Botaki Aika “Kaungaira Nakon te Tangira ma Mwakuri Aika Raraoi”

NI WAAKINAKON taian tienture ao a bobotaki ana aomata Iehova n te aro ae baireaki raoi. I Iteraera rimoa ao a bane n nanako mwaane nako Ierutarem ni kaei tooa aika tenua aika abwabwaki. (TuaKau. 16:16) N te moan tienture ao a bobotaki naba Kristian, ao n angiin te tai n ana auti te aomata temanna. (Bire. 1, 2) Ni boong aikai ao ti kaakaei naba botaki, ruunga, ao bwabwaro. Bukin tera bwa a bobotaki ana toro te Atua? Ibukina bwa bon anne iteran ara taromauri ae kakawaki.​—TaiAre. 95:6; IKoro. 3:16.

² A kakabwaiaaki naba ni botaki aikai naake a kaei. A tuangaki ae kangai I-Iteraera ni kaineti ma te Toa ae Umwanrianna are e kakaraoaki ni katoa itiua te ririki: “Ikotiia aomata aika mwaane, aine, ataei, ao aomata aika maeka n iruwa n ami kaawa nako, bwa a aonga n ongora ao n reiakina taekan Iehova ae Atuami ao maakakina, ao n taratara raoi bwa a na kakororaoi taekan nako te Tua aei.” (TuaKau. 31:12) E teretere ngkanne bwa teuana bukina ae kakawaki iai te bobotaki, bwa ti ‘reireinaki iai iroun Iehova.’ (Ita. 54:13) E reke naba ara tai n ikikina ni bobotaki aikai, ti karekea iai te kaungaunga, ao ti kakorakoraaki naba iai n ikotakira ma taari.

BOBOTAKI N TE EKARETIA

³ A botumwaaka ni mutiakin aia angareirei abotoro taan rimwini Kristo ake a ikoikotaki imwini Bentekota 33 C.E., ao “a katoabong n nakon te tembora ma te kantaninga ae tii teuana.” (Mwa. 2:​42, 46) Imwina riki, ngkana a ikotaki n taromauri Kristian, ao a wawareki koroboki aika kairaki koreaia rinanon te taamnei n ikotaki naba ma aia reta abotoro ao Kristian riki tabeman ake taan rimwini Kristo. (1Kor. 1:​1, 2; IKoro. 4:16; 1Tet. 1:1; Iak. 1:1) Iai naba te tai are a botaki iai n tataro kaain te ekaretia. (Mwa. 4:​24-29; 20:36) N tabetai ao e karakinaki rongorongon te mwakuri ni mitinare. (Mwa. 11:​5-18; 14:​27, 28) A rinanoaki naba booto n reirei man te Baibara ao kakororaoan taetae ni burabeti ake a kairaki koreaia rinanon te taamnei. E taekinaki naba te kaetieti ibukin te aroaro ni Kristian ae riai ao tangiran te Atua. A bane ni kaungaaki bwa a na riki bwa taan tataekina te rongorongo ae raoiroi aika ingainga.​—IRom 10:​9, 10; 1Kor. 11:​23-26; 15:58; IEbe. 5:​1-33.

⁴ Titeboo teini bobotaki ni Kristian aika ngkai ma ake n aia tai abotoro. Ti mutiakina te kaungaunga ae kairaki koreana rinanon te taamnei are n Ebera 10:​24, 25, ae kangai: “Ti na iaiangoira i marenara . . . , ao ti na aki kaaki arora ni bobotaki, n aron ae a taneiai iai tabemwaang, ma ti na kaungaira i marenara, ni kakorakoraira riki iai ngkai ti a nora te bong arei bwa e a kaan.” Ni kabaneani boong aika karuanikai aikai, ao ti kainnanoa te kaungaunga ae reke man te uaia ni bobotaki, bwa ti aonga ni kona ni kateimatoa korakorara n te onimaki ao etin arora ni Kristian. (IRom 1:​11, 12) Ngkai Kristian ngaira, ti a maeka i buakon te roro ae buakaka ma ni bubure. Ti a tia n rarawa nakoni bwaai ni kabane ake a kaitaraa nanon te Atua ao nakon tangirani bwain aon te aba. (IBir. 2:​15, 16; Tit. 2:​12-14) Iai riki ngkanne te tabo ae raoiroi ibukira nakon ae ti na bobotaki ma ana aomata Iehova? (TaiAre. 84:10) Ao iai te bwai ae ti na kakabwaiaaki riki iai nakon te ukeuke n reirei ao maroroakinan Ana Taeka te Atua? Iangoi bobotaki aika kakaokoro ake a a tia ni baireaki ibukini kabwaiara.

