon Aaron ma nikiraia natina mwaane ake Ereata ao Itama: “Tai kauakakai irannatumi ke n raeuai kunnikaimi,+ bwa kam aonga n aki mate ao e aonga n aki roko unin te Atua i aon te botaki n aomata. A na tanginiwenei tarimi aika tibun Iteraera ni kabane ibukia te koraki ake e tiringia Iehova n te ai. 7 Kam na tai kararoaingkami mai rarikini mataroan te umwa ni botaki bwa kam kaawa ni mate, ngkai kam a tia ni kabiraki n ana bwaa* Iehova.”+ Ngaia are a karaoa are e taku Mote.

8 E taku ngkanne Iehova nakon Aaron: 9 “Tai nim wain ke kamanging riki tabeua ngkoe ma natim mwaane ngkana kam rin n te umwa ni botaki,+ bwa kam aonga n aki mate. Aio te tua ae teimatoa n ami roro nako. 10 Aio boni kaokoroan te bwai ae tabu ma ae kamwara ao te bwai ae itiaki ma ae aki itiaki,+ 11 ao kam na reireinia tibun Iteraera tuua ni kabane ake e taekin Iehova nakoia rinanoni Mote.”+

12 E taku ngkanne Mote nakon Aaron ma Ereata ao Itama ake nikiraia natina mwaane: “Anaa te karea ae te amwarake are nikirani karea ake a kareanaki n te ai nakon Iehova, ao kanna i rarikin te baonikarea ngkai te bwerena ae aki karikaki,+ ibukina bwa bon te bwai ae moan te tabu.+ 13 Ko riai ni kanna n te tabo ae tabu,+ ibukina bwa bon tibwangam ao tibwangaia natim mwaane mani karea ake a kareanaki n te ai nakon Iehova, bwa anne ae I tuangaki. 14 Ko na kana naba bwabwaan te man are man te karea ni katiotioaki ao te ranga are man te tibwanga ae tabu+ n te tabo ae itiaki, ngkoe ma natim mwaane ma aine,+ ibukina bwa ko anganaki baikai bwa tibwangam ao tibwangaia natim mwaane mai buakon aia karea n raoi tibun Iteraera. 15 E na uotaki te ranga are man te tibwanga ae tabu ao bwabwaan te karea ni katiotioaki, n ikotaki ma karea ake a kareanaki n te ai ake taiani mwaete, bwa e aonga ni katiotioaki bwa te karea ni katiotioaki i matan Iehova, ao e na riki bwa te tibwanga ae teimatoa ibukim ao ibukia natim mwaane,+ n aron are e tua Iehova.”

16 Ao e kakorakoraa n ukoukora te kooti are te karea ni kabwarabure Mote,+ ao e a kunea bwa e a tia ni kabuekaki. Ngaia are e a un irouia Ereata ma Itama ake nikiraia natin Aaron aika mwaane, ao e taku: 17 “E aera ngkai kam aki kana te karea ni kabwarabure n te tabo ae tabu,+ ngkai bon te bwai ae moan te tabu ao e a tia n anganingkami n te aro ae kam a kona iai n uota aia bure te botaki n aomata ao ni karekei kabwaraan aia bure i matan Iehova? 18 Noria! E tuai n uotaki raraan te karea ni kabwarabure nako nanon te tabo ae tabu.+ Kam bon riai n tia ni kana te karea anne i nanon te tabo ae tabu, n aron are I tuangaki.” 19 E kaeka Aaron nakoni Mote ni kangai: “Noria! A a tia aomata n anga aia karea ni kabwarabure ao aia karea ni kabuekaki i matan Iehova n te bong aei,+ ma a bon riki naba baikai nakoiu. Ma ngke arona bwa I kana te karea ni kabwarabure, e na kukurei n anne Iehova?” 20 Ngke e ongo aei Mote ao e rau nanona.

11 E taku ngkanne Iehova nakoni Mote ma Aaron: 2 “Tuangia tibun Iteraera ni kangai, ‘Aikai manin aon te aba aika kam kona ni kang aika kaka aai waeia ni kabane:+ 3 A kona ni kanaki maan nako ake a manga waeia n akea te kun i marenana ao ake a nnai kanaia ni manga kantii.

4 “‘Ma tii maan aikai aika kam na tai kang ake a nnai kanaia ni manga kantii ao ake a manga waeia: te kamero bwa e nna kanana ni manga kantia ma e aki manga waena. E kamwara ibukimi.+ 5 Ao manin te bwaa ae te baetia,*+ ibukina bwa e nna kanana ni manga kantia ma e aki manga waena. E kamwara ibukimi. 6 Ao te rabiti naba ae te ea, ibukina bwa e nna kanana ni manga kantia ma e aki manga waena. E kamwara ibukimi. 7 Ao te beeki,+ ibukina bwa e manga waena n akea te kun i marenana ma e aki nna kanana ni manga kantia. E kamwara ibukimi. 8 Kam na tai kang naba teutana irikoia ke n ringi rabwataia maan akanne aika mate. A kamwara ibukimi.+

9 “‘Aikai baika kam kona ni kang mani bwaai ni kabane ake n te ran: Bwaai ni kabane ake n te ran aika iai ingia ao inaia, ake i taari ke n te karaanga, kam kona ni kanna.+ 10 Ma boni baika a na ribaaki iroumi bwaai ni kabane ake i taari ao n te karaanga aika akea ingia ma inaia, mai buakon te nna ni man* nako aika mwamwae ao mai buakoia maan* ni kabane ake n te ran. 11 Eng, a riai n ribaaki iroumi ao kam na tai kana naba teutana irikoia,+ ao kam riai n ribai rabwataia maan akanne aika mate. 12 Boni baika a na ribaaki iroumi bwaai ni kabane ake n te ran aika akea ingia ma inaia.

13 “‘Aikai maan aika iai baia ni kiba aika kam riai n ribai. A aki riai ni kanaki bwa boni baika ribaaki: te ikare,+ te aotibure, te kia ae roroo,+ 14 te kaite ae uraura, ao te kaite ae roroo n aekana nako, 15 reeben n aekaia nako, 16 te aotireti, te aure, te timu, te baokan n aekana nako, 17 te aure ae uarereke, te komorante, te aure ae abwabwaki taningana, 18 te tuwaan, te berikan, te kia, 19 te titaoki, te kaai n aekana nako, te uboi, ao te baate. 20 Boni baika a na ribaaki iroumi te nna ni man* aika mwamwae aika iai baia ni kiba, aika kaka aai waeia.

21 “‘Ma tii aikai aika ko kona ni kang mai buakoia nna ni man nako aika mwamwae aika iai baia ni kiba, aika kaka aai waeia, bon ake iai riki rangaia* aika kona n ewewe iai i aontano. 22 Aikai maan aika kam kona ni kang mai buakoia: rokati aika mwamwae n aekaia nako, ao rokati aika kakanaki ake tabeua,+ taiani kuriketi, ao taian taake. 23 Boni baika a na ribaaki iroumi nna ni man aika mwamwae ake tabeua aika iai baia ni kiba aika aai waeia. 24 Kam na kamwara ni baikai. A na kamwara ni karokoa ae bong aomata nako ake a ringi rabwataia maan akanne aika mate.+ 25 E riai ni kaitiakii kunnikaina ane e uotii rabwataia maan akanne aika mate,+ ao e na kamwara ni karokoa ae bong.

26 “‘A kamwara ibukimi maan nako aika manga waeia, ma akea te kun i marenana ao a aki nnai kanaia ni manga kantii. A na kamwara aomata nako ake a ringia maan aikai.+ 27 A kamwara ibukimi maan nako ake a nakonako i aon nanoni baia mai buakoni maan aika kaka aai waeia. A na kamwara ni karokoa ae bong aomata nako ake a ringi rabwataia maan akanne aika mate. 28 E riai ni kaitiakii kunnikaina ane e uotii rabwataia maan akanne aika mate,+ ao e na kamwara ni karokoa ae bong.+ A kamwara ibukimi.

29 “‘Aikai nna ni man aika mwamwae aika kamwara ibukimi i aon te aba: te kimoa ae te moore, te kimoa,+ te tikunei n aekana nako, 30 te beru, te tikunei ae bubura, te niute, tikunein aontano, ao te kemirian. 31 A kamwara maan aikai ibukimi+ mai buakon te nna ni man ni kabane aika mwamwae. A na kamwara ni karokoa ae bong aomata nako ake a ringia maan akanne aika mate.+

32 “‘A na kamwara bwaai ni kabane aika bwakaraki ni maan aikai ngkana a mate, ae tao te bwainnamwarake ae te kai, te kunnikai, kunin te man, ke te raerobwa.* E riai ni kateboaki n te ran te bwainnamwarake ae kabonganaaki, ao e na kamwara ni karokoa ae bong ao e na manga itiaki. 33 Kam na ibea te bwaata ae te kaatibu ngkana a bwaka maan akanne i nanona, ao e na kamwara kanoana.+ 34 A na kamwara amwarake nako aika boo ma te ran ane mena n te bwaata anne, ao a na kamwara moi nako aika kona n nimaki ake a mena n te bwaata anne. 35 A na kamwara baika bwakaraki n rabwataia maan akanne aika mate. A riai n uruakaki ni kamaeinikunaki e ngae ngke te ai n umum ke te titoobu ae uarereke. Boni baika kamwara baikai ao a na teimatoa ni kamwara ibukimi. 36 Bon tii te koburake n ran ao te mwarua ae kawakinaki iai te ran, aika a na teimatoa n itiaki, ma e na kamwara ane e ringi rabwataia maan akanne aika mate. 37 Ngkana a bwaka rabwataia maan akanne aika mate i aoni koraan te aroka ae e na unikaki, ao e itiaki. 38 Ma ngkana e tebokaki te koraa n te ran, ao e bwakaraki ni bwain rabwataia maan akanne aika mate, ao e boni kamwara ibukimi te koraa anne.

39 “‘Ngkana e mate te man ae kam kariaiakaki ni kanna, ao ane e ringa rabwatana ngkai e mate, e na kamwara ni karokoa ae bong.+ 40 Ane e kana bwain rabwatan te man ae mate, e riai ni kaitiakii kunnikaina ao e na kamwara ni karokoa ae bong.+ Ane e uotaanako rabwatan te man ae mate, e riai ni kaitiakii kunnikaina ao e na kamwara ni karokoa ae bong. 41 Boni baika ribaaki maan nako aika mwamwae mai buakoia nna ni man aika i aon te aba.+ A aki riai ni kanaki. 42 Kam na tai kang maan nako aika aeae i aoni birotoia, ao maan nako aika nakonako i aoni waeia aika kaka aai, ke nna ni man aika mwamwae i aon te aba aika rangi ni bati waeia, bwa boni maan aika ribaaki baikai.+ 43 Tai karekei ribaakimi ni maan nako mai buakoia nna ni man aika mwamwae, ao kam na aki kamwaraeingkami ni baikai ma ni kamwaraeaki iai.+ 44 Bwa bon Iehova ngai ae Atuami,+ ao kam na katabuingkami* ao kam na itiaki*+ ibukina bwa I itiaki.+ Mangaia ae kam na tai kamwaraeingkami n te nna ni man aika mwamwae i aon te aba. 45 Bwa bon Iehova ngai ae I kairingkami ni kaotinakoingkami man te aba are Aikubita ni kaotia nakoimi bwa bon te Atua ngai,+ ao kam na itiaki+ ibukina bwa I itiaki.+

46 “‘Anne te tua ibukia maan, ao maan aika iai baia ni kiba, ao maan* nako aika mwamwae n te ran, ao nna ni man* aika mwamwae i aon te aba, 47 bwa e aonga ni kaokoroaki ae kamwara ma ae itiaki, ao te man ae kona ni kanaki ma te man ae aki kona ni kanaki.’”+

12 E reitia ni kangai Iehova nakoni Mote: 2 “Tuangia tibun Iteraera ni kangai, ‘Ngkana e bikoukou te aine ao e bungia natina te mwaane, e na kamwara i nanon itibong n ai arona n aki itiaki ngkana e aoraki n aine.+ 3 E na korotobibiaki te teei n te kawanibong.+ 4 E na tiku ni mwengana neiei ni kaitiakia man raraana i nanon 33 te bong. E aki riai n ringa te bwai teuana ae tabu, ao e aki riai n rin n te tabo ae tabu ni karokoa koroni bongini kaitiakana.

5 “‘Ngkana e bungia natina ae te aine, e na kamwara i nanon 14 te bong n ai arona n ana tai n aoraki n aine. E na tiku ni mwengana ni kaitiakia man raraana i nanon 66 te bong. 6 Ngkana a koro ana bong ni kaitiakia ibukin natina te mwaane ke te aine, e na uota te tiibutetei ae te mwaane ae tuai n ririki ibukin te karea ni kabuekaki,+ ao te bitin ae ataei ke te taobe ibukin te karea ni kabwarabure, nako rarikini mataroan te umwa ni botaki nakon te ibonga.* 7 E na anga te ibonga i matan Iehova ao e na karaoia ibukini karekeani kabwaraan ana bure neiei, ao e na itiaki mani waanakon raraana. Aio te tua ibukin te aine ae bungia natina te mwaane ke te aine. 8 Ma ngkana e aki tau ana bwai ibukini kabooan te tiibu, e riai ngkanne n anai taobe aika uoman ke bitin aika uoman aika ataei,+ temanna ibukin te karea ni kabuekaki ao are temanna ibukin te karea ni kabwarabure, ao e na karaoia te ibonga ibukini karekeani kabwaraan ana bure neiei, ao e na itiaki.’”

13 E reitia ni kangai Iehova nakoni Mote ma Aaron: 2 “Ngkana e riki te tibu ke te kunnikone ke te tango i aoni kunin* te aomata, ae e kona n riki bwa te aoraki ae te rebera*+ i aoni kunna, e riai ngkanne ni kairaki nakon Aaron are te ibonga ke nakon temanna mai buakoia natina mwaane, ake ibonga.*+ 3 E na tuoa te tabo are rotaki n te kun te ibonga. Ngkana e a mainaina buraen te tabo ane rotaki anne ao e matenten taraana i aan te kun, ao bon te aoraki ae te rebera. E na tuoa te baenne te ibonga ao n atonga te aomata anne bwa e kamwara. 4 Ma ngkana e mainaina te tango are i aoni kunna ao e aki matenten taraana i aan te kun, ao e aki bitaki buraena nakon te mainaina, ao e na kaokoroa te aomata ane reke irouna te aoraki anne te ibonga i nanon itibong.+ 5 Ao te ibonga e na tuoa te aomata anne n te kaitiua ni bong, ao ngkana e a taraa n toki te tabo ane rotaki anne ao e a aki rakanako i aon te kun, e na manga kaokoroa te aomata anne te ibonga i nanon itibong riki.

6 “E riai te ibonga ni manga tuoa te aomata anne n te kaitiua ni bong, ao ngkana e a kani mauna te tabo ane rotaki anne ao e a aki rakanako n te kun, e na atonga te aomata anne te ibonga bwa e a itiaki.+ Bon tii te kunnikone te baei. E na kaitiakii kunnikaina te aomata anne ao e na itiaki. 7 Ma ngkana e bon rakanako te kunnikone* anne i aon te kun, imwin ae e kaoti te aomata anne i matan te ibonga ibukin atongana bwa e a itiaki, e na manga kaoti riki* i matan te ibonga. 8 E na tuoa te baenne te ibonga, ao ngkana e rakanako te kunnikone anne n te kun, ao te ibonga e na atonga te aomata anne bwa e kamwara. Bon te rebera te baei.+

9 “Ngkana e riki te aoraki ae te rebera iroun te aomata, ao e riai ni kairaki nakon te ibonga, 10 ao e na tuoa te ibonga.+ Ngkana iai te tibu ae mainaina i aon te kun ao e a mainaina buraena* ao iai te maneka n te tibu anne,+ 11 bon te rebera ae kakaiaki i aoni kunna, ao te ibonga e na atonga te aomata anne bwa e kamwara. E aki riai ni kaokoroa+ bwa e na taraaki riki, bwa e a ataaki bwa e kamwara. 12 Ngkana e riki te rebera ni kunna ni kabutaa, ao e a buta te aoraki anne ni kunin te aomata anne mai atuna ni karokoa waena, n aron are e kona n noria te ibonga, 13 ao e tuoa te ibonga ao e noria bwa e a buta kunna n te rebera, e na atonga ngkanne te aomata are aoraki bwa e a itiaki.* E a mainaina kunna ni kabane ao e a itiaki. 14 Ma n te tai are e kaoti iai te maneka ni kunna, ao e na kamwara. 15 Ngkana e nora te maneka te ibonga, ao e na atonga te aomata anne bwa e kamwara.+ E kamwara te maneka anne. Bon te rebera te baei.+ 16 Ma ngkana e a manga mainaina te maneka anne, ao e na kawara te ibonga te aomata anne. 17 E na tuoa te aomata anne te ibonga,+ ao ngkana e a mainaina te tabo ane rotaki anne, ao te ibonga e na atonga te aomata are aoraki bwa e a itiaki. E a itiaki.

