Mwakoro Tebwi Ma Tenua
Te Koraki ae Uanao i Matan Ana Kaintokanuea Iehova
1. (a) Tera ae a riai n rinanona moa, ana toro te Atua ake a maiu imwain aia tai Kristian ao te koraki ake 144,000 mwaitiia, imwain ae a na karekea kaniwangaia? (b) Tera ae na reke nakoia “te koraki ae uanao” aika a maiu ngkai?
ANA toro te Atua aika kakaonimaki ni moa mairoun Abera ni karokoa Ioane te tia Babetito, a moanibwaia karaoan nanon te Atua ni maiuia. Ma a a tia ngkai ni mate, ao a tataningaa kautakia nakon te maiu n ana aonnaba te Atua ae boou. A riai n rinanon te mate te koraki ake a na tautaeka ma Kristo n ana Tautaeka n Uea te Atua i karawa ae 144,000 mwaitiia, imwain karekean kaniwangaia. Ma e taekinna Te Kaotioti 7:9 bwa ni boong aika kaitira aikai, e na iai “te koraki ae uanao” mai buakoia natannaomata nako aika a na aki rinanon te mate, ma a na kona ni maiu n aki toki n te aonnaba aei. Ko mena naba i buakoia te koraki aei?
Kinaakia te Koraki ae Uanao
2. Baikara bwaai aika a karikirakea te ota i aon ataakin ae antai te koraki ae uanao ae taekinaki n Te Kaotioti 7:9?
2 N 1923 ana toro Iehova a ota bwa “tiibu” n ana kaikonaki Iesu ni Mataio 25:31-46, ao “tiibu tabemang” ake e taekinia n Ioane 10:16, bon aomata ake a na karekea te maiu n aki toki n te aonnaba. N 1931, te koraki ake a kabwarabwaraki taekaia n Etekiera 9:1-11 ake a a tia ni kanikinaeaki ramwaia, a ataaki naba bwa aomata aika a na maiu n te aonnaba. N 1935, e a ataaki bwa te koraki ae uanao boni kaain naba te koraki ake tiibu tabemwaang ake e taekinia Iesu. Ni boong aikai iai kaain te koraki ae uanao ae akoaki aei, aika mirion ma mirion mwaitiia.
3. Bukin tera bwa te kibu n taeka ae “tei i matan te kaintokanuea,” e aki nanonia kaain te nako karawa?
3 A aki noraki kaain te koraki ae uanao n tei i karawa n Te Kaotioti 7:9. (BK) Aroia n ‘tei i matan ana kaintokanuea te Atua’ e aki nanonna bwa a mena i karawa. A mena n te tabo ae a noraki iai iroun te Atua. (Taian Areru 11:4) E noraki bwa te koraki ae uanao bon tiaki te koraki aika a na mena i karawa, ngkana e kabotauaki aia ware ae “akea temanna ae e kona ni wareki maitia,” ma te mwaiti are kateretereaki n Te Kaotioti 7:4-8 ao Te Kaotioti 14:1-4. Ni kiibu akanne mwaitiia aomata ake a na anaaki mai aon te aba nako karawa, e kaotaki bwa 144,000.
4. (a) Tera “te rawawata are korakora” are a kamaiuaki mai iai te koraki ae uanao? (b) N aron ae taekinaki n Te Kaotioti 7:11, 12, antai aika a tarataraia te koraki ae uanao ao ni buokanibwai ma ngaiia n taromauri?
4 E taekina aei Te Kaotioti 7:14 ibukin te koraki ae uanao: “Bon aika nako mai buakon te rawawata are korakora.” A kamaiuaki man te kangaanga ae korakora ae tuai man noraki mai mwaina. (Mataio 24:21) Ngkana a kaota ataakin ae a kamaiuaki iroun te Atua ao Kristo, kaaini karawa ngkanne ni kabane aika kakaonimaki, a na botii bwanaia ma ngaiia n taku: “Amene: Ana bwai Atuara te karaoiroaki, ma te neboaki, ma te rabakau, ma te katituaraoaki, ma te karineaki, ma te mwaka, ma te korakora, n aki totoki. Amene.”—Te Kaotioti 7:11, 12.