TE BOTAKI N TAROMAURI N TE WIKEEN

⁵ Kanoani moan iteran te taromauri n te wikeen bon te kabwarabwara man te Baibara ae karaoaki ibukia aomata nako, ao tabeman i buakoia tao ai tibwa aia moantai n roko n taromauri. E kakawaki te kabwarabwara ibukia aomata nako bwa e kakorakoraa aia onimaki aomata ake a a tibwa roko ao bon taan uarongorongo n te ekaretia.​—Mwa. 18:4; 19:​9, 10.

⁶ A kairi naba kabwarabwara ibukia aomata nako Kristo Iesu ma ana abotoro, ao raoia ni beku, n aron ae kakaraoaki n taai aikai n aia ekaretia ana aomata Iehova. Akea te nanououa bwa bon te tia kabwarabwara Iesu ae te kabanea ni kakannato n te aonnaba. E taekinaki ae kangai ibukina: “Akea te aomata ae e a tia n taetae n aron teuaei.” (Ioa. 7:46) A miroaroa naake a ongora irouna bwa e taetae n aron te aomata ae mwiokoaki iroun te Atua. (Mat. 7:​28, 29) A bati kakabwaiaaia naake a mutiakin raoi ana rongorongo. (Mat. 13:​16, 17) A kakairi abotoro n ana katoto. Ni Mwakuri 2:​14-36 ao ti wareka iai ana kabwarabwara ae rangi n anainano Betero ni Bentekota 33 C.E. A kairaki nga ma nga aomata bwa a na mwakuria te baere a ongoraeia. Imwina riki ao iai ake a a riki bwa taan onimaki imwin ongoraeia n ana kabwarabwara Bauro i Atenai.​—Mwa. 17:​22-34.

⁷ Mirion ma mirion ni boong aikai ake a a tia naba ni kakabwaiaaki man te kabwarabwara ibukia aomata nako ae karaoaki ni katoa wiki n taian ekaretia, n ikotaki naba ma kabwarabwara ibukia aomata nako ake a karaoaki n taian runga ao bwabwaro. A buokira aeka ni kabwarabwara aikai bwa ti na teimatoa ni mutiakin reirei ni Kristian, ao n teimatoa ni beku ibukin te Tautaeka n Uea. Man arora ni kaoia aika a kan ongora n ikotaki naba ma aomata nako, ti a kakororaoa iai ae bati ni kaineti ma kaongoaia aomata taiani moan reirei n te Baibara.

⁸ A kakaokoro atu n reirei aika maroroakinaki n taiani kabwarabwara ibukia aomata nako. E rinanoaki iai ana reirei te Baibara, taetae ni burabeti ma booto n reirei ake iai, ao ana reirei ni kairiri, ibukin te maiu n utu ao te tekateka n taanga, aia kangaanga rooro n rikirake, ao ai te aroaro ni maiu ae riai ibukia Kristian. Tabeua kabwarabwara a boboto i aon ana mwakuri ni karikibwai aika kamimi Iehova. Ake tabeua a katuruturui katoto aika raraoi ni kaineti ma te onimaki, te ninikoria, ao etin aroia aomata aika karakinaki n te Baibara, ao ni kaatuui iai reireiara ni boong aikai.

