Ko Kakoroi Baem Nako Iroun Te Atua?
“Ba e na motiki taekan ana makuri te aomata te Atua, aika ana makuri ni kabane aika a raba, aika a raraoi ma aika a bubuaka.”—Te Minita 12:14, Bk.
1. Baikara bwaai ake e a tia ni katauraoi ibukia ana aomata Iehova?
IEHOVA e boutokoaia aomata ni kabaneia aika a uringnga bwa bon aia tia Karikiriki ae Kakannato ngaia. Ana Taeka ae kairaki koreana e angania te atatai ae a kainnanoa bwa a aonga ni kakukureia raoi nanona. Ana taamnei ae raoiroi te Atua e kairiia ngke a karaoa nanona, ma ni “uaa ni makuri nako aika raraoi.” (I-Korote 1:9, 10) Irarikin anne, Iehova e katauraoa te amwarake n taamnei ao te kairiri mairouna, rinanon “te toro ae kakaonimaki ae wanawana.” (Mataio 24:45-47) Mangaia are n aaro aika mwaiti, ana aomata te Atua a kakabwaiaki mai karawa ngkai a beku iroun Iehova ma ni waakina te mwakuri ae moan te kainnanoaki ae tataekinan euangkerion te Tautaeka n Uea.—Mareko 13:10.
2. Baikara titiraki aika a kona n tabekaki ngkai ibukin te beku iroun Iehova?
2 A kukurei Kristian ni koaua ni katabetabeaki ni karaoa te beku ae itiaki ibukin Iehova. Ma e ngae n anne, tao a kona ni bwara nanoia aomata tabeman ma n taku bwa akea manenan aia mwakuri. N aron anne, Kristian ake a a tia ni katabui maiuiia a kona n nanououa n iangoia bwa a manena aia kekeiaki ae aia kabanea n raoiroi, ke a aki. Ngkana e iangoa aron waakinan te reirei n te utu ao mwakuri tabeua riki, tao atun te utu temanna e kona n iangoi naba titiraki n aron aikai: ‘Te koaua bwa e kukurei Iehova ni bwaai aika ti tabe ni kakaraoi ngkai? Te koaua bwa ti kakoroi baera nako iroun te Atua ke tiaki?’ Ana taeka n rabakau te minita, a na kona ni buokira ni kaekai titiraki aikai.
Te Koaua bwa Akea Manenani Bwaai Nako?
3. N aron are e taekinaki n Te Minita 12:8, tera riki te bwai ae akea manenana?
3 Tabeman a kona n taku bwa a aki rangi ni kaunga ana taeka te tia rabakau arei nakoia aomata—ngkana a ataei ke tao a kara. “Akea maneni bwaai”! e taekinna te minita, “akea maneni bwaai ni bane.” (Te Minita 12:8) Bon te aro ae akea manenana ae te kabanea ni buakaka aki-mutiakinan te tia Karikiriki ae Kakannato iroun te aomata n ana bong n ataei, ao te rikirake ni kara n aki beku irouna, are nanona bwa akea riki uaani maiuna, bwa bon tii te kara. E aki manena ao akea uaani maiun te aomata anne e ngae ngkana e kaubwai ke e tanoata taekana n te aonnaba, aei ae e wene inanon teuare buakaka ae Tatan te Riaboro.—1 Ioane 5:19.