A Riai ni Kaotia bwa A Tau ni Kamaiuaki
5. Ti na kanga n ataia bwa tera ae ti riai ni karaoia bwa ti aonga n riki bwa kaain te koraki ae uanao?
5 Kamaiuaia te koraki ae uanao rinanon te rawawata ae korakora, e na waakinaki ni kaineti ma ana kaetieti Iehova aika raraoi. Te Baibara e katereterei raoi aroaroia aomata aika a na kamaiuaki. Ibukin anne, aomata aika tangira te raoiroi a kona ni mwakuri mangkai, bwa a aonga n tau ni kamaiuaki. Tera ae a riai ni karaoia?
6. Bukin tera bwa te koraki ae uanao a boni kona ni kabotauaki ma tiibu?
6 A nimamannei tiibu ao a aantaeka, mangaia are ngke e taku Iesu bwa iai riki ana tiibu aika tiaki kaain te koraki ake a na nako karawa, e bon nanonia aomata ake a kani maiu n aki toki n te aonnaba, ao n aantaeka naba n ana reirei. E taku: “A ongo bwanau au tiibu, ao I kinaia, ao a irirai.” (Ioane 10:16, 27) Aikai aomata ake a kakauongo raoi ao n ongeaba n ana taeka Iesu, ao a riki bwa taan rimwina.
7. Baikara aroaro ake a riai ni karikirakei taan rimwin Iesu?
7 Baikara riki aroaro tabeua ake a riai ni karikirakei taan rimwin Iesu? E kaeka ana Taeka te Atua ni kangai: “Kam na kitana te aomata nikawai are aromi ni maeka ngkoa . . . ao kam na karina te aomata nabangkai, are karaoaki ba aron te Atua n te raoiroi ao n te itiaki are riki man te koaua.” (I-Ebeto 4:22-24) A karikirakei aroaro ake a kakorakoraa riki katiteuanakiia n toro iroun te Atua, n aron “te tangira, te kimareirei, te rau, te taotaonaki n nano, te atataiaomata, te raoiroi, te kakaonimaki, te nimamanei, [ao ai] te tau-baang.”—I-Karatia 5:22, 23.
8. Tera ae a na kaaitara ma ngaia te koraki ae uanao ngkai a boutokaia te nikira ake a kabiraki?
8 Te koraki ae uanao a boutokaia te koraki ake a kaantaninga te nako karawa ae e uarereke mwaitiia, ake a kaira te mwakuri n uarongorongo. (Mataio 24:14; 25:40) A anga te boutoka aei tiibu tabemwaang, e ngae ngke a ataia bwa a na ribaaki iai, ibukina bwa ni moan boong aika kaitira aikai, Kristo Iesu ao ana anera a tewea nako Tatan ma ana taimonio mai karawa. E nanonaki iai bwa e na “reke kain te aba . . . ba e ruo te riaboro nako imi, ao e bati n unun, ngkae e ataia ba a kani bane ana bong.” (Te Kaotioti 12:7-12) Mangaia are, e a kakorakoraa riki ngkai te kairiribai Tatan nakoia ana toro te Atua ibukina bwa e a kaan tokin te waaki ae buakaka aei.
9. Tera aron nakoraoin tataekinan te euangkerio irouia ana toro te Atua, ao bukin tera?
9 E teimatoa ni waakinako te mwakuri n tataekina te rongorongo, n aki ongea te bwainikirinaki ae korakora. E a raka ngkai mwaitiia taan uarongorongoa te Tautaeka n Uea man tabeua te ngaa n tokin te Moan Buaka ae Kabuta te Aonnaba nakon tabeua te mirion, bwa e berita ni kangai Iehova: “Bon akea te kai-ni-buaka teuana ae karaoaki n ekiko nako ae na tokanikai.” (Itaia 54:17) Bon iai naba temanna kaain te kaboowi ae rietata i Iutaia ae ataia bwa e aki kona ni katokaki ana mwakuri te Atua. E tuangia Baritaio n te moan tienture ni kaineti ma taan rimwin Iesu ni kangai: “Tai tukiia: ba ngkana tao aia bwai aomata te taeka aei ke te makuri aei, ao bon akea mwina: ma ngkana ana bwai te Atua, ao kam aki kona n urua; ba kam kawa n noraki iai ba kam buakana te Atua.”—Mwakuri 5:38, 39.
