KARAKI 59

Riain Birinakon Tawita

IMWIN tiringakin Koria iroun Tawita, ao e a kairaki iroun mataniwin te taanga ni buaka are Abenera nakon Tauro. E rangi ni kukurei Tauro iroun Tawita. E a karikia bwa te mataniwi temanna n ana taanga ni buaka, ao e a kamaekaa n ana auti te uea.

Imwina riki, ngke a a oki taani buaka imwin booia ma kaain Biritia, ao a anene aine ni kangai: ‘E kamateia ngaa Tauro ma e kamateia tatabebwi ni ngaa Tawita.’ Aio are e a kabakantanga Tauro, ibukina bwa e a karineaki riki Tawita nakoina. Ma e aki bakantang natin Tauro are Ionatan. E rangi n taatangira Tawita, ao Tawita e taatangiria naba. Mangaia are a a berita naaka uoman aikai bwa a na kateimatoaa aia itangitangiri i marenaia.

E rangi n rabakau naba ni katanga te aabi Tawita, ao e taatangira te katangitang Tauro are e katangnga Tawita. Ma n te taina ao e a karaoa te mwakuri ae kakaiaki Tauro ibukin ana bakantang. Ngke e tabe ni katanga te aabi Tawita, ao e a boni karetekeia naba Tauro n te kainiwai, ao e taku: ‘N na kanimwa Tawita ma oon te auti!’ Ma e karina ni katuaa kaina Tawita, ngaia are e a aki teke n te kainiwai arei. Rimwi riki ao e a manga tua nako naba kain Tawita n ana kainiwai Tauro are e a manga karetekeia naba n te kauatai. Mangaia are e a ataia ngkai Tawita bwa e riai n rangi n taratara raoi.

Ko uringa ngkoa ana berita Tauro? E taku bwa e na anga natina te aine nakon te mwaane are e tiringa Koria. E tuangaki Tawita iroun Tauro bwa e kona n anganna natina are Mikara, ma e na tiringia moa 100 taiani kairiribai ake kaain Biritia. Iangoa anne! Ni koauana, e kaantaningaia Tauro bwa a na bon tiringa Tawita kaain Biritia. Ma a aki, ngaia are e a anga natina te aine Tauro bwa buun Tawita.

N te taina ao e a tuanga Ionatan Tauro ma ana toro nako, are e kan tiringa Tawita. Ma e taku Ionatan nakon tamana: ‘Tai tiringa Tawita. Akea te bwai ae e a tia ni karaoia ae bure nakoim. Ma bwaai ake e karaoi, moan te bati iai buokam. E a tia naba n ruanikai maiuna ngke e tiringa ngkoa Koria, ao ngke ko noria ao ko kukurei iai.’

E ira nanon natina Tauro, ao e a berita bwa e na aki tiringa Tawita. E a manga kaokaki Tawita nakon ana auti te uea, ao e a manga toro naba iroun Tauro, n aron are mai mwaina. N te taina ngke e tabe ni katangitang Tawita, ao e a manga karetekeaki naba iroun Tauro. E a manga karina naba ni katuaa kaina Tawita ao e a teke te oo n te kainiwai. Aio ai bon te katenua n tai! E a ataia ngkai Tawita bwa e riai ni birinako!

N te tairiki anne ao e a nakon ana auti Tawita. Ma e kanakoia mwaane tabeman Tauro bwa a na tiringnga. E ataa ana babaire tamana Mikara are e nang karaoia. Mangaia are e tuanga buuna ni kangai: ‘Ngkana ko aki rabanako n tairiki, ao ko nang mate ningabong.’ N te tairiki anne ao e a buoka Tawita Mikara ni kabirinakoa man te winto. E kabanea itua te ririki Tawita ni karabarabaa man te tabo teuana nakon teuana, bwa e aonga n aki reke iroun Tauro.

1 Tamuera 17:​55-58; 18:​1-30; 19:​1-18.