Antai Te Atua?

1, 2. Baikara titiraki aika a tatabeki aomata?

A RANGI ni kautitiraki ataei. Ko kona ni kabwarabwaraa nakoia te bwai teuana, ma a aki toki ni kangai, ‘Bwaau?’ Ao ngkana ko a manga kataia ni kaekaia, ao a kona ni manga titiraki ni kangai, ‘Bwa e aera?’

² E ngae ngkana tao ti ataei ke ti a kara, ma a bane n iai ara titiraki. Ti kona n titiraki ni kaineti ma kanara ke kunnikaira ke te bwai ae ti na kabooa. Ke ti kona n tabeki titiraki aika kakawaki riki ibukin te maiu ao taai aika a na roko. Ma ngkana a aki rau nanora ni kaekaan ara titiraki, ao ti a aki naba kan ukeri kaekaaia.

3. E aera ngkai a bati aomata aika iangoia bwa e aki kona n reke kaekaan aia titiraki aika kakawaki?

³ Iai n te Baibara kaekaan ara titiraki aika kakawaki? A taku tabeman bwa iai, ma irouia e rangi ni kangaanga te ota n te Baibara. A kona n iangoia bwa tii taan reirei ao mataniwi n Aaro aika atai kaekaan titiraki. Ao tabemwaang a maamaa ni kaotia ae a aki atai kaekaan titiraki. Tera ngkoe am iango?

4, 5. Baikara am titiraki aika kakawaki? Bukin tera bwa ko riai n teimatoa n ukeri kaekaaia?

⁴ Ko bae ni kan atai naba kaekaan titiraki n aron aikai: E aera ngkai I mena ikai? Tera ae e na riki nakoiu ngkana I mate? Aekakira te Atua? E taku Iesu are te tia Reirei ae rangi ni kinaaki: “Teimatoa ni bubutii ao kam na anganaki. Teimatoa n ukeuke ao kam na kunea. Teimatoa ni karebwerebwe ao e na kaukaki nakoimi.” (Mataio 7:7) Tai kabwaraa nanom ni karokoa ae a reke kaekaan am titiraki aika ko kona n onimakini.

⁵ Eng ngkana ko “teimatoa n ukeuke,” ao ane a na reke kaekaan am titiraki n te Baibara. (Taeka N Rabakau 2:1-5) A rangi ni kai ota kaeka aikai. E na kakukurei riki maium ngkai ao e na reke am kantaninga ae tamaroa nakon taai aika a na roko, mani baika ko reiakin. Ti na nora ngkai te titiraki ae e a tia ni kamangaoi aia iango aomata aika bati.

E MUTIAKINIRA TE ATUA KE E RIBUAKA?

6. E aera ngkai a iangoia tabeman bwa e aki mutiakina rawawataia te Atua?

⁶ A bati aomata aika iangoia bwa e aki mutiakinira te Atua. A taku bwa ngkana e boni mutiakinira te Atua, ao bon tiaki aei aron te aonnaba. Ti a nora te buaka, te riribai, ao te rawawata n taabo nako. A aoraki aomata, a rawawata, ao a mate. A iango tabeman ni kangai, ‘Ngkana e mutiakinira te Atua, e aera ngkai e aki katoki rawawata aikai?’

7. (a) N te aro raa ae a reireinia iai aomata mataniwi n Aaro bwa e ribuaka te Atua? (b) Ti kangaa ni kakoauaa ae e bon aki riai ni bukinaki te Atua n rikini baika bubuaka?

⁷ N tabetai ao mataniwi n Aaro a kairiia aomata bwa a na kakoauaa ae e ribuaka te Atua. Ngkana e riki te kabuanibwai teuana ao a taekinna bwa bon ana babaire te Atua. A taku bwa e bon tangiria te Atua bwa e na riki te baenne. N taekinan aei irouia, a a bukina iai te Atua. Ma e reirei te Baibara bwa bon tiaki te tia karikii baika bubuaka te Atua. E kaotaki nakoira n Iakobo 1:13 bwa e aki kataa temanna te Atua ni baika bubuaka. E taekinaki iai ae kangai: “Ngkana iai ae e rinanon te kataaki ao e na aki kangai: ‘I kataaki iroun te Atua.’ Bwa e aki kona ni kataaki te Atua ni baika bubuaka ao e aki kona naba ni kataa temanna iai.” Nanon aei bwa e ngae ngke e tuai ni katoki baika bubuaka te Atua, ma bon tiaki ngaia ae e karikii. (Wareka Iobi 34:10-12.) Ti na nora te katoto.