⁹ Ti riai ni kakauongo raoi n tain te kabwarabwara ibukia aomata nako, ti na kakaaei kiibu ake e taekin te tia kabwarabwara, ao n iriri warekaia ngkana e wareki ma ni kabwarabwarai, bwa ti aonga n rangi ni kakabwaiaaki iai. (Ruka 8:18) Ngkana ti a koaua raoi ni baike a maroroakinaki, ti na boni kamatoai nanora n nimti baike ti reiakin ao ni maiuakin.​—1Tet. 5:21.

¹⁰ Akea te nanououa bwa e na boni katoa wiki te kabwarabwara ngkana iai taani kabwarabwara. E angaraoi aei n angiin te tai ngkana a kaoaki taani kabwarabwara man ekaretia aika uakaan. Ngkana e aki tau mwaitiia taani kabwarabwara, a na kakaraoaki ngkanne kabwarabwara n taai aika angaraoi.

¹¹ Kauouan iteran te taromauri n te wikeen bon te Taua-n-Tantani, ae karaoaki rinanon te titiraki ma kaeka i aon Te Taua-n-Tantani ae te maekatin ibukin te reirei. E anganira Iehova te amwarake n taamnei ae roko raoi n taina rinanon Te Taua-n-Tantani.

¹² Ni kanoan te reirei n te Taua-n-Tantani ao e okioki riki iai aroni maiuakinani booto n reirei man te Baibara ni katoabong. A kakorakoraaki iai Kristian n rarawa nakon “nanon aon te aba” ao aroaro aika kammaira. (1Kor. 2:12) E rarakarake te oota ni kaineti ma ana reirei te Baibara ao taetae ni burabeti, rinanon Te Taua-n-Tantani, ike ti a bane ni kona iai ni kakarekea te ota ae boou i aon te koaua, ao n teimatoa i nanoni kawaia akana raoiroi. (TaiAre. 97:11; TaeRab. 4:18) Iriran te Reirei n te Taua-n-Tantani ao ara anga kaeka iai, e kona ni buokira ni kimwareirei ni kantaningaan ana aonnaba ae boou Iehova ae mena iai te raoiroi. (IRom 12:12; 2Bet. 3:13) Ti buokaki n ara bobotaki ni Kristian bwa ti na karikirakea uaan te taamnei ae raoiroi, ao ni kakorakoraa iroura tangiran te beku iroun Iehova ma te ingaingannano. (IKar. 5:​22, 23) Ti kakorakoraaki bwa ti na nanomwaaka i aani kataaki ao ni katea ‘aara ae raoiroi ibukin taai aika a na roko’ bwa ti “aonga n taua raoi te maiu ni koaua.”​—1Tim. 6:19; 1Bet. 1:​6, 7.

¹³ Ti na kangaa ni kabongana raoi te amwarake n taamnei ae katauraoaki aei? Ti riai ni kamani katauraoi i bon iroura ke ma kaain ara utu, ti na wareki kiibu ao n anga ara kaeka n oin ara taeka n tain te botaki. Karaoan anne e na karina i nanora te koaua, ao a na kakabwaiaaki iai tabemwaang ngkana a ongoraea ara taeka aika kaotiota ara onimaki. Kakauongora raoi n aia kaeka tabemwaang, ti na kakabwaiaaki iai man te reirei ni katoa wiki.

TE BOTAKI N TAROMAURI I NUKAN TE WIKI

¹⁴ A ikotaki kaain te ekaretia ni katoa wiki n te Tabo n Taromauri, ibukin te botaki ae aranaki bwa Maiura ni Kristian ao Ara Mwakuri ni Minita. Iai tenua iteran te botaki aei ake a katauraoaki ibukini buokara bwa ti aonga n “tau” bwa ana minita te Atua. (2Kor. 3:​5, 6) E na kakatauraoaki te kaetieti ao baike a na rinanoaki n Te Boki n Reirei ae Maiura ni Kristian ao Ara Mwakuri ni Minita, ae katoa namwakaina. Iai naba i nanona aron te maroro aika a na kabonganaaki n te mwakuri ni minita.

