Reirei 9

Antai Raoraon te Atua?

Iesu Kristo bon Natin Iehova, ao raoraona ae e kaan riki ma ngaia, ao ae e tangiraki riki irouna. Imwain are e riki bwa te aomata i aon te aonnaba, e a kamani maiu i karawa Iesu bwa te aomata ae te taamnei ae mwaaka. (Ioane 17:5) Imwina, e ruo nako aon te aba bwa e na reireinia aomata te koaua ibukin te Atua. (Ioane 18:37) E anga naba maiuna n aomata bwa a na kamaiuiaki iai aomata aika a ongotaeka, man te bure ao te mate. (I-Rom 6:23) E a riki Iesu ngkai bwa te Uea n ana Tautaeka n Uea te Atua, ae te tautaeka i karawa are e na karekea te Baretaiti nakon te aonnaba aio.​—Te Kaotioti 19:16.

Taian anera bon raoraon naba te Atua. Anera a aki moana maiuia n riki bwa aomata i aon te aonnaba. A karikaki i karawa imwain karaoan te aonnaba iroun te Atua. (Iobi 38:4-7) Iai mirion ma mirion mwaitiia anera. (Taniera 7:10) Raoraon te Atua aika kaaini karawa aikai, a tangiriia aomata bwa a na reiakina te koaua ibukin Iehova.​—Te Kaotioti 14:6, 7.

Iai naba raoraon te Atua i aon te aonnaba; a aranaki irouna bwa ana tia kakoaua. Te tia kakoaua n te boowi, e taekina te bwai ae e ataia ibukin temanna ke te bwai teuana. Ana Tia Kakoaua Iehova a kaotii nakoia tabeman bwaai aika a ataia ibukin Iehova ao ana kaantaninga. (Itaia 43:10) N aroia naba anera, taani Kakoaua a tangiria ni buokiko bwa ko na reiakina te koaua ibukin Iehova. A tangiriko bwa ko na riki bwa raoraon te Atua naba.