Tera Ae Ko Tabe N Uaiakinna I Aoni Maium?
• A mwaiti aomata aika a kabanei riki aia tai n tabeakini bwaai aika a kainnanoi ibukin maiuia n te bong koraki, ao a aki bati n iangoia bwa tera raoi ae a tabe n uaiakinna.
• Ti kaongoaki n te Baibara taekan bwaai aika kamimi aika a na riki nakon taai aika imwaira. E kauringira naba taekan te bitaki ae korakora are a na rinanona aia botaki ao aia waaki kaain te aonnaba ni kabane. Ngkana ti na kakabwaiaki man ataakin te rongorongo aei ao n totokoa rikin te kabuanibwai nakoira, ao ti riai ni kaumakira ni waekoa ni karaoi mwakuri aika raraoi ngkai.
• Iai tabeman aomata aika a ataa kanoan te Baibara ao a kataia ni karaoa nanona, ma a manga kariaia bwa a na atikaki nako nanoia n raraomaeakinan bwain te maiu.
• Ko kukurei ni bwaai aika ko uaiakin ni maium? Ngkana ko babairei bwaai aika ko na karaoi, ko iangoia moa bwa e na kangaa n rotaki iai tiam aika ko uaiakini?
[Bwaoki/Taamnei n iteraniba 9]
Tera ae Kakawaki Riki Iroum?
E ngaa ae kakawaki iroum mai buakon bwaai aikai? Karinanna man nambwa 1 nakon 10 ni kaineti ma kakawakiia iroum.
A mwaiti mai buakoia aika kakawaki ibukin maiura, ma ngkana ko riai n rineia, e ngaa ae te kabanea ni kakawaki ibukin maium? ao are i aana riki? ao ai uana nako naba.
․․․ Te takaakaro/te kakibotu
․․․ Au mwakuri ke nakoau
․․․ Marurungin rabwatau
․․․ Kukureiu
․․․ Buu
․․․ Au karo
․․․ Natiu
․․․ Te auti ae kamwengaraoi, kunnikai aika raraoi
․․․ N na moanna ni bwaai ni kabane ake I karaoi
․․․ Taromaurian te Atua
[Bwaoki n iteraniba 11]
A Kairiko Nakon Tiam ae Ko Kan Uaiakinna Baika Ko Rinei?
IANGOI TITIRAKI AIKAI
TE TAKAAKARO/TE KAKIBOTU: A kamarurungai bwaai aika I rinei bwa au bwai ni kakakibotu? E irianaki te kakibotu aei n te roko-n-nano are e na kona ni karekea te kangaanga nakon marurungin rabwatau, ke e na kona ni kamwaukuai ni kabane au bong ni maiu? E irekereke te kakibotu ke te takaakaro aei ma te “kukurei” tii i nanon tabeua te aoa, ao imwina e karekea te rawawatannano i nanon te tai ae maan? E ngae ngkana takaakaro ake I rinei a raraoi, ma te koaua bwa I kabanea au tai ae rangi ni mwaiti iai, n te aro are e a karibwaa au tai ibukin karaoan bwaai tabeua aika kakawaki riki?
AU MWAKURI KE NAKOAU: E buokai nakoau aei ibukin karekean bwaai aika I kainnanoi ibukin maiuu, ke I boni kabanea au tai ao korakorau iai? I kainnanoaki bwa N na mwakuri iai n akea au motirawa n te aro are e a kani kabuanibwai marurungiu iai? I tangira riki te tiku ni mwakuri i tinanikun te aoa ni mwakuri, nakon ae N na kabanea riki au tai ma buu ke natiu? Ngkana arona bwa e tangirai au tia kamwakuri bwa N na karaoa te mwakuri ae aki karaua mataniwin nanou ke e a aki toki ni karibwaa karaoan bwaai n taamnei irou, te koaua bwa N na boni karaoa ae e tangiria bwa I aonga n aki kabaneaki?
MARURUNGIN RABWATAU: I kaotiota aki-tabeakinan marurungiu, ke I katoatai n tararuaia raoi? Atun au maroro n taai nako marurungiu? Te koaua bwa arou n tararuaa marurungiu, I a kaotia naba iai bwa I tabeakina au utu?
KUKUREIU: I moanibwaia riki aei ni maiuu? I kaakarimoaa kukureiu nakon kukurein buu ke au utu? Te koaua bwa arou n ukoukora kukureiu e boraoi ma anuan te aomata ae te tia taromauria te Atua ae koaua?
BUU: I iangoa buu bwa raoraou ni koaua n taai nako ke tii ngkana e angaraoi irou? I karinea buu n aron ae riai ni karineaki iai te aomata? E kairiraki aroarou nakon buu n onimakinan te Atua?
AU KARO: Ngkai I tuai n roko n te roro n ikawai, te koaua bwa I ongeaba irouia au karo n aron ae I kaekaia ma te karinerine, I kakaonimaki ni karaoi raoi mwakuri aika I mwiokoaki iai, I okira au auti n te tai are a a tia ni baireia nakoiu, I kararoai mwakuri ao aaro n iraorao ake a tukai mai iai? Ngkai I a ikawai, I kakauongo raoi nakoia au karo ma ni karineia, ao I buokiia ngkana a kainnanoa buokaia? A tautaekanaki aroarou aika I kaakaraoi nakoia n te bwai ae I tangiria ke n reirei man ana Taeka te Atua?