8, 9. E aera ngkai e aki raoiroi bwa ti na bukina te Atua n ara kangaanga? Aanga te katoto.

⁸ Iangoa te rorobuaka n ataei temanna ae maeka ma ana karo. E rangi n tangiraki iroun tamana, ao e reireinaki arona ni karaoi motinnano aika raraoi. Ma rimwi riki e a karitei te rorobuaka aei nakon tamana, ao e a kitana mwengana. E a karaoi mwakuri aika bubuaka ao e a reke n te kangaanga. Ko na bukina tamana n te baere riki, bwa e aki tautaua natina ngke e nang kitana te mwenga? Ko na bon aki! (Ruka 15:11-13) N aron te tama aei, e aki naba tukiia aomata te Atua ngke a rineia bwa a na karitei ao ni karaoa ae buakaka. Ngaia are ngkana e riki te bwai ae buakaka, ti riai n uringnga bwa bon tiaki te Atua ae karikia. E bon aki raoiroi bwa ti na bukina te Atua.

⁹ Iai bukina ae rangi n raoiroi, ngkai e tuai ni katoki baika bubuaka te Atua. Ko na reiakina ae taekinaki n te Baibara ni kaineti ma aei ni Mwakoro 11. Ma ko kona ni kakoauaa ae e tangirira te Atua, ao bon tiaki ngaia ae riai ni bukinaki n ara kangaanga. Bon tii Ngaia ae kona ni katoki ara kangaanga.​—Itaia 33:2.

10. Ti kangaa ni kakoauaa ae te Atua e na manga katamaroai mwin aia urubwai aomata aika buakaka?

¹⁰ E tabu te Atua. (Itaia 6:3) A bane n itiaki baika e karaoi, akea baarekaia, ao a raoiroi. Ngaia are ti kona n onimakinna. Ma tiaki anne aroia aomata. N tabetai a a manga karaoi baika kairua. Bon akea naba mwaakan te tia tautaeka ae te kabanea ni kakaonimaki ni kona ni katamaroai mwin aia urubwai aomata aika buakaka. Bon akea ae rota mwaakan te Atua. E kona ao e na manga katamaroai mwin aia urubwai aomata aika bubuaka. E na boni kamauna n aki toki te buakaka.​—Wareka Taian Areru 37:9-11.

TERA ANA NAMAKIN TE ATUA N RAWAWATAIA AOMATA?

11. Tera ana namakin te Atua n rawawatam?

¹¹ Tera ana namakin te Atua ngkana e nora te bwai ae riki n te aonnaba ao te bwai ae ko rinanona? E reireinira te Baibara bwa e “tangira te kaetitaeka ae riai” te Atua. (Taian Areru 37:28) Ngaia are e rangi n tabe ma te bwai ae raoiroi ao ae buakaka. E ribaa ae a na rawawata aomata. E taekinna te Baibara bwa “e nanokawaki” ngke e nora te buakaka bwa e korakora n te aonnaba. (Karikani Bwaai 6:5, 6) E aki bibitaki te Atua. (Maraki 3:6) E taekinna te Baibara bwa te Atua e rangi ni mutiakiniko.​—Wareka 1 Betero 5:7.

12, 13. (a) E aera bwa ti tangiriia aomata ao ni mutiakinia, ao tera ara namakin n te rawawata ae n te aonnaba? (b) E aera bwa ti kona ni kakoauaa ae te Atua e na boni kamaunai rawawata ni kabane ao te ribuaka?

¹² E taku naba te Baibara bwa te Atua e karikira ni katotongana. (Karikani Bwaai 1:26) Nanon aei bwa e karikira te Atua ao iai naba iroura aroarona aika raraoi. Ngaia are ngkana ko nanokawaki n noraia aomata aika rawawata, ngkanne e na rangi n nanokawaki riki iai te Atua! Ti kangaa n ataia?

