Ngkana Ko na Kakairi Iroun Iesu, Ko na. . .

ATATAIAOMATA

Ngkai bon te aomata ae kororaoi Iesu, e aki rinanoni karawawata ma tabeaianga aika bati n aron ae a rinanona aomata. Ma e kaotiota ana namakin ae korakora ibukia aomata. E boni kukurei ni buokiia aomata, ni karaoi mwakuri aika taraa n riaon ae riai ni karaoaki. Eng, e kairaki n te atataiaomata bwa e na buokiia tabemwaang. Iangoi katoto aika mena ni Mwakoro 32, 37, 57, 99.

KAI KAWARAKI

A namakinna aomata aika kakaokoro aia ririki ake a a ataei ao ake a a kara, bwa a kona ni kawara Iesu ibukina bwa e aki kani kararoaa ma aomata ao e aki kani kakannato. Ibukina bwa a ataa nanon Iesu aomata ae e tabeakinia, a a kabebeteaki iai ngkana e mena i rarikia. Ibukin ataakin aei, nori Mwakoro 25, 27, 95.

TATATARO

E kakawara Tamana Iesu rinanon te tataro ma te nano ni koaua ngkana tii ngaia ao ngkana e mena i rarikia taan taromauri ni koaua. E tataro n taai aika bati ao tiaki n tii tain te amwarake. E tataro ni kaitaua Tamana, ni karaoiroia, ao n ukera ana kairiri imwaini karaoani motinnano aika kakawaki. Iangoi katoto aika mena ni Mwakoro 24, 34, 91, 122, 123.

AKI BANGAOMATA

N tabetai e rangi ni kainnanoa te motirawa ao te kaakibotu Iesu, ma e ngae n anne e mwinibwaia kainnanona ibukia tabemwaang. Bon tiaki ngaia te aomata ae momoanibwai irouna baike e tangiri. Ni kaineti ma aei, e katea iai te banna ni katoto ae ti kona ni kakairi raoi iai. Reiakinna bwa e kangaa ni kaotiotaki te banna ni katoto anne ni Mwakoro 19, 41, 52.

KABWARAI BUURE

E bati riki ae e karaoia Iesu nakon te angareirei i aon riain te kabwarabure are e kaotiotia n arona nakoia taan rimwina ao tabeman riki. Kananoa am iango i aoni katoto aika mena ni Mwakoro 26, 40, 64, 85, 131.

INGAINGANNANO

E a kaman taekinaki bwa a na aki butimwaea te Mesia angia I-Iutaia ao e na kamateaki irouia taani kairiribai nakoina. Ngaia are e kona ni bebete iroun Iesu bwa e na aki rangi n tabeakinia aomata. Ma e bon ingainga nanona ni boutokaa te taromauri ae koaua. E katea te katoto ibukin te ingaingannano nakoia taan rimwina ni kabane ake a kaaitara ma te aki bwerengaki ao te totoko naba. Nori Mwakoro 16, 72, 103.

NANORINANO

E kakannato riki Iesu nakoia aomata aika aki kororaoi n aaro aika aki kona ni warekaki, n aron ana atatai ma wanawanana. E boni marurung riki rabwatana ao ana iango nakoia aomata nako ibukina bwa e kororaoi. Ma e ngae n anne, e nanorinano ni beku ibukia tabemwaang. Ko kona ni karekei reirei ibukin aei ni Mwakoro 10, 62, 66, 94, 116.

TAOTAONAKINNANO

E teimatoa Iesu ni kaotiota te taotaonakinnano nakoia ana abotoro ao tabeman riki ngkana a kabwaka ni kakairi n ana katoto ke ni karaoa are e tuangia. E taotaona nanona ni kaokiokii reirei ake a kainnanoi bwa a aonga ni kaaniaki riki ma Iehova. Iaiangoi ana katoto Iesu ni kaineti ma ana taotaonakinnano ni Mwakoro 74, 98, 118, 135.