¹⁵ Ti na buokaki ni moan iteran te botaki aei ae Baika Kakawaki Aika Mena n Ana Taeka te Atua, bwa ti na ota n te rongorongo ao ni bwaninin raoi baika karakinaki n te Baibara, ao n reireinaki iai arora ni maiuakin. N te botaki aei ao iai naba te kabwarabwara, te wareware, ao te maroro ae boto i aon te wareware n te Baibara ae katoa wiki. Iai naba i nanon Te Boki n Reirei ae Maiura ao Ara Mwakuri ni Minita, bwaai n ibuobuoki aika taian taamnei ao iteraniba tabeua ake a na ibuobuoki ni kamataatai riki rongorongo akanne. Te ukeuke ae nano aei i aon te Baibara e buokira ni maiura ao n ara angareirei, bwa ti “aonga n taubobonga iai . . .  ma n tauraoi raoi nakoni mwakuri aika raraoi ni kabane.”​—2Tim. 3:​16, 17.

¹⁶ E katauraoaki kauouan iteran te botaki aei ae Kanakoraoa Am Mwakuri ni Minita, bwa a aonga ni bane n reke aia tai taari ni kataneiai ibukin te mwakuri ni minita ao ni karikirakei riki aia konabwai n uarongorongo ao n angareirei. Irarikin are te reirei irouia kaain te kuura, iai naba taamnei aika kaotaki ni kaineti ma aron te maroro. Ti buokaki n iteran te botaki aei bwa ti na karekea “neweia te koraki ake a a tia n reiakinaki” bwa ti “aonga n ataa aroni kaekaan ane e kua, n te taeka ae riai.”​—Ita. 50:4.

¹⁷ E rinanoaki ni katenuan iteran te botaki aei, ae Maiura ni Kristian, reirei aika manena aika reke mani booto n reirei man te Baibara ni maiura ni katoabong. (TaiAre. 119:105) Mwakoron te botaki aei ae abwabwaki riki taina bon te Reirei n te Baibara n te Ekaretia. E karaoaki te Reirei n te Baibara n te Ekaretia rinanon titiraki ma kaeka n aroni karaoan te Reirei n Te Taua-n-Tantani.

¹⁸ Ni katoa namwakaina are e roko iai Te Boki n Reirei ae Maiura ao Ara Mwakuri ni Minita ae boou, ao te tia babaire n te rabwata n unimwaane ke te unimwaane ae buokia, e na karaua moa n rinanon te boki aei ao ni karaoa iai te babaire. Ni katoa wiki ao e na riki bwa te tia babaire n te botaki, te unimwaane ae mwaatai n angareirei ao n tia ni katauaki n te rabwata n unimwaane. Taben naba teuaei e na taraia raoi bwa e na waaki ao n toki te botaki i aon te tai, ao n anga te taeka ni kamoamoa ao te reirei ni kairiri nakoia kaain te kuura ake iai mwiokoaia.

¹⁹ Ngkai ti kakatauraoi, ti kaakaea ara Botaki ae Maiura ao Ara Mwakuri ni Minita, ao n anganga kaeka iai, ti a karekea te atatai man te Baibara, te ota ni booto n reirei man te Baibara, te aki mamaaku n tataekina te rongorongo ae raoiroi, ao te konabwai ni karekeia taan rimwini Kristo. A kakabwaiaaki naba naake a tuai n riki bwa taani Kakoaua aika bwabetitoaki, man te iraorao ao te maroro aika kakorakoraa te onimaki. Ibukini buokara bwa ti na tauraoi nakon te botaki aei ao ake tabeua riki, ti kona ni kabonganai raoi bwaai n ibuobuoki aika te Watchtower Library, JW Library^®, Watchtower ONLINE LIBRARY^™ (ngkana e tauraoi n am taetae), ao ai te tabo ni boki n te Tabo n Taromauri. Iai n te tabo ni boki are n te Tabo n Taromauri booki ake a tauraoi irouia Ana Tia Kakoaua Iehova, te Watch Tower Publications Index ke te Research Guide for Jehovah’s Witnesses, n ikotaki naba ma rairai n te Baibara aika bati, te concordance, te rikitinare, ao booki riki aika bwaai n ibuobuoki aika manena. E kona ni kabonganaaki te tabo ni boki aei irouia aomata nako, imwain ke imwin taiani botaki.