¹³ E reireinira te Baibara bwa “te Atua bon te tangira.” (1 Ioane 4:8) A bon aanaki n te tangira ana mwakuri te Atua. Ngaia are ti tatangira ibukina bwa e tatangira te Atua. Iangoa aei: Ngkana iai iroum te mwaaka, ko na kamaunai rawawata ni kabane ao te ribuaka n te aonnaba aei? Ko na boni bae, ibukin tangiraia aomata. Tera aron te Atua? Iai irouna te mwaaka, ao ibukina bwa e tangirira, e na boni kamaunai rawawata ni kabane ao te ribuaka. Ko kona ni kakoauaa ae a na boni koro bukin ana berita te Atua ake a taekinaki ni moan te boki aei! Ko riai n atai riki taekan te Atua bwa ko aonga ni kona n onimakini berita aikai.

E TANGIRIA TE ATUA BWA KO NA KINAA

14. Antai aran te Atua, ao ti kangaa n ataia ae ti riai ni kabongana?

¹⁴ Ngkana ko kan raoraona te aomata temanna, tera te bwai ae ko na moani kaotia nakoina? Bon aram. Iai aran te Atua? A bati Aaro aika taku bwa arana bon te Atua ke te Uea, ma tiaki aara baikai. Bon tii taian nakoa, n aron “te uea” ke “te beretitenti.” E kaotia nakoira te Atua bwa arana bon Iehova. E kangai Taian Areru 83:18: “Ke a ataiko aomata ae Iehova aram, bwa bon tii ngkoe Teuare Moan te Rietata n te aonnaba ni kabutaa.” A kabongana aran te Atua taani korea te Baibara nga ma nga te tai. E tangiria Iehova bwa ko na ataa arana ao ko na kabongana. E kaota arana nakoim bwa ko aonga n riki bwa raoraona.

15. Tera nanon te ara ae Iehova?

¹⁵ E rangi ni kaakanoa aran te Atua ae Iehova. E nanonaki iai bwa e kona te Atua ni kakoroi bukin ana berita ao ni kakororaoa ana kantaninga. E aki kona n tukaki. E onoti te ara aei nakoina.a

16, 17. Tera ae nanonaki n te taeka ae (a) “Moan te Mwaaka”? (b) “te Uea n aki totoki”? (c) “te tia Karikiriki”?

¹⁶ N aron ae ti warekia mai mwaina, ao e kangai Taian Areru 83:18 ni kaineti ma Iehova: “Bon tii ngkoe Teuare Moan te Rietata.” E kangai naba Te Kaotioti 15:3: “A kakannato am mwakuri ngkoe ae Iehova ae te Atua ae Moan te Mwaaka ao a kamimi. A raraoi kawaim ao a koaua, ngkoe ae te Uea n aki totoki.” Tera nanon te nakoa ae “Moan te Mwaaka”? Nanona bwa akea n te iuniweeti aei ae e rota mwaakan Iehova. Ao te nakoa ae te “Uea n aki totoki” e nanonaki iai bwa e na teimatoa n aki toki. E kabwarabwaraaki n Taian Areru 90:2 bwa akea moana ao tokina. E aki ngkanne kamimi anne!

¹⁷ Bon tii Iehova te tia Karikiriki. E kangai Te Kaotioti 4:11: “Ko riai n anganaki te neboaki ma te karineaki ma te mwaaka, ngkoe ae Iehova ae Atuara, ibukina bwa ko karikii bwaai ni kabane, ao ibukin nanom, ao a a riki baikai bwa ko karikii.” Bon Iehova ae karikiia anera ma itoi aika i karawa, uaan taian aroka ao iika aika i taari, eng e boni karikii bwaai ni kabane!

KO KONA N RIKI BWA RAORAON IEHOVA?

18. E aera ngkai a iangoia tabeman bwa a aki kona n riki bwa raoraon te Atua? Tera ae taekinaki n te Baibara ibukin anne?

¹⁸ Ngke a wareki taekan aroaron Iehova aika kamimi aikai tabeman, ao a maaku ma n taku, ‘E aera bwa e na mutiakinai te Atua, ngkai bon te Atua ngaia ae rangi ni mwaaka, e kakannato, ao n raroanako?’ Ma e tangiria te Atua bwa ti na namakina anne? E bon aki. E kani kaanira Iehova. E taekinna te Baibara bwa “e bon aki raroa [te Atua] mairoura n tatabemanira nako.” (Mwakuri 17:27) E tangiria te Atua bwa ko na kaania, ao e berita bwa ‘e na kaaniko.’​—Iakobo 4:8.

