E Taku Birato: “Noria! Ao Aio Teuaei!”

E tua Birato nakoia te koraki ake a ukera kamatean Iesu ni kangai: “Bon akea te bure ae I kunea irouna, ni kaineti ma baike kam bukinna iai. Ao e bon aki naba reke bukinana iroun Erote.” (Ruka 23:14, 15) E a kabongana ngkai te anga teuana Birato ni kataia ni kamaiua iai Iesu ao e kangai nakoia aomata: “Iai ami katei bwa I riai ni kainaomataa te aomata nakoimi n tain te Toa ae te Riao. Kam tangiria ngkanne bwa N na kainaomataa nakoimi aia Uea I-Iutaia?”​—Ioane 18:39.

E ataa Birato taekan te bure ae Baraba, are bon te tia kamwarua, te tia ekaanako te tautaeka, ao te tia tiriaomata. Ngaia are e a titiraki Birato ni kangai: “Antai ae kam tangiria bwa N na kainaomataa nakoimi, Baraba ke Iesu are e atongaki bwa Kristo?” Ibukina bwa a anaaki nanoia aomata irouia mataniwi n ibonga, ao a bubutii bwa e na kabwaraaki Baraba ao tiaki Iesu. E a manga titiraki Birato ni kangai: “Antai i buakoia naaka uoman ae kam tangiria bwa N na kainaomataa nakoimi?” A takarua te koraki ni kangai: “Baraba”!​—Mataio 27:17, 21.

E rawawata nanoni Birato ao e taku: “Tera ngkanne ae N na karaoia ma Iesu are atongaki bwa Kristo?” A takarua aomata n te bwanaa ae korakora ni kangai: “Kamatea i aon te kai!” (Mataio 27:22) A boni kamaamaeia n tangirani maten te aomata ae akea ana bure. E bubutii Birato ni kangai: “Bwa e aera? Tera te bwai ae buakaka ae e karaoia teuaei? I aki kunea te bwai ae e riai matena iai, mangaia ae N na katuuaaea ao I a kainaomataa naba.”​—Ruka 23:22.

N aki ongei baike e okioki ni karaoi Birato, a takarua te koraki ake a kaunaki n te bwanaa ae tii teuana ni kangai: “Kamatea i aon te kai!” (Mataio 27:23) A a tia mataniwin te Aro ni karangirangia aomata bwa a na tangira te raraa! Ao tiaki raraan te aomata ae te tia kakeru ke te tia tiriaomata. Bon raraan te aomata ae akea ana bure are e butimwaeaki nimabong n nako ngke e rinnako i Ierutarem bwa te Uea. Ma ngkana iai taan rimwin Iesu i buakoia, ao a kainabwabu ma n aki bati ni kaotiotiia.

E noria Birato bwa e a matebuaka ana bubutii bwa e a moanna ni kauekeaki iai te kiriwe. Ngaia are e a anaa te ran ao e teboka baina i mataia aomata ao e tuangia ni kangai: “I aki bukintaeka ni maten te aomata aei. Ai bon ami bwai iangoana.” E bon aki bitaki aia iango n anne. Ma a taku: “E na mena raraana i aora ao i aoia natira.”​—Mataio 27:24, 25.

E kani kakukureiia riki aomata te kowana nakoni kani karaoan riki te bwai ae e ataia bwa e eti. Ngaia are ni kaineti ma aia bubutii, e a kabwaraaki Baraba irouni Birato nakoia te koraki aika rangi n un. E tua buutan ana kunnikai Iesu ao imwina e a kataereaki.

Imwin orean Iesu n te aro ae iowawa, ao e a kairaki irouia tautia nakon ana baareti te kowana. A ikotaki tautia ni kabane ao a bwainnataeia. A bira te bau ae kateketeke ao a karibua i atuna. A anganna naba tautia te kaibwabwaa bwa e na taua ni baina are te atai, ao a kaaki i aona te kamwarai ae uraroo ae a bwabwainna bwaanuea. A bwainingareia ni kangai: “Te raoi iroum aia Uea I-Iutaia!” (Mataio 27:28, 29) E bati riki ae a karaoia bwa a bawarea Iesu ao a kakaretabaia. A anaa te kaibwabwaa mai baina ao a ororea atuna iai ni karibunakoa kateketeken ana “baunuea” ni kunin atuna.

E rangi n rotaki nanoni Birato n aron Iesu n teimatoa n rau ao n ninikoria n aki ongea bwainikirinana, ao e a manga kakorakoraa naba n iangoa kabwaraana ngke e kangai: “Noria! I kaotinakoa nakoimi bwa kam aonga n ataia ae akea ana bure ae I kunea.” E koaua bwa e iangoia Birato bwa a na nanoangaa Iesu aomata ngkana a nora rabwatana ae e a rangi n ikoaki ao n raraa? Ngke e a tei Iesu i mataia aomata aika akea aia tangira aikai ao e a taetae Birato ni kangai: “Noria! Ao aio teuaei!”​—Ioane 19:4, 5.

E ngae ngke e ikoaki Iesu ma ni babaangaki, ma e boni kaotiota te kakannato ao te rau are e bae ni kakoauaa naba Birato, bwa a oti n ana taeka Birato ae e karinea Iesu ma n nanoangaia.