4. Bukin tera ngkai e aki kona n taekinaki bwa akea manenani bwaai ni kabane?
4 Ma tiaki anne aroia aomata aika a kakaonimaki ni beku iroun Iehova aika a kaiko aia bwai aika kakawaki nako karawa. (Mataio 6:19, 20) A korakora tabeia n te mwakuri ae uaana, ae ana mwakuri te Uea, ao bon iai maneni mwakuri aikai. (1 I-Korinto 15:58) Ma ngkana Kristian ngaira aika ti a tia ni katabui maiura nakon te Atua, te koaua bwa ti a tabe ni karaoa te mwakuri ae ti mwiokoaki iai iroun te Atua inanoni boong aika kaitira aikai? (2 Timoteo 3:1) Ke ti tabe ni maiuakina te maiu ae aki rangi ni kaokoro ma angiia aomata aika a mena irarikira? Tao a reitaki ma Aaro tabeua ao tao a kakaonimaki iai ni kaea aia taromauri ni katoa tai, ma ni kakoroi bukin bwaai aika a kainnanoaki man aia Aro. Te koaua bwa tiaki ngaiia taan tataekina rongorongon te Tautaeka n Uea. Akea irouia te atatai ae eti ae e kaotaki nakoia, ae te tai aei bon “tain te toki,” ao akea irouia namakinan te nano ni kani kaumakiia ibukin taai aika ti maeka inanoia ngkai.—Taniera 12:4.
5. Tera ae ti riai ni karaoia ngkana ti moanibwai riki bwain te maiu aei?
5 E taekin ara tai aika kangaanga aikai Iesu Kristo ni kangai: “Ao ai aron ana bongi Noa rokon Natin te Aomata. Ba aron te aba ni boong ake i mwain te ieka ngke a amamarake ma ni momoi, ma n iein, ma n anganga te aba nakon te iein ni karokoa te bong are e rin iai Noa i nanon te ake, a aki ata te ieka ngke e tuai n roko n uotiia nako aomata ni kabaneia; ao ai aron naba rokon Natin te Aomata.” (Mataio 24:37-39) Akea buren te amwarake ao te moi ma te taubaang, ao te mare bon te babaire ae moan kateaki iroun te Atua. (Karikani Bwaai 2:20-24) Ma ngkana ti noria bwa ti a tia ni moanna ni moanibwai riki bwaai aika a taneiai ni kakaraoaki n te maiu aei, ao tiaki te koaua bwa e raoiroi riki ngkana ti tataro ibukin te kangaanga aei? Iehova e kona ni buokira bwa ti na moanibwaia riki ana bwai te Tautaeka n Uea, ni karaoa ae e riai ni karaoaki, ma ni kakoroi baera nako irouna.—Mataio 6:33; I-Rom 12:12; 2 I-Korinto 13:7.
Te Katabu ao Baera Iroun te Atua
6. Tera te aro ae aomata tabeman ake a a tia ni babetitoaki, n aki kakoroa baeia teuana ae kakawaki iroun te Atua?
6 Kristian tabeman aika a a tia ni babetitoaki a riai ni kakorakoraiia n tatataro, ibukina bwa a aki karaoi kabaeakia ni minita ake a butimwaia ngke a katabui maiuiia nakon te Atua. A raka riki nakon 300,000, mwaitiia aomata ake a babetitoaki ni katoa ririki, inanon ririki tabeua ake a a tia n nako, ma e aki kekerake mwaitiia taani Kakoaua ibukin Iehova aika a mwamwakuri, n te mwaiti ae boraoi ma anne. Tabeman ake a a tia n riki bwa taan ua rongorongo ibukin te Tautaeka n Uea a manga aki tataekina te euangkerio ngkai. Ma imwain babetitoakiia, a riai aomata ni karaoa te mwakuri ni minita ni Kristian n te aro ae manena. A bon ataa te mwioko are e angania taan rimwina Iesu: “Nako ni kakiritiania botanaomata ni kabaneia, ni babetitoiia nako nanon aran te Tama ma te Nati ma te Tamnei are Raoiroi; n reireiia ba a na kabane baike I tuangngkami n tauu.” (Mataio 28:19, 20) Ngkana akea tukakia iai ibukin te aoraki ae kakaiaki ke kangaanga tabeua aika a riaon aia kona ni kaetii, aomata aika a a tia ni babetitoaki aika a aki mwamwakuri ngkai bwa taani Kakoaua ibukin te Atua ao Kristo, a aki karaoa are a kabaeaki bwa a na karaoi iroun te tia Karikiriki ae Kakannato.—Itaia 43:10-12.
