“Uringia Akana Kairiri i Buakomi”

A KONA naba ana taeka te abotoro Bauro aikai aika koreaki n Ebera 13:​7, n rairaki ni kangai: “Uringia akana tautaeka i aomi.” Ni moa mani Bentekota 33 C.E., ao a a tia ana abotoro aika kakaonimaki te Toka ae Iesu Kristo, ni kakororaoa mwiokoaia ae kaainakin te rabwata n tautaeka, are kaira karaoan te babaire ibukin te ekaretia ni Kristian ae e a tibwa tei. (Mwa. 6:​2-4) Tao n te ririki 49 C.E., ao e a manga kamwaitaki riki kaain te rabwata n tautaeka aei bwa e a kaainaki irouia aika tiaki tii ana abotoro Iesu. N te tai are e maroroakinaki iai taekan te korotobibi, ao e a kaainaki te rabwata n tautaeka irouia “abotoro ma unimwaane ake i Ierutarem.” (Mwa. 15:​1, 2) Boni mwiokoaia bwa a na maroroakini baika a rotaki iai Kristian n taabo nako. A kakanakoi reeta ma mooti ake a na kakorakoraaki iai ekaretia, ao ni kateimatoa te katiteuanaaki n aia iango ao n aia mwakuri taan rimwini Kristo. A ongeaba ekaretia ao a aantaeka n ana kairiri te rabwata n tautaeka, ao ibukin anne a a kakabwaiaaki iroun Iehova ao ni maiureirei.​—Mwa. 8:​1, 14, 15; 15:​22-31; 16:​4, 5; Ebera 13:17.

² Imwini mateia abotoro ao e a korakora te tannako man te koaua. (2Tet. 2:​3-12) N aron are e a kaman taekinna Iesu n ana kaikonaki are te titania ma te uita, a na uaia n unikaki uita (taekaia Kristian aika kabiraki) ma titania (taekaia Kristian ni kewe). I nanoni waakinakon taian tienture ao a kariaiakaki bwa a na kaai n rikirake koraki akana uoua akanne ni karokoa tain taiakin te uaa, ae “tain tokin te waaki ae ngkai i aon te aba.” (Mat. 13:​24-30, 36-43) N te tai anne ao a teimatoa n akoaki iroun Iesu Kristian aika kabiraki n tatabemania nako, ma bon akea te rabwata n tautaeka, ao akea te rabwata teuana ae ataaki n te aonnaba are e kabongana Iesu ibukini karorokoan ana kairiri irouia taan rimwina. (Mat. 28:20) Ma e a kaman taekinna bwa e na riki te bitaki n tain taiakin te uaa.

³ “Antai raoi te toro ae kakaonimaki ma ni wanawana?” Ni kaekaan te titiraki anne ao e a taekina te kaikonaki teuana Iesu Kristo ke te kabotau, ae kanoan naba “te kanikina” are e taekinna ni kaineti ma “tain tokin te waaki ae ngkai i aon te aba.” (Mat. 24:​3, 42-47) E katerea Iesu bwa te toro ae kakaonimaki aei e na tabetabe ni katauraoan te amwarake n taamnei “n te tai ae riai,” ibukia ana aomata te Atua. Kioina ngke e kabongana Iesu te rabwata teuana ae kaainaki irouia mwaane, ao tiaki temanna te aomata bwa e na kairiri n te moan tienture, nanona ngkanne bwa te toro ae kakaonimaki ae kabonganaaki iroun Iesu n tain tokin te waaki ae ngkai i aon te aba, bon tiaki tii temanna te aomata.

KINAAKIN “TE TORO AE KAKAONIMAKI MA NI WANAWANA”

⁴ Antai are mwiokoia Iesu bwa e na kaamwarakeia taan rimwina? E bon tau ni kabonganaia Kristian aika kabiraki aika n te aonnaba. A aranaki n te Baibara te koraki aikai bwa “te koraki n ibonga aika ueea,” ake a mwiokoaki bwa a na “ ‘kabutaanako taekan raoiroin aroaron’ Teuare [weteiia] man te roo nakon ana oota ae kamimi.” (1Bet. 2:9; Maraki 2:7; TeKao. 12:17) A bane taani kabiraki aika n te aonnaba n riki bwa te toro ae kakaonimaki? A aki. Ngke e katauraoa te amwarake Iesu n te aro ni kakai ibukia aomata ake 5,000 tabun mwaane n ikotaki naba ma aine ao ataei, ao e anga nakoia taan rimwina, ao taan rimwina a tibwai nakoia aomata. (Mat. 14:19) E kaamwarakeia aomata aika bati rinanoia aomata aika karako. Ni boong aikai ao e katauraoa naba te amwarake n taamnei n te aro anne.