18 “Ngkana e riki te kaboa i aoni kunin te aomata ao e a manga mao, 19 ma ngkana e riki te tibu ae mainaina ke te tango ae uraura ni mainaina n te tabo are e riki iai te kaboa, ao e riai ni kaoti te aomata anne iroun te ibonga. 20 E na tuoa te baenne te ibonga,+ ao ngkana e matenten taraana i aan te kun ao e a mainaina buraena, e na atonga te aomata anne te ibonga bwa e kamwara. Bon te aoraki ae te rebera te baei ae riki i nanon te kaboa. 21 Ma ngkana e tuoa te baenne te ibonga ao e noria bwa akea buraena ae mainaina ao e aki matenten taraana i aan te kun ao e a kani mauna, e na kaokoroa te aomata anne te ibonga i nanon itibong.+ 22 Ao ngkana e a otara bwa e rakanako i aon te kun, ao te ibonga e na atonga te aomata anne bwa e kamwara. Bon te aoraki te baei. 23 Ma ngkana e tiku n arona te tango n aki rakanako, ao bon tii tibutauan te kaboa, ao te ibonga e na atonga te aomata anne bwa e a itiaki.+

24 “Ke ngkana iai temanna ae bue ao e a reke iai te mwaka, ao e a riki te maneka are man te bue bwa te tango ae uraura ni mainaina ke ae mainaina, 25 ao e na tuoa te baenne te ibonga. Ngkana e a mainaina buraen te tango ao e matenten taraana i aan te kun, ao bon te rebera te baei ae riki i nanon te mwaka, ao te ibonga e na atonga te aomata anne bwa e kamwara. Bon te aoraki ae te rebera te baei. 26 Ma ngkana e tuoa te baenne te ibonga ao e noria bwa akea te burae ae mainaina n te tango, ao e aki matenten taraana i aan te kun ao e a kani mauna, e na kaokoroa te aomata anne te ibonga i nanon itibong.+ 27 Ao te ibonga e na tuoa te aomata anne n te kaitiua ni bong, ao ngkana e a otara bwa e rakanako i aon te kun, ao te ibonga e na atonga te aomata anne bwa e kamwara. Bon te aoraki ae te rebera te baei. 28 Ma ngkana e bon tiku n arona te tango anne n aki rakanako i aon te kun ao e a kani mauna, bon tii tibuni ngkanne te mwaka, ao e na atonga te aomata anne te ibonga bwa e itiaki, ibukina bwa bon tibun te mwaka.

29 “Ngkana iai te tabo ae rotaki i aon atun ke bwangen te mwaane ke te aine, 30 ao te ibonga e na tuoa te tabo ane rotaki anne.+ Ngkana e matenten taraana i aan te kun, ao e a meamea ma ni mareare irana,* ao te ibonga e na atonga te aomata anne bwa e kamwara. E rotaki oin te ira ke te buai. Bon te rebera ae riki n te atu ke n te bwange. 31 Ma ngkana e nora te tabo are rotaki te ibonga bwa e aki matenten taraana i aan te kun ao akea te ira ae roroo iai, ao e riai te ibonga ni kaokoroa te aomata ane aoraki anne i nanon itibong.+ 32 E na tuoa te tabo are rotaki te ibonga n te kaitiua ni bong, ao ngkana e aki rakanako te tabo are rotaki, ao akea te ira ae meamea ae riki iai ao e aki matenten taraana i aan te kun, 33 e riai ngkanne n imana irannatuna ma buaina te aomata anne, ma e na aki imana te tabo are rotaki, ao te ibonga e na kaokoroa te aomata ane rotaki anne i nanon itibong.

34 “E na tuoa riki te tabo are rotaki te ibonga n te kaitiua ni bong, ao ngkana e aki rakanako i aon te kun te tabo are rotaki i oin te ira ao n te buai, ao e aki matenten taraana i aan te kun, ao te ibonga e na atonga te aomata anne bwa e itiaki, ao e riai ni kaitiakii kunnikaina ao e na itiaki. 35 Ma ngkana e a otara bwa e rakanako i aon te kun te tabo ane rotaki anne imwin atongana iroun te ibonga bwa e a itiaki, 36 ao te ibonga e na tuoa te aomata anne, ao ngkana e rakanako i aon te kun te tabo are rotaki, ao e aki riai te ibonga ni kakaaea te ira ae meamea, bwa e kamwara te aomata anne. 37 Ma ngkana e oti n te tutuo bwa e aki rakanako te tabo are rotaki ao e a bwebwe iai te ira ae roroo, e a mao ngkanne te tabo are rotaki. E a itiaki te aomata anne, ao e na atongnga te ibonga bwa e a itiaki.+

38 “Ngkana a riki taango i aoni kunin* te mwaane ke te aine, ao a mainaina taango akanne, 39 ao e na tuoi te ibonga,+ ao ngkana a a kani mauna mainainan taango akanne, ao bon tii te kiritibutibu ae riki i aon te kun. E itiaki te aomata anne.

40 “Ngkana ai akea iran te mwaane ao e a mara, ao e itiaki teuanne. 41 Ngkana ai akea irana are i moan atuna ao e a mara, ao e itiaki teuanne. 42 Ma ngkana e riki te kinaka ae uraura ni mainaina i aoni maran taubukin te atu ke ni marani moan te atu, ao bon te rebera ae riki ni maran taubukin atun teuanne ke ni moan atuna. 43 E na tuoa teuanne te ibonga, ao ngkana e uraura ni mainaina tibun te tabo ane rotaki anne i aoni maran taubukin atuna ke ni marani moan atuna, ao kaanga taraan te rebera i aoni kunna, 44 ao bon te rebera teuanne. E kamwara ao e riai te ibonga n atongnga bwa e kamwara bwa e rebera atuna. 45 A riai n raeuaaki kunnikain te aomata ae rebera ae reke irouna te aoraki aei, ao e riai n uakaka irannatuna, ao e riai n rabuna wina* ao n tatakarua ni kangai, ‘I kamwara, I kamwara!’ 46 E na kamwara i nanon taai ni kabane ake e aoraki iai. E riai ni maeka ni kararoaa kioina ngkai e kamwara. E na mamaeka i tinanikun te kaembwa.+

47 “Ngkana e rotaki te kunnikai n te aoraki ae te rebera ae tao buraen te tiibu ke te kunnikai ae te rinen, 48 ke karain te kunnikai ae te rinen ae rarangaaki,* ke buraen te man, ke kunin te man, ke te bwai teuana ae karaoaki mani kunin te man, 49 ao ngkana e riki te memea ae babobo ni kiriin ke n uraura man te aoraki are e rotaki iai te kunnikai, kunin te man, ke karain te kunnikai ae rarangaaki, ke te bwai teuana ae karaoaki mani kunin te man, e bon ewekaki te kunnikai n te rebera, ao e riai ni kaotaki nakon te ibonga. 50 E na tuoa te baenne te ibonga, ao e riai ni kaokoroa te bwai are mena i aona te baenne i nanon itibong.+ 51 Ngkana e tuoa te baenne n te kaitiua ni bong ao e noria bwa e rakanako n te kunnikai, ni karain te kunnikai ae rarangaaki, ke ni kunin te man (n aki ongeia bwa e kabonganaaki n tera kunin te man anne), ao bon te aoraki ae ewewe te rebera anne, ao e kamwara te baenne.+ 52 E riai ni kabueka te kunnikai ke karain te kunnikai ae rarangaaki ae buraen te man, ke te rinen ae rarangaaki, ke te bwai teuana ae karaoaki mani kunin te man are tao e riki iai te aoraki anne, bwa bon te rebera ae ewewe. E riai ni kabuekaki n te ai te baenne.

53 “Ma ngkana e tuoa te ibonga ao e aki rakanako te aoraki anne n te kunnikai ke ni karain te kunnikai ae rarangaaki ke n te bwai teuana ae karaoaki mani kunin te man, 54 e na tua ngkanne te ibonga bwa a riai ni kaitiaka te bwai are rotaki n te rebera, ao e na kaokoroa i nanon itibong riki. 55 E na tuoa te baere rotaki te ibonga imwini kaitiakana raoi. Ngkana e aki bitaki taraana e ngae naba ngkana e tuai n rakanako, e boni kamwara te baenne. Ko riai ni kabuekia n te ai ibukina bwa e a kanakinako mai nanona ke mai tinanikuna.

56 “Ma ngkana e tuoa te ibonga ao e a kani mauna te tabo are rotaki imwini kaitiakana raoi, e na raeuaa ngkanne ni kanakoa te tabo are rotaki i aon te kunnikai, ke ni kunin te man, ke ni karain te kunnikai ae rarangaaki. 57 Ma ngkana bon iai naba te baenne n te tabo teuana i aon te kunnikai, ke ni karain te kunnikai ae rarangaaki ke n te bwai teuana ae karaoaki mani kunin te man, e bon rakanako te rebera anne ao ko riai ni kabueka te bwai ane rotaki n te rebera n te ai.+ 58 Ma ngkana e mauna te rebera man te kunnikai, ke karain te kunnikai ae rarangaaki ke te bwai teuana ae karaoaki mani kunin te man are ko kaitiakia, ao e riai ni manga kaitiakaki kaua ao e na itiaki.

59 “Anne tuan te aoraki ae te rebera n te kunnikai ae buraen te tiibu, ke n te kunnikai ae te rinen, ke ni karain te kunnikai ae rarangaaki, ke n te bwai teuana ae karaoaki mani kunin te man, bwa e aonga n atongaki bwa e itiaki ke e kamwara.”

14 E reitia ni kangai Iehova nakoni Mote: 2 “E na riki aei bwa te tua ibukin te aomata ae rebera n te bong ae e karaoa iai kaitiakana, n te tai are e riai ni kairaki iai nakon te ibonga.*+ 3 E na nako tinanikun te kaembwa te ibonga ao e na tuoa. Ngkana e a toki reberan te aomata ane rebera anne, 4 e na tua te ibonga nakon te aomata arei bwa e na uotii mannikiba aika uoman aika maiu aika itiaki, ao mwaangan te kai ae te tiira, ao te kunnikai ae uraroo,* ao te utoba,* ibukini kaitiakana.+ 5 E na tua te ibonga bwa e na kamateaki te mannikiba temanna i nanon te bwaata ae te kaatibu ae kanoana te ran man te koburake n ran. 6 Ma e riai n anaa te mannikiba are maiu, n ikotaki ma mwaangan te kai are te tiira, ao te kunnikai are uraroo, ao te utoba, ao e na kaai ni kateboi ma te mannikiba are maiu i nanon raraan te mannikiba are kamateaki i etan te ran man te koburake n ran. 7 Ao e na katimtimwa te raraa itiua te tai i aon te aomata ibukini kaitiakana man te rebera, ao e na atongnga bwa e a itiaki, ao e na kakibanakoa te mannikiba are maiu nakon te tawaana.+

8 “E riai ni kaitiakii kunnikaina te aomata are kaitiakia ao e na imana rabwatana ni kabane, ao e na tebotebo n te ran ao e na itiaki. E a kona n nakon te kaembwa imwina, ma e na mamaeka i tinanikun ana umwanrianna i nanon itibong. 9 E riai n imana irannatuna ni kabane ao buaina ao ana ari n te kaitiua ni bong. Imwin imanakin rabwatana ni kabane, ao e na kaitiakii kunnikaina ao e na tebotebo n te ran, ao e na itiaki.

10 “N te kawanibong ao e na anai tiibu mwaane aika uoman aika ataei aika marurung raoi, temanna te tiibutetei ae te aine ae marurung raoi+ ae tuai n ririki, tenua katebwinani mwakoron te eba* ni burawa ae mte ae renganaki ma te oera bwa te karea ae te amwarake,+ ao teuana te roka* ni bwaa,+ 11 ao te ibonga are atonga te aomata are e na kaitiakaki bwa e a itiaki, e na kaota te aomata anne n ikotaki ma taiani karea i matan Iehova i rarikini mataroan te umwa ni botaki. 12 E na kaira temanna te tiibu mwaane ae ataei te ibonga ao e na anga n ikotaki ma te roka ni bwaa bwa te karea ni kabooa mwin te bure,+ ao e na katiotioi bwa te karea ni katiotioaki i matan Iehova.+ 13 Ao e na kamatea te tiibu mwaane ae ataei n te tabo are e kakamateaki iai te karea ni kabwarabure ao te karea ni kabuekaki,+ n te tabo ae tabu, ibukina bwa bon tibwangan te ibonga te karea ni kabooa mwin te bure n ai aron te karea ni kabwarabure.+ Bon te bwai ae moan te tabu te baei.+

14 “E na anaa ngkanne teutana raraan te karea ni kabooa mwin te bure te ibonga, ao e na kabira iai aon reben taningan te aomata are e na kaitiakaki are te atai, ao aoni waebuani baina are te atai ao aoni waebuani waena are te atai. 15 Ao e na anaa teutana te roka ni bwaa te ibonga+ ao e na kabwaroa bon i nanoni baina are te maing. 16 E na kateboa ngkanne tabonibaina are te atai te ibonga n te bwaa are i nanoni baina are te maing, ao e na katimtimwa teutana man te bwaa anne n tabonibaina itiua te tai i matan Iehova. 17 Ao te ibonga e na kabira aon reben taningan te aomata are te atai ibukini kaitiakana, man nikiran te bwaa teutana are i nanoni baina, ao aoni waebuani baina are te atai ao aoni waebuani waena are te atai, i aon raraan te karea ni kabooa mwin te bure. 18 Ao te ibonga e na kaaki nikiran te bwaa are i nanoni baina i aon atun te aomata are e na kaitiakaki, ao e na karaoia ibukini karekeani kabwaraan ana bure te aomata anne i matan Iehova.+

19 “E na anga te karea ni kabwarabure te ibonga+ ibukini karekeani kabwaraan ana bure te aomata are e na kaitiakaki mani kamwaraana, ao imwina e na kamatea te karea ni kabuekaki. 20 Ao e na anga te karea ni kabuekaki te ibonga ao te karea ae te amwarake+ i aon te baonikarea, ao e na karaoia te ibonga ibukini karekeani kabwaraan ana bure te aomata anne,+ ao e na itiaki.+

21 “Ma ngkana e maiu ni kainnano ao e aki tau ana bwai, ao e na anaa temanna te tiibu mwaane ae ataei bwa te karea ni kabooa mwin te bure ao e na riki bwa te karea ni katiotioaki, bwa e aonga ni karaoaki karekeani kabwaraan ana bure te aomata anne, n ikotaki ma teuana katebwinani mwakoron te eba* ni burawa ae mte ae renganaki ma te oera bwa te karea ae te amwarake, ao teuana te roka ni bwaa, 22 ao taobe aika uoman ke bitin aika uoman aika ataei n aron are e kona ni kabooi. E na riki are temanna bwa te karea ni kabwarabure ao are temanna bwa te karea ni kabuekaki.+ 23 N te kawanibong+ ao e na uotii baikai nakon te ibonga i rarikini mataroan te umwa ni botaki i matan Iehova ibukini karaoani kaitiakana.+

24 “E na kaira te tiibu mwaane ae ataei te ibonga are te karea ni kabooa mwin te bure+ ao te roka ni bwaa, ao e na katiotioi te ibonga bwa te karea ni katiotioaki i matan Iehova.+ 25 E na kamatea ngkanne te tiibu mwaane ae ataei are te karea ni kabooa mwin te bure, ao e na anaa teutana raraan te karea ni kabooa mwin te bure te ibonga, ao e na kabira iai aon reben taningan te aomata are te atai ibukini kaitiakana, ao aoni waebuani baina are te atai ao aoni waebuani waena are te atai.+ 26 E na kabwaroa teutana te bwaa te ibonga bon i nanoni baina are te maing,+ 27 ao e na katimtimwa teutana te bwaa are mena i nanoni baina are te maing itiua te tai i matan Iehova, n tabonibaina are te atai. 28 Ao e na kabira aon reben taningan te aomata are te atai ibukini kaitiakana, n teutana te bwaa are i nanoni baina, ao aoni waebuani baina are te atai ao aoni waebuani waena are te atai, i aon taabo ake e kaaki iai raraan te karea ni kabooa mwin te bure. 29 E na kabwaroa nikiran te bwaa te ibonga are i nanoni baina i aon atun te aomata are e na kaitiakaki, bwa e aonga ni karaoa karekeani kabwaraan ana bure te aomata anne i matan Iehova.