7. Bukin tera ngkai ti riai ni kakaonimaki ni bobotaki n taromauri?
7 Iteraera rimoa bon te botannaomata ae katabuaki nakon te Atua, ao iai baeia aomata iroun Iehova bwa a mena i aan te berita n Tua. N te katoto teuana, mwaane ni kabane a riai ni botaki tenua te tai ni katoa ririki n taian toa, ao te mwaane ae rawa ni kawakina te toa ae te Riao e na “teweaki nako” ni kamateaki. (Warekaia Iteraera 9:13; Nakoaia Ibonga 23:1-43; Te Tua-Kaua 16:16) Ibukin kakoroan bukin baeia iroun te Atua n aroia aomata aika a katabuaki nakoina, a riai ni bobotaki n taromauri I-Iteraera. (Te Tua-Kaua 31:10-13) Akea taekan te Tua ae kangai, ‘Karaoa aei ngkana arona bwa e anga raoi iroum.’ Ibukia aomata aika a katabuaki nakon Iehova ngkai, te tua aei e boutokai ana taeka Bauro aikai: “Ao ti na taratara n iangoi arora ba ti aonga ni keiakinira ni karika te tangira ma mwakuri aika raraoi. Ao ti na tai kaki te bobotira, n ai aroia tabemang, ma ti na taetae n i kauungaira i roura; ni kakorakoraira riki iai n te aro ane kam nora te Bong arei ba e a kan roko.” (Ebera 10:24, 25) Eng, te kakaonimaki ni bobotaki ma raao n onimaki bon teuana mai buakon baen te Kristian ae e a tia ni katabua maiuna nakon te Atua.
Iangoa Raoi Am Moti n Nano!
8. Bukin tera ngkai te roro-n-rikirake ae e a tia ni katabua maiuna, e riai n tataro n iangoa raoi aron ana beku iroun te Atua?
8 Tao te roro-n-rikirake ngkoe ae ko a tia ni katabua maium nakon Iehova. Kakabwaia aika a rangi n tamaroa a na roko iroum ngkana ko teimatoa ni moanibwaia te Tautaeka n Uea inanoni maium. (Taeka N Rabakau 10:22) Ngkana ko tataro ni karaoa raoi am babaire, tao ko kona ni kabanea tabeua am ririki n ataei ni karaoa te beku ibukin te Atua ni kabwanina am tai iai—ae te aro ae rangi n raoiroi ae ko kaotia iai bwa ko ururinga am tia Karikiriki ae Kakannato. Bwa ngkana ko aki, tao tangiran bwaikorakin te maiu aei a kona ni kabanea riki am tai ao am iango. N aroia angiia aomata, tao ko na moantaai ni mare ma n taarau n te mwane ibukin kabooan am bwaikoraki. Karekean te nakoa n te mwakuri ae e bati te kareke mwane iai e kona ni kabanea angiin am tai ao korakoram. Ngkana ko kariki, ao e na iai naba uotam n am utu aika a na katabetabeko inanon ririki aika mwaiti. (1 Timoteo 5:8) Tao ko aki mwaninga iai am tia Karikiriki ae Kakannato, ma e raoiroi ngkana ko ataia bwa te moantaai ni bairea maium ke aki karaoan anne, e na kawenea anuani maium ngkana ko a ikawai riki. Ngkana ko a ikawai riki, tao ko na uringaba ma n taku bwa e na raoiroi riki ngke arona bwa ko a tia ni kabanea moa am bong n ataei ni kabatia riki iai karaoan te beku ibukin ara tia Karikiriki ae Kakannato. Bukin tera bwa ko aki tataro ma n iangoa raoi karaoan anne ngkai, bwa ko aonga ni kakukureiko ni beku iroun Iehova n am boong n ataei?