10. (a) Tera ae nanonaki n “te kanikina” are e mena i aoia te koraki ae uanao? (b) A kanga ana toro te Atua n ongotaeka nakon “te bwana teuana mai karawa”?
10 Kaain te koraki ae uanao a kanikinaeaki ibukin te kamaiuaki. (Etekiera 9:4-6) “Te kanikina” bon te bwai ni kakoaua are e kaotia bwa a a tia ni katabui maiuia nakon Iehova, a babetitoaki bwa taan rimwin Iesu, ao a uaiakina karinan aroaroni Kristo i nanoia. A ira nanon “te bwana teuana mai karawa” are e taekina ana botaki n Aro ae kewe Tatan ni katobibia te aonnaba, ae kangai: “Au aomata, kam na oti nako mai nanona, ba kam na aki buokanibwai ma ngaia n ana bure, ao a na aki reke i roumi bwaai ni kamamate ake kaina.”—Te Kaotioti 18:1-5.
11. Tera te anga ae kakawaki are a kaotiotiia iai kaain te koraki ae uanao bwa bon ana toro Iehova ngaiia?
11 E tuangia riki taan rimwina Iesu ni kangai: “Ane a na ataingkami aomata ni kabaneia ba au reirei ngkami n aei, ngkana kam i tangitangiri.” (Ioane 13:35) Ni kaitaraa anne, kaain Aaro n te aonnaba aei a tiringia taria n te onimaki n te buaka, tii ibukin kaokoron aia reeti! E taku ana Taeka te Atua: “A kaotaki natin nako te Atua ma natin nako te riaboro n aei: ane aki karaoa ae raoiroi ao tiaki mairoun te Atua, ao ai uana naba ane aki tangira tarina. . . . ti na i tangitangiri: tiaki aroni Kain are mairoun teuare buakaka, are kamatea tarina.”—1 Ioane 3:10-12.
12. N te rawawata ae korakora, tera ae e na karaoia Iehova nakoni “kaai” aika a tei ibukia Aaro, aika a kariki uaa aika bubuaka?
12 E kaota aio Iesu: “Ao ai aron naba kaai ni kabane aika raraoi, a kariki uaa aika raraoi; ao kaai ni kabane aika bubuaka, a kariki uaa aika bubuaka. E aki kona ni karika te uaa ae buakaka te kai ae raoiroi, ao e aki kona ni karika te uaa ae raoiroi te kai ae buakaka. Kaai nako aika aki kariki uaa aika raraoi a koreaki, ao a teweaki nako n te ai. Ma ngaia aei, ba ane kam na kinaia uakekei n uaaia.” (Mataio 7:17-20) A kaotaki Aaro n te aonnaba aei n uaaia, bwa “kaai” ngaiia aika bubuaka ake a nang kamaunaki iroun Iehova, n tain te rawawata ae korakora.—Te Kaotioti 17:16.
13. A kanga te koraki ae uanao ni kabwarabwaraa bwa a katiteuanaki n ‘tei i matan ana kaintokanuea Iehova?’
13 E kaira ara iango Te Kaotioti 7:9-15 (BK), nakoni bwaai aika karika kamaiuaia kaain te koraki ae uanao. A noraki ni katiteuanaki n “tei i matan . . . [ana] kaintokanuea” Iehova, ni boutokaa mwaakan ao riain ana tautaeka i aon bwaai ni kabane. “A tia n teboki aia kamarai ma ni kamainainai n raran te Tibutetei,” are a a kaotia iai bwa a onimakina manenan ana karea Iesu ni kabwarai buure. (Ioane 1:29) A a tia ni katabui maiuia nakon te Atua, ma ni kaotaraaea anne n te babetito n te ran. Mangaia are aia kamwarai aika mainaina, a a kaota itiakiia i matan te Atua, ao a “tataromauria, ni ngaina ao ni bong.” Iai riki aanga tabeua aika ko kona ni kaboraoa iai maium ma ae kabwarabwaraki ikai?