⁵ Ngaia are “te toro ae kakaonimaki ma ni wanawana,” bon te rabwata teuana ae uarereke ae kaainaki irouia mwaane aika kabiraki, ake a tabe ma katauraoan ao karorokoan amwarake n taamnei, n tain okini ma tikuni Kristo. (Ruka 12:42) Ni waakinakoni kabaneani boong, ao a uaia ni beku mwaane aika kabiraki ake a riki bwa “te toro ae kakaonimaki ma ni wanawana” ni kautun ara botaki. Ni boong aikai a a riki mwaane aika kabiraki aikai bwa kaain te Rabwata n Tautaeka ibukia Ana Tia Kakoaua Iehova.

⁶ E kabongana te rabwata aei Kristo ibukini boreetian rongorongo ni kaineti ma kakororaoan taetae ni burabeti aika n te Baibara, ao n anganga kairiri aika roko raoi n taia, ni kaineti ma maiuakinani booto n reirei man te Baibara ni katoabong. E tibwatibwaaki te amwarake n taamnei aei rinanon nako aia ekaretia Ana Tia Kakoaua Iehova. (Ita. 43:10; IKar. 6:16) N taai ake a karakinaki n te Baibara, ao te toro ae onimakinaki e riki bwa manatian te auti. N aron anne, e a tia naba ni mwiokoaki te toro ae kakaonimaki ma ni wanawana bwa e na tararuaa te bata ae kaainaki irouia taan onimaki. Ngaia are te toro ae kakaonimaki e tararuai naba ana bwai nako ara botaki, te uarongorongo, kaetieti ibukin te runga ma te bwabwaro, rineakia mataniwi bwa a na karaoi mwakuri aika kakaokoro i nanon ara botaki, ao ai katauraoani booki aika aanaki n te Baibara, aika waakinako ake a na kakabwaiaaki iai “tabonibai.”​—Mat. 24:45.

⁷ Antai ngkanne “tabonibai”? Bon naake a kaamwarakeaki. N te moantai ao tabonibai ni kabane bon taani kabiraki. Imwina riki ao a a manga rin naba iai te koraki ae uanao ake “tiibu tabemwaang.” (Ioa. 10:16) A uaia koraki aikai n amwamwarake n taian amwarake n taamnei ake a roroko mairoun te toro ae kakaonimaki.

⁸ N tain te rawawata ae korakora ngkana e a roko Iesu ni motika taekan te waaki ae buakaka ae ngkai, ao e nang mwiokoa ngkanne te toro ae kakaonimaki “i aon ana bwai ni kabane.” (Mat. 24:​46, 47) A na karekea kaniwangaia ae te nako karawa naake a riki bwa te toro ae kakaonimaki. Ao a na raona Kristo ni kairiri i karawa, n ikotaki ma nikiraia te koraki ake 144,000. E ngae ngke e nang akea te toro ae kakaonimaki ma ni wanawana n te aonnaba n te tai ae e na roko, ma a na katauraoa te kairiri Iehova ao Iesu ibukia taan tautaekanaki n te Tautaeka n Uea are e na kairaki iroun te Mesia, rinanoia mwaane ake a mwiokoaki bwa “mataniwi.”​—TaiAre. 45:16.

E AERA BWA TI NA “URINGIA AKANA KAIRIRI”?

⁹ A bati bukina aika ti riai iai n “uringia akana kairiri” ao ni kaotiota onimakinaia. Bukin tera ngkai e raoiroi bwa ti na karaoa aei? E kangai te abotoro Bauro: “A teimatoa n tantani ni kawakini maiumi ngkai a na anga taekan aroia iai, bwa a aonga ni karaoa aei ma te kimwareirei ao a na aki rawawata, bwa e karuanikai aei nakoimi.” (Ebera 13:17) E rangi ni kakawaki bwa ti na ongeaba ao n aantaeka n aia babaire taani kairiri, ibukina bwa a teimatoa n tantani ni kawakina ara onimaki ao maiura.

¹⁰ N aron ae koreaki n 1 I-Korinto 16:14 ao e kangai Bauro: “Karaoi bwaai ni kabane ake kam karaoi, ma te tangira.” Babaire ake a karaoaki ibukia ana aomata te Atua, a boni boto i aon te aroaro ae rangi n rianako aei ae te tangira. E kangai 1 I-Korinto 13:​4-8 ni kaineti ma te tangira: “E taotaonakinnano te tangira ao e akoi. E aki bakantang te tangira. E aki taetae ni kamoamoa, ao e aki kainikatonga. E aki kakamatauninga, e aki ukera oini kabwaiana, e aki kakaiun. E aki taua mwini karawawataana. E aki kimwareirei n te buakaka, ma e kimwareirei n te koaua. E taona nanona nakoni bwaai ni kabane, e onimakini bwaai ni kabane, e kantaningai bwaai ni kabane, ao e nanomwaaka nakoni bwaai ni kabane. Akea kabwakan te tangira.” Kioina ngkai a aanaki n te tangira babaire ake a karaoaki ibukini kabwaiaia ana toro Iehova, ti bon riai ngkanne n namakina te mano raoi i aan te aeka ni kairiri anne. Irarikin anne, te kairiri aei boni kaotiotan ana tangira Iehova.

