Ataakin ao Butimwaeani Mwiokoani Kristo n Ana Babaire te Atua

“N TE moantai ao e karika karawa ma te aonnaba te Atua,” ao “a rangi n raoiroi” bwaai ni kabane ake e karaoi. (KBwaai 1:​1, 31) E karikiia aomata Iehova ma aia kantaninga ae tamaroa ibukin taai aika a na roko. Ma e uruanaki moa aroia aomata ane kakukurei anne n te karitei are riki i Eten. Ma e ngae n anne, e teimatoa n aki bitaki ana kantaninga Iehova ibukia aomata ao te aonnaba. E taekinna te Atua bwa a na kamaiuaki kanoan Atam aika ongeaba. E na manga kaokaki te taromauri ae koaua, ao te Atua e na kamauna teuare buakaka n ikotaki ma ana mwakuri nako aika bubuaka. (KBwaai 3:15) A na manga “rangi n raoiroi” bwaai. E na kakororaoa aei Iehova rinanon Natina ae Iesu Kristo. (1Ioa. 3:8) Mangaia are e rangi ni kakawaki ataakin ao butimwaeani mwiokoani Kristo n ana babaire te Atua.​—Mwa. 4:12; IBir. 2:​9, 11.

MWIOKOANI KRISTO

² Ngkana ti iaiangoa mwiokoani Kristo n ana babaire te Atua, ti a ataia iai bwa a bati nako mwiokoana. E riki Iesu bwa te tia Manga Kabooia aomata, te Ibonga ae Rietata, Atun te ekaretia ni Kristian, ao ngkai ai te Uea n Ana Tautaeka n Uea te Atua. Kananoan ara iango i aoni mwioko aikai, e a karikirakea ara kakaitau ibukin ana babaire te Atua, ao e a kakorakoraa riki tangirani Kristo Iesu iroura. E kabwarabwarai te Baibara tabeua mwiokoan Iesu aika kakaokoro.

³ N ana mwakuri ni minita Kristo n te aonnaba, ao e teretere iai bwa raoiakinaia aomata aika ongeaba nakon te Atua, e na kakororaoaki rinanon Iesu. (Ioa. 14:6) Ngkai Iesu te tia Manga Kabooia aomata, e a anga boni ngaia bwa te kaboomwi ibukia aomata aika bati. (Mat. 20:28) Mangaia are e aki tii katea te banna ni katoto Iesu ibukin te aroaro ae boraoi ma nanon te Atua. Ma e riki bwa te aomata ae rangi ni kakannato ibukini kakoroani bukin ana kantaninga Iehova ibukia aomata. Bon tii ngaia te kawai ae ti kona ni kaoka iai akoara iroun te Atua. (Mwa. 5:31; 2Kor. 5:​18, 19) Maten Iesu bwa te karea ao mangautina, e a kauka te kawai nakoia aika ongeaba bwa a na karekea kakabwaiaaia n aki toki i aan ana kairiri Ana Tautaeka n Uea te Atua ae bwaini karawa.

⁴ Ngkai te Ibonga ae Rietata Iesu, e kona n “nanoangaira ni mamaarara” ao e na karekea kabwaraan aia bure taan rimwina aika katabui maiuia aika n te aonnaba. E kabwarabwaraa te abotoro Bauro ni kangai: “Ara ibonga ae rietata bon tiaki teuae aki kona n nanoangaira ni mamaarara, ma bon teuae e a tia ni kataaki ni bwaai ni kabane n ai arora, ma e aki bure.” Ao e kaungaia Bauro te koraki ake a onimakina Iesu Kristo bwa a na kamanena raoi te babaire aei ibukin raoiakinaia nakon te Atua, ngke e kangai: “Ngaia ae ti bia kaania te kaintokanuea are reke iai te akoi ae rianako, ao n tataro nakon te Atua ma te aki maaku, bwa ti aonga n nanoangaaki ao ni karekea te akoi ae rianako ibukini buokara n te tai are ti kainnanoia iai.”​—Ebera 4:​14-16; 1Ioa. 2:2.

⁵ E riki naba Iesu bwa Atun te ekaretia ni Kristian. Ti aki kainnanoa te tia kairiri ae te aomata ni boong aikai, n aroia naba taan rimwina ake n te moan tienture. E anga te kairiri Iesu rinanon te taamnei ae raoiroi ao rinanoia taani kawakina te nanai aika konabwai, ake a mwakuri i aan ana tararua teuaei ao Tamana are i karawa n tararuaa ana nanai te Atua. (Ebera 13:17; 1Bet. 5:​2, 3) E taetae ni burabeti Iehova ibukin Iesu ni kangai: “Noria! I karaoa teuaei bwa te tia kakoaua nakoia natannaomata, ae te tia kairiri ao te mataniwi irouia natannaomata.” (Ita. 55:4) E kamatoaa Iesu kakoroani bukin te taetae ni burabeti aei ngke e tuangia taan rimwina ni kangai: “Tai atongingkami naba bwa ‘taani kairiri,’ bwa tii temanna ami tia Kairiri ae te Kristo.”​—Mat. 23:10.

⁶ Ni kaotan ana iango Iesu ao nanona ni kani buokira, e a kaoira ni kangai: “Nakomai nakoiu ngkami akana kam korakai ma n rawawata, ao N na motiki rawami. Amoa amou i aomi ao reirei irou bwa I nimamannei ao I nanorinano, ao e na kabebeteaki nanomi iai. Bwa e kamaiu amou ao e bebete uotau.” (Mat. 11:​28-30) Man aron Iesu Kristo ni kairira te ekaretia ni Kristian ma te nimamannei ao n te aro ae ti kabebeteaki iai, e oti iai bwa bon “te tia kawakintiibu ae raoiroi” ngaia n aron Tamana are i karawa ae Iehova ae te Atua.​—Ioa. 10:11; Ita. 40:11.