30 “E na anga temanna mai buakoia taobe aika uoman ke temanna mai buakoia bitin aika uoman aika ataei, n aron are e kona ni kabooi te aomata are e na kaitiakaki,+ 31 temanna bwa te karea ni kabwarabure ao are temanna bwa te karea ni kabuekaki.+ E na anga taiani karea aikai n ikotaki ma te karea ae te amwarake, ao e na karaoia te ibonga ibukini karekeani kabwaraan ana bure te aomata are e na kaitiakaki i matan Iehova.+

32 “Aio te tua ibukin te aomata ae rebera, ma e aki tau ana bwai ni karekea ae kainnanoaki ibukini karaoani kaitiakana.”

33 Ao e taku Iehova nakoni Mote ma Aaron: 34 “Ngkana kam roko n te aba ae Kanaan+ ae I anganingkami bwa abami,+ ao N na kariaia rokon te aoraki ae te rebera n te auti ane i abami,+ 35 ao e riai ni kawara te ibonga te aomata are ana auti anne ao e na tuangnga ni kangai, ‘Iai te bwai ae oti n oon au auti ae kaanga taraan te rebera.’ 36 E na tua te ibonga bwa a na kanakoaki bwain te auti imwain rokona n tuoa te baerei, bwa e aonga n aki atongi bwaai ni kabane ake n te auti bwa a kamwara, ao imwin anne e na rin te ibonga n tuoa te auti. 37 E na tuoa te tabo are rotaki, ao ngkana a babobo ni kiriin ke n uraura oon te auti, ao taraani baikai a rinnako rinanon oon te auti, 38 e na otinako ngkanne te ibonga mani mataroan te auti ao e na kaina te auti i nanon itibong.+

39 “Ao e na manga oki te ibonga n te kaitiua ni bong ao e na karaoa ana tutuo, ao ngkana e rakanako te baenne n oon te auti, 40 e na tua te ibonga bwa a riai n uruakaki atibu ake a rotaki, ao ni karenakoaki i tinanikun te kaawa n te tabo are a kakarenakoaki iai baika kamwara. 41 Ao e na tua bwa e na kakaaraki raoi nanon te auti ao e riai ni kabwaroaki kabiran te oo ao te bokaboka are kaaraki ni kanakoaki, i tinanikun te kaawa n te tabo are a kakarenakoaki iai baika kamwara. 42 Ao a na karin atibu ake tabeua n te tabo are a mena iai atibu ake a koutii, ao e riai ni kabongana te bokaboka ae boou ao e na tua bwa e na kabiraki iai te auti.

43 “Ma ngkana e a manga oki naba te baenne ao e a manga riki n te auti imwin taekakin atibu ao kaarakin te bokaboka man te auti, ao imwini manga kabirana, 44 ao e na rinnako te ibonga ao e na tuoa. Ngkana e rakanako te baenne n te auti, ao bon te rebera ae ewewe+ n te auti. E kamwara te auti anne. 45 E na tua ngkanne kabwakaan te auti, ae atibuna, kaina, kabirana ni kabane ma te bokaboka are n te auti, ao a na uotaki nako tinanikun te kaawa nakon te tabo are a kakarenakoaki iai baika kamwara.+ 46 Ma e na kamwara ni karokoa ae bong+ ane e rin n te auti anne,+ ni boong ake e kainaki iai, 47 ao e riai ni kaitiakii kunnikaina ane e wene n te auti anne ao ane e amwarake iai.

48 “Ma ngkana e roko te ibonga ao e noria bwa e aki rakanako te baenne n te auti imwini manga kabirakina, ao e na atonga te auti anne te ibonga bwa e a itiaki, ibukina bwa e a mauna te baenne. 49 E na anai mannikiba aika uoman, mwaangan te kai ae te tiira, te kunnikai ae uraroo, ao te utoba, ibukini kaitiakan te auti anne mani kamwaraana.*+ 50 E na kamatea temanna te mannikiba i nanon te bwaata ae te kaatibu ae kanoana te ran man te koburake n ran. 51 Ao e na anaa mwaangan te kai are te tiira, te utoba, te kunnikai are uraroo, ao te mannikiba are maiu, ao e na kateboi i nanon raraan te mannikiba are kamateaki ao i nanon te ran man te koburake n ran, ao e na katimtimwa te raraa itiua te tai ni kaitaraa te auti anne.+ 52 Ao e na kaitiaka te auti mani kamwaraana,* n raraan te mannikiba, te ran man te koburake n ran, te mannikiba are maiu, mwaangan te kai ae te tiira, te utoba, ao te kunnikai ae uraroo. 53 Ao e na kakibanakoa te mannikiba are maiu nako tinanikun te kaawa n te tawaana, ao e na karaoia ibukini kaitiakan te auti man te bure, ao e na itiaki.

54 “Anne te tua ni kaineti ma te aoraki ae te rebera, rotakin oin te ira ke te buai,+ 55 te rebera n te kunnikai+ ke n te auti,+ 56 ao ni kaineti ma te kiritibutibu, te kunnikone, ao te tango,+ 57 bwa e aonga n ataaki te bwai bwa e kamwara ke e itiaki.+ Aio te tua ibukin te aoraki ae te rebera.”+

15 E reitia ni kangai Iehova nakoni Mote ma Aaron: 2 “Taetae nakoia tibun Iteraera ao tuangia ni kangai, ‘Ngkana iai te mwaane ae iai te bae waanako mani mwaanena,* ao e kamwara man te baene waanako anne.+ 3 E kamwara teuaei man te bae waanako aei, e ngae ngke e teimatoa ni waanako te baenne mani mwaanena ke e a bono mwaanena iai, ma e boni kamwara naba teuaei.

4 “‘A na kamwara nne ni wene nako ake e wene iai te aomata ae iai te bae waanako mairouna, ao a na kamwara bwaai nako ake e tekatekani. 5 E riai ni kaitiakii kunnikaina te mwaane ae ringa nnen teuaei ni wene, ao e riai n tebotebo n te ran ao e na kamwara ni karokoa ae bong.+ 6 E riai ni kaitiakii kunnikaina ane e tekateka i aon te bwai ae e a tia n tekatekanna te aomata ae iai te bae waanako mairouna, ao e na tebotebo n te ran, ao e na kamwara ni karokoa ae bong. 7 E riai ni kaitiakii kunnikaina ane e ringa rabwatan te aomata are iai te bae waanako mairouna, e na tebotebo n te ran, ao e na kamwara ni karokoa ae bong. 8 Ngkana e bawareaki te aomata ae itiaki iroun teuare iai te bae waanako mairouna, ao e riai ni kaitiakii kunnikaina te aomata anne, e na tebotebo n te ran, ao e na kamwara ni karokoa ae bong. 9 A na kamwara kaintoka nako ake i aoia maan ake e tokari te aomata are iai te bae waanako mairouna. 10 E na kamwara ni karokoa ae bong ane e ringi bwaai nako ake e a tia n tekatekani teuaei, ao e na kaitiakii kunnikaina ane e uouotii baikai, e na tebotebo n te ran, ao e na kamwara ni karokoa ae bong. 11 E na kaitiakii kunnikaina te aomata are e ringaki iroun teuare iai te bae waanako mairouna+ ao e tuai n teboki baina n te ran, e na tebotebo n te ran te aomata anne, ao e na kamwara ni karokoa ae bong. 12 E riai n ibeaki te bwainnamwarake ae te kaatibu ae e ringnga te aomata are iai te bae waanako mairouna, ao a riai n ireaki n te ran bwainnamwarake nako ake a karaoaki man te kai.+

13 “‘Ngkana e a toki te bae waanako ao e a itiaki man te baenne te aomata, e na wareka ngkanne itibong ibukini kaitiakana, ao e riai ni kaitiakii kunnikaina, ma n tebotebo n te ran man te koburake n ran, ao e na itiaki.+ 14 Ao n te kawanibong e riai n anai taobe aika uoman ke bitin aika uoman aika ataei,+ ao e na nako matan Iehova i rarikini mataroan te umwa ni botaki ao e na anga baikai nakon te ibonga.* 15 Ao e na anga baikai te ibonga, temanna bwa te karea ni kabwarabure ao are temanna bwa te karea ni kabuekaki, ao e na karaoia te ibonga ibukini karekeani kabwaraan ana bure teuaei i matan Iehova ni kaineti ma te bae waanako mairouna.

16 “‘Ngkana e nako ana tari te mwaane mairouna, ao e riai n teboka rabwatana ni kabane n te ran ao e na kamwara ni karokoa ae bong.+ 17 E riai ni kaitiakii n te ran kunnikai nako ma kunin nako te man ake e mena te tari i aoia, ao e na kamwara te baei ni karokoa ae bong.

18 “‘Ngkana e wene n taanga te mwaane ma te aine ao e nako ana tari, ao a riai n tebotebo n te ran ao a na kamwara ni karokoa ae bong.+

19 “‘Ngkana iai te bae waanako mairoun te aine ae te raraa ao e riai n tiku n aki itiaki i nanon itibong ibukin aorakina n aine.+ Ane e ringa neiei e na kamwara ni karokoa ae bong.+ 20 A na kamwara bwaai nako ake e wene i aoia n ana tai n aki itiaki n aorakina n aine, ao a na kamwara bwaai nako ake e tekatekani.+ 21 E riai ni kaitiakii kunnikaina ane e ringa nnen neiei ni wene, e na tebotebo n te ran, ao e na kamwara ni karokoa ae bong. 22 E riai ni kaitiakii kunnikaina ane e ringi bwaai nako ake e tekatekani neiei, e na tebotebo n te ran, ao e na kamwara ni karokoa ae bong. 23 E na kamwara ni karokoa ae bong ane e ringa te nne ni wene ke te bwai riki teuana ae e tekatekanna neiei.+ 24 Ao ngkana e wene n taanga te mwaane ma neiei ao e mena i aona raraan neiei man aorakina n aine,+ ao e na kamwara teuaei i nanon itibong, ao a na kamwara nne ni wene nako ake e wene iai teuaei.

25 “‘Ma ngkana e waanako raraan te aine ni boong aika bati+ n te tai ae tiaki raoi ana tai n aoraki n aine,+ ke ngkana e a maan riki waanakon raraana nakon ana tai n aoraki n aine ae taneiai iai, e na kamwara ni boong ni kabane ake e waanako iai, n arona n aki itiaki n ana bongi n aoraki n aine. 26 A na riki nne ni wene nako ake e wene iai ni boong ake iai te bae waanako mairouna, bwa nnena ni wene n aoraki n aine,+ ao a na kamwara bwaai nako ake e tekatekani n aron aki itiakin aorakina n aine. 27 E na kamwara ane e ringi baikai, ao e riai ni kaitiakii kunnikaina, e na tebotebo n te ran, ao e na kamwara ni karokoa ae bong.+

28 “‘Ma ngkana e a toki te bae waanako mairouna, ao e na wareka itibong imwin tokin te baere waanako, ao imwina e na itiaki.+ 29 Ao n te kawanibong e riai n anai taobe aika uoman ke bitin aika uoman aika ataei,+ ao e na uotii nakon te ibonga i rarikini mataroan te umwa ni botaki.+ 30 E na karaoa are temanna te ibonga bwa te karea ni kabwarabure ao are temanna bwa te karea ni kabuekaki, ao e na karaoia te ibonga ibukini karekeani kabwaraan ana bure neiei i matan Iehova, ni kaineti ma te bae kamwara are waanako mairouna.+

31 “‘Mangaia ae kam na buokiia tibun Iteraera bwa a aonga n itiaki, ao a aonga n aki mate ni kaineti ma kamwaraia ibukini kamwaraean au umwanrianna ae tabu* are mena i buakoia.+

32 “‘Anne te tua ibukin te mwaane ae iai te bae waanako mairouna, ao te mwaane ae nako ana tari n te aro are e a kamwara iai,+ 33 ao te aine ae kamwara ni kaineti ma aorakina n aine,+ ao te mwaane ke te aine ae iai te bae waanako mairouna,+ ao te mwaane ae wene n taanga ma te aine n ana tai ni kamwara.’”

16 E taetae Iehova nakoni Mote imwini mateia natin Aaron ake mwaane ake uoman, ake a mate bwa a kaania Iehova n te aro ae aki riai.+ 2 E taku Iehova nakoni Mote: “Tuanga Aaron are tarim bwa e aki kona n rin n taai ake e bon taku n te tabo ae tabu+ i akun te keeten+ ao n tei i matan rabunan te Ati bwa e kaawa ni mate,+ bwa N na kaoti n te nang+ i etan rabunan te Ati.+

3 “E riai n rinnako Aaron n te tabo ae tabu ma baikai: te kao mwaane ae ataei bwa te karea ni kabwarabure,+ ao te tiibu mwaane bwa te karea ni kabuekaki.+ 4 E riai ni karina te kamwarai ae te rinen ae tabu+ ao te kawaerake* ae te rinen,+ ao e riai ni kabaea nukana n te kabaea n nuka ae te rinen+ ao n ninira atuna n te bwara ae te kunnikai ae te rinen.+ A tabu kunnikai aikai.+ E na tebotebo n te ran+ ma ni karin i aona.

5 “E riai n anai man te botaki n aomata aika tibun Iteraera+ kooti mwaane aika ataei aika uoman bwa te karea ni kabwarabure, ao temanna te tiibu mwaane bwa te karea ni kabuekaki.

6 “Ao e riai n anga te kao mwaane Aaron ae te karea ni kabwarabure ibukina, ao e na karaoia ibukini karekeani kabwaraan ana bure+ ma kaaini batana.

7 “Ao e na anai kooti aika uoman ao e na kateiia i matan Iehova i rarikini mataroan te umwa ni botaki. 8 E na ukoukora te kanikina* mairoun te Atua Aaron i aoia kooti ake uoman, teuana ibukin Iehova ao teuana ibukin Atatera.* 9 E na anga Aaron te kooti ibukin Iehova are reke n te kanikina+ anne, ao e na karaoia bwa te karea ni kabwarabure. 10 Ma e riai ni kairaki ao ni kateaki i matan Iehova te kooti are maiu are reke ibukin Atatera n te kanikina mairoun te Atua, bwa e na karaoaki i aona karekean te kabwarabure, bwa e aonga ni kanakoaki nakon te rereua ibukin Atatera.+

11 “E na anga te kao mwaane Aaron are te karea ni kabwarabure ibukina, ao e na karaoia ibukini karekeani kabwaraan ana bure ma kaaini batana, ao imwina e na kamatea te kao mwaane are te karea ni kabwarabure ibukina.+

12 “E na uota ngkanne te baan ae nneni mwaakaron te ai+ ae onrake n taiani mwaakaro n ai man te baonikarea+ mai matan Iehova, ao e na kaoni baina ni kauaai ni baika boiarara aika mte,+ ao e na uotii nako akun te keeten.+ 13 E na kaaki naba baika boiarara i aon taiani mwaakaro n ai i matan Iehova,+ ao e na buta aon rabunan te Ati ni Berita+ ni bubuni baika boiarara,+ bwa e aonga n aki mate.

14 “E na anaa teutana raraan te kao mwaane+ ao e na katimtimmwa n tabonibaina i matan rabunan te Ati i mainikuna, ao e na katimtimwa teutana te raraa n tabonibaina, itiua te tai i matan rabunan te Ati.+

15 “E na kamatea ngkanne te kooti ae te karea ni kabwarabure, are ibukia aomata,+ ao e na uota raraana nako akun te keeten+ ao e na katimtimwa te raraa+ anne i matan rabunan te Ati, n aron are e karaoia nakon raraan te kao mwaane.