TE BOTAKI IBUKIN TE MWAKURI NI MINITA

²⁰ N taai aika kakaokoro i nanon te wiki ao n te wikeen, ao a ikoikotaki taan uarongorongo ni karaoa te botaki ae uarereke ibukin te mwakuri ni minita. A kakaraoaki botaki aikai n aia auti taari ke n taabo ake a angaraoi. E kona naba ni kabonganaaki te Tabo n Taromauri ni karaoan te botaki aei. Karekeani kurubu aika uarereke n taabo tabeua n te aono teuana, e kona ni bebete iai rokoia taan uarongorongo n te botaki ibukin te uarongorongo, ao n te tabo n nakonako. E kai baireaki riki iai aroia taan uarongorongo, ao ni waekoa ni waaki nakon te tabo n nakonako. E kona naba iai te mataniwi n te kurubu n tararuaiia raoi kaain ana kurubu. E ngae ngke iai raoiroin ae a na botaki i bon irouia kurubu aika kakaokoro, ma i aani kangaanga tabeua a kona ni manga ikotaki kurubu tabeua. N te katoto, ngkana tii tabeman taan uarongorongo aika nanakonako i nanon te wiki, tao e na raoiroi riki ngkana a ikotaki taiani kurubu ke a a bane naba ni kaitiboo n te Tabo n Taromauri ke n te tabo teuana ae nakoraoi. N te aro aei, a na bane iai taan uarongorongo n reke toaia ni mwakuri. E kona naba n angaraoi irouia kaain te ekaretia bwa a na kaitiboo n te Tabo n Taromauri ni boong ni motirawa. Ke e kona ni baireaki n te ekaretia bwa e na iai te botaki ibukin te mwakuri ni minita imwin te Reirei n Te Taua-n-Tantani.

²¹ Ngkana a kakaokoro aia tabo taiani kurubu, e na kaira te botaki ibukin te mwakuri ni minita te mataniwi n te kurubu. N tabetai e kona te mataniwi n te kurubu ni mwiokoa ana tia ibuobuoki ke te tari temanna ae tau, bwa e na kairi aeka ni botaki aikai. E riai te tia kairiri n tauraoi ni maroroakini baika manena ao n ibuobuoki n te mwakuri ni minita. Ngkana a a tia ni karaoaki babaire ibukin te nakonako, ao e na tataro temanna kaain te kurubu. A na tauraoi ngkanne kaain te kurubu n nakon aia mwabe. Maanin aeka ni botaki aikai bon nimaua nakon itiua te miniti, ma e riai ni kimototo riki ngkana a karaoaki imwin te taromauri. E riai n reke mai iai te kaungaunga, te kaetieti ae manena, ao te kairiri, ibukia naake a nangi nako n uarongorongo. A kona taari aika boou ke tabemwaang riki aika kainnanoa buokaia, n toa ma taan uarongorongo aika mwaatai riki bwa a aonga ni kataneiaaki.

BABAIRE N TE BOTAKI IBUKIA EKARETIA AIKA BOOU KE AIKA UAREREKE

²² Ngkai a a mwaiti riki taan rimwini Kristo, e a rikirake naba mwaitin te ekaretia. Te bubutii ibukin tein te ekaretia ae boou e kakanakoaki rinanon te mataniwi n te aono ae uarereke. Ma i aani bukina tabeua, e kona n raoiroi riki irouia kurubu aika uarereke bwa a na bobotaki ma te ekaretia are a uakaan ma ngaia.