⁷ N ana moan reta Bauro nakoia I-Korinto ao e kabwarabwaraa mwiokoan riki Iesu Kristo, n taeka aikai: “E riai n tautaeka bwa te uea ni karokoa kaakaia akana kairiribai nakoina ni kabane i aani waena iroun te Atua. Ma ngkana a a tia ni kaakaki i aana bwaai ni kabane, ao e na kairia i bon irouna te Nati bwa e na aantaeka iroun Teuare kaaki bwaai ni kabane i aan te Nati, bwa e aonga n riki te Atua bwa bwaninin bwaai ni kabane nakoia aomata nako.” (1Kor. 15:​25, 28) Imwain rokon Iesu n te aonnaba ao boni ngaia ana “tia mwakuri ae mwaatai” te Atua, kioina ngkai e moani karikaki iroun te Atua. (TaeRab. 8:​22-31) Ngke e kanakomaia Iesu nakon te aonnaba te Atua, ao e kakaraoa nanon te Atua n taai nako. E nanomwaaka i aan te kataaki ae te kabanea ni kangaanga, ao e kakaonimaki nakon Tamana ni karokoa matena. (Ioa. 4:34; 15:10) Ibukina bwa e kakaonimaki ni koaua Natina ni karokoa matena, e kautia te Atua nako karawa ao ni kariaia bwa e na Uea n te Tautaeka n Uea ae bwaini karawa. (Mwa. 2:​32-36) Ngaia are bon iai taben Kristo Iesu ae bubura mairoun te Atua ae kairaia anera aika mwaitikurikuri aika mwaaka, bwa a na kamaunai taian tautaeka n aomata n te aonnaba ao ni kaitiaka te buakaka ni kabane. (TaeRab. 2:​21, 22; 2Tet. 1:​6-9; TeKao. 19:​11-21; 20:​1-3) Imwin anne, e na kairiri n te aonnaba ni kabutaa tii Ana Tautaeka n Uea te Atua ae bwaini karawa ae kairaki irouni Kristo.​—TeKao. 11:15.

TE BAE NANONAKI N ATAAKIN AO NI BUTIMWAEANI MWIOKOANA

⁸ E kororaoi ara Banna ni Katoto are Iesu Kristo. E mwiokoaki bwa e na kawakinira. Ngkana ti kani kakabwaiaaki man ana tararua ae tatangira, ti riai n teimatoa ni kakaonimaki ni koaua nakon Iehova ao n teimatoa n irira rikiraken ana botaki.

⁹ Taan rimwin Iesu ake n te moan tienture, a ataa ma ni butimwaea raoi mwiokoani Kristo ni kaineti ma ana babaire te Atua. A kaotiota anne n aroia ni katiteuanaaki i aan ana kairiri Kristo ao n aantaeka n ana kairiri ae roko rinanon te taamnei ae raoiroi. (Mwa. 15:​12-21) E taekina katiteuanaakia kaain te ekaretia ni Kristian aika kabiraki te abotoro Bauro, ngke e korea ae kangai: “Ngkai ti tataekina te koaua, ti na rikirake n ikawai ni bwaai ni kabane i nanon teuare te atu are Kristo, ni bwainan te tangira. Bwa rinanon teuaei, e katiteuanaaki te rabwata ae bwanin ao a bane n ibuobuoki tomatomana nako ni karaoa ae kainnanoaki. Ngkana a bane bwain te rabwata n tatabeua nako ni mwamwakuri raoi, e buokaki te rabwata iai bwa e na rikirake i nanon te tangira.”​—IEbe. 4: 15, 16.

¹⁰ Ngkana a ibuobuoki i marenaia kaain te ekaretia ao a bane ni mwakuri i aan ana kairiri Kristo, e na noraki iai te rikirake ao te tangira, ae “te bwai ni kabaebae ae katiteuanaia aomata n te aro ae kororaoi.”​—Ioa. 10:16; IKoro. 3:14; 1Kor. 12:​14-26.

¹¹ E kakoauaaki ni baika riiriki n te aonnaba aika kakoroa bukin ana taetae ni burabeti te Baibara, bwa e anganaki Iesu Kristo mwaakana n te Tautaeka n Uea man 1914. E a tabe ngkai n tautaeka i buakoia taani kairiribai nakoina. (TaiAre. 2:​1-12; 110:​1, 2) Tera ae e nanonaki n aei ibukia te koraki aika maeka ngkai n te aonnaba? E nang karaoa mwiokoana Iesu ae Aia Uea ueea ao Aia Toka tooka, ngkana e a karokoa ana motikitaeka te Atua i aoia taani kairiribai nakoina. (TeKao. 11:15; 12:10; 19:16) Ao ana berita Iehova are ibukini kamaiuaia aomata are e taekinna ngke a moani karitei aomata, e na kakororaoaki nakoia aomata ake i angaataini Kristo ake a karekea akoaia. (Mat. 25:34) Ai kukureira ngaira n ataakin ao ni butimwaeani mwiokoani Kristo ni kaineti ma ana babaire te Atua! Ti bia teimatoa ni katiteuanaaki ni kakororaoa ara mwakuri ni minita ni katobibia te aonnaba ni kabaneani boong aikai i aan ana kairiri Kristo!