Te Aonnaba Ae Boou Are E A Tia Ni Beritanna Te Atua
TI RANGI ni kariariaa kakororaoan ana Taeka te Atua ae koreaki n te Baibara ngke e taekina ae kangai: “Ti kaantaningai karawa nabangkai ma aonaba nabangkai, ake e mena iai te raoiroi.”—2 Betero 3:13.
Tera “karawa nabangkai”? N te Baibara, ao e kairekerekeaki karawa ma te tautaeka. (Mwakuri 7:49) “Karawa nabangkai,” bon te tautaeka ae boou are e na tautaekana aon te aba. E atongaki bwa e boou kioina ngkai e na onea mwin te waaki n tautaeka ae ngkai; bon te mwaneka naba ae boou ibukin kakororaoan ana kaantaninga te Atua. Bon te Tautaeka n Uea are e reireinira Iesu bwa ti na tataroia. (Mataio 6:10) Kioina ngkai te tia Katea te tautaeka aei bon te Atua ae mamaeka i karawa, e atongaki ngkanne bwa “te tautaeka n uea i karawa.”—Mataio 7:21, NW.
Tera “aonaba nabangkai”? E na aki manga karaoaki te aonnaba teuana ae boou, kioina ngkai e kamatataaki n te Baibara bwa e na boni maekanaki n aki toki te aonnaba aei. Te “aonaba nabangkai” bon te botannaomata ae boou. E boou kioina ngkai a a tia n teweaki nako mai iai aomata aika buakaka. (Taeka N Rabakau 2:21, 22) Aomata ngkanne ake a maiu n te tai anne, a na neboa ao n ongeaba iroun te tia Karikiriki ao a na kaboraoa maiuiia ma ana kaetieti. (Taian Areru 22:27) A bane ni kaoaki aomata man botannaomata nako bwa a na kaboraoi maiuiia ma bwaai aika tangiraki irouna ngkai. Ko tabe ni karaoa anne ngkai?
A na bane aomata ni karinea Ana tautaeka te Atua n ana aonnaba ae boou. Te koaua bwa e kairiko tangiran te Atua bwa ko na ongeaba irouna? (1 Ioane 5:3) E noraki bwa ko karaoa anne n aroarom ni mwengam? n am tabo ni mwakuri ke n te reirei? n arom ni kabongana maium ngkai?
A na katiteuanaki kaain te aonnaba ae boou ni kabane n taromauria te Atua ni koaua. Ko bon taromauria te tia Karika karawa ao aonnaba? Ko katiteuanaki n am taromauri anne ma raom n onimaki mai buakoia botannaomata, reeti, ao taetae ni kabane?—Taian Areru 86:9, 10; Itaia 2:2-4; Tebania 3:9.
[Taamnei n iteraniba 17]
Te Atua are E Beritani Baikai
Boni ngaia te tia Kariki bwaini karawa ni kabane ao te Aonnaba. Boni ngaia naba are e taekinna Iesu Kristo bwa “te Atua ae ti temanna ae koaua.”—Ioane 17:3.
Angiia aomata a neboi atuaia aika a boni karaoi. Iai aomata aika mirion ma mirion mwaitiia aika a bobaraki i matan aia bouannanti. Tabeman a kabotoi aia iango i aon katein aon te aba, bwaikorakin te maiu aei ke koaua aika kaakea bongan te Atua, ke a moanibwaia oin nanoia. Iai naba aomata ake a taku bwa e boto aia taromauri man te Baibara, ma a aki bane n neboa te ara are e kaotaki n te Baibara bwa aran “te Atua ni koaua.”—Te Tua-Kaua 4:35, BK.
E taekina ae kangai te tia Karikiriki: “Bon Iehova Ngai; bon arau aei.” (Itaia 42:5, 8) E kaotiotaki te ara aei n te Baibara 7,000 tabun te tai n te taetae are e moani koreaki iai ngkoa te Baibara. E reireinia taan rimwina Iesu Kristo bwa a na tataro ni kangai: “Tamara are i karawa, E na tabuaki aram.”—Mataio 6:9.
Tera aroaron te Atua ni koaua? E boni kabwarabwaraa aroarona ae e “on n te atataiaomata, ae akoi, ae iremwe n un, ae e bati te nanoanga ma te koaua” irouna, ao e aki kamanoia aomata aika a urua ana tua ni bon oin nanoia man katuuaeakia. (Te Otinako 34:6, 7) E kona ni kakoauaki aroarona aikai man rongorongon ana itoman ma aomata ma rimoa ni karokoa ngkai.
Te ara anne ao teuare arana anne, a riai ni katabuaki ke n iangoaki bwa a itiaki. Ngkai boni ngaia te tia Karikiriki ao te tia Tautaeka i aon Bwaai ni Kabane, e bon riai ngkanne bwa ti na ongeaba irouna ma n taromauria. Ko bon taromauria ma n ongeaba irouna?
[Bwaoki/Taamnei n iteraniba 18]
Baikara Bitaki Aika A na Reke man “Karawa Nabangkai ma Aonaba Nabangkai”?
E a onikaki aon te aba nakon te Baretaiti Ruka 23:43
A katiteuanaki n te tangira aomata ni katobibia te aonnaba, mai buakoia botannaomata, reeti, ao taetae ni kabane Ioane 13:35;
E a taabangaki te rau ao te mweeraoi ni koaua Taian Areru 37:10, 11;
Te mwakuri ae kakukurei, e na taonako te amwarake Itaia 25:6; 65:17, 21-23
E a kamaunaki te aoraki, te nanokawaki, ao te mate Itaia 25:8;
A katiteuanaki kaain te aonnaba ni kabane n taromaurian te Atua ni koaua Te Kaotioti 15:3, 4
[Bwaoki/Taamnei n iteraniba 19]
Ko na Kakabwaiaki Iai?
E aki kona ni kewe Atua!—Tito 1:2.
E taku Iehova: “Au taeka . . . e na aki okirai ni matebuaka, ma e na boni karaoa ae I tangiria, ao e na reke konana n are I kanakoa nako iai.”—Itaia 55:11.
E tabe ni karika “karawa nabangkai ma aonaba nabangkai,” Iehova. E a tia ngkai ni waakina ana mwakuri te tautaeka aei i karawa. E a tia ni kaweneaki aan te “aonaba nabangkai.”
N te boki ae Te Kaotioti, imwin kabwarabwaraan bwaai aika rangi n raraoi aika a na karekeaki ibukia aomata iroun “karawa nabangkai ao aonnaba nabangkai,” ao e manga koreaki iai ana taeka te Atua are te tia Tautaeka i aon Bwaai ni Kabane ae kangai: “Noria, I a manga karaoi bwaai ni kabane ba bwaini ngkai.” E a manga taku riki: “Koroboki: ba a kakaonimaki taeka aikai ao a koaua.”—Te Kaotioti 21:1, 5.
E kangai ngkanne te titiraki ae kakawaki, Te koaua bwa ti karaoi bitaki aika kainnanoaki bwa ti aonga n noraki bwa ti bon tau n riki bwa kaain te “aonaba nabangkai” i aan “karawa nabangkai”?