Te Reta Mairoun te Rabwata n Tautaeka

Nakoim Ngkoe ae Raora n Uarongorongoa te Tautaeka n Uea:

IANGOIA bwa aongkoa ngkoe kaain te utu ni Betaera i Brooklyn, n ingabongin te Kanimabong ae Okitobwa 2 n 1914. Ko tekateka n am tabo are ko taneiai iai n te taibora ni kaingabong ao n tataningaa rokon Brother C. T. Russell. Akea bwa e a uki te mataroa nakon te tabo n amwarake ao e a kaoti Brother Russell. E tei moa teutana te tai n aron are e taneiai ni kakaraoia, ao e a kamauriia kaain te utu ni Betaera ma te kimarimari ni kangai: “Kam na bane ni mauri.” Ao e aki waekoa ni kaea ana tabo n tekateka are i tabon te taibora, ma e uboi baina ao ni kanakoa te katanoata ae kakukurei, ae kangai: “E a toki aia Tai Tientaire. E a bane aia bong aia uea!” Ko a bon aki kona n tautaua kimwareireim, bwa bon aio raoi te tai are ko a maan ni kakariariaa! Ko butimwaea te rongorongo ae kakukurei aei ma kaain te utu ni Betaera ni kabane, ma te uboubo ni kukurei ae maan.

Ai irabwi ma irabwi te ririki ngkai imwin te tai are e taekina iai te katanoata ae kakukurei aei Brother Russell. Tera ae e a tia ni kakororaoia te Tautaeka n Uea man te tai anne ni karokoa ngkai? A rangi ni bati! E a tia Iehova ni katamaroaia ao ni kataneiaia ana aomata teutana imwin teutana rinanon te Tautaeka n Uea, mangke tii nga ma nga mwaitiia n 1914 ni karokoa ae a a raka ngkai i aon itiua ao te iterana te mirion. Mwaitira baika ko a tia ni kakabwaiaaki iai man te aeka ni kataneiai anne?

Ni boong aikai ao ti aki toki n ongo ae kangai irouia tarira: “E a buti ana kaa ni buaka i karawa Iehova!” ao e boni koaua anne. Ma e a bon tia ni buti n te buti ae butimwaaka ni moa man 1914 te kaa ni buaka i karawa, are e tei ibukin iteran ana botaki Iehova ae aki nonoraki, n aron ae e na oti ngkana ko karaua ni wareka te boki aei. Ibukini karokoan te rongorongo ae raoiroi n te aonnaba ni kabutaa, a a tia taan uarongorongoa te Tautaeka n Uea ni kabonganai aanga aika boou aika kakaokoro, n ikotaki naba ma aroni kamanenaan te nuutibeeba, taiani mwaati, taiani kaoti taamnei, beeba ni kaotioti, kuramwaboon, te rerio, ao ai te Intanete.

Man ana kakabwaia Iehova i aon te mwakuri ao ti a kona ngkai ni boretii ara boki aika aanaki n te Baibara aika kantara, n taetae aika raka i aon 670 ao n tibwatibwai nakoia aomata n akea booia. A ibuobuoki taan anganano aika anga boni ngaiia ibukini katean Taabo n Taromauri, Taabo ni Botaki ibukin te Runga, ao autin nako te aobiti n tararua, n aaba aika kaubwai ao aika aki kaubwai. Ao ngkana a riki kabuanibwai aika karina, a ienikuri taari aika tatangira ni buokiia naake n aono ake a rotakibuaka, ike a a kaotia iai bwa a boni “bungiaki ibukin tain te rawawata.”​—TaeRab. 17:17.

N tabetai ao a kataia mataniwin te Aro ma taani kakaaitara riki tabeman ni “kauekea te kangaanga n aran te tua,” ma e kakorakoraaki ara onimaki n noran taai aika bati ake a a riki iai aia kakorakora aika kairua bwa “karikirakean te rongorongo ae raoiroi ao tiaki totokoana.”​—TaiAre. 94:20; IBir. 1:12.

Bon te kakabwaia nakoira ngkai ti kona n iraorao ma ngkami aika raora n “tabonibai.” Uringnga ae ti rangi n tangiringkami ni kabane. Bon ara tataro bwa kam na buokaki ni kanoan te boki aei, bwa kam na kakaitau riki ngkai ibukini kaubwaimi ni kaineti ma te onimaki, nakon are mai mwaina.​—Mat. 24:45.

Ara kantaninga bwa a na nakoraoi bwaai ni kabane ibukimi, ngaira

Tarimi,

Te Rabwata n Tautaeka Ibukia Ana tia Kakoaua Iehova