9. Tao tera ae e na kona ni karaoia te aomata ae kara ngkai, ae iai irouna rimoa te mwioko ae korakora n te ekaretia?
9 Iangoa riki te katoto teuana aei—ae aron te mwaane temanna ae te tia kawakina “ana nanai te Atua” rimoa. (1 Betero 5:2, 3) Bon iai bukina ae e kerikaki man ana beku anne. Te koaua bwa e a kara ngkai ao e a kangaanga irouna te teimatoa ni beku iroun te Atua. Ma e kona ni manga keiakina riki karekean beku n taamnei irouna ngkai? Ai raoiroi ra kakabwaia aika e kona ni karekei nakoia aomata tabemwaang, ngkana te aeka n aomata anne e kona ni mwiokoaki riki n te ekaretia! Ao kioina ngkai akea te aomata ae maiuakina maiuna tii ibon ibukina, a na kimwareirei iai ana utu ao raoraona ngkana e kona ni kabatia riki ana beku ma n neboa te Atua iai. (I-Rom 14:7, 8) Ao ae kakawaki riki, Iehova e na aki mwanuokin bwaai aika a karaoaki irouia aomata ni kabaneia aika a beku ibukina. (Ebera 6:10-12) Mangaia are tera ae na buokira bwa ti na ururinga ara tia Karikiriki ae Kakannato?
Bwaai Aika A Buokira n Ururinga Ara tia Karikiriki ae Kakannato
10. Bukin tera ngke te minita e rangi n tau n anga kaetieti i aon ururingan te tia Karikiriki ae Kakannato?
10 Te minita arei e rangi n tau n taekin kaetieti ibukin ururingan ara tia Karikiriki ae Kakannato. Iehova e boni kaeka ana tataro aika a nako man nanona, n te aro are E anganna te wanawana ae raka. (1 Uea 3:6-12) E neneri aroaroia aomata nako Toromon. Irarikin anne, e kairaki iroun te Atua bwa e na koroi mwin ana kakai bwa a aonga ni kakabwaiaki aomata iai. E korea ae kangai: “Ao aio riki, ngkae e rabakau te Minita, ao e reireiia naba aomata te ataibwai; ao e iangoi taeka n rabakau aika bati, ao e ukoukori, ao e kaetii. E ukeuke te Minita, ba e na kareke taeka aika tangiraki ma ae koreaki n te aro ae riai, aika taeka aika koaua.”—Te Minita 12:9, 10.
11. Bukin tera ngkai ti riai ni butimwaai ana reirei aika wanawana Toromon?
11 Te Baibara n te taetae n Erene ae te Septuagint e rairi taeka aikai ni kangai: “Ao irarikin anne, kioina ngke e wanawana te tia kaotiota te rongorongo, ao e reireinia aomata taekan te wanawana; bwa e aonga te taninga n ataa ae raoiroi man taiani kaikonaki, te tia kaotiota te rongorongo e kakaonimaki ni kakaei taeka aika kakukurei, bwa e aonga ni korea ae raoiroi ma n eti—aika taeka aika koaua.” (The Septuagint Bible, ae rairaki iroun Charles Thomson) E kekeiaki Toromon bwa e na ringi nanoia taani wareware n ana taeka, n taeka aika kakukurei ao reirei aika kakannongora ma ni manena. Kioina ngkai ana taeka aika a koreaki n te Baibara a kairaki iroun te taamnei ae raoiroi, ti kona ni butimwaia mwin ana kakaae, ao ana reirei aika raraoi, n akea te nanokokoraki iai.—2 Timoteo 3:16, 17.