Kakabwaia Aika Reke Ngkai
14. Baikara kakabwaia aika okoro aika rereke ngkai naba irouia ana toro Iehova?
14 Tao ko a tia rinanon kakabwaia aika okoro aika a rereke naba ngkai irouia aika a beku iroun Iehova. N te katoto, ngke ko reiakina taekan ana kaantaninga Iehova aika raraoi, ko a ota bwa iai te kaantaninga ae moan te tamaroa nakon taai aika na roko. Mangaia are iai manenan maium, ngkai ko kona ni bebeku iroun te Atua ae koaua ma ni kaantaningaa te maiu n aki toki n te aonnaba ae te baretaiti. Eng, te Uea ae Iesu Kristo, “e na kairiia [te koraki ae uanao] nakon te koburake n ran, ike a na moi iai n te ran ni kamaiu.”—Te Kaotioti 7:17, BK.
15. A kanga ni kakabwaiaki Ana Tia Kakoaua Iehova man maiuakinan ana reirei te Baibara aika a kaineti ma te waaki n tautaeka ao te aroaro ni maiu ae riai?
15 Te kakabwaia ae kamimi ae reke irouia kaain te koraki ae uanao aika toro iroun Iehova ni katobibia te aonnaba, bon te tangira, te katiteuanaki, ao te rau. Ti bane n aantaeka n tuua ma reirei aika a kuneaki n ana Taeka te Atua, ibukina bwa tii te arona karara n taamnei ae ti amwamwarake iai. Anne bukina ae e aki uruaki iai boonnanora n aia waaki ao aia iango tautaeka aika kakaokoro. Ti kateimatoaa naba te aroaro ni maiu ae riai are e tangiria te Atua mairouia ana aomata. (1 I-Korinto 6:9-11) Ana aomata Iehova a aki rinanon te itabarara, te iraraure, ao aroaro ni maiu aika buakaka aika a taabangaki n te aonnaba aei, bwa a maeka, kaanga n te baretaiti n taamnei. Nora aron kabwarabwaran aei n Itaia 65:13, 14.
16. N aki ongei taiani kangaanga aika riiriki n te maiu aei, ma tera aia kaantaninga kaain te koraki ae uanao?
16 A bon aki-kororaoi ana toro Iehova, ao a rotaki naba ni kangaanga aika riiriki n te aonnaba aei, n aron taian rawawata, ke te reketaati n aia buaka natannaomata. A kaaitara ma te aoraki, te maraki, ao ai te mate. Ma a onimakinna bwa n te aonnaba ae boou, “E na kabane rannimataia te Atua ni kaoi mai mataia. Ao e na akea riki te mate, ao e na akea naba te nanokawaki, ma te tang ma te maraki.”—Te Kaotioti 21:4.
17. N aki ongeia bwa tao tera ae e na riki nakoira ngkai, ma tera te kaantaninga ae kamimi ibukin te tai ae na roko, ae e katauraoia te Atua ae koaua ibukia taan taromauria?
17 E ngae ngkana ko mate ibukin te kara, te aoraki, te kabuanibwai, ke te bwainikirinaki, ma e na boni manga kautiko Iehova nakon te maiu n te Baretaiti. (Mwakuri 24:15) Ko na teimatoa iai n amwamwarake n te marike n taamnei n ana tai n Tautaeka Kristo ae Maanna Tenga te Ririki. E na kakorakoraki riki tangiran te Atua iroum ngkana ko a nori kakoroan bukin ana kaantaninga nako aika kamimi. Ma ae e na kakorakoraa riki am tangira, boni kakabwaia n te itera n rabwata ake e na anga Iehova. (Itaia 25:6-9) Ai kamimi ra te tai ae na roko are e katauraoia te Atua ibukia ana aomata!
Te Maroro Ibukin te Kauring
• Tera te waaki ae kamimi are e kairekerekea iai taekaia te koraki ae uanao, te Baibara?
• Tera ae ti riai ni karaoia ma ngkai, ngkana ti na riki bwa kaain te koraki ae uanao ake a akoaki iroun te Atua?
• A rangi ni kakawaki iroum kakabwaia aika rereke irouia kaain te koraki ae uanao ngkai, ao ake a na reke n ana aonnaba te Atua ae boou?
[Taamnei n iteraniba 123]
Mirion ma mirion mwaitiia kaain te koraki ae uanao aika a katiteuanaki n taromauria te Atua ae koaua