“Bon te Koaua Bwa Natin te Atua Teuaei”

Ngkai ai te “kaonoua n aoa” ke e a tawanou. E a roko te rotongitong ae kamimi i “aon te aba ni kabutaa . . . ni karokoa te karuaiwa n aoa,” ae te aoa tenua n te bwakantaai. (Mareko 15:33) E aki riki te rotongitong ae kakamaaku aei mani menan namwakaina i marenan te aonnaba ma taai, bwa e tii riiriki anne n te oti n namwakaina, ma bon te Toa ae te Riao ngkai ae e tabwanin iai namwakaina. Ao e maan riki te rotongitong aei nakon te rotongitong are e riiriki mani menan namwakaina i marenan te aonnaba ma taai. Ngaia are bon te Atua ae karika te rotongitong aei!

Iangoia bwa ai tera aroia iai te koraki ake a kaenaenaa Iesu. N tain te roo aei, ao iai aine aika aman ake a keerake nakon te kai ni kammaraki. Bon tinan Iesu, Tarome, Maria te I-Maketara, ao ai Maria are tinan te abotoro Iakobo are uarereke riki.

E mena te abotoro Ioane i rarikin tinan Iesu are e tanginiwenei ‘i rarikin te kai ni kammaraki.’ E a matakuakina natina Maria are e bungia ma n nabenabeia, are e a tauraki ngkai ma te korakai ni maraki. Ai aron ae e ewaraki neiei n “te kabaang ae abwabwaki.” (Ioane 19:25; Ruka 2:35) E tabeaianga naba Iesu ibukin aron tinana ribuakoni korakaina ni maraki. E keiaki n euta atuna nakon Ioane, ao e taku nakon tinana: “Neiko, noria! Natim!” E a manga euta atuna nakoni Maria ao e kangai nakon Ioane: “Noria! Tinam!”​—Ioane 19:26, 27.

E mwiokoa te abotoro are e rangi n tatangiria Iesu bwa e na tabeakina tinana are e oti iai bwa e a tia ni mate buun neiei n te tai aei. E ataia Iesu bwa tarina ake natini Maria, a tuai n onimakinna. Ngaia are e a bairea aron tararuaani kainnanon tinana n te itera n rabwata ao ni kaineti naba ma ana onimaki. Ai tamaroara te katoto aei!

Ngke e a toki te rotongitong ao e a taku Iesu: “I a taka.” Aio are e a kakororaoaki iai kanoan te Baibara. (Ioane 19:28; Taian Areru 22:15) E namakinna Iesu bwa Tamana kaanga ai aron ae e a taua mairouna ana bwai ni kamanomano, bwa e aonga ni kona n tuoaki raoi etin aron Natina. E takarua Kristo n aia taetae n Aramwaike I-Kareria ni kangai: “Eri, Eri, rama tiabaketani?” ae nanona, “Atuau, Atuau, e aera ngkai ko a kitanai?” A bure ongoia tabeman ake a teitei ikekei ao a taku: “Noria! E wetea Eria teuaei.” E biri temanna mai buakoia ni kateboa te ongantari n te wain ae kamangingi, ao e kanewea n te kaibwabwaa ao e angan Iesu bwa e na moi iai. Ma a taku ake tabemwaang: “Ti na aki kuaia! Ti na noria bwa tao ane e na roko Eria ni karuoa.”​—Mareko 15:34-36.

E a takarua ngkanne Iesu ni kangai: “E a tia!” (Ioane 19:30) Eng, e a tia ni kakororaoi bwaai ni kabane ake e kanakoaki iai iroun Tamana bwa e na karaoi i aon te aba. N tokina ao e a taku Iesu: “Tamau, I mwiokoa taamneiu i nanoni baim.” (Ruka 23:46) E mwiokoa maiuna Iesu nako nanoni bain Iehova, ao e onimakinna bwa e na manga kautia. E kararaa atuna Kristo ao ni mate ma onimakinan te Atua ae korakora irouna.

E a riki te mwaeiei ae korakora n te tai anne ao a tabwenaua taiani bwaa. Bon te mwaeiei ae rangi ni korakora bwa a a uki iai ruanimate ake i tinanikun Ierutarem ao a ubaranako mai iai rabwataia maate. Ngke a noriia maate n raea taan rikekei ao a a rin n “te kaawa ae tabu” ao ni karakina te baere a noria.​—Mataio 12:11; 27:51-53.

Ngke e mate Iesu ao e a raeuaaki mai nukana, mai eta ni karokoa naano, te keeten ae rangi n tinebu are e kaokoroa te Ruu ae Tabu ma te Ruu ae Moan te Tabu n ana tembora te Atua. Te bwai ae kamimi ae riki aei boni kaotan unin te Atua n ekiianako te koraki ake a kamatea Natina, ao e kaotaki naba iai ukin te kawai nakon te Ruu ae Moan te Tabu ae taekani karawa.​—Ebera 9:2, 3; 10:19, 20.

E teretere bwa a bon rangi ni maaku aomata. E taku te mataniwi n tautia are e teiakina kamatean Iesu: “Bon te koaua bwa Natin te Atua teuaei.” (Mareko 15:39) E bae ni mena teuaei n te tai are e tei iai Iesu i matani Birato ao ni kauntaekaan taekana bwa natin te Atua ke tiaki. E a kakoauaa raoi ngkai teuaei bwa e bon raoiroi Iesu ao boni ngaia Natin te Atua.

Tabemwaang ake a maaku ni baika kamimi aikai, a a okiri mwengaia ma n “ororei bwabwaaia” bwa kaotani korakoran rawawataia ma maamaaia. (Ruka 23:48) Mai buakoia ake a mataku mai kiraroa bon taan rimwin Iesu aika aine aika bati, ake a iriria n te tai anne. A rangi n ringaki naba nanoia ni baika kakawaki ake a riki.