Kainnanoan te Kabwarabure

E a tia n ongo Betero ana kaetieti Iesu ni kaineti ma arona ni kaeta te kangaanga i marenaia taari. Ma e taraa n ae e kan ataa Betero mwaitin te tai ae e riai temanna ni kakorakoraa ni karaoia.

E titiraki Betero ni kangai: “Te Uea, e na iraua ana tai ni bure tariu nakoiu ao N na kabwaraa? E nakon itiua te tai?” A reirei tabeman mataniwin te Aro bwa e riai temanna ni kabwarai buure nakon tenua te tai. Ngaia are e iangoia Betero bwa e rangi n tituaraoi ngkana e kamwaita kabwaraan ana bure tarina “nakon itiua te tai.”​—Mataio 18:21.

Ma e ngae n anne, te iango ae tauani mwaitin te kabwarabure e bon aki boraoi ma ana reirei Iesu. Ngaia are e kaeta Betero ni kangai: “I aki tuangko, nakon itiua te tai, ma nakon 77 te tai.” (Mataio 18:22) N taeka riki tabeua, e nanonaki iai bwa akea tokina. E aki riai n tianaki mwaitin ana tai Betero ni kabwaraa ana bure tarina.

E taekina ngkanne te kaikonaki Iesu nakoni Betero ao tabeman riki ni katuruturua iai aroia ni kabwarai aia bure aomata. E kaineti aei ma taekan te toro are kabwaka ni kakairi iroun ana toka ae nanoanga. E kani kaetii te uea aia taarau ana toro, ao e kairaki nakoina ana toro ae bati riki ana taarau bwa 10,000 te tarena [60,000,000 te tenariati]. Ai bon akea ana anga teuaei ni kabwaraa ana taarau. Mangaia are e tua te uea bwa e na kaboonakoaki te toro aei ma buuna ao natina ao ni kabwaraaki ana taarau mani booia. Ngaia are e a katorobubua ni bobaraaki teuaei i waen ana toka ao e bubutii ni kangai: “Taotaona nanom irou bwa N na boni kabwaraa au taarau ni kabane nakoim.”​—Mataio 18:26.

E rotaki n te nanoanga te uea ao e a kamaunai ana taarau te toro aei ae rangi ni bati. Ngke e a tia te uea ni karaoa aei, e a nako te toro aei ao e a kaitiboo ma raona n toro ae iai ana taarau irouna ae 100 te tenariati. E taua te toro arei ni koona roroana n te aro are e a moanna ni bono ikena, ao e taku: “Kabwaraa am taarau ni kabane.” Ma e katorobubua ni bobaraaki i rarikini waen teuae bon iai naba ana taarau aei ao e bubutiia ni kangai: “Taotaona nanom irou bwa N na boni kabwaraa au taarau nakoim.” (Mataio 18:28, 29) Ma e aki kakairi te toro anne iroun ana toka are iai baena irouna are e kakeaaki. E tua bwa e na kabureaki raona n toro arei are e uarereke mwaitini baena irouna ni karokoa ae e kabwaraa.

E taekinna ngkanne Iesu bwa a nako ni kaongoa aia toka tooro ake a nora te aro are akea iai te nanoanga. E a rangi n un teuaei ao e tua kawaekoaan te toro arei ao e taku nakoina: “Te toro ae ko buakaka, I kakeaa am taarau ni kabane ibukina bwa ko bubutiiai. Tiaki ko riai n nanoangaa raom n toro, n arou ae I a tia n nanoangaiko?” E rangi ni korakora unin te uea ao e a anga te toro ae aki nanoanga aei nakoia taan tararuaia buure ni karokoa tiana ni kabwaraa baena ni kabane. E motikia Iesu ni kangai: “Anne naba aron ae e na karaoia nakoimi Tamau are i karawa ngkana kam aki kabwarai aia bure tarimi mai nanomi.”​—Mataio 18:32-35.

Ai tamaroara te reirei aei ibukin reiakinara taekan te kabwarabure! E a tia te Atua ni kabwaraa ara taarau ae rangi ni bubura ae te bure. E bon uarereke ana bure tarira ni Kristian ngkana e kabotauaki ma anne. Ma e kabwarai ara bure Iehova tiaki tii te taina, ma nga ma nga te tai. Tiaki ti kona ngkanne ni kabwaraa ana bure tarira n taai aika bati, e ngae naba ngkana iai bukini ngurengurera? N aron are e angareirei iai Iesu n ana Kabwarabwara i aon te Maunga, e na “kabwarai ara bure [te Atua] n ai arora ngkai ti kabwarai aia bure akana bure nakoira.”​—Mataio 6:12.