12. Ko na kanga ngkoe ni kabwarabwara n oin am taeka, ae taekinaki iroun Toromon n Te Minita 12:11, 12?
12 E ngae ngke e tuai ni kuneaki te aro ni boreeti ae bwainaki n taai aikai, ma a mwaiti naba booki n ana tai Toromon. Ma tera ae riai n iangoaki ibukini booki aikai? E kangai: “Aia taeka akana rabakau ai aroni bwaai aika kateketeke, ao ai aron neera aika kamatoaki raoi aia taeka taani boboti taekan rabakau, aika e anganaki te aba mairoun te tia kaamarakeia tiibu ae ti temanna. Ao aio riki, natiu, ba ko na reireiaki: ba akea tokini karaoani booki aika bati; ao te kabatia te reirei boni kakuan te iriko.”—Te Minita 12:11, 12.
13. A na kanga aia taeka aomata aika iai irouia te wanawana mairoun te Atua n riki bwa bwaai ni kateketeke, ao antai aika ai aroia “neera aika kamatoaki”?
13 Aia taeka aomata aika iai irouia te wanawana mairoun te Atua, ai aron bwaai aika kateketeke. N te aro ra? A katekei nanoia taani wareware ke taan ongora bwa a na rikirake riki ni karaoa ae boraoi ma taeka aika wanawana ake a warekaki ke a ongoraeaki. Irarikin anne, akana a tabe ni “boboti taekan rabakau” aika taeka aika a wanawana ma ni manena ni koaua, bon ai aroia “neera aika kamatoaki raoi,” ke aika a nene raoi. Tao e a riki aei ibukina bwa aia taeka aomata aika a kaotiota te wanawana mairoun Iehova, e kona ni kateimatoa ma ni buokia taani wareware ao taan ongora. Ngkana te karo ae ko maaka te Atua ngkoe, tiaki te koaua bwa ko riai ni kakorakorako ni karina te wanawana aei inanon ana iango ao nanon natim?—Te Tua-Kaua 6:4-9.
14. (a) Baikara booki aika a aki rangi ni manena ‘kabatiakin te reirei’ mai iai? (b) Baikara booki aika ti riai ni katuua riki iangoaia, ao bukin tera?
14 Ma tera bukin ana taeka Toromon ibukin taiani boki? Ngkana a kabotauaki ma ana Taeka Iehova, booki aika mwaiti kurikuri aika a karaoaki iroun te aonnaba aei a tii taekin aia iango aomata. Angiin iango aikai a kaotiota ana iango Tatan te Riaboro. (2 I-Korinto 4:4) Mangaia are e uarereke mwaitini bwaai aika a teimatoa ni manena, aika a reke man “kabatian te reirei” i aon aia boki aomata. Ni koauana, e kona naba n urui tangirani bwaai n taamnei irouia aomata. N ai aron Toromon, ti bia iaiangoa raoi ana Taeka te Atua ibukin te maiu aei. E na kakorakoraki iai ara onimaki, ao e na kaanira riki nakon Iehova. Kabatiaan te reirei i aon booki ao reirei tabeua riki e kona ni kakua irikora. Ao a moamoa riki booki aikai ni kona n urua onimakinan te Atua ma ana kaantaninga iroura, ngkana a boto i aon iango aika bwainaki n te aonnaba aei aika a bobuaka ma te wanawana mairoun te Atua. Mangaia are ti bia uringa bwa koroboki aika manena riki n ana tai Toromon ao n ara tai naba aei, boni koroboki aika a kaotiota te wanawana mairoun “te tia kaamarakeia tiibu ae tii temanna,” ae Iehova ae te Atua. E katauraoa bokin te Baibara ae Tabu aika 66, ao ti riai n mutiakini riki koroboki aikai. Te Baibara ao booki n ibuobuoki mairoun te ‘toro ae kakaonimaki’ a buokira ni karekea “atakin te Atua” iroura.—Taeka N Rabakau 2:1-6.
Baera Nako Iroun te Atua
15. (a) Ko na kanga ni kabwarabwara ana taeka Toromon ibukin ‘baeia nako aomata’? (b) Tera ae ti riai ni karaoia ngkana ti na kona ni kakoroi baera nako iroun te Atua?
