Buokaia ae te Kabanea n Tamaroa Akana Rawawata Nanoia

TE MARAKI NI MATEN TEMANNA AE TANGIRAKI, E A TIA N RANGI NI KORAKORA TE UKEUKE I AONA N TAAI AIKA TIBWA NAKO. Ma n aron ae e a tia ni kaotaki, aia taeka taan rabakau aika taiani kabanea n raoiroi e aki toki ni boraoi ma te wanawana rimoa ae kona n reke n te Baibara. E oti raoi ikai bwa e aki babane tain te kairiri ae n te Baibara. Ma e aki tii kakanoa te Baibara n taeka n reirei aika kona n onimakinaki. Iai naba te rongorongo iai ae aki kona n reke n te tabo riki teuana, ae te rongorongo ae kona n rangi ni kabebeteia aika a rawawata nanoia.

• Te karaunano bwa naake a mate ake ti tangiriia a bon aki kammarakaki

  E taku te Baibara n Te Minita 9:5 bwa “a bon aki ataa te bwai teuana akana mate.” A a “maunanako [aia] iango.” (Taian Areru 146:4) N aron aei, e kabotaua naba te mate te Baibara ma te matu raoi.​—Ioane 11:11.

• E karekea te kabebeteaki onimakinan raoi te Atua ae tatangira

  E taku te Baibara n Taian Areru 34:15: “A mena matan Iehovaa i aoia akana raoiroi, ao a uki taningana nakon tangia ni kani buokaki.” E rangi ni karaunano riki bunran nanora nakon te Atua n te tataro, nakon te maroro ma temanna ke kakainan ara namakin. E boni buokira ni karekea ara reitaki ae kaan ma ara tia Karikiriki, ae kona ni kabongana mwaakana ni kabebeteira.

• Taai aika raraoi aika ti kantaningai

  Iangoa te tai ae imwaira ngkana a a manga kautaki naake n te ruanimate bwa a na maiu n te aonnaba! E okioki n taekinaki n te Baibara taekan te tai anne. N taekinan aron te aonnaba n te tai ae imwaira, ao e taku te Baibara bwa te Atua “e na kaoa te rannimata ni kabane mai [matara], ao e nang akea riki te mate, ke te nanokawaki ke te tang ke te maraki.”​—Te Kaotioti 21:3, 4.

A bati aika onimakina Iehova ae te Atua ae taekinaki n te Baibara, aika a kakorakoraaki raoi bwa a na kekeiaki ma rawawatan nanoia, bwa a onimakina te kantaninga ae a na manga noriia aia koraki aika tangiraki irouia ake a a tia ni mate. N te katoto, e taku Ann ae e a tia ni mate buuna are tekateka ma ngaia i nanon 65 te ririki: “E karaua nanou te Baibara bwa ara koraki aika ti tangiriia ake a a tia ni mate a bon aki karawawataaki, ao te Atua e na manga kautiia naake e uringia. A aki toki n tetei i matau kantaninga aikai n taai ake I a manga taonaki iai n te rawawata, ao anne bukina ae I a kona ni kekeiaki iai ma rawawatau ae rangi ni korakora aei!”

E taku Tiina are taekinaki ni moan te kaongora ae rereitaki aei: “I namakina ana boutoka te Atua boni man te tai are e mate iai Timo. I rangi n namakina ana ibuobuoki Iehova n au tai n rawawata. Ao I kakoauaa raoi ana berita te Baibara ibukin te mangauti. E kakorakoraai bwa N na waakinako n uaa te bong are N na manga nora iai Timo.”

Bwaebwaeti aikai bon titeboo naba ma aia bwaebwaeti mirion ma mirion aomata ake a onimakina raoi te Baibara. E ngae ngkana ko taku bwa a bon aki koaua ke bon tii te mii kanoan te Baibara, ma e kakawaki bwa ko na ukera moa te kakoaua ao n nora raoiroin te kaetieti ao berita ake iai. Ko na bae n noria ae te Baibara boni buokaia ae te kabanea n tamaroa akana rawawata nanoia.

REIAKINA RIKI TE KANTANINGA IBUKIA MAATE

Nori taamnei aika irekereke ma aei n ara atureti n te intanete ae, jw.org

TERA AE E NA RIKI NAKOIA MAATE?

Tera ae e riki nakoira ngkana ti mate? E kabebetenano ma ni karaunano ana kaeka ae mataata te Baibara

Nakoni BAIKA KATAURAOAKI > TAAMNEI (I Aan Taamnei: TE BAIBARA > ANA REIREI TE BAIBARA)

KO KAN ONGO TE RONGORONGO AE RAOIROI?

E a rangi ni bati te rongorongo ae kananokawaki, ma ko na kunea ia te rongorongo ae raoiroi?

Nakoni BIBLE TEACHINGS > PEACE & HAPPINESS