²³ N tabetai e kona n ae kaain te ekaretia teuana ae uarereke ai bon taari aine naba ni kabane. Ngkana e riki anne, ao te tari te aine are tataro ibukia kaain te ekaretia ke e kaira te botaki e riai n rabuna atuna, ni kaineti ma te kaetieti man te Baibara. (1Kor. 11:​3-16) N angiin te tai e tekateka ni kaaitaraia kaain te kurubu. A aki kakabwarabwara taari aine n tain te botaki. Ma a wareka te kaongora are baireaki man ara botaki ao a anga aia ibuobuoki i aona, ke teuana naba a kona ni maroroakina kanoana ke ni karaoia bwa te kaotioti. E na reitaki te aobiti n tararua ma te tari te aine temanna ao ni mwiokoia bwa e na rereitaki ma te aobiti ao n tabeakini bobotaki. Imwina riki ngkana a tau taari mwaane ibukin te mwioko anne, ao a a karaoi naba.

TAIAN RUNGA

²⁴ Ni katoa ririki, a baireaki ekaretia ake n te aono teuana bwa a na ikotaki ibukin ruunga aika uoua aika kaka tebongina maania. Taai aika kakimwareirei aikai e a karekea aia tai taan roko ni kabane ni ‘kamwaawawai nanoia’ ibukin te iraorao ni Kristian. (2Kor. 6:​11-13) E katauraoa te boto n iango man te Baibara ana botaki Iehova, ao kanoan riki te botaki aei aika kakaokoro, ae kaineti raoi ma te bwai ae kainnanoaki. E kamatataaki te boto n iango anne rinanon taiani kabwarabwara, kaotioti, manga kaotiotinani baike a a tia n riki, te kaotioti are e taetae iai i bon irouna temanna, ao taiani maroro. Te kaetieti ane e roko raoi n taina anne e a kakorakoraia taan roko ni kabane. N taian runga aikai are e a reke iai angaia taan rimwini Kristo aika boou ni bwabetitoaki bwa kaotan aia katabu nakon Iehova.

TAIANI BWABWARO IBUKIN TE AONO

²⁵ Iai riki te botaki ae bubura ae karaoaki naba te taina n te ririki. N angiin te tai ao e kabaneaki tenibong ibukin taiani bwabwaro ibukin te aono, ike a a ikotaki iai ekaretia man aono aika bati. A noria aobiti n tararua aika uarereke riki bwa e nakoraoi irouia ngkana a bane ekaretia ake a tararuai, ni botaki n te tabo teuana. E kona ni kaokoro te babaire ibukini botaki aikai n aaba tabeua, ni kaineti ma baika riiriki ke te babaire man ara botaki. N tabetai, a kona ni karaoaki bwabwaro ibukia aaba aika kakaokoro ke bwabwaro aika okoro n aaba tabeua, ike a kona ni kaeaki irouia taani Kakoaua aika tatabebwi te nga mwaitiia, man aaba aika kakaokoro. Ni waakinakon te ririki, ao a bati ake a a tia n reiakina te rongorongo ae raoiroi ibukin te Tautaeka n Uea, mani kabutaan taekan aia botaki aika bubura Ana Tia Kakoaua Iehova.

²⁶ A riki bwabwaro aikai bwa taai ni kimwareirei irouia ana aomata Iehova ake a a tia ni katabui maiuia, ike a a katiteuanaaki iai n taromauri. A riki naba bwabwaro aikai bwa taini karakaan ootan te koaua. Ni bwabwaro tabeua ao a kaotinakoaki iai booki aika boou ibukin te reirei i bon iroum ao te reirei n te ekaretia, ke bwaai n uarongorongo. A karaoaki naba bwabetito n taiani bwabwaro. A rangi ni kakawaki taiani bwabwaro ni kaineti ma te rikirake n te onimaki. E oti mani bwabwaro aikai bwa ana aomata Iehova bon teuana te botaki n itaritari ae katobibia te aonnaba, ae kaainaki irouia Kristian aika katabui maiuia, ake a kaotiota kanikinaeaia taan rimwin Iesu Kristo.​—Ioa. 13:35.

