KARAKI 5

Rokon Te Maiu Ae Karawawata

E A RANGI ni bati aia kangaanga Atam ma Nei Ewa ngke a otinako man te oo-n-aroka are Eten. A riai ni mwakuri korakora bwa e aonga n reke kanaia. A aikoa nori kaai ake a rangi ni bati uaaia ma ni maiureirei, bwa a a oneaki mwia n akanta ma kaai aika kateketeke. Aio te bwai are e riki ngke a aki ongeaba iroun te Atua, ao e a toki naba iai aia iraorao ma Ngaia.

Ma ae a rangi n rotaki buaka riki iai, e a kekerikaki marurungia bwa a nang mate. Uringnga bwa e a tia ngkoa ni kauringia te Atua, are a na mate ngkana a kana uaan te kai arei. Eng, man te bong are a kanna iai, ao e a tabe naba ni kekerikaki marurungia nakon te mate. Ai baba ra ngkai a aki ongotaeka iroun te Atua!

A a tibwa bane n riki natin Atam ma Nei Ewa, imwin kaotinakoaia man te oo-n-aroka are Eten. Nanon aei bwa a na rotaki naba n te kara ao te mate naati aikai.

Ngke arona bwa a ongeaba Atam ma Nei Ewa iroun Iehova, a na boni kukurei n te maiu aei ma natiia. A kona ni maiu n aki toki n te aonnaba ma ni kukurei. Akea ae e na rikirake ni kara, ao akea naba ae e na aoraki ma ni mate.

E tangiriia aomata te Atua bwa a na maiu n aki toki ma ni kukurei, ao e berita bwa e na boni koro bukin aei nakoia n te taina. N te tai anne tiaki tii te aonnaba ni kabutaa ae e na rangi n tikiraoi, ma a na bane naba aomata iai ni marurung. A na bane kaain te aonnaba n reitaki n te iraorao i marenaia, ao i marenaia ma te Atua.

Ma ai tiaki ngkai raoraon te Atua Nei Ewa. Ai ngaia are e a kangaanga bungian natina bwa e a maraki iai. Ko noria ngkanne bwa te aki-ongeaba iroun Iehova, e karika te rawawata ae bati nakon neiei ke e aki?

A mwaiti natin Atam ma Nei Ewa aika mwaane ao aine. Ngke e bungiaki aia karimoa ao a aranna bwa Kain. A arana natia te mwaane are te kauoman bwa Abera. Tera are e riki nakoia? Ko ataia?

Karikani Bwaai 3:​16-23; 4:​1, 2; Te Kaotioti 21:​3, 4.