NATIU: I namakinna bwa bon tabeu bwa N na reireinia natiu te aroaro ni maiu ae riai, ke I kaantaningaia bwa e na karaoaki aei n aia tabo n reirei? Iai au tai ae I kabanea ma natiu ke I a bon onimakin naba aia bwai n takaakaro, te viteo, ke te takaakaro n te kombiuta bwa e na katabetabeaki aia iango iai? I katuuaia natiu n taai ni kabane ake a aki mutiakina iai ana kauring te Atua, ke tii ngkana iai te bwai ae kaunai?
TE AUTI AE KAMWENGARAOI, KUNNIKAI AIKA RARAOI: Tera ae kairai ni kaineti ma korakorau ae I kabanea ibukin katikiraoan taraakiu ao au bwai koraki? E kairaki nanou iai n te kan tiroaki irouia kaain rarikiu? nanou ni kan katauraoi bwaai aika riai ibukin au utu? tabeu iai kioina ngkai te tia taromauria te Atua ngai?
N NA MOANNA NI BWAAI AKE I KARAOI: Iai irou namakinan ae e kakawaki kaakaraoan ae raoiroi nakoni bwaai nako? I kakorakorai bwa N na moanna ni bwaai ake I karaoi? E tabetabe au iango ngkana iai ae karaoa ae raoiroi riki nakoiu?
TAROMAURIAN TE ATUA: E kakawaki riki irou akoakiu iroun te Atua nakon akoakiu iroun buu, natiu, au karo, ke te aomata ae I mwakuri irouna? Te koaua bwa N na tauraoi ni kamwinibwaia au beku ibukin te Atua ibukin kateimatoan kamwengaraoau?
IANGOI RAOI ANA REIREI TE BAIBARA
Tera aron kakawakin taromaurian te Atua iroum?
Te Minita 12:13: “Maka te Atua, ao tou mwin ana tua; ba bon anne kabanean te aro ae riai irouia aomata.”
TITIRAKINIKO NI KANGAI: I kaotia n anuani maiuu bwa I kairaki n te kibu anne? Te koaua bwa te ongeaba nakon ana tua te Atua e kairai ni kaineti ma aroarou ni kakororaoa tabeu ni mwengau, n au tabo ni mwakuri, ke n au tabo n reirei? Ke I kariaia bwa raraomaeakinan bwain te maiu aei irou ke bwaai tabeua ake I kani karaoi, a na urua au tai ae I riai ni kabonganaa ibukin te Atua?
Aekakira am iraorao ma te Atua?
Taeka N Rabakau 3:5, 6: “Onimakina Iehova n nanom ni kabanea, ao tai mwiokoa oin am ataibwai: Ko na ataia n nakonakom ni kabane, ao E na kaeti kawaim.”
Mataio 4:10: “Ko na taromauria Iehova ae Atuam, ao ko na toro i Rouna n ti Ngaia.”
TITIRAKINIKO NI KANGAI: E boraoi au namakin nakon te Atua ma ae taekinaki n te kibu ae mai eta? E kaotiotaki onimakinan ao tangiran te Atua irou ni mwakuri aika I kaakaraoi ni katoa bong, n irianaki naba ma arou ni kaaitarai kangaanga ke bwaai aika kakamaaku?
Tera aron kakawakin te wareware ao te reirei n te Baibara iroum?
Ioane 17:3: “Aio te maiu are aki toki, te ataiko ae te Atua ae ti temanna ae koaua, ao Iesu Kristo, ae Ko kanakomaia.”
TITIRAKINIKO NI KANGAI: Te koaua bwa kakawakin warekan ao kananoan au iango i aon ana Taeka te Atua, e kaotia bwa I boni kakoauaa raoi te kibu anne?
Tera aron kakawakin kaakaean botaki n te ekaretia ni Kristian iroum?
Ebera 10:24, 25: “Ti na i taratara n iangoi arora ba ti aonga ni keiakinira ni karika te tangira ma makuri aika raraoi. Ao ti na tai kaki te bobotira, . . . ni kakorakoraira riki iai n te aro ane kam nora te Bong arei ba e a kan roko.”
Taian Areru 122:1: “I kukurei ngke a kangai nako iu, Ti na nako ni maneaban Iehova.”
TITIRAKINIKO NI KANGAI: Te koaua bwa e noraki n anuani maiuu te kakaitau ibukin te kaetieti aei man ana Taeka te Atua? N te namwakaina are nako, iai te botaki ni Kristian ae I aki iria ibukina bwa I moanibwai riki karaoan bwaai tabeua?
E ingainga nanom ni kan taekina te Atua ma ana kaantaninga nakoia aomata?
Mataio 24:14: “E na tataekinaki euangkerion uean te Atua aei i aonaba ni bane ba te bwai ni kaotioti . . . , ao ngkanne e na roko naba iai te toki.”
Mataio 28:19, 20: “Ma ngaia ae kam na nako ni kakiritiania botanaomata ni kabaneia, . . . n reireiia ba a na kabane baike I tuangngkami n tauu.”
Taian Areru 96:2: “Anene nakon Iehova, karaoiroa arana; Kaota kamaiuan te aba i Rouna n te bong ae koraki.”
TITIRAKINIKO NI KANGAI: Te koaua bwa e kakawaki te mwakuri aei irou, n aron ae kaantaningaki bwa e riai ni karaoaki? E noraki man arou ni kakorakoraai ni buoka karaoan te mwakuri aei bwa I kakoaua bwa ti a boni mena ngkai i nanon taai aika kakawaki?