E a Okira Karawa Iesu

E kaitiboo Iesu ma taan rimwina i Kariraia ao e angania te tua ae rangi ni kakawaki aei: ‘Naako reireinia aomata bwa a na riki bwa taan rimwiu man aaba nako. Reireinia bwaai ake I reireiningkami, ao bwabetitoiia.’ Imwina ao e berita ni kangai: ‘Uringnga ae N na memena iroumi n taai nako.’

E kaoti Iesu nakoia bubua ma bubua taan rimwina i Kariraia ao i Ierutarem, i nanon 40 te bong imwini kautakina. E reireinia baika kakawaki ao ni karaoi kakai aika bati. Imwina ao e a kaitiboo ma ana abotoro ae ai ana kabanea n tai naba, n te Maunga ae Oriweta. E taku: ‘Tai kitana Ierutarem. Teimatoa n taningaa te baere e beritanna te Tama.’

A aki ota ana abotoro n te bwai ae e nanonna. Ao a titirakinna ni kangai: ‘Ko nang riki ngkai bwa aia Uea tibun Iteraera?’ E taku Iesu: ‘E tuai n roko ana tai Iehova ibukiu bwa N na riki bwa te Uea. E a kaan te tai ae kam na anganaki iai te mwaaka rinanon te taamnei ae raoiroi, ao kam na riki bwa taani kakoaua ibukiu. Naako uarongorongo i Ierutarem, i Iutaia, i Tamaria, ao nakon taabo ake taiani kabanea n raroa n te aonnaba.’

Ao e a uotakirake Iesu nako karawa ao e karabaa te nang mai mataia. A teimatoa n tararake taan rimwina, ma e a bua.

A kitana te Maunga ae Oriweta taan rimwina ao a nako Ierutarem. A katoatai ni botaki n te ruu are i eta ao n tataro. A tataningaa Iesu bwa e na angania kaetieti riki tabeua.