Kakeaana N Ana Auti Kaiaba

Ngke e katikaki Iesu n te onnaroka are Ketetemane ao a birinako ni kitanna ana abotoro ibukini maakuia. Ma a aki birinako uoman mai buakoia. Naakai boni Betero “ao te tia rimwin Iesu temanna,” ae kakoauaaki bwa te abotoro Ioane. (Ioane 18:15; 19:35; 21:24) A bae n ririmwin Iesu ngke e a kairaki nakoni mwengan Annati. Ngke e kanakoaki Iesu iroun Annati nakon te Ibonga ae Rietata ae Kaiaba, ao a bon rimwina naba Betero ao Ioane n taua raroaia. A bae n nanotiotio ni maakakin ae e na ruanikai maiuia ao a tabeaianga naba n te bae e na riki nakon aia Toka.

E kinaaki Ioane iroun te ibonga ae rietata ngaia are e reke angana n rinnako ni katawanangin ana auti Kaiaba. Ma e tiku Betero i tinanikun te mataroa ni karokoa okin Ioane ao e taetae nakon te toro te aine are te tia teiakina te mataroa. E a kariaiakaki ngkanne Betero n rin.

E mwaitoro te tairiki aei, ngaia are a a kauraa te ai te koraki ake a mena n te katawanang. E tekateka Betero i rarikia ni kaabuea n tataninga “bwa tera ae e na riki” imwini boowian taekan Iesu. (Mataio 26:58) N te tai aei, n ootan te ai arei ao e a karaua raoi n taraa Betero te aine are te tia teina te mataroa. E taku: “Tiaki bon temanna naba ngkoe te tia rimwin teuaei?” (Ioane 18:17) Ao tiaki tii neiei ni kinaa Betero ao ni bukinna bwa raon Iesu.​—Mataio 26:69, 71-73; Mareko 14:70.

E rangi ni maraki nanoni Betero iai ao e kataia n aki rangi ni kaotiotia i mataia aomata, ao ngke e otinako naba nakon te kawai n rin. Ngaia are e kakewea Betero ae bon raona Iesu, ao e a taekina ae kangai: “I bon aki kinaa ao I aki ota n te bwai ane ko taekinna.” (Mareko 14:67, 68) E a taetae ngkanne ni “kamaraiaa i bon irouna ao n tuea,” ae nanonaki iai bwa e kariaia ae e na taetae n tuea, bwa a koaua ana taeka ao ni kaitaraa te kangaanga ngkana a aki koaua ana taeka.​—Mataio 26:74.

N te tai anne ao e bon tabe naba ni boowiaki taekan Iesu, tao n iteran ana auti Kaiaba ae mena i etan te katawanang. A bae Betero ao tabeman riki ake a tataninga i nano n noriia taani kakoaua aika kakaokoro ake a roko ao ake a nako ake a anaaki aia rongorongo ao a a manga oki.

E oti n aron taetaeni Betero ni Kariraia bwa e kairua ana kakewekewe. Irarikin anne ao e mena ikanne temanna ae ana koraki Mariko are e kabwabua taningana Betero. Ngaia are e a bukinaki Betero: “I noriko n te onnaroka ma teuarei, tiaki ngaia?” Ngke e kakewea aei Betero n te katentai, ao e a tang naba te moa n aron are e a kaman taekinaki.​—Ioane 13:38; 18:26, 27.

N te tai anne ao e bae n tei Iesu n te oo ni kaitaraa te katawanang. E rairaki te Uea ao e taraa Betero, ao e a rangi n rawawata iai nanoni Betero. E a uringi Betero ana taeka Iesu are e taekinna tabeua te aoa n nako ngke e mena n te ruu are i eta. Iangoa aron ana namakin Betero n te baere e a tia ni karaoia are e a bon taonakinako iai! E otinako Betero ao e a korakai n tang.​—Ruka 22:61, 62.

E kangaa n riki aei? E kangaa Betero ni kakeaa ana Toka ngkai e kakoauaa raoi bwa e korakora ana onimaki ao e kakaonimaki ni koaua? E tabe ni kamangaoaki te koaua, ao e a kaotiotaki Iesu bwa te tia kakeru ae rangi n iowawa. E kona n tei Betero ibukin teuare aki bure, ma e aki bwa e tannako mairoun Teuare a mena irouna “taeka aika kairiri nakon te maiu are aki toki.”​—Ioane 6:68.

E kaotaki n te kangaanga are e rinanona Betero bwa e kona ni bwaka ni korakorani kataakina te aomata ae iai ana onimaki ao ana tangira, ngkana e aki tauraoi nakoni kataakina ke kaririana ake e aki kantaningai. E bia riki te baere e rinanona Betero bwa te kauring nakoia ana toro ni kabane te Atua!