TITIRAKI 7
Tera Arou n Tokanikai i Aoni Kaririau Nakon te Wene n Taanga?
TERA AE KO NA KARAOIA?
Iangoa te bwai ae riki aei: E iraorao Heather ma Mike ai tibwa uoua te namwakaina, ma iroun neiei ai aron ae e a rangi ni maan ni kinaa teuaei. A aki toki n text i marenaia ao a kona n taetae n te tareboon i nanon te tai ae maan, ao a a kaman atai baike a na taekin! Ma e a aki tii kani maroro Mike.
I nanon namwakaina n nako aika uoua, a tii tataubai Mike ao Heather ao ni kaboria teutana. E aki kani karaoa ae riao riki Heather. Ma e aki naba kani katoka ana iraorao ma Mike. Akea ae e a tia ni karekea nakon neiei namakinan ae e baaraoi ao e rangi n okoro. E taku i nanona neiei, ‘Irarikin anne, ti a bon tangira. . .’
Ngkana ko a ikawai ao n tau n iraorao, ao ko rinanon are riki iroun Heather, tera ae ko na karaoia imwina?
TEEI MOA AO IANGO!
Te wene n taanga bon te bwaintangira mairoun te Atua tii nakoia ake a a tia ni mare. Te wene n taanga imwain te mare boni kabonganaan te bwaintangira aei n te aro ae aki riai. Kaanga ai aron ae e anganiko temanna te kunnikai ae tamaroa ao ko kabongana bwa am bwai ni kaitiaki
Ngkana ko ewenako man te aroka ao ni kataia ni kiba n aron te mannikiba, ko na bon rotakibuaka ni mwina. Tii te arona naba anne ngkana ko urua te tua ibukin te aroaro ni maiu ae riai, n aron teuana ae kangai: ‘Raawa nakon te wene ni bure.’—1 I-Tetaronike 4:3.
Baikara mwin te aki ongeaba n te tua aei? E kangai te Baibara: “Ane e kakaraoa te wene ni bure, ao e bure nakon oin rabwatana.” (1 I-Korinto 6:18) E kangaa ni koaua anne?
A kunea taani kakaae bwa a bati rooro n rikirake ake a wene n taanga imwaini mareia ae a aki toki n rotakibuaka ni mwina aikai.
TE RAWAWATANNANO. A taekinna angia rooro n rikirake ake a wene n taanga imwaini mareia, bwa a uringaaba imwina.
TE AKI ONIMAKINAKI. Imwin aia wene n taanga, ane a na iango i marenaia ni kangai, ‘Antai riki ae e a tia ni wene n taanga ma neiei/teuaei?’
TE URINGAABA. A bati ataeinnaine aika tangira te aomata ae e na kamanoia, ao e na aki bwainikirinia. Ao a bati ataeinimwaane ake a noria bwa a aki rangi n tangira te aine are e a tia n angania te baere a tangiria.
Te bwai ae moan te kakawaki: Ngkana ko wene n taanga imwaini marem, ko bon urua arom n anga te bwai ae rangi ni kakawaki. (I-Rom 1:24) Moan te kakawaki rabwatam ao ko aki riai n anga!
Kaotia ae iai korakoram n “rawa nakon te wene ni bure.” (1 I-Tetaronike 4:3) Ao n te tai teuana ngkana ko a mare, ko a kona ni wene n taanga. Ao ane ko na kukurei raoi iai, n akea te raraoma, te uringaaba, ao te maaku, ae n angiin te tai a riiriki ngkana ko wene n taanga imwaini marem.—Taeka N Rabakau 7:22, 23; 1 I-Korinto 7:3.
TERA AM IANGO?
E na karaoa te bwai ae e na rotakibuaka iai rabwatam ao am namakin, te aomata ae tangiriko ni koaua?
E na kaririko bwa ko na urua am iraorao ma te Atua, te aomata ae tabeakiniko ni koaua?—Ebera 13:4.