Reirei 10

E na Kanga ni Kakaeaki te Aro ae Koaua

Ngkana ko kan riki bwa raoraon te Atua, ko riai ni kakaonimaki nakon te Aro are E kukurei iai. E taku Iesu bwa “taan taromauri ni koaua” a na taromauria te Atua n te aro ae boraoi ma “te koaua.” (Ioane 4:23, 24) Bon tii teuana te kawai ae eti ibukin taromaurian te Atua. (I-Ebeto 4:4-6) Te Aro ae koaua e kairiri nakon te maiu are aki toki, ao te Aro ae kewe e kairiri nakon te kamaunaaki.​—Mataio 7:13, 14.

Ko kona ni kinaa te Aro ae koaua man taraakin aia kakaonimaki kaaina. Kioina ngkai e raoiroi Iehova, te koraki ake taan taromauriia ni koaua bon aomata aika a riai n raoiroi naba. N aron te aroka ae te aoranti ae raoiroi ae kariki uaana aoranti aika a raraoi naba, te Aro ni koaua e na kariki naba uaana aomata aika a raraoi.​—Mataio 7:15-20.

Raoraon Iehova a rangi ni karinea te Baibara. A bon ataia ae te Baibara e nako mairoun te Atua. A kariaia are e taku bwa e na kaira aron maiuia, e na katoki aia kanganga, ao e na buokiia n reiakina taekan te Atua. (2 Timoteo 3:16) A kataia ni maiuakini bwaai ake a tataekinna.

Raoraon Iehova a kaotiota te tangira imarenaia. Iesu e a tia ni kaota te tangira nakoia aomata ngke e reireiia taekan te Atua, ao ngke e katoki aorakiia. Te koraki ake a kataneiaaki inanon te Aro ae koaua a boni kaotiota naba te tangira nakoia aomata. A katotonga Iesu n aki kona ni kaaki bongaia te koraki ake a raarikin, ke te koraki ake a kakaokoro aia reeti ma ngaiia. E taku Iesu bwa a na kinaaki taan rimwina irouia aomata, man te tangira are a kaotiotia imarenaia.​—Ioane 13:35.

Raoraon te Atua a karinea aran te Atua, ae Iehova. Ngkana iai ae rarawa ni kabongana aram, e kona n riki te aomata anne bwa raoraom ae ko kaan ma ngaia? E bon aki konaa! Ngkana arona bwa iai raoraora, ti na boni bae ni kabongana arana ao n tataekin bwaai aika raraoi ibukin raoraora arei nakoia tabeman. Mangaia are te koraki ake a kan riki bwa raoraon te Atua, a riai ni kabongana arana ao n tataekina taekana nakoia tabeman. Iehova e tangirira bwa ti na karaoa anne.​—Mataio 6:9; I-Rom 10:13, 14.

Raoraon te Atua a katotonga Iesu, n reirei taekan ana Tautaeka n Uea te Atua. Ana Tautaeka n Uea te Atua bon te tautaeka mai karawa are e na karaoa te aonnaba aei bwa te baretaiti. Raoraon te Atua a tibwaa te rongorongo ae raoiroi aei ibukin ana Tautaeka n Uea te Atua ma tabeman.​—Mataio 24:14.

Ana Tia Kakoaua Iehova, a kakorakoraiia bwa a aonga n raoraona te Atua. A karinea te Baibara ao a itangitangiri imarenaia. A kabongana aran te Atua mani karinea, ao a reireiia naba tabeman taekan ana Tautaeka n Uea te Atua. Ana Tia Kakoaua Iehova boni ngaiia aika a waakina te Aro ni koaua i aon te aba ni boong aikai.