16 “E riai ni karaoia ibukini kaitiakan te tabo ae tabu man te bure ni kaineti ma aia mwakuri aika kamwara tibun Iteraera ma aia kairua ao aia bure,+ ao anne te aro ae e riai ni karaoia ibukin te umwa ni botaki are tei i buakoia i buakon aia mwakuri aika kamwara.

17 “Akea te aomata temanna ae riai ni mena i nanon te umwa ni botaki man te tai are e rin iai Aaron ni karaoa karekeani kabwaraan te bure n te tabo ae tabu ni karokoa ae e otinako. E na karaoia ibukini karekeani kabwaraan te bure ibukina ma kaaini batana+ ao ibukin te botaki n aomata aika tibun Iteraera.+

18 “Ibukini karekeani kaitiakan te baonikarea man te bure, e na otinako nakon te baonikarea+ are i matan Iehova, ao e na anaa teutana raraan te kao mwaane ao teutana raraan te kooti, ao e na kabiri kooro ake n te baonikarea n iterana nako. 19 E na katimtimwa naba teutana te raraa i aon te baonikarea itiua te tai n tabonibaina, ao ni kaitiakia ao ni katabua man aia mwakuri aika kamwara tibun Iteraera.

20 “Ngkana e a tia ni karaoia ibukini kaitiakan+ te tabo ae tabu ao te umwa ni botaki ao te baonikarea+ man te bure, e na anga naba te kooti are maiu.+ 21 E na kaaki baina Aaron ni kauaai i aon atun te kooti are maiu, ao ni kaotii i aona aia kairua nako tibun Iteraera, ao aia aki ongeaba ni kabane, ao aia bure nako, ao e na kaaki i aon atun te kooti+ ao e na kanakoa nakon te rereua ni bain te aomata ae mwiokoaki bwa e na karaoa aei.* 22 E na uotii aia kairua ni kabane i aona te kooti anne+ nakon te aba ae rereua,+ ao e na kanakoa te kooti nakon te rereua.+

23 “E na rin ngkanne Aaron n te umwa ni botaki ao e na buutii kunnikaina aika rinen ake e karini ngke e rin n te tabo ae tabu, ao e na katikui ikekei. 24 E riai n tebotebo n te ran+ n te tabo ae tabu ao e na karini kunnikaina,+ ao e na otinako n anga ana karea ni kabuekaki+ ao aia karea ni kabuekaki aomata,+ ao e na karaoia ibukini karekeani kabwaraan ana bure ao aia bure aomata.+ 25 E na kabueka mwaeten te karea ni kabwarabure ni kabubua i aon te baonikarea.

26 “E riai ni kaitiakii kunnikaina teuare kanakoa te kooti ibukin Atatera+ ao e na tebotebo n te ran, ao imwina e a kona n rin n te kaembwa.

27 “Ao a na uotaki nako tinanikun te kaembwa te kao mwaane ae te karea ni kabwarabure ao te kooti ae te karea ni kabwarabure, ake a uotaki raraaia ni karinaki n te tabo ae tabu ibukini karekeani kabwaraan te bure, ao a na kabuekaki kunia ao irikoia ao nakotaaria n te ai.+ 28 E riai ni kaitiakii kunnikaina ane e kabueki baikai ao e na tebotebo n te ran, ao imwina e a kona n rin n te kaembwa.

29 “Aei te tua nakoimi ae teimatoa: Kam na kaota nanokawakimi* ibukin ami bure n te kaitiua n namwakaina ae tebwina iai bongin te namwakaina, ao kam na tai karaoa te mwakuri teuana.+ E na aki naba mwakuri tibun Iteraera ae bungiaki i buakomi ke te ianena ae maeka i buakomi. 30 E na karaoaki n te bong aei karekeani kabwaraan ami bure+ bwa kam aonga n atongaki bwa kam itiaki. Kam na itiaki man ami bure nako i matan Iehova.+ 31 Bon te bongi n taabati ae kam na motirawa iai, ao kam riai ni kaota nanokawakimi ibukin ami bure.+ Bon te tua ae teimatoa.

32 “E na karaoa karekeani kabwaraan te bure te ibonga* are kabiraki+ ma ni kateirakeaki* bwa e na beku bwa te ibonga+ n onea mwin tamana,+ ao e na karin i aona kunnikai aika rinen,+ aika kunnikai aika tabu.+ 33 E na karaoa kaitiakan te tabo ae tabu,+ te umwa ni botaki,+ ao te baonikarea+ man te bure, ao e na karaoa karekeani kabwaraan te bure ibukia ibonga ao ibukin te botaki n aomata aika tibun Iteraera.+ 34 E na riki aei bwa te tua nakoimi ae teimatoa,+ bwa e aonga ni karaoaki karekeani kabwaraan aia bure tibun Iteraera n te taina n te ririki ibukin aia bure nako.”+

Mangaia are e karaoia n aron are e tua Iehova nakoni Mote.

17 E reitia ni kangai Iehova nakoni Mote: 2 “Taetae nakon Aaron ma natina mwaane ao tibun Iteraera ni kabane, ao kangai nakoia, ‘Aio te bwai ae e tua Iehova:

3 “‘“Ngkana iai te aomata temanna mai buakoia tibun Iteraera ae e kamatea te kao mwaane ke te tiibu mwaane ae ataei ke te kooti i nanon te kaembwa, ke ngkana e kamatea i tinanikun te kaembwa, 4 ao e aki kairia nako rarikini mataroan te umwa ni botaki bwa e na anga bwa te karea nakon Iehova i matan ana umwanrianna ae tabu* Iehova, ao e na atongaki te aomata anne bwa e bure ni katuturaraa. E a tia ni katuturaraa ao e riai ni kamateaki te aomata anne. 5 E na karaoaki aei bwa a aonga n aki manga kamatei aia man tibun Iteraera n te tawaana, ma a na kairiia nakon Iehova nako rarikini mataroan te umwa ni botaki nakon te ibonga,* ao a na kareani bwa karea n raoi nakon Iehova.+ 6 Ao e na katimtimwa te raraa te ibonga i aon ana baonikarea Iehova i rarikini mataroan te umwa ni botaki, ao e na kabueka te mwaete ni kabubua bwa te boi ae boiarara* iroun Iehova.+ 7 Mangaia are a aki riai ni manga anga aia karea nakoia taimonio*+ aika ai aron te kooti, bwa a riki iai bwa aomata aika aki kakaonimaki.+ E na riki aei bwa te tua ae teimatoa nakoimi, n ami roro nako.”’

8 “Ko riai ni kangai nakoia, ‘Ngkana iai te aomata temanna mai buakoia tibun Iteraera ke te ianena ae maeka i buakomi ae e anga ana karea ni kabuekaki ke ana karea, 9 ao e aki kairia nako rarikini mataroan te umwa ni botaki bwa e na anga nakon Iehova, ao e na kamateaki te aomata anne.+

10 “‘Ngkana e kana te aeka n raraa teuana te aomata temanna mai buakoia tibun Iteraera ke te ianena ae maeka i buakomi,+ N na boni kaeta matau n ekaanako te aomata* ane kang raraa anne ao N na kamatea. 11 Bwa a mena maiuni* baika maiu i nanon te raraa,+ ao boni ngai ae I baireia bwa e na mena i aon te baonikarea+ ibukini karekeani kabwaraan ami bure, bwa bon te raraa ae karekei kabwaraani buure+ rinanon te maiu* are i nanona. 12 Anne bukina are I kangai iai nakoia tibun Iteraera: “Akea te aomata* i buakomi ae e riai ni kang raraa, ao akea te ianena temanna ae maeka i buakomi+ ae e riai ni kang raraa.”+

13 “‘Ngkana e kaeman te aomata temanna mai buakoia tibun Iteraera ke te ianena ae maeka i buakomi, ao e reke konana te man ae moaanti ke te mannikiba ae kona ni kanaki, e riai ni katutuaanako raraana+ ao n taunna n te tano. 14 Bwa maiuni* baika maiu ni kabane te raraa ibukina bwa e mena te maiu* i nanon raraaia. Mangaia are I taku nakoia tibun Iteraera: “Kam na tai kang raraani baika maiu ni kabane, bwa boni maiuni* baika maiu ni kabane raraaia. E na kamateaki ane e kanna.”+ 15 Ngkana iai te aomata* ae tibun Iteraera ae bungiaki i buakomi ke te ianena ae kana te man ae kuneaki ni mate ke ae raebitiaki iroun te man ni kaakang,+ e riai ni kaitiakii kunnikaina, e na tebotebo n te ran, ao e na kamwara ni karokoa ae bong,+ ao ngkanne e na itiaki. 16 Ma ngkana e aki kaitiakii kunnikaina ao e aki tebotebo, ao e na katuuaaeaki ibukin ana bure.’”+

18 E reitia ni kangai Iehova nakoni Mote: 2 “Taetae nakoia tibun Iteraera ao kangai, ‘Bon Iehova ngai ae Atuami.+ 3 Kam na tai karaoa te aro are a kakaraoia aomata n te aba are Aikubita are kam maeka iai, ao kam na tai karaoa te aro ae a kakaraoia aomata n te aba ae Kanaan ae I a kairingkami nako iai,+ ao kam na tai kakairi n aia tua. 4 Kam riai ni kakororaoi au moti ao kam riai ni kawakin au tua ma ni kakairi iai.+ Bon Iehova ngai ae Atuami. 5 Kam riai ni kawakin au tua ma au moti. Ane e karaoa aei ao e na maiu iai.+ Bon Iehova ngai.

6 “‘Akea te mwaane i buakomi ae e riai ni kawara temanna ae ana koraki ni kaan bwa e na wene n taanga ma ngaia.*+ Bon Iehova ngai. 7 Ko na tai wene n taanga ma tamam ke tinam. Bon tinam, ko na tai wene n taanga ma ngaia.

8 “‘Ko na tai wene n taanga ma buun tamam.+ Boni kamaamaean tamam te aro aei.*

9 “‘Ko na tai wene n taanga ma mwaanem, ae natin tamam te aine ke natin tinam te aine ae tao e bungiaki n am utu ke e aki.+

10 “‘Ko na tai wene n taanga ma tibum te aine mairoun natim te mwaane ke mairoun natim te aine, ibukina bwa bon am koraki ni kaan ao bon te aro ae ko kamaamaeaki iai.

11 “‘Ko na tai wene n taanga ma natini buun tamam ae kanoan tamam, ibukina bwa boni mwaanem neienne.

12 “‘Ko na tai wene n taanga ma mwaanen tamam. Bon ana koraki tamam ae bon raraana.+

13 “‘Ko na tai wene n taanga ma tarin tinam, bwa bon ana koraki tinam ae bon raraana.

14 “‘Ko na tai kamaamaea tarin tamam,* n arom ni wene n taanga ma buuna. Bon ai tinam neienne.+

15 “‘Ko na tai wene n taanga ma buun natim te mwaane.+ Boni buun natim te mwaane neienne, ko na tai wene n taanga ma ngaia.

16 “‘Ko na tai wene n taanga ma buun tarim,+ ibukina bwa boni kamaamaean tarim te aro aei.*

17 “‘Ngkana ko mare ma te aine temanna ao ko na tai wene n taanga ma natina te aine.+ Ko na tai buuna tibuna te aine mairoun natina te mwaane ke natina te aine, bwa ko na wene n taanga ma ngaia. Naakai bon ana koraki ni kaan neiei. Bon te mwakuri ae kammaira* te baei.

18 “‘Ko na tai buuna naba tarini buum bwa ko na wene n taanga ma ngaia, bwa e na riki bwa te buu ae te tia kaiangatoa+ ngkai e maiu tarina.

19 “‘Ko na tai kawara te aine n ana tai n aki itiaki n aorakina n aine, bwa ko na wene n taanga ma ngaia.+

20 “‘Ko na tai wene n taanga ma* buun raom* ni kamwaraeko iai.+

21 “‘Ko na tai kariaia bwa ko na anga* kanoam temanna nakoni Moreka.+ Ko na tai kamatauningaa aran Atuam n te aro anne.+ Bon Iehova ngai.

22 “‘Ko na tai wene n taanga ma te mwaane n aron ae ko wene n taanga ma te aine.+ Bon te mwakuri ae riribaaki te aro aei.

23 “‘E na tai karaobure* te mwaane ma te man ni kamwaraea iai. E aki riai naba te aine n anga ngaia nakon te man bwa e na karaobure ma ngaia.+ Bon uruan te aro ae riai te baei.

24 “‘Tai kamwaraeingkami n te bwai teuana mai buakoni baikai, bwa a a tia ni kamwaraeia ni baikai ni kabane natannaomata ake N na kakioianako mai mwaimi.+ 25 Mangaia ae e a kamwara te aba, ao N na karokoa te tuuaa i aona ibukin te bure are iai, ao e na mumutaia nako kaaina te aba.+ 26 Ma kam na kawakin au tua ma au moti,+ ao kam na tai karaoa te bwai teuana mai buakoni baika riribaaki aikai, e na tai karaoia naba tibun Iteraera ae bungiaki i buakomi ke te ianena ae maeka i buakomi.+ 27 Bwa a karaoi bwaai ni kabane aika riribaaki aikai aomata ake a maeka n te aba imwaimi,+ ao e a kamwara ngkai te aba. 28 Ao ngkai kam aki kabarekaa te aba, e na aki mumutaingkami nako te aba n aron ae e na mumutaia nako natannaomata akana imwaimi. 29 Ngkana iai aika a karaoa te bwai teuana mai buakoni baika riribaaki aikai, ao a na bane ni kamateaki aomata* ake a karaoi baikai. 30 Kam na kawakina mwiokoami irou n aki karaoa te bwai teuana mai buakoni katei aika riribaaki ake a kakaraoaki imwaimi,+ bwa kam aonga n aki kamwaraeaki ni baikai. Bon Iehova ngai ae Atuami.’”

19 E reitia ni kangai Iehova nakoni Mote: 2 “Taetae nakon te botaki n aomata aika tibun Iteraera, ao tuangia ni kangai, ‘Kam riai n itiaki* ibukina bwa I itiaki ngai ae Iehova ae Atuami.+

3 “‘Kam riai ni karinea* tinami ao tamami n tatabemaningkami nako,+ ao kam riai ni kawakin au bongi n taabati.+ Bon Iehova ngai ae Atuami. 4 Kam na aki rairaki nakoia atua aika akea manenaia+ ke ni karaoi ami bouannanti aika biiti aika kaburoaki n atoaki.+ Bon Iehova ngai ae Atuami.

5 “‘Ngkana kam na kareana te karea n raoi nakon Iehova,+ kam riai ni kareanna n te aro ae e na reke iai akoami.+ 6 E riai ni kanaki n te bong are kam angakarea iai ao n te bong naba are imwina, ma e riai ni kabuekaki n te ai nikirana are tiku nakon te katenua ni bong.+ 7 Ma ngkana e kanaki irikon te karea n te katenua ni bong, ao bon te bwai ae kamwara ae e na aki butimwaeaki. 8 E na katuuaaeaki ibukin ana bure ane e kanna, bwa e a tia ni kamwaraea ana bwai ae tabu Iehova, ao e na kamateaki te aomata* anne.

9 “‘Ngkana kam taia uaan abami, ko na tai taia maninganingan am tawaana ni kabanea, ao ko na tai rikoi nikiran am uaa imwin taiakia.+ 10 Ko na tai anai naba nikirani kureebe ake n am nne ni kureebe ke n rikoi naba kureebe ake a bwakabwaka n am nne ni kureebe. Ko riai ni katikui ibukia akana maiu ni kainnano*+ ao te aomata ae maeka n iruwa i rarikim. Bon Iehova ngai ae Atuami.

11 “‘Kam na tai iraa,+ kam na tai mwamwanaa te aba,+ ao kam na tai aonikai i marenami. 12 Kam na tai tuea ni kewe n arau,+ ao ni kamatauningaa iai aran Atuami. Bon Iehova ngai. 13 Ko na tai babakanikawaia raom n aomata,+ ao ko na tai iraebwai.+ Ko aki riai n taua boon te tia mwakuri ae kabooaki ana mwakuri ni karokoa te ingabong.+

14 “‘Ko na tai kamaraiaa* te aomata ae bonotaninga ke ni kaaki imwain te mataki te bwai ae e na bwaka iai,+ ao ko na maaka Atuam.+ Bon Iehova ngai.