19. (a) Ko na kangaa n riki bwa raoraon te Atua? (b) Tera aroaron Iehova ae ko tatangiria riki?

¹⁹ Ko na kangaa n riki bwa raoraon te Atua? E taku Iesu: “Ibukini karekean te maiu are aki toki, a riai n ataiko ae tii ngkoe te Atua ae koaua, ao n ataa naba teuare ko kanakomaia ae Iesu Kristo.” (Ioane 17:3) Kateimatoa am reirei, ao ane ko na ataa Iehova ao Iesu. Ao ane e na reke iroum te maiu are aki toki. N te katoto, ti a tia n reiakinna bwa “te Atua bon te tangira.” (1 Ioane 4:16) Ma a bati riki aroarona aika tamaroa. E tuangira te Baibara bwa Iehova bon te Atua ae “nanoanga ao e atataiaomata, ae iremwe n un ao e bati irouna te tangira ae koaua ao e bwabwaina te koaua.” (Te Otinako 34:6) E ‘raoiroi ao e tauraoi ni kabwarabure’ Iehova. (Taian Areru 86:5) E taotaonakinnano te Atua ao e kakaonimaki ni koaua. (2 Betero 3:9; Te Kaotioti 15:4) Ko na nori riki aroarona aika tamaroa ngkana ko wareka taekana n te Baibara.

20-22. (a) Ti na kangaa n namakina ae ti a kaaniaki ma te Atua e ngae ngkana ti aki kona n noria? (b) Tera ae ko riai ni karaoia ngkana iai aika a kani katoka am reirei n te Baibara?

²⁰ Ko na kangaa n namakina ae ko a kaaniaki ma te Atua ngkana ko aki kona n noria? (Ioane 1:18; 4:24; 1 Timoteo 1:17) Ngkana ko wareka taekan Iehova n te Baibara, ao ane ko na kinaa bwa kaanga te Aomata ni koaua. (Taian Areru 27:4; I-Rom 1:20) Ngkana ko kabatiaa reiakinan taekan Iehova, ao ane e na ririkirake iroum tangirana ao namakinan ae ko a kaan riki ma ngaia.

²¹ Ane ko na ataia ae Iehova bon Tamara. (Mataio 6:9) E anganira te maiu ao e tangiria naba bwa e na reke iroura te maiu ae te kabanea n tamaroa. Anne te bwai ae tangiria te karo ae tatangira bwa e na riki nakoia natina. (Taian Areru 36:9) Eng, e reirei te Baibara bwa ko kona n riki bwa raoraon Iehova. (Iakobo 2:23) Iangoa anne. E tangiria Iehova ae te tia Karika te iuniweeti aei, bwa ko na riki bwa raoraona!

²² A bae n iai tabeman aika kani katoka am reirei n te Baibara. A bae n ribaiko bwa ko na bita am Aro. Ma tai kariaia temanna bwa e na tukiko bwa ko na riki bwa raoraon Iehova. Boni ngaia Raoraom ni koaua.

23, 24. (a) E aera bwa ko riai n teimatoa n titiraki? (b) Tera ae ti na maroroakinna n te mwakoro ae imwina?

²³ E na bon iai bwaai tabeua aika ko na aki mataata iai n am tai n reirei n te Baibara. Tai maamaa n titiraki ke ni bubutii buokam. E taku Iesu bwa ti riai ni karinanoira n aroia ataei. (Mataio 18:2-4) Ao ataei a rangi ni kautitiraki. E tangiria te Atua bwa ko na atai kaekaaia. Ngaia are reiakina raoi te Baibara n taraia raoi bwa te bwai are ko reiakinna bon te koaua.​—Wareka Mwakuri 17:11.

²⁴ Te anga ae te kabanea n tamaroa ibukin ataakin taekan Iehova bon reiakinan te Baibara. N te mwakoro ae imwina ao ti na nora iai bukina ngkai e kaokoro te Baibara ma booki nako.