“E na Bati te Raoi” i Aan Ana Tautaeka n Uea te Atua

E nang uota te raoi ao te katiteuanaaki nakoia aomata nako Ana Tautaeka n Uea te Atua are e a kamani kariariaaki, ae kateia te Atua ae e na tautaekana te aonnaba. E beritanaki n Taian Areru 72:7 bwa “e na bati te raoi.” Ma e na moana n ningai ana kairiri te Tautaeka n Uea anne? E na kangaa ni karaoa anne? Ao ko na kangaa ni kakabwaiaaki man ana kairiri?

E NA ROKO N NINGAI ANA TAUTAEKA N UEA TE ATUA?

E a kaman taekin rikini baika bati aika kamimi te Baibara aika kaota kaanin rokon Ana Tautaeka n Uea te Atua. A riki baikai bwa kanoan “te kanikina,” n aron te buaka, te rongo, te aoraki, mwaeiei aika bati, ao ai rikiraken te buakaka.​—Mataio 24:​3, 7, 12; Ruka 21:11; Te Kaotioti 6:​2-8.

E kangai te taetae ni burabeti riki teuana: “A na roko taai aika okoro aika karuanikai, ni kabaneani boong. Bwa ane a nang riki aomata bwa taan tangiriia i bon irouia, taani bakimwane, . . . taan aki ongeaba irouia aia karo, taani bangaomata, taan aki kakaonimaki nakoia raoia, taan aki tatangira, taani kakanneti, taan uarao, taan aki taubaang, taan iowawa, taan riribaa te raoiroi, . . . taani kainikatonga, taan tangira riki kakukurein te rabwata nakon tangiran te Atua.” (2 Timoteo 3:​1-4) A nonoraki aroaro aikai irouia aomata tabeman ngkoa, ma ngkai e a rangi n taabangaki.

A kakororaoaki taetae ni burabeti akanne n 1914. A bon taekina aron te bitaki n te aonnaba man te ririki anne taani korei rongorongon rimoa, bwakuaku n te tautaeka, ao taani koro rongorongo. N te katoto, e korea ae kangai te tia korea rongorongon rimoa ae Peter Munch mai Danish: “E riki te bitaki ae korakora nakon te botannaomata n te buaka n 1914. Imwain 1914 ao a iangoia aomata bwa e a rikirake n nakoraoi riki te aonnaba, ma akea bwa a a tii roko naba boong aika karuanikai, a kakamaaku, e bati te riribai iai, ao ai akea te mweraoi n taabo nako.”

N te itera teuana, titeboo baikai ma kaanga te angibuaka imwain te raoi. A kaotia ae e a kaan te tai ae e nang kairiri iai te Tautaeka n Uea n te aonnaba ni kabutaa. E bon taekina naba te bwai ae raoiroi Iesu ae kanoan te kanikina anne, ni kangai: “E na tataekinaki te rongorongo ae raoiroi aei ae taekan te Tautaeka n Uea, n te aonnaba ni kabutaa bwa te bwai ni kaotioti nakoia botannaomata ni kabane, ao ngkanne e a roko naba te toki.”​—Mataio 24:14.

Te rongorongo ane raoiroi anne bon oin aia rongorongo Ana Tia Kakoaua Iehova. E kangai atun aia boki ae a rangi ni kakabongana: Te Taua n Tantani ae Tataekina Ana Tautaeka n Uea Iehova. E tataekini baika raraoi aika e na karaoi Ana Tautaeka n Uea te Atua ibukia aomata ao te aonnaba.

E NA KANGAA NI KAIRIRI ANA TAUTAEKA N UEA TE ATUA?

E irekereke te kaeka ma koaua aika aua aika kakawaki aikai:

1. E na aki kabonganaia taan tautaeka n te aonnaba aika ngkai te Tautaeka n Uea aei.

2. A na kan taua te mwaaka ni kairiri taan tautaeka aikai, ao a na kaitaraa Ana Tautaeka n Uea te Atua.​—Taian Areru 2:​2-9.

3. E na boni kamaunai tautaeka n aomata aika kani karawawataia aomata, Ana Tautaeka n Uea te Atua. (Taniera 2:44; Te Kaotioti 19:​17-21) E aranaki te kabanea ni buaka aei ae kabutaa te aonnaba bwa Aremaketon.​—Te Kaotioti 16:​14, 16.

4. Naake a kan aantaeka nakon Ana Tautaeka n Uea te Atua, a na kamaiuaki rinanon Aremaketon nakon te aonnaba ae boou ae rau. Iai mirion ma mirion aomata ake a na kaaina te koraki ae e taekinna te Baibara bwa “te koraki ae uanao.”​—Te Kaotioti 7:​9, 10, 13, 14.

KO NA KANGAA NI KAKABWAIAAKI MAN ANA KAIRIRI TE TAUTAEKA N UEA?

Te moani mwaneka ae ko na riki iai bwa ana aomata Ana Tautaeka n Uea te Atua bon te reirei. E taku Iesu ngke e tataro nakon te Atua: “Ibukini karekean te maiu are aki toki, a riai n ataiko ae tii ngkoe te Atua ae koaua, ao n ataa naba teuare ko kanakomaia ae Iesu Kristo.”​—Ioane 17:3.

Ngkana a a kinaa Iehova ae te Atua aomata n aron ae kaanga te Aomata, a a kakabwaiaaki iai n aanga aika bati. Iangoi baika tii uoua aikai: Te moan, a na karekea onimakinana ae nene. E boto te onimaki anne i aon te bae e boni koaua, are a kakoauaa bwa bon iai Ana Tautaeka n Uea te Atua ao i aoni kawaina ni kairiri. (Ebera 11:1) Te kauoua, a na tangira riki te Atua ao aomata naba. E kaumakiia tangiran te Atua bwa a na ongeaba irouna ma nanoia ni koaua. A kairaki n tangiraia aomata bwa a na maiuakin ana taeka Iesu ake a araranaki bwa te Kibu ni Koora. E kangai: “Bwaai ake kam tangiriia aomata bwa a na karaoi nakoimi, karaoi naba nakoia.”​—Ruka 6:31.

Kaanga ai aron te karo ae tatangira ara tia Karikiriki, ae tangira te kabanea n tamaroa ibukira. E tangirira bwa ti na karekea te bae e atongnga te Baibara bwa “te maiu ni koaua.” (1 Timoteo 6:19) Te maiu ni boong aikai bon tiaki “te maiu ni koaua,” kioina ngkai a karawawataaki mirion ma mirion, ao a kabokorakora ni maiuia. N te aro bwa ko na nora bannan “te maiu ni koaua,” iangoi tabeua baika raraoi ake e na karaoi Ana Tautaeka n Uea te Atua ibukia ana aomata.