15 “‘Kam na tai ribuaka n ami motikitaeka. Ko na tai inanonano nakoia akana maiu ni kainnano ke n tangiriia riki aomata aika kaubwai.+ Ko riai ni motika taekan raom n aomata n te kaetitaeka ae riai.

16 “‘Ko na tai nakonako ni kabutaanako te uarao i buakoia am koraki.+ Ko na tai teirake n ekaanako maiun* raom n aomata.+ Bon Iehova ngai.

17 “‘Ko na tai ribaa tarim i nanom.+ Ko riai ni boaa raom n aomata,+ bwa ko aonga n aki raonna n ana bure.

18 “‘Ko na tai irantanga+ ao ko na tai kaikoa unim irouia natiia am koraki, ao ko riai n tangira raom n aomata n aron tangiram i bon iroum.+ Bon Iehova ngai.

19 “‘Kam riai ni kawakin au tua aikai: Ko na tai kaieinia am man aika kaokoro aika uaekaki. Ko na tai uniki koraa aika uaekaki n am tawaana,+ ao ko na tai bwaina te kunnikai ae karaoaki* mani karai aika kaokoro aika uaekaki.+

20 “‘Ngkana e wene n taanga te mwaane ma te aine, ma bon te toro neienne ae katauaki ibukin te mwaane temanna, ao e tuai ni kabwakaaki te kaboomwi ibukin neiei ke n anganaki te inaomata, ao a riai ni katuuaaeaki. Ma a aki riai ni kamateaki bwa e tuai ni kainaomataaki neienne. 21 E riai ni kaira te tiibu mwaane teuanne nakon Iehova, ae te karea ni kabooa mwin te bure, nako rarikini mataroan te umwa ni botaki, bwa ana karea ni kabooa mwin te bure.+ 22 E na karaoa karekeani kabwaraan ana bure teuanne te ibonga* i matan Iehova, n te tiibu mwaane are te karea ni kabooa mwin te bure ibukin te bure are e karaoia, ao e na kabwaraaki ana bure are e karaoia.

23 “‘Ngkana kam roko n te aba, ao kam uniki aeka ni kainnamwarake nako, kam na iangoi uaaia bwa a aki itiaki ao a katabuakaki. Kam tabuaki ni kang i nanon tenua te ririki. E aki riai ni kanaki. 24 Ma a na bane n tabu uaana n te kaaua n ririki ibukin te kakatonga i matan Iehova.+ 25 Ao kam a kona ni kang uaaia n te kanimaua n ririki, bwa a aonga ni kabatiaaki riki uaa n ami mwakuri n tai. Bon Iehova ngai ae Atuami.

26 “‘Kam na tai kana te bwai teuana ae mena te raraa iai.+

“‘Kam na tai kaiwa n ukeri kanikinaeani baika tuai n riki ke n tabunea.+

27 “‘Kam na tai imani* maninganingami ke ni korea buaimi ni kakororoa.+

28 “‘Kam na tai korokorei rabwatami ibukin te aomata* ae mate,+ ao kam na tai korotaitai i aomi. Bon Iehova ngai.

29 “‘Ko na tai kabwainranga natim te aine ni karikia bwa te aine ae kakabooaki,+ bwa e aonga n aki kakaraoaki te mwakuri ni kakabooaki ibukin te wene ni bure n te aba, ao ni kaonaki n aroaro aika kammaira.+

30 “‘Kam riai ni kawakin au bongi n taabati,+ ao kam riai ni kaota karinean* au tabo ae tabu. Bon Iehova ngai.

31 “‘Kam na tai rairaki nakoia taan rorokoia taimonio,+ ao tai bubutii buokami irouia taani kaiwani kanoan taai aika a na roko,+ bwa kam kaawa ni kamwara irouia. Bon Iehova ngai ae Atuami.

32 “‘Ko riai n teirake imwain ane e iaia irana,+ ao ko riai ni kaota karinean ae e a kara,+ ao ko na maaka Atuam.+ Bon Iehova ngai.

33 “‘Ngkana iai te ianena ae maeka i rarikim i abami, kam na tai karaoa ae aki riai nakoina.+ 34 E riai n riki te ianena ae maeka i rarikimi bwa ai aron tibun Iteraera ae bungiaki i buakomi,+ ao ko na tangiria n ai aron tangiram i bon iroum, bwa kam maeka n iruwa naba ngkoa n te aba are Aikubita.+ Bon Iehova ngai ae Atuami.

35 “‘Kam na tai kabonganai bwaai ni baire aika aki eti ni kaineti ma bairean te abwaki, te rawawata, ke baika ran.+ 36 Kam riai ni kabonganai kainikatine aika eti raoi, bwaai n tau rawawata aika eti raoi, te bwai n tau rawawata* ae eti raoi ibukini baika mwau, ao te bwai n uakorai* baika ran ae eti raoi.+ Bon Iehova ngai ae Atuami ae I kairingkami ni kaotinakoingkami man te aba are Aikubita. 37 Mangaia ae kam na kawakin au tua nako ma au moti nako, ao kam na kakairi iai.+ Bon Iehova ngai.’”

20 E reitia ni kangai Iehova nakoni Mote: 2 “Ko na kangai nakoia tibun Iteraera, ‘E riai ni kamateaki te aomata temanna mai buakoia tibun Iteraera ke te ianena ae maeka i Iteraera, ae e anga kanoana temanna nakoni Moreka.+ A riai kaain te aba ni karebanaia n atibu n uaa matena. 3 Boni ngai ae N na kaeta matau n ekaanako te aomata anne ao N na kamatea, kioina ngkai e a tia n anga kanoana nakoni Moreka ao e a tia ni kabarekaa au tabo ae tabu+ ao ni kamatauningaa arau ae tabu. 4 Ngkana bon nanoia kaain te aba bwa a na kamaki mataia nakon te baere e karaoia te aomata anne ngkana e anga kanoana nakoni Moreka, ao a aki kamatea,+ 5 ao boni ngai ae N na boni kaeta matau n ekaanako te aomata anne ma ana utu.+ N na kamatea te aomata anne ma ake a raonna ni kabane n aki kakaonimaki* n aroia ni kakairi irouni Moreka.

6 “‘Ni kaineti ma te aomata* ae aki kakaonimaki* nakoiu bwa e rairaki nakoia taan rorokoia taimonio+ ao taani kaiwani kanoan taai aika a na roko,+ N na bon ekaanako te aomata* anne ao N na kamatea.+

7 “‘Kam na katabuingkami* ao kam na itiaki,*+ ibukina bwa bon Iehova ngai ae Atuami. 8 Ao kam na kawakin au tua ma ni kakairi iai.+ Bon Iehova ngai ae I katabuingkami.+

9 “‘Ngkana iai te aomata ae kamaraiaa* tamana ke tinana, ao e bon riai ni kamateaki.+ E boni mena raraana i aona kioina ngke e kamaraiaa tamana ke tinana.

10 “‘Ni kaineti ngkanne ma te mwaane ae wene ni kimoa ma buun te mwaane temanna, e boni wene ni kimoa ma buun raona n aomata. A bon riai ni kamateaki naakai.*+ 11 Te mwaane ae wene n taanga ma buun tamana, e kamaamaea* tamana.+ A bon riai n uaia ni kamateaki. A boni mena raraaia i aoia. 12 Ngkana e wene n taanga te mwaane ma te aine ae buun natina, a bon riai n uaia ni kamateaki. A urua te aro ae riai. A boni mena raraaia i aoia.+

13 “‘Ngkana e wene n taanga te mwaane ma te mwaane n aron ae e wene n taanga ma te aine, a uaia ni karaoa te bwai ae riribaaki.+ A bon riai ni kamateaki. A boni mena raraaia i aoia.

14 “‘Ngkana e buuna te aine te mwaane temanna ma e wene n taanga ma tinan neiei, ao bon te mwakuri ae kammaira* te baei.+ E riai ni kamateaki teuanne ma nakanne ao imwina a kabuekaki n te ai,+ bwa e aonga n aki teimatoa i buakomi te aroaro ae kamwara.

15 “‘Ngkana e karaobure* te mwaane ma te man ao e bon riai ni kamateaki teuanne, ao kam riai ni kamatea te man anne.+ 16 Ngkana e kawara te man te aine temanna bwa e na karaobure ma ngaia,+ ko na tiringa te aine anne ao te man. A bon riai ni kamateaki. A boni mena raraaia i aoia.

17 “‘Ngkana e wene n taanga te mwaane temanna ma mwaanena, ae natin tamana ke natin tinana, ao a uaia n nori bwain rabwataia aika riai ni karabaaki ao bon te bwai ni kabwainrang te baei.+ A riai ni kamateaki i mataia aomata. E kamaamaea* mwaanena teuaei. E riai ni katuuaaeaki ibukin ana bure.

18 “‘Ngkana e wene n taanga te mwaane ma te aine ae aoraki n aine, a uaia ni kaotia bwa e aki tabu te raraa irouia.+ Ngaia are a na uaia ni kamateaki.

19 “‘Ko na tai wene n taanga ma tarin tinam ke mwaanen tamam, bwa boni kamaamaean anne am koraki ae bon raraam.+ A riai ni katuuaaeaki ibukin aia bure. 20 E kamaamaea* ai tamana te mwaane ae wene n taanga ma buun ai tamana.+ A riai ni katuuaaeaki ibukin aia bure. A na mate. A na akea natiia. 21 Ngkana iai te mwaane ae e buuna buun tarina, bon te bwai ae riai n riribaaki.+ E kamaamaea* tarina. A na mate n akea natiia.

22 “‘Kam na kawakin au tua nako ma au moti nako+ ao ni kakairi iai,+ bwa e aonga n aki mumutaingkami nako te aba ae I a kairingkami nako iai bwa kam na maekanna.+ 23 Kam na tai kakairi n aia tua natannaomata ake N na kakioianako mai mwaimi,+ bwa a karaoi baikai ni kabane ao I riribaiia.+ 24 Anne bukina ae I kangai iai nakoimi: “Kam na abana abaia, ao N na anganingkami bwa abami te aba ae raanga iai rannimamman te man ma aia karewe manibeeru.*+ Bon Iehova ngai ae Atuami, ae I kaokoroingkami mai buakoia botannaomata.”+ 25 Kam na kaokoroa te man ae itiaki ma ae kamwara ao te mannikiba ae kamwara ma ae itiaki,+ ao kam na tai karekei ribaakimi n te man temanna ke te mannikiba ke baika kawakawa i aontano ake I kaokoroi ibukimi bwa kam na atongi bwa a kamwara.+ 26 Kam na itiaki* i matau ibukina bwa I itiaki ngai ae Iehova,+ ae I kaokoroingkami mai buakoia botannaomata bwa kam aonga n riki bwa au aomata.+

27 “‘E bon riai ni kamateaki te mwaane ke te aine ae te tia rorokoia taimonio ke te tia kaiwani kanoan taai aika a na roko.+ A riai aomata ni karebanaiia n atibu n uaa mateia. A boni mena raraaia i aoia.’”

21 E reitia ni kangai Iehova nakoni Mote: “Taetae nakoia ibonga* aika natin Aaron aika mwaane, ao kangai nakoia, ‘Akea te ibonga i buakoia aomata ae e riai ni kamwaraea ibukin te aomata* ae mate.+ 2 Ma e kona ni kamwaraea ibukin ana koraki ni kaan ae bon raraana, ibukin tinana, tamana, natina te mwaane, natina te aine, ao tarina, 3 ao e kona ni kamwaraea ibukini mwaanena ngkana e tuai ni boo ma te mwaane ao e kaan ma ngaia ao akea buuna. 4 E aki kona ni kamwaraea i buakoia aomata ibukin te aine ae iai buuna, n te aro ae e na kamwaraea irouna. 5 A aki riai n imani irannatuia,+ ke n imani buaia ake i maninganingaia, ke ni korokorei rabwataia.+ 6 A riai n itiaki* i matan Atuaia,+ ao a aki riai ni kamatauningaa aran Atuaia,+ ibukina bwa boni ngaiia taan anga ana karea Iehova aika kareanaki n te ai, ae te amwarake ae kareanaki nakon Atuaia, ao a riai n itiaki.+ 7 A aki riai ni mare ma te aine ae kakabooaki,+ ke ae e a tia ni boo ma te mwaane, ke te aine ae e a tia ni buuraure ma buuna,+ ibukina bwa e itiaki* te ibonga nakon Atuana. 8 Ko na katabua* teuanne,+ ibukina bwa e kakareana te amwarake nakon Atuam. E riai n itiaki* iroum, ibukina bwa I itiaki ngai ae Iehova are teuare katabuingkami.+

9 “‘Ngkana e kamwaraea i bon irouna natin te ibonga te aine bwa e karaoa te mwakuri ni kakabooaki ibukin te wene ni bure, ao e boni kamatauningaa tamana. E riai ni kamateaki ao imwina e kabuekaki n te ai.+

10 “‘E aki riai ni kauakakaa irannatuna ke n raeuai kunnikaina+ te ibonga ae rietata* i buakoia tarina aika ibonga, are e kabwaroaki te bwaa ae tabu* i atuna+ ao are e kateirakeaki* nakon te nakoa n ibonga bwa e na oneia n te kunnikai n ibonga.+ 11 E aki riai ni kawara te aomata* ae mate.+ E aki kona naba ni kamwaraea ibukin tamana ke tinana. 12 E aki riai n otinako man te tabo ae tabu ao e aki riai ni kamwaraea ana tabo ae tabu Atuana,+ bwa e mena i aona kanikinaean te katabu ae ana bwaa ae tabu Atuana.+ Bon Iehova ngai.

13 “‘E riai ni karekea buuna ae tuai ni boo ma te mwaane.+ 14 E na aki mare ma te aine ae e a tia ni mate buuna, te aine ae e a tia ni buuraure, ke ae e a tia ni boo ma te mwaane, ke ae e kakabooaki, ma e riai ni karekea buuna ae te teinnaine mai buakoia aomata. 15 E aki riai ni kamwaraeia kanoana* i buakoia aomata,+ bwa bon Iehova ngai ae I katabua teuaei.’”

16 E reitia ni kangai Iehova nakoni Mote: 17 “Tuanga Aaron ni kangai, ‘Akea temanna mai buakoia kanoam* ae iai toabuakani bwain rabwatana n aia roro nako, ae e na keerake bwa e na kareana te amwarake nakon Atuana. 18 Ngkana iai te mwaane ae toabuaka bwain rabwatana ao e aki kona ni kaania te tabo ae tabu: te mwaane ae mataki ke ae mwauku ke ae bwaibwainnanti ubuna,* ke ae riao abwakini baina ke waena teaina, 19 te mwaane ae iai mwaotoni waena ke mwaotoni baina, 20 ae mori nukana ke ae tinauere* ke te mwaane ae iai aorakini matana, ke ae ngongo ke ae konee ke ae ikoaki maangena.+ 21 Akea te mwaane temanna ae toabuaka bwain rabwatana mai buakoia kanoan* Aaron are te ibonga, ae e kona ni keerake bwa e na anga taiani karea aika kareanaki n te ai nakon Iehova. E aki kona ni kaania te baonikarea bwa e na kareana te amwarake nakon Atuana, ibukina bwa iai toabuakan rabwatana. 22 E kona ni kana te amwarake mai buakon ae kareanaki nakon Atuana, mai buakoni bwaai aika moan te tabu+ ao mai buakoni bwaai aika tabu.+ 23 Ma e na aki kaania te keeten+ ao e na aki kaania te baonikarea,+ ibukina bwa iai toabuakani bwain rabwatana ao e aki riai ni kamwaraea au tabo ae tabu,+ bwa bon Iehova ngai ae I katabuia.’”+

24 Mangaia are e taetae Mote nakon Aaron ma natina mwaane ao nakoia tibun Iteraera ni kabane.

22 E reitia ni kangai Iehova nakoni Mote: 2 “Tuanga Aaron ma natina mwaane bwa a riai n tarataraiia raoi ni kaineti ma aroia nakoni* baika tabu aika aia bwai tibun Iteraera, ao a na aki kamatauningaa arau ae tabu+ ni kaineti ma baike a katabui nakoiu.+ Bon Iehova ngai. 3 Ko na kangai nakoia, ‘Ngkana iai mai buakoia kanoami n ami roro nako ae e kaania ma baika tabu n ana tai ni kamwara, ake baike a katabui tibun Iteraera nakon Iehova, ao e na kamateaki te aomata* anne mai matau.+ Bon Iehova ngai. 4 E na aki kang baika tabu ni karokoa ae e itiaki,+ te mwaane ae kanoan Aaron ae rebera+ ke iai te bae waanako mani mwaanena,+ ke ae e nako ana tari.+ E na aki naba kang baikai ane e ringa temanna ae kamwara ibukin ringan te aomata* ae mate,+ 5 ke te mwaane ae ringa te man ae mwamwae* ae kamwara,+ ke ane e ringa te aomata ae kamwara n te bwai teuana, ao te aomata ae kona ni kamwara irouna.+ 6 E na kamwara ni karokoa ae bong te aomata* ae ringa teuana mai buakoni baikai, ao e na aki kana te bwai teuana mai buakoni baika tabu, ma e riai n tebotebo n te ran.+ 7 E na itiaki ngkana e a tia ni bung taai, ao imwina e a kona ni kang baika tabu tabeua, ibukina bwa boni kanana.+ 8 E aki riai naba ni kana te man ae kuneaki ni mate ke ae raebitiaki irouia maan ni kaakang, ao e na kamwara iai.+ Bon Iehova ngai.

