E Kammarakaki i Aon te Kai te Uea Ae Akea Ana Bure

E kairaki Iesu nakon te tabo ae aki raroa ma te kaawa ike e na kamateaki iai ma taani kamwarua aika uoman. Aran te tabo anne boni Korokota, ke Nnen te Tabwanou, ao e kona n noraki “mai kiraroa.”​—Mareko 15:40.

A a buutaki kunnikaia mwaane aika teniman ake a kabuakakaaki. Ao e a katauraoaki te wain ae renganaki ma te mura ao te ran ae mao. A bae ni katauraoa te wain aei ainen Ierutarem, ao a aki totokoia kaain Rom bwa e buokiia naake a tauraki ni kauarerekea marakia. Ma ngke e katoongnga Iesu, ao e rawa n nimma naba teutana. Bukin tera? E kani kaatuua ana iango ni kabane i aoni kataakina ae te kabanea ni kakawaki aei. E tangiria bwa e na namakinaaba ao ni kakaonimaki ni karokoa matena.

E a wene ngkai Iesu i aon te kai. (Mareko 15:25) A bobitiaki baina ma waena irouia tautia, a ewara irikona ma iana ike e a rangi ni korakora iai marakina. Ngke e a kateaki rake te kai ao e a rangi ni korakora riki iai marakina bwa a a raeuaaki ikoakina n tinebun rabwatana. Ma e aki boaiia tautia Iesu ma e tataro ni kangai: “Tamau, kabwarai aia bure bwa a aki ataa te bwai ae a karaoia.”​—Ruka 23:34.

A taneiai kaain Rom ni kanimwa te koroboki i aon te kai are mena iai te tia kamwarua are kabuakakaaki. N te tai aei, e a tia Birato ni kanimwa te koroboki ae kangai: “Iesu ae te I-Natareta ae aia Uea I-Iutaia.” E boni koreaki n te taetae n Ebera, n Ratine, ao ni Kuriiti, ngaia are a a kona ni warekia aomata nako. E kaotia Birato n ana mwakuri bwa e ribaiia I-Iutaia ake a kairoroa kamatean Iesu. A taku mataniwi n ibonga aika tabeaianga aikai: “Tai korea ae kangai, ‘Aia Uea I-Iutaia,’ ma korea ae, e taku, ‘Ngai aia Uea I-Iutaia.’ ” Ma e a aki Birato kani manga kairoroaki irouia ao e a kaeka ni kangai: “Te bwai are I a tia ni koreia, ao I a tia ni koreia.”​—Ioane 19:19-22.

A okioki ibonga aika rangi n un aikai n taekina aia bukibuki ni kewe are a taekinna ngkoa ni boowin te Tanirim. E aki kamimi ngkai a katoutoui atuia aomata ake a rirarikina ni kakanikoa ao a kabuakakaa ni kangai: “Akea ngaira! Ngkoe are aongkoa ko na kabwakaa te tembora ao ni manga kateia i nanon tenibong, kamaiuko i bon iroum n ruo man te kai ni kammaraki!” N aron naba anne, a taetae i marenaia mataniwi n ibonga ma taani koroboki ni kangai: “Ke e ruo ngkai te Kristo ae Uean Iteraera man te kai ni kammaraki, bwa ti na noria ao ti na kakoauaa.” (Mareko 15:29-32) A boni kabuakakaa naba Iesu taani kamwarua ake n angaataina ao ni maingina e ngae ngke bon tii ngaia ae akea ana bure.

A bwainingarea naba Iesu tautian Rom aika aman. A a bae n tia n nima te wain ae mangingi, ngaia are a a kakanikoa ngkai ao a taua teutana mai iai i matan Iesu are e a aikoa kona n anaa teutana. A kakanikoa n te koroboki are i etan atuna kaain Rom ao a kangai: “Ngkana aia Uea I-Iutaia ngkoe, ao kamaiuko.” (Ruka 23:36, 37) Iangoa aei! E a bwainnataeaki ao ni bwainingareaki te mwaane are kakoauaaki bwa boni ngaia te kawai, te koa­ua, ao te maiu. Ma e boni kammarakaki ni baikai ni kabane, ao e aki un nakoia I-Iutaia ake a matakuakinna, tautian Rom ake a kakanikoa, ke taani kamwarua ake uoman ake a tauraki i rarikina.

A a tia tautia ake aman n anaa ana kauaatao Iesu ao n tibwai nakon aua te tibwa. A karaoa te ananga ni katekeraoi n noria bwa antai ae riai n reke irouna te mwakoro teuana ma teuana. Ma iai ana kunnikai Iesu ae kaokoro bwa a tii bwabwainna aomata aika kakannato ae “akea te toma n ana kunnikai bwa e rarangaaki mai eta nako naano.” A iango tautia ao a taku: “Ti na aki raeuaia ma ti na karaoia n te ananga ni katekeraoi bwa antai ae e na bwainna.” A a boni kakoroa iai nanon are e taekinaki n te Baibara ae kangai: “A tibwatibwai au kunnikai i marenaia, ao a karaoa te ananga ni katekeraoi ibukini kunnikaiu.”​—Ioane 19:23, 24; Taian Areru 22:18.

Imwina riki ao e a ataia temanna mai buakoia taani kamwarua bwa Iesu bon te uea. E a boaa raona ao e taku: “Ko aki maaka naba teutana te Atua, ngkai ai titeboo motikan taekam ma teuaei? Ngaira e bon riai aei nakoira, bwa ti bon riai ni karekei mwini baike ti a tia ni karaoi, ma akea te bwai ae bure ae e karaoia teuaei.” Ao e a bubutiia Iesu ni kangai: “Uringai ngkana ko a roko n am Tautaeka n Uea.”​—Ruka 23:40-42.

E kaeka Iesu ni kangai: “E koaua ae I tuangko n te bong aei, ko na mena ma ngai,” tiaki n te Tautaeka n Uea ma “n te Bwaretaiti.” (Ruka 23:43) E kaokoro te berita aei ma are e tuangia ana abotoro, are a na tekateka i aoni kaintokanuea ma ngaia n te Tautaeka n Uea. (Mataio 19:28; Ruka 22:29, 30) Tao e a tia n ongo te tia kamwarua ae te I-Iutaia aei taekan te Bwaretaiti i aon te aba are e moan anga Iehova nakoia Atam ma Ewa bwa mwengaia ma kanoaia. E a kona ni mate ngkai te tia kamwarua aei ma te kantaninga anne ae mena imwaina.