¹¹ N aron ae noraki n te moan tienture, a bon aki kororaoi mwaane ake e kabonganaia Iehova bwa a na kairiri i aoia ana aomata. Ma e a tia Iehova n taai aika nako ni kabonganaia aomata aika aki kororaoi ibukini kakororaoan nanona. E katea te aake Noa ao e tataekina rokon te kamaunanakoaki are e na roko n ana bong. (KBwaai 6:​13, 14, 22; 2Bet. 2:5) E mwiokoaki Mote bwa e na kairiia ana aomata Iehova ni kaotinakoia mai Aikubita. (TeOti. 3:10) A kairaki n te taamnei mwaane aika aki kororaoi bwa a na korea te Baibara. (2Tim. 3:16; 2Bet. 1:21) Aron Iehova ni kabonganaia mwaane aika aki kororaoi ni boong aikai bwa a na kaira karaoan te uarongorongo ao te mwakuri ni karekeia taan rimwini Kristo, e bon aki kamamaraa onimakinan ana botaki te Atua iroura. Ma ti kakorakoraaki bwa ti a ataia ae ngke arona bwa akea ana boutoka Iehova, ao e na bon aki kona ara botaki ni kakororaoi bwaai ni kabane ake e karaoi. N aki ongea te kangaanga ae bati ao baika riiriki, e a tia te toro ae kakaonimaki ni kaotiotia ae bon taamnein te Atua ae kairira te waaki. A bati kakabwaia ni boong aikai ake a a tia ni kabwaroaki i aon iteran ana botaki Iehova ae n te aonnaba. Ngaia are ti kabanea nanora ni boutokaa ara botaki ao n onimakinna.

ARORA NI KAOTIOTA ONIMAKINAN IEHOVA AO ANA BABAIRE

¹² A kaotiota onimakinan Iehova ao ana babaire te koraki aika mwiokoaki n te ekaretia, n aroia ni butimwaea tabeia ake a mwiokoaki iai ma te kukurei ao te kakaonimaki. (Mwa. 20:28) Ngkai ngaira taan tataekina te Tautaeka n Uea, ti ingainga n uataboa te mwakuri man te auti teuana nakon teuana, ti okiokiriia aomata, ao ti kairi reirei n te Baibara ni mwengaia. (Mat. 24:14; 28:​19, 20) Ti kakatauraoi imwaini botaki nako ao ti kaakaei n ikotaki naba ma ruunga ao bwabwaro, bwa ti aonga ni kakabwaiaaki raoi man te amwarake n taamnei ae bati ae kakarokoaki iroun te toro ae kakaonimaki. Ti rangi ni buokaki man te ikaungaunga ae reke ngkana ti ikoikotaki ma tarira ni Kristian ni botaki aikai.​—Ebera 10:​24, 25.

¹³ E oti onimakinan ana botaki Iehova iroura ngkana ti anga ara bwaintangira ibukini boutokaana. (TaeRab. 3:​9, 10) Ti waekoa ni buokiia tarira ngkana ti noriia bwa a kainnano. (IKar. 6:10; 1Tim. 6:18) Bon te itangitangiri n tari ae aana karaoan aei, ao ti tatauraoi n ukeri aanga ake ti kona iai ni kaota ara kakaitau nakon Iehova ao ana botaki, ibukini baika raraoi ake a reke iroura.​—Ioa. 13:35.

¹⁴ Ti kaotia naba bwa ti onimakina ara botaki n arora ni butimwaei babaire ake a karaoaki iai. E nanonaki naba n aei te nanorinano n aantaeka n aia kairiri naake a mwiokoaki bwa taan tararua, n aroia mataniwi n aono aika uarereke ao unimwaanen te ekaretia. A warekaki naba taari mwaane aikai i buakoia “akana kairiri” aika ti riai n ongeaba ao n aantaeka irouia. (Ebera 13:​7, 17) E ngae ngkana ti aki ota raoi ni babaire tabeua, ma ti ataia bwa ti na rangi ni kabwaia ngkana ti butimwaei. Ibukin anne, e kakabwaiaira Iehova ibukin ongeabara n ana Taeka ao n ana botaki. Mangaia are ti kaotia iai bwa ti aantaeka nakon ara Toka ae Iesu Kristo.

¹⁵ Eng, ti bon riai n onimakina te toro ae kakaonimaki ma ni wanawana. E a kabanea ngkai korakorana atuan te waaki ae ngkai i aon te aba ae Tatan ni kataia ni kabuakakaa aran Iehova ao ana botaki. (2Kor. 4:4) Tai mwane bwa konan Tatan n ana kunemwaan aika bubuaka! (2Kor. 2:11) E ataia bwa “e a kimototo ana tai” imwain ae e na kainaki n te kinono, ngaia are e kakorakoraa ni katannakoia ana aomata aika bati Iehova. (TeKao. 12:12) Ma ti bia kaanira riki ma Iehova ngkai e a rangi ni kakorakoraa Tatan. Ti bia onimakina Iehova ao te rabwata are e kabongana ni kairiia iai ana aomata ni boong aikai. Karaoan anne iroura e na karekea te katiteuanaaki n ara botaki n itaritari.