9 “‘A na kawakini mwiokoaia irou bwa a aonga n aki bure ibukin anne ao ni mate iai, ibukina bwa a kamwaraei baika tabu. Bon Iehova ngai ae I katabuia.

10 “‘E na aki kang baika tabu te aomata ae akea kariaiakana.*+ Akea te ianena ae maeka iroun te ibonga* ke te tia mwakuri ae kabooaki ana mwakuri, ae e na kang baika tabu. 11 Ma ngkana e kabooa te aomata* te ibonga n ana mwane, e kona te aomata anne ni kanna. A kona naba ni kana kanana tooro ake a bungiaki ni batana.+ 12 Ngkana e mare natin te ibonga te aine ma te aomata ae tiaki te ibonga,* e na aki kang bwaai n tituaraoi neiei aika tabu. 13 Ma ngkana e a mate buun natin te ibonga te aine ke e buuraure buuna ma ngaia ao akea natina, ao ibukin aei e a okira ana auti tamana n arona ngke e kairake, e kona neiei ni kana teutana kanan tamana,+ ma e na aki kanna te aomata ae akea kariaiakana.*

14 “‘Ngkana e kana te bwai ae tabu te aomata n tiaki nanona, e riai ni kabooa mwina ma n raonna ni kanimamwakorona ao e na angan te ibonga te karea ane tabu anne.+ 15 Mangaia ae a aki riai ibonga ni kamwaraei baika tabu aika aia bwai tibun Iteraera ake a anga nakon Iehova,+ 16 ao ni karokoa i aoia aomata te tuuaa ibukin te bure, n aroia ni kariaia aomata bwa a na kang baika tabu, bwa bon Iehova ngai ae I katabuia.’”

17 E reitia ni kangai Iehova nakoni Mote: 18 “Taetae nakon Aaron ma natina mwaane ao tibun Iteraera ni kabane ao kangai nakoia, ‘Ngkana e anga ana karea ni kabuekaki+ nakon Iehova tibun Iteraera temanna ke te aomata ae maeka n iruwa i Iteraera, bwa kakororaoan ana taeka ni bau ke e karaoia bwa te karea ni kan anga,+ 19 e riai n anga te man ae te mwaane ae marurung raoi+ mai buakon te nanai, mai buakoia tiibu mwaane aika ataei ke kooti, bwa e aonga n reke akoana. 20 Kam na aki anga ae iai toabuakani bwain rabwatana,+ bwa e na aki reke iai akoami.

21 “‘Ngkana e anga ana karea n raoi te aomata+ nakon Iehova bwa kakoroan ana taeka ni bau ke ana karea ni kan anga, e riai ni marurung raoi te man anne mai buakoia kaao ke tiibu, bwa e aonga n reke akoana. E aki riai n toabuaka naba teutana bwain rabwatana. 22 E aki riai te karea ni mataki, ni mwaoto, n ikoaki, n nongaiburuburu, ni koa, ke ni konee, kam na aki anga nakon Iehova mai buakon aikai, ke ni kareana te karea anne i aon te baonikarea ibukin Iehova. 23 Ko kona n anga bwa te karea ni kan anga te kao mwaane ke te tiibu ae riao abwakin ke uarerekeni waena ke baina teaina, ma e aki kona ni butimwaeaki bwa te karea ae te taetae ni bau. 24 Kam na aki anga nakon Iehova te man ae ikoaki maangena ke ni manatua, ke ae kanakoaki maangena ke ni koreaki, ao kam aki riai ni karean aeka ni man akanne i abami. 25 Ao kam na aki anga temanna mai buakon aikai mai bain te ianena, bwa te amwarake ae kareanaki nakon Atuami, bwa a buakaka ao a toabuaka. A na aki butimwaeaki.’”

26 E reitia ni kangai Iehova nakoni Mote: 27 “Ngkana e bungiaki te kao mwaane ke te tiibutetei ae te mwaane ke te kooti, e na teimatoa n tiku iroun tinana i nanon itibong,+ ma e na kariaiakaki bwa te karea n te kawanibong ao imwina riki, ae te karea ae kareanaki n te ai nakon Iehova. 28 Kam na aki kamatea te kao mwaane ma natina ke te tiibu ma natina n tii tebongina.+

29 “Ngkana kam kareana te karea ni katituaraoi nakon Iehova,+ kam riai ni kareanna ibukini karekean akoami. 30 E riai ni kanaki n te bong anne. Kam aki riai ni katuka teutana ni karokoa ae ingabong.+ Bon Iehova ngai.

31 “Kam riai ni kawakin au tua ma ni kakairi iai.+ Bon Iehova ngai. 32 Kam na aki kamatauningaa arau ae tabu+ ao N na katabuaki i buakoia tibun Iteraera.+ Bon Iehova ngai ae I katabuingkami,+ 33 are teuare kairingkami ni kaotinakoingkami man te aba are Aikubita ni kaotia nakoimi bwa bon te Atua ngai.+ Bon Iehova ngai.”

23 E reitia ni kangai Iehova nakoni Mote: 2 “Taetae nakoia tibun Iteraera ao tuangia ni kangai, ‘Boni bwabwaro aika tabu ana toa Iehova+ aika kam riai ni katanoatai.+ Aikai au toa aika motikaki taia:

3 “‘A kona ni karaoaki mwakuri nako i nanon onobong, ma n te kaitiua ni bong bon te bongi n taabati ae te bong ni motirawa,+ ae te bwabwaro ae tabu. Ko aki kona ni karaoa te mwakuri naba teuana. Bon te bongi n taabati ibukin Iehova n taabo ake kam maeka iai.+

4 “‘Aikai ana toa Iehova aika motikaki taia aika bwabwaro aika tabu, aika kam riai ni katanoatai n taia ake a motikaki: 5 N te moan namwakaina ae 14 iai bongin te namwakaina,+ n te airoo,* bon te Toa ae te Riao+ ibukin Iehova.

6 “‘N 15 bongin te namwakaina naba anne, bon te Toa ae te Bwerena ae Aki Karikaki ibukin Iehova.+ Kam riai ni kang bwerena aika aki karikaki i nanon itibong.+ 7 N te moani bong ao kam na kawakina te bwabwaro ae tabu.+ Kam aki riai ni karaoa te mwakuri teuana ae rawawata. 8 Ma kam na anga te karea ae kareanaki n te ai nakon Iehova i nanon itibong. N te kaitiua ni bong ao e na karaoaki te bwabwaro ae tabu. Kam aki riai ni karaoa te mwakuri teuana ae rawawata.’”

9 E reitia ni kangai Iehova nakoni Mote: 10 “Taetae nakoia tibun Iteraera, ao tuangia ni kangai, ‘Ngkana kam a roko n te aba ae N na anganingkami ao ngkana kam a tia n taia uaana, kam riai n uota teuana te bwabwati ae moan uaan+ ami tai nakon te ibonga.*+ 11 Ao e na katiotioa te bwabwati te ibonga i matan Iehova ibukini karekean akoami. E riai te ibonga ni katiotioa n te bong are imwin te bongi n Taabati. 12 N te bong are e katiotioaki iai te bwabwati ibukimi, kam riai n anga te tiibutetei ae te mwaane ae marurung raoi ae tuai n ririki bwa te karea ni kabuekaki nakon Iehova. 13 Ao raona ae te karea ae te amwarake bon uoua katebwinani mwakoron te eba* ni burawa ae mte ae renganaki ma te oera, bwa te karea ae kareanaki n te ai nakon Iehova, ae te boi ae boiarara.* Ao raona ae te karea ae te moi bon te kaamwakoro te in* ni wain. 14 Ko aki riai ni kana te kariki, koraa aika umunaki, ke koraa aika boou ni karokoa te bong aei, ni karokoa ae kam uota te karea nakon Atuami. Aio te tua ae teimatoa nakoia ami roro nako, n taabo ake kam maeka iai.

15 “‘Kam na wareki boongi n taabati aika itiua, man te bong are imwin te bongi n Taabati are kam uota iai te bwabwati bwa te karea ni katiotioaki.+ E riai ni koro raoi itiua te wiki. 16 Kam na wareka 50 te bong+ ni karokoa te bong are imwin te kaitiua ni bongi n Taabati, ao kam riai n anga iai te karea ae te amwarake ae boou nakon Iehova.+ 17 Kam riai n uotii kariki aika uoua man ami tabo ni maeka bwa te karea ni katiotioaki. A riai ni karaoaki man uoua katebwinani mwakoron te eba* ni burawa ae mte.+ A riai ni karikaki ao n umunaki bwa moan uaa aika tawaa nakon Iehova.+ 18 Ao kam riai n anga itiman te tiibutetei aika mwaane aika marurung raoi aika kaka teuana aia ririki, ao te kao mwaane temanna ae ataei ao tiibu mwaane aika uoman bwa raon taiani kariki.+ A na riki bwa te karea ni kabuekaki nakon Iehova n ikotaki naba ma te karea ae te amwarake ao te karea ae te moi, bwa te karea ae kareanaki n te ai, ae te boi ae boiarara* iroun Iehova. 19 Ao kam riai n anga te kooti ae ataei temanna bwa te karea ni kabwarabure+ ao uoman te tiibutetei aika mwaane aika kaka teuana aia ririki bwa te karea n raoi.+ 20 E na katiotioi tiibutetei aika mwaane akana uoman akanne te ibonga ma kariki ake moan uaa aika tawaa, bwa te karea ni katiotioaki i matan Iehova. A riai n riki bwa bwaai aika tabu nakon Iehova ao bon tibwangan te ibonga.+ 21 Kam na katanoataa n te bong anne+ te bwabwaro ae tabu ibukimi. Kam aki kona ni karaoa te mwakuri teuana ae rawawata. Aio te tua ae teimatoa nakoia ami roro nako, n taabo nako ake kam maeka iai.

22 “‘Ngkana kam taia uaan abami, ko aki riai n taia maninganingan am tawaana ni kabanea, ao ko aki riai n rikoi nikiran am uaa imwin taiakia.+ Ko riai ni katikua ibukia akana maiu ni kainnano*+ ao te aomata ae maeka n iruwa.+ Bon Iehova ngai ae Atuami.’”

23 E reitia ni kangai Iehova nakoni Mote: 24 “Tuangia tibun Iteraera ni kangai, ‘N te kaitiua n namwakaina ae teuana iai bongin te namwakaina, kam riai ni kawakina te motirawa, ae te kanuringa ae kaotaki ni katangan te buu,+ ae te bwabwaro ae tabu. 25 Kam aki kona ni karaoa te mwakuri teuana ae rawawata ao kam na anga te karea ae kareanaki n te ai nakon Iehova.’”

26 E reitia ni kangai Iehova nakoni Mote: 27 “Ma n tebwina iai bongin te kaitiua n namwakaina, bon te Bong ni Kabwarabure.+ Kam riai ni kawakina te bwabwaro ae tabu ao kam na kaota nanokawakimi,*+ ao kam na anga te karea ae kareanaki n te ai nakon Iehova. 28 Kam na aki karaoa te mwakuri naba teuana n te bong anne, bwa bon te bong ni kabwarabure are e na karaoaki iai kabwaraan ami bure+ i matan Iehova ae Atuami. 29 A na kamateaki aomata* akana aki kaota nanokawakia* n te bong anne.+ 30 Ao N na kamatea te aomata* ane karaoa te mwakuri naba teuana n te bong anne. 31 Kam na tai karaoa te mwakuri naba teuana. Aio te tua ae teimatoa nakoia ami roro nako, n taabo nako ake kam maeka iai. 32 Bon te bongi n taabati ae kam na motirawa iai, ao kam na kaota nanokawakimi+ n te tairiki ae ruaiwa iai bongin te namwakaina anne. Kam riai ni kawakina ami bongi n taabati mani bungin taai n te bong anne ni karokoa bungin taai n te bong are imwina.”

33 E reitia ni kangai Iehova nakoni Mote: 34 “Tuangia tibun Iteraera ni kangai, ‘N 15 bongin te kaitiua n namwakaina ao bon te Toa ae Umwanrianna* ae itibong bongina nakon Iehova.+ 35 E na iai te bwabwaro ae tabu n te moani bong, ao kam aki riai ni karaoa te mwakuri teuana ae rawawata. 36 Kam riai n anga te karea ae kareanaki n te ai nakon Iehova i nanon itibong. N te kawanibong ao kam na kawakina te bwabwaro ae tabu,+ ao kam riai n anga te karea ae kareanaki n te ai nakon Iehova. Bon te botaki ae okoro. Kam aki kona ni karaoa te mwakuri teuana ae rawawata.

37 “‘Akanne ana toa Iehova+ aika motikaki taia aika kam riai ni katanoatai bwa bwabwaro aika tabu+ ibukini karaoan te karea ae kareanaki n te ai nakon Iehova, ae te karea ni kabuekaki+ ao te karea ae te amwarake+ ao te karea ae te moi,+ ni kaineti ma ae baireaki ibukini boongi n toa nako. 38 Karea akanne bon raon taiani karea ibukin ana bongi n taabati nako Iehova,+ ami bwaintituaraoi,+ ami karea ae kam anga ibukin ami taetae ni bau,+ ao ai ami karea ni kan anga+ aika kam riai n anga nakon Iehova. 39 Ma n 15 iai bongin te kaitiua n namwakaina, ngkana kam a tia n ikoikotii uaan abami, kam riai ni bukamarua te toa ibukin Iehova i nanon itibong.+ Te moani bong bon te bong ni motirawa ao te kawanibong bon te bong ni motirawa naba.+ 40 Kam na anai uaani kaai aika raoiroi n te moani bong, ma baani baam+ ao mwaangan aroka aika bati baaia ma aroka aika taiani bobura aika maiu i rarikin te karaanga,* ao kam na kimwareirei+ i matan Iehova ae Atuami i nanon itibong.+ 41 Kam na bukamaruia bwa te toa ibukin Iehova i nanon itibong n te ririki.+ Ngkai bon te tua ae teimatoa n ami roro nako, kam riai ngkanne ni bukamaruia n te kaitiua n namwakaina. 42 Ko riai ni maeka n taian umwanrianna i nanon itibong.+ A riai tibun Iteraera ni kabane ni maeka n taian umwanrianna, 43 bwa a aonga n ataia ami roro nako ake imwina+ bwa I kamaekaia tibun Iteraera n taian umwanrianna ngke I kairiia ni kaotinakoia man te aba are Aikubita.+ Bon Iehova ngai ae Atuami.’”

44 Mangaia are e taetae Mote nakoia tibun Iteraera ni kaineti ma ana toa Iehova aika motikaki taia.

24 E taetae ngkanne Iehova nakoni Mote ni kangai: 2 “Ko na tua nakoia tibun Iteraera bwa a na uota nakoim te bwaa man oriwa aika ikaki ae aki renganaki ibukin taian taura, bwa a aonga n teimatoa n ura taura.+ 3 E riai ni baireia Aaron bwa a na teimatoa n ura taura i tinanikuni keetenin te Ati ni Berita* i nanon te umwa ni botaki, man te tairiki ni karokoa ae ingabong i matan Iehova. Aio te tua ae teimatoa n ami roro nako. 4 E riai ni bairei taura ni katokai i aon te kaintaura+ ae te koora ni koaua, bwa e na teimatoa n ura i matan Iehova.