²⁷ Rorokora ni bobotakin aia ekaretia n ikotaki ma aia runga ao aia bwabwaro ana aomata Iehova, ti a kakorakoraaki iai bwa ti na karaoa nanon Iehova. Ti kamanoaki naba iai man ana kariri te aonnaba are e kona ni kamamaraa ara onimaki ni Kristian. A bane botaki aikai ni karekea karaoiroan ao neboan Iehova. (TaiAre. 35:18; TaeRab. 14:28) Ti kona ni kakaitau ngkai e a tia Iehova ni katauraoi taai ibukini kakorakoraan aia onimaki ana aomata ake a a tia ni katabui maiuia, n tain te toki aei.

ANA KATAIRIKI TE UEA

²⁸ Ni katoa ririki n taini kauringaani maten Iesu Kristo ao Ana Tia Kakoaua Iehova ni katobibia te aonnaba, a kakaraoa Kauringaani mateni Kristo ke Ana Katairiki te Uea. (1Kor. 11:​20, 23, 24) Aei te botaki n te ririki, ae moan te kakawaki irouia ana aomata Iehova. Bon iai te tua nakoira bwa ti na kakaraoa te Kauring aei.​—Ruka 22:19.

²⁹ E boraoi bongin te namwakaina ibukin te Kauring ma tain te Toa are te Riao, are e kaotaki raoi n te Baibara. (TeOti. 12:​2, 6; Mat. 26:​17, 20, 26) Te Toa ae te Riao, bon te kauring ni katoa ririki ibukin Otinakoia I-Iteraera mai Aikubita n te ririki 1513 B.C.E. N te tai anne ao Iehova e kanikinaea te ka-14 ni bong n aia moan namwakaina, bwa aia tai ni kana te tiibutetei ibukin te Toa ae te Riao ao aia tai ni kitana tautoronakia i Aikubita. (TeOti. 12:​1-51) E ataaki te tai anne mani warekan 13 te bong, mani moan te oti n namwakaina ae uakaan ma te spring equinox, ae te tai ae boraoi iai aoan te roo ma te ngaina are nonoraki i Ierutarem. N angiin te tai ao karaoan te Kauring anne, e bwakara raoi te tai are moan tabwanin iai namwakaina imwin te spring equinox.

³⁰ E kabwarabwaraa Iesu ni Mataio 26:​26-28 aroni karaoan te Kauring. Bon tiaki te bukamaru ae irekereke ma te tabunea, ma bon te amwarake ni kaikonaki, ae karaoaki irouia naake a a weteaki bwa taani bwaibwai ma Iesu Kristo n ana Tautaeka n Uea i karawa. (Ruka 22:​28-30) A kaungaaki Kristian ake tabemwaang ake a a tia ni katabui maiuia ao naake a kan ongora, bwa a na kaea Ana Katairiki te Uea bwa taani kakoauaa te bong anne. N rokoia ao a a kaota iai aia kakaitau ibukin te baere e a tia ni katauraoia Iehova ae te Atua ibukini kabwaiaia aomata nako, rinanon Natina ae Iesu Kristo. Imwain te Kauring ao e na karaoaki te kabwarabwara ae okoro ibukini kaingaingaaia aomata nakon te botaki aei ao ibukini kaungaan riki te kan reirei n te Baibara.

³¹ A kakantaninga ma te kimwareirei Ana Tia Kakoaua Iehova, nakon taai ake a na manga ikotaki naba iai n taromauri, ike ti a “iaiangoira [iai] i marenara bwa ti aonga ni kaungaira nakon te tangira ma mwakuri aika raraoi.” (Ebera 10:24) E taningamarau te toro ae kakaonimaki ma ni wanawana ni katauraoi aeka ni botaki aikai, aika kaineti raoi ma baika ti kainnanoi n te onimaki. A kaumakaki ana toro Iehova ni kabane ao ai naake a kan ongora bwa a na kabongana raoi te babaire aei, ae te katoatai n ikoikotaki. A katiteuanaaki n te boonnano ana toro te Atua, man aroia ni kaota aia kakaitau ae nako raoi mai nanoia ibukini baike e katauraoi Iehova rinanon ana botaki. Ma ae kakawaki riki, ti a karaoiroa ao n neboa Iehova.​—TaiAre. 111:1.