5 “Ko na anaa te burawa ae mte ao umun iai 12 bwerena aika mronron. E riai ni kaka uoua katebwinani mwakoron te eba* i nanoni bwerena aikai n tatabeua nako. 6 Ko na bairei nakon uoua te rinan ni kauaataoi, kaka onoua i nanon teuana te rinan,+ ni katokai i aon te taibora ae te koora ni koaua i matan Iehova.+ 7 Ko riai ni kaaki te ribano ae aki renganaki i aon te rinan teuana ma teuana. Ko riai ni kabueka te ribano nakon Iehova ni kauringnga taekan te bwerena.+ 8 E riai ni bairei n taai nako i matan Iehova n te bongi n Taabati teuana ma teuana.+ Bon te berita ae teimaan i marenau ma tibun Iteraera. 9 E na riki bwa tibwangan Aaron ma natina mwaane,+ ao a na kanna n te tabo ae tabu,+ ibukina bwa bon te bwai ae moan te tabu ibukin te ibonga* mani karea ake a kareanaki n te ai nakon Iehova, bwa te tua ae teimatoa.”

10 Ao iai te mwaane temanna i buakoia tibun Iteraera ae natin te aine ae tibun Iteraera ma te mwaane ae te I-Aikubita,+ ao e boo n un te mwaane aei ma tibun Iteraera temanna i nanon te kaembwa. 11 E taetae ni kamatauningaa aran te Atua ao e karereantia* te Ara* aei,+ natin te aine are tibun Iteraera. Mangaia are a kaira teuaei nakoni Mote.+ Ao aran tinan teuaei Teromita ae natin Tebiri man te baronga ae Tan. 12 A kaburea teuaei ni karokoa reken ana moti Iehova irouia ae teretere raoi.+

13 E taku ngkanne Iehova nakoni Mote: 14 “Kaira te aomata ane karereanti nako tinanikun te kaembwa, ao a na bane ni katokai baia i aon atuna te koraki ake a ongo ana taeka, ao a na karebanaia n atibu te botaki n aomata.+ 15 Ao ko riai n tuangia tibun Iteraera ni kangai, ‘Ngkana iai te aomata ae karereantia Atuana, ao e na katuuaaeaki ibukin ana bure. 16 Mangaia are e bon riai ni kamateaki te aomata are taetae ni kamatauningaa aran Iehova.+ A bon riai te botaki n aomata ni karebanaia n atibu. E riai ni kamateaki te aomata ae maeka n iruwa ma tibun Iteraera ae bungiaki i buakomi ibukin ana taetae ni kamatauningaa aran te Atua.

17 “‘Ngkana e anaa maiun temanna,* te aomata temanna, ao e bon riai ni kamateaki.+ 18 Ane e orea te man* ae manana ao ni kamatea, ae ana man te aomata temanna, ao e riai ni kabooa mwina, bwa te maiu boona te maiu.* 19 Ngkana e kaikoaka raona n aomata te aomata temanna, ao e riai ni karaoaki nakoina aron are e a tia ni karaoia.+ 20 E na karaoaki naba nakoina te aeka ni kaikoaki are e karaoia nakon te aomata, bwa te mwaoto boona te mwaoto, te mata boona te mata, ao te wi boona te wi.+ 21 E riai ni kabooa mwin te man te aomata ae orea te man ni kamatea,+ ma e riai ni kamateaki te aomata ae orea te aomata ni kamatea.+

22 “‘E riai n tii te arona te moti ibukimi, n aki ongeia bwa te aomata ae maeka n iruwa ke tibun Iteraera ae bungiaki i buakomi,+ ibukina bwa bon Iehova ngai ae Atuami.’”

23 Ao e taetae Mote nakoia tibun Iteraera, ao a kaira te aomata are karereanti nako tinanikun te kaembwa ao a karebanaia n atibu.+ Mangaia are a karaoa are e tua Iehova nakoni Mote tibun Iteraera.

25 E reitia ni kangai Iehova nakoni Mote i aon te Maunga ae Tinai: 2 “Taetae nakoia tibun Iteraera ao tuangia ni kangai, ‘Ngkana kam a roko n te aba ae N na anganingkami,+ ao kam na aki mwakuria te aba ibukina bwa bon te taabati* nakon Iehova.+ 3 Ko riai n uniki koraa n am tawaana i nanon onoua te ririki, ao ko riai ni koromwaangai arokam n am nne ni kureebe i nanon onoua te ririki, ao ko na ikotii uaan te aba.+ 4 Ma ko na katuka te aba n aki mwakuria n te kaitiua n ririki bwa bon te taabati nakon Iehova. Ko aki riai n uniki koraa n am tawaana ke ni koromwaangai arokam n am nne ni kureebe. 5 Ko aki riai n taia ae rikirake i bon irouna mani koraa ake a tiku imwin te mwakuri n tai are mai mwaina, ao ko na tai ikotii uaan arokam ae te kureebe ae aki koromwangaaki. E na katukaki te aba n aki mwakuriaki n te ririki anne. 6 Ma kam kona ni kang amwarake ake uaan te aba ake a rikirake n te tai n taabati anne, ngkoe ma am toro mwaane ao aine, ma am tia mwakuri ae ko kabooa ana mwakuri, ao a kona naba ni kang ianena ake a maeka i buakomi, 7 n ikotaki ma maan aika manana ao aika moaanti aika mena i abam. E kona ni kanaki uaan nako te aba ake a reke.

8 “‘Ko na wareki ririki n taabati aika itiua, itiua kamwaitia ma itiua te ririki, ao e na reke bongin ririki n taabati aika itiua bwa 49 te ririki. 9 Ao ko na katanga te buu ae te koro ni katangimwakaa n te kaitiua n namwakaina ae tebwina iai bongin te namwakaina, ae te Bong ni Kabwarabure.+ Kam riai ni katanga te buu n te aro ae e na ongo te aba i aon abami ni kabutaa. 10 Kam na katabua te ka-50 n ririki ao kam na katanoataa te inaomata i aon te aba nakoia kaaina ni kabane.+ E na riki bwa ami Ririki n Inaomata,* ao kam na okiri abami n tatabemaningkami nako ao kam riai n okiriia ami utu n tatabemaningkami nako.+ 11 E na riki te ka-50 n ririki bwa ami Ririki n Inaomata. Kam na aki uniki koraa ke n taia ae rikirake i bon irouna mani koraa ake a tiku man ami mwakuri n tai are mai mwaina, ke n ikotii naba uaan arokami ae te kureebe akana aki koromwangaaki.+ 12 Bon te Ririki n Inaomata. E riai n tabu iroumi. Kam tii kona n amwarake man uaan te aba ake a rikirake i bon irouia.+

13 “‘Kam riai n okiri abami n tatabemaningkami nako n te Ririki n Inaomata anne.+ 14 Ngkana kam kaboonakoi bwaai nakoia raomi ke ni boobwai mairouia, kam na tai aonikai i marenami.+ 15 Ngkana ko kabooa te aba mairoun raom ko riai ni wareki mwaitin ririki ake imwin te Ririki n Inaomata, ao e riai ni katea ana boo ni kaineti ma mwaitin nikiran ririki ake a na taiaki iai uaana.+ 16 E kona ni karakaa ana boo ngkana a bati nikiran ririki akanne, ma e na kakerikaaka ana boo ngkana a karako nikiran ririki akanne, ibukina bwa e kaboonakoi nakoim mwaitin taian uaa ake a na reke. 17 Akea i buakomi ae e riai n aonikaia raona,+ ao ko na maaka Atuam,+ bwa bon Iehova ngai ae Atuami.+ 18 Kam na maeka i aon te aba ma te mweraoi ngkana kam kakororaoi au tua ao ni kawakin au moti.+ 19 E na anga uaana aon te aba,+ ao kam na amwarake ni karokoa rauakimi ao ni maeka iai ma te mweraoi.+

20 “‘Ma ngkana kam kangai: “Tera ae ti nang kanna n te kaitiua n ririki ngkana ti aki uniki koraa ke n ikotii ara uaa?”+ 21 Tai raraoma, N na karokoa au kakabwaia i aomi n te kaonoua n ririki, ao e na karikii uaana aika tau aon te aba ibukin ririki aika tenua.+ 22 Ao kam na uniki koraa n te kawanua n ririki ao n amwarake man uaa nikawai ni karokoa te karuaiwa n ririki. Kam na kang uaa nikawai ni karokoa ae a tai ami uaa.

23 “‘E aki riai ni kaboonakoaki te aba n aki manga kaokaki,+ ibukina bwa au bwai te aba aei.+ Bwa irou, bon aomata aika taani maeka n iruwa ngkami ao ianena aika maeka n te aba aei.+ 24 Ni kaineti ma abami ni kabane, iai mwaakan te tia kaboonakoa abana ni manga kabooa ni kaokia.

25 “‘Ngkana e a maiu ni kainnano am koraki temanna ao e a kainnanoa kaboonakoan abana tabeua, e riai n roko te tia kaboomwi ae ana koraki ni kaan ni manga kabooa ni kaoka are e kaboonakoa ana koraki.+ 26 Ngkana iai temanna ae akea te tia kaboomwi ibukina, ma e a kaubwai ao e a kona ni karekea te mwane ibukini manga kabooana ni kaokia, 27 e riai ni warebwaia mwaitini boon taian uaa man te ririki are e kaboonakoa iai abana. E na anaa te mwaiti anne mani boon abana are e anganaki ngkoa, ma e na angan teuare kaboonakoa abana nakoina nikiran te mwane. E a kona ngkanne n okira abana.+

28 “‘Ma ngkana e aki kona ni karekea te mwane ibukini kaokan abana, e na tiku abana are e kaboonakoa iroun te tia kabooa ni karokoa te Ririki n Inaomata,+ ao e na kaokaki abana nakoina n te Ririki n Inaomata ao e na okira abana.+

29 “‘Ngkana e kaboonakoa ana auti ae mena n te kaawa ae ooaki te aomata temanna, e na teimatoa n iai mwaakana ni manga kabooa ni kaokia ni karokoa koron teuana te ririki imwini kaboonakoana. E na teimatoa mwaakana ni manga kabooa+ i nanon teuana te ririki. 30 Ma ngkana e aki manga kabooaki ni kaokaki te auti anne imwaini koron teuana te ririki, e na riki te auti ane n te kaawa ae ooaki bwa ana bwai n aki toki te aomata are te tia kabooa i nanon ana roro nako. E aki riai ni kaokaki n te Ririki n Inaomata. 31 Ma a riai n iangoaki auti ake n taabo ni maeka ake a aki ooaki, bwa raon tawaanan te aba. E na teimatoa n uki manga kabooan te auti anne ni kaokaki, ao e riai ni kaokaki n te Ririki n Inaomata.

32 “‘Ni kaineti ma aia auti tibun Rewi ake n aia kaawa,+ e riai n teimatoa n iai mwaakaia tibun Rewi ni manga kabooi aia auti ni kaoki. 33 Ngkana e aki manga kabooa ana auti ae mena n te kaawa are e bwaibwai iai tibun Rewi, e na kaokaki nakoina n te Ririki n Inaomata,+ ibukina bwa auti ake n aia kaawa tibun Rewi bon tibwangaia i buakoia tibun Iteraera.+ 34 Irarikin anne, e na aki kaboonakoaki te tawaana+ ae katobibia aia kaawa, bwa e na teimatoa ni mena irouia bwa tibwangaia.

35 “‘Ngkana e a maiu ni kainnano kaain rarikim temanna ao e a aki kona ni kamaiua i bon irouna, ko riai ni buokia+ ao ko na buoka naba te aomata ae maeka n iruwa ma te ianena ae maeka n te aba,+ bwa e aonga n teimatoa ni maiu i rarikim. 36 Ko na tai anaa bakaon am mwane ke am raka* mairouna.+ Ko na maaka Atuam,+ ao e na teimatoa ni maiu tarim i rarikim. 37 Ko aki riai ni katangomwane nakoina ni bakaonna+ ke n anganna te amwarake ibukini karekean am raka. 38 Bon Iehova ngai ae Atuami ae I kairingkami ni kaotinakoingkami man te aba are Aikubita,+ bwa N na anganingkami te aba ae Kanaan, ni kaotia bwa bon Atuami ngai.+

39 “‘Ngkana e a maiu ni kainnano kaain rarikim temanna, ao e a kaboonakoa boni ngaia nakoim,+ ko na tai kaaunganna n aron te toro ae mangori.+ 40 E riai n iangoaki bwa kaanga te tia mwakuri ae kabooaki ana mwakuri+ ke te ianena ae maeka i buakomi. E riai ni beku iroum ni karokoa te Ririki n Inaomata. 41 Ao e na nako mairoum ngaia ma natina* ao e na okiriia ana koraki. E riai n okira abaia ana bakatibu.+ 42 Bwa bon au toro ngaiia ake I kairiia ni kaotinakoia man te aba are Aikubita.+ A aki riai ni kaboonakoia boni ngaiia n ai aroni kaboonakoan te toro. 43 Ko na tai karawawataia+ ao ko na maaka Atuam.+ 44 A riai n nako am toro mwaane ao aine mai buakoia natannaomata akana i rarikimi, kam kona ni kabooa te toro te mwaane ke te aine mai buakoia. 45 Kam kona naba ni kabooia ami toro mai buakoia natiia ianena ake a maeka i rarikimi,+ ao mai buakoia aia utu ake a bungia i abami, ao a na riki bwa ami toro. 46 Kam kona n anga ngaiia nakoia natimi ake imwimi bwa tibwangaia ao a na teimatoa n riki bwa aia toro. Kam na karikiia bwa ami tia mwakuri, ma ko na tai karawawataia tarim aika tibun Iteraera.+

47 “‘Ma ngkana e a kaubwai te aomata ae maeka n iruwa ke te ianena ae maeka i rarikim, ao e a maiu ni kainnano tarim ae mena i rarikina, ao e nang kaboonakoa boni ngaia nakon te aomata ae maeka n iruwa ke te ianena ae maeka i rarikim, ke nakon temanna mai buakoia kaain ana utu te aomata ae maeka n iruwa, 48 ao e na teimatoa n uki manga kabooan teuaei ni kaokaki, ngkana e a tia ni kaboonakoa boni ngaia. E kona temanna mai buakoia tarina ni manga kabooa ni kaokia,+ 49 ke e kona ni manga kabooa ni kaokia ai tamana ke natin ai tamana, ke temanna mai buakoia ana koraki ni kaan,* e kona ni kabooa ni kaokia temanna mai buakoia kaain ana utu.

“‘Ke ngkana e a kaubwai, e kona ni boni kabooa boni ngaia ibukini manga kaokana.+ 50 E riai ni warebwaia te tai ma teuare kabooa ni moa man te ririki are e kaboonakoa boni ngaia nakoina, ni karokoa te Ririki n Inaomata.+ E riai ni kaineti booni kabooana ma mwaitin ririki akanne.+ I nanon te tai anne, e na karaoaki boona n ana bong ni mwakuri, n ai aroni boon te tia mwakuri ae kabooaki ana mwakuri.+ 51 Ngkana a bati nikiran ririki akanne, ao e riai ni kabwakaa booni manga kaokana ni kaineti ma mwaitin nikiran te ririki. 52 Ma ngkana a karako mwaitin nikiran te ririki imwain te Ririki n Inaomata, ao e riai ni warebwaia i bon ibukina ao ni kabwakaa booni manga kaokana ni kaineti ma nikiran te ririki. 53 E riai n iangoaki iroun ana toka n te ririki teuana ma teuana bwa ai aron te tia mwakuri ae kabooaki ana mwakuri, ao ko riai n taraia bwa e na aki karawawataaki iroun ana toka.+ 54 Ma ngkana e aki kona ni manga kabooa boni ngaia ni kaokia n aaro aikai, e na inaomata ngkanne n te Ririki n Inaomata+ ngaia ma natina* ake raona.

55 “‘Bwa bon au toro tibun Iteraera. Bon au toro ngaiia ake I kairiia ni kaotinakoia man te aba are Aikubita.+ Bon Iehova ngai ae Atuami.

26 “‘Kam na tai karaoi atuami aika akea manenaia,+ ao kam na tai katea te bouannanti ae kaaraki+ ke ami boua ae tabu ao kam na tai katea te atibu ae te banna+ i abami bwa kam na bobaraaki nako iai,+ bwa bon Iehova ngai ae Atuami. 2 Kam riai ni kawakin au taabati nako ao kaota karinean* au tabo ae tabu. Bon Iehova ngai.

3 “‘Ngkana kam teimatoa ni kakairi n au moti ma ni kawakin au tua ao kam kakororaoi,+ 4 N na anganingkami te karau n taia aika riai,+ ao e na uaa aon te aba,+ ao a na anga uaaia arokan te tawaana. 5 Ibukini korakoran te mari e na waaki nako tain te mwakuri ni kaaki kun ni uita ni karokoa tain taiakini kureebe, ao e na waaki nako taiakini kureebe ni karokoa tain unikakin taiani koraa. Kam na bon amwarake ni kanami ni karokoa nuaimi, ao kam na maeka ma te mweraoi i abami.+ 6 N na karokoa te rau n te aba,+ ao kam na wene n akea ae e na kakamaakuingkami,+ ao N na tuka rokoia maan aika tiritiri i abami, ao akea temanna ae e na kaaitaraingkami ma te kabaang ni buaka. 7 Kam na boni kaeiia akana kairiribai nakoimi, ao a na bwaka i matami n te kabaang. 8 Niman mai buakomi a na kaeiia 100, ao 100 mai buakomi a na kaeiia 10,000, ao a na bwaka n te kabaang i matami akana kairiribai nakoimi.+

9 “‘N na mutiakiningkami* ao N na kabatiaia ami kariki ma ni kamwaitingkami,+ ao N na kawakina au berita ma ngkami.+ 10 Ngkai kam tabe n amwamwarake n uaa ake man te ririki are mai mwaina, ane kam na kainnanoa kaotinakoan ake mai mwaina ni kamwaawai nnen uaa aika boou. 11 Ao N na kaaki au umwanrianna ae tabu* i buakomi,+ ao N na aki katinanikuingkami. 12 N na nakonako i buakomi ma n riki bwa Atuami,+ ao ngkami kam na riki bwa au aomata.+ 13 Bon Iehova ngai ae Atuami, ae I kairingkami ni kaotinakoingkami man te aba are Aikubita bwa kam aonga n aki manga tautoronaki irouia, ao I otei amomi n te aro ae kam na nakonako ni kaetii ikami.*

14 “‘Ma ngkana kam aki ongo irou ke ni kawakin tuua aikai ni kabane,+ 15 ao ngkana kam kaaki taekan au tua+ ao ngkana kam ribai au moti n te aro ae kam a aki kawakin au tua ni kabane, ao kam a urua au berita,+ 16 ao ngai N na karaoi baikai nakoimi: N na katuuaaeingkami n te rawawata, n te kangenge, ao n te kabuebue, n te aro are a na urui matami ma ni kamamaaraingkami. A na matebuaka unikan ami koraa bwa a na kang akana kairiribai nakoimi.+ 17 N na kaeta matau n ekingkami nako, ao kam na konaaki irouia akana kairiribai nakoimi,+ ao a na karawawataingkami taan ribaingkami,+ ao kam na birinako ibukini maakumi e ngae ngke akea ae e kaeingkami.+

18 “‘Ma ngkana kam aki naba ongo irou n aki ongea aei, ao N na boni katuuaaeingkami itiua te tai ibukin ami bure. 19 N na bon urua kainikatongami ae korakora ao ni karaoi ami karawa bwa kaanga te biti+ ao abami bwa kaanga te buraati. 20 E na matebuaka kabonganaani korakorami, bwa e na aki uaa abami,+ ao a na aki karikiuaa arokan te tawaana.

21 “‘Ma ngkana kam teimatoa n nakonako ni kaitaraai ao n aki kan ongo irou, N na boni kaitiua riki mwaitin rekeni kaimi ni kaineti ma ami bure. 22 N na kanakoia manin te tawaana aika tiritiri nako buakomi,+ ao a na raweiia natimi mairoumi,+ ao a na kamateia ami man aika manana ao a na kakekerikaaka mwaitimi, ao a na kitanaki kawaimi.+

23 “‘Ngkana kam aki naba butimwaea kaetakimi irou n aki ongei baikai,+ ao kam bon imanono naba n nakonako ni kaitaraai, 24 ao N na nakonako naba ni kaaitaraingkami ao boni ngai ae N na oreingkami itiua te tai ibukin ami bure. 25 N na karokoa i aomi te kabaang ni karekekai ibukina bwa kam urua te berita ma ngai.+ Ngkana kam birinako ni kamanoingkami n ami kaawa nako, ao N na karokoa te aoraki i buakomi,+ ao kam na mena i nanoni bain te tia kairiribai.+ 26 Ngkana I urui nnen* ami kariki*+ are rereke mai iai, a na kona ngkanne aine aika tengaun n umuni ami kariki n te ai n umum ae tii teuana, ao a na bwaunani ami kariki n taui rawawataia,+ ao kam na amwarake ma kam na aki nuai.+

27 “‘Ngkana kam aki naba ongo irou n aki ongea aei ao kam bon imanono naba n nakonako ni kaitaraai, 28 ao N na kakorakoraa kaitaraakimi irou+ ao boni ngai ae N na katuuaaeingkami itiua te tai ibukin ami bure. 29 Mangaia ae kam na kang irikoia natimi mwaane, ao kam na kang irikoia natimi aine.+ 30 N na kamaunai ami tabo aika tabu aika rietata,+ ao N na kamaunai ami baonikarea ibukini baika boiarara ma ni kauaataoi rabwatami ngkana kam mate i aoni bannaia ami bouannanti aika kamwara,*+ ao N na tannako mairoumi bwa kam koro n ribaaki.+ 31 N na anga ami kaawa bwa a na kamaunaaki n te kabaang+ ao N na kakeaia kaain ami tabo aika tabu, ao N na rawa n aroki boin ami karea aika boiarara.* 32 Boni ngai ae N na kamaroaea aon te aba,+ ao a na taraia ma te miroaroa taani kairiribai nakoimi ake a maeka iai.+ 33 Ao N na kamaenakoingkami i buakoia natannaomata,+ ao N na buuta te kabaang ao e na kaeingkami,+ ao a na kamaroaeaki abami,+ ao a na uruakaki ami kaawa.

34 “‘N te tai anne ngkana e a tiku aon te aba n aki kaainaki bwa kam a mena i abaia akana kairiribai nakoimi, ao e nang kabooi mwin ana taabati aon te aba. E nang motirawa* aon te aba n te tai anne ibukin ana taabati ake e aki momotirawa iai.+ 35 E na motirawa ni boong ni kabane ake e tiku iai n aki kaainaki, ibukina bwa e aki momotirawa n te tai are kam bon riai ni kawakin iai taabati ngke kam maeka iai.

36 “‘N na karokoa te maaku i nanoia te koraki ake a maeka+ i abaia taani kairiribai nakoia, ao e na kabirinakoia mwakaikain te baanikai ae ukakinako, ao a na birinako n aroni birinakon te aomata imwain te kabaang ao a na bwaka ma akea ae e kaeiia.+ 37 A na tatanako ni bwaka i bon i marenaia n aroia aomata aika birinako imwain te kabaang e ngae ngke akea ae e kaeiia, ao kam na aki kona ni kaaitaraia akana kairiribai nakoimi.+ 38 Kam na mauna i buakoia natannaomata,+ ao e na kabwautingkami abaia akana kairiribai nakoimi. 39 A na kakaiaki mamaaraia te koraki ake nikirami i abaia taani kairiribai nakoimi+ ibukin ami kairua. Eng, a na kakaiaki mamaaraia ibukin aia kairua tamaia.+ 40 Ao a na kaotii oin aia kairua+ ma aia kairua ao aia aki kakaonimaki tamaia, ao a na butimwaea taekaia ae a aki kakaonimaki n aroia n nakonako ni kaitaraai.+ 41 Ma I nakonako naba ni kaaitaraia+ n arou ni kairiia nako abaia akana kairiribai nakoia.+

“‘Tao ane a nang kananorinanoaki ngkanne nanoia aika aki korotobibiaki*+ ao a nang kabooi ngkanne mwin aia kairua. 42 Ao N na uringa au berita ma Iakoba+ ao au berita ma Itaaka,+ ao N na uringa au berita ma Aberaam,+ ao N na uringa aon te aba. 43 N te tai are e a aki maekanaki iai te aba irouia ao e a kabooi naba mwin ana taabati te aba+ ma n tiku n aki kaainaki, ao a a kabooi mwin aia kairua ibukina bwa a a tia ni kaaki taekan au moti ao a ribai au tua.+ 44 E ngae ngke a riki baikai ni kabane, ma N na aki kaaki raoi taekaia ngkai a mena i abaia akana kairiribai nakoia,+ ke n ribaiia n te aro ae N na kamaunaia, bwa e urua au berita+ ma ngaiia te aro anne, bwa bon Iehova ngai ae Atuaia. 45 N na uringa ibukia te berita ma aia bakatibu+ ake I kairiia ni kaotinakoia man te aba are Aikubita i mataia natannaomata,+ bwa I aonga ni kaotia bwa bon Atuaia ngai. Bon Iehova ngai.’”

46 Aikai kaetieti, mooti, ao tuua, ake e katei Iehova i marenana ma tibun Iteraera i aon te Maunga ae Tinai rinanoni Mote.+

27 E reitia ni kangai Iehova nakoni Mote: 2 “Taetae nakoia tibun Iteraera ao tuangia ni kangai, ‘Ngkana e taetae te aomata temanna n te taetae ni bau ae okoro+ bwa e na angan Iehova te mwane ae boraoi ma te boo ae katautauaki ibukin ana aomata* temanna, 3 ao ngkana bon te mwaane ana aomata anne ae moa ana ririki man 20 nakon 60, boona ae katautauaki bon 50 te tiekera* n tirewa ae te tiekera ae kakabonganaaki n te tabo ae tabu.* 4 Ma ngkana bon te aine, mwaitini boona ae katautauaki bon 30 te tiekera. 5 Ngkana e moa te roro man 5 te ririki nakon 20, te boo ae katautauaki ibukin te mwaane bon 20 te tiekera, ao 10 te tiekera ibukin te aine. 6 Ngkana e moa te roro man teuana namwakaina nakon nimaua te ririki, te boo ae katautauaki ibukin te mwaane bon nimaua te tiekera n tirewa, ao tenua te tiekera n tirewa ibukin te aine.

7 “‘Ngkana 60 te ririki ni waerake, ao te boo ae katautauaki ibukin te mwaane bon 15 te tiekera, ao 10 te tiekera ibukin te aine. 8 Ma ngkana e rangi ni maiu ni kainnano te aomata are taetae ni bau ao e aki kona ni kabwakaa te boo are katautauaki,+ e na tei i matan te ibonga* te aomata are e anga te tia taetae ni bau, ao e na bairea boon te aomata anne te ibonga. E na bairea boona te ibonga ni kaineti ma are e kona n reke iroun te aomata are taetae ni bau.+

9 “‘Ngkana e irekereke te taetae ni bau ma te man ae tau ibukin te angakarea nakon Iehova, a na riki maan ake e anganaki Iehova bwa baika tabu. 10 E na aki onea mwina ke ni kaaibibita ae raoiroi ma ae buakaka, ke ae buakaka ma ae raoiroi. Ma ngkana e na kaaibibita te moani man ma te man temanna, a na uaia n tabu te moani man ao te man are kaaibibitaki ma ngaia. 11 Ngkana bon te man ae aki itiaki+ ae aki tau ni kareanaki nakon Iehova, e na katea ngkanne te man anne i matan te ibonga. 12 E na bairea ngkanne boona te ibonga ni kaineti ma raoiroina ke buakakana. E na bwainaki te boo are e katautaua te ibonga. 13 Ma ngkana e kani manga kabooa ana man ni kaokia te aomata arei, e na anga boona are e katautauaki n raonna ni kanimamwakoroni boona.+

14 “‘Ngkana e na katabua ana auti te aomata temanna bwa te bwai ae tabu nakon Iehova, e na bairea ngkanne boona te ibonga ni kaineti ma raoiroina ke buakakana. Te boo are e baireia te ibonga, boni boona ae e na bwainaki.+ 15 Ma ngkana e kani manga kabooa ana auti ni kaokia te aomata are katabua ana auti, e na anga boona are e katautauaki n raonna ni kanimamwakoroni boona, ao e na manga riki bwa ana auti.

16 “‘Ngkana e katabua mwakoron ana tawaana te aomata temanna nakon Iehova, e na katautauaki boona ni kaineti ma koraa ake a riai n unikaki iai, teuana te oma* koraan te baare, bon 50 te tiekera n tirewa. 17 Ngkana e katabua ana tawaana ni moa man te Ririki n Inaomata,*+ e na bwainaki te boo are katautauaki. 18 Ngkana e katabua ana tawaana imwin te Ririki n Inaomata, e na kauarerekea ngkanne boona te ibonga ni kaineti ma mwaitin ririki ake imwain te Ririki n Inaomata are imwina.+ 19 Ma ngkana e a manga kabooa ana tawaana ni kaokia te aomata are katabua ana tawaana, e na anga boona are katautauaki n raonna ni kanimamwakoroni boona, ao e na tiku bwa ana tawaana. 20 Ngkana e aki kabooa te tawaana ni kaokia ao e a kaboonakoaki te tawaana nakon te aomata temanna, e na aki manga kabooaki ni kaokaki. 21 Ngkana e kaokaki te tawaana anne n te Ririki n Inaomata, e na riki te tawaana bwa te bwai ae tabu ae katabuaki nakon Iehova. A na bwainna ibonga.+

22 “‘Ngkana te aomata temanna e katabua nakon Iehova te tawaana ae e kabooa ae bon tiaki tibwangana ae bwaibwai iai,+ 23 e na warebwaia boona te ibonga ibukin te aomata anne man te tai anne ni karokoa te Ririki n Inaomata, ao e na anga n te bong anne te boo ae katautauaki.+ Bon te bwai ae tabu nakon Iehova. 24 E na oki te tawaana n te Ririki n Inaomata nakon te aomata are e kabooa te aba mairouna, are bon tibwangana te aba anne.+

25 “‘A riai ni katautauaki taiani boo nako n te tiekera are kakabonganaaki n te tabo ae tabu. E riai ni boraoi te tiekera ma 20 te kira.*

26 “‘Ma akea te aomata ae riai ni katabuia maan aika karimoa kioina ngkai bon ana bwai Iehova te karimoa.+ N aki ongeia bwa tao te kao mwaane ke te tiibu ma bon ana bwai Iehova.+ 27 Ma e kona ni manga kabooaki te karimoa mai buakoia maan aika aki itiaki. E riai te aomata are karaoa anne ni kabwakaa te mwane ae boona ae katautauaki ao n raonna ni kanimamwakoroni boona.+ Ma ngkana e aki manga kabooa te aomata are ana man, e na kaboonakoa ngkanne te ibonga ni kaineti ma te boo ae katautauaki.

28 “‘Ngkana e anga te aomata ke te man ke te tawaana te aomata temanna ae bon ana bwai, ao e katabui nakon Iehova n aki toki,* a na aki manga kaboonakoaki ke ni kabooaki ni kaokaki. Moan te tabu te aomata anne ke te man anne ke te tawaana anne. Bon ana bwai Iehova.+ 29 Irarikin anne, akea te aomata ae kabuakakaaki ae kaokoroaki nakon te kamateaki, ae e kona ni manga kabooaki.+ E bon riai ni kamateaki te aomata anne.+

30 “‘Bon ana bwai Iehova teuana katebwinani mwakoron*+ aaba nako, ae tao man uaan te tawaana ke uaan aroka. Bon te bwai ae tabu nakon Iehova. 31 Ngkana e a manga kani kabooa teuana katebwinani mwakoron abana te aomata anne ni kaokia, e riai n anga boona ao n raonna ni kanimamwakoroni boona. 32 E riai n anganaki Iehova teuana katebwinani mwakoron nako te nanai ni kao ao te nanai n tiibu. Ngkana e warekiia* ana man te tia kawakintiibu, e riai ni kaokoroia maan* aika taiani katengaun bwa a tabu nakon te Atua. 33 E aki riai n tuoa bwa e raoiroi ke e buakaka, e aki riai naba ni kaaibibitia. Ma ngkana e na boni kaaibibitia, a riai n uaia n tabu te moani man ao te man are kaaibibitaki ma ngaia.+ E na aki kabooaki ni kaokaki.’”

34 Aikai tuua ake e anga Iehova nakoni Mote n te Maunga ae Tinai, ibukia tibun Iteraera.+