15 E kamota mwin ana kakaei te minita are Toromon ni kangai: “Au kabanea n taeka: i aoni bai ni kabane ao ko na maka te Atua ma ni kawakin ana tua, bon anne baeia aomata nako. Ba e na motiki taekan ana makuri te aomata te Atua, aika ana makuri ni kabane aika a raba, aika a raraoi ma aika a bubuaka.” (Te Minita 12:13, 14, BK) Maakan ke karinean ara tia Karikiriki ae Kakannato iroura n te aro ae riai, e na kawakinira ao tao ara utu naba, man karaoan te aro n nanobaba inanoni maiura, ae a kona ni karekei kangaanga ao te nanokawaki ae bati nakoira ao nakoia aomata aika a tangiraki iroura. Maakan te Atua n te aro ae riai, e itiaki, ao bon te moan mwaneka ibukin karekean te wanawana ao te atatai. (Taian Areru 19:9; Taeka N Rabakau 1:7) Ngkana iai iroura te ataibwai ae boto i aon ana Taeka te Atua ae kairaki koreana ao ti kamanena ana reirei ni bwaai ni kabane ake ti karaoi, ao ti na bon kakoroi ‘baera nako’ iroun te Atua. Tiaki nanon anne bwa ti na koroi taekan bwaai ni kabane aika ti bae iai, i aon te beba teuana. Ma e tangiraki bwa ti na kakairi n te Baibara ngkana ti mwamwakuri ni kaetii kangaanga n te maiu aei, ma ni karaoi bwaai ni kabane n te aro ae boraoi ma nanon te Atua.
16. Tera ae na karaoia Iehova ni kaineti ma te motiki taeka?
16 Ti riai n ataia bwa e nori bwaai ni kabane ara tia Karikiriki ae Kakannato. (Taeka N Rabakau 15:3) E “na motiki taekan ana makuri te aomata te Atua aika a na mwakuri ni kabane.” Eng, Teuare Moan te Rietata e na motiki taekan bwaai ni kabane, n ikotaki ma bwaai aika a karabaki mairouia aomata. Ataakin koaua aikai e kona ni kaungai nanora bwa ti na ira nanon ana tua te Atua. Ma te bwai ae e riai ni kaungai nanora iai ae kakawaki riki, bon tangiran Tamara are i karawa iroura, bwa e korea ae kangai te abotoro Ioane: “Ba bon tangiran te Atua te baei, ae tauan ana tua i roura: ao a aki rawawata ana tua.” (1 Ioane 5:3) Ao kioina ngkai a kateaki ana tua te Atua ibukin kakabwaiara n aki toki, e karaoa ae riai ao ae wanawana, te aomata ae ongeaba iai. Bon tiaki te uota ae rawawata aei irouia aomata aika a tangira te tia Karikiriki ae Kakannato. A tangiria ni kakoroa baeia nakoina.
Kakoroi Baem Nako
17. Tera ae ti na karaoia ngkana ti kani kakoroi baera nako iroun te Atua?
17 Ngkana te koaua bwa ti wanawana ao ti tangiria ni kakoroi baera nako iroun te Atua, irarikin iran nanon ana tua, ti na boni karinea ma ni maaku ni karaoa te bwai ae e na aki kukurei nanona iai. Te koaua bwa “moan rikin te rabakau maakan Iehova,” ao “iai nanowanawanaia ae raoiroi” akana ira nanon ana tua. (Taian Areru 111:10; Taeka N Rabakau 1:7) Mangaia ae ti bia karaoa ae wanawana ma n ongeaba iroun Iehova ni bwaai ni kabane. Moan te kakawaki karaoan anne ngkai, bwa e a tia ngkai ni mena ma aomata te Uea ae Iesu Kristo, ao e a kaan te bongi ni motikitaeka irouna, ae boni ngaia te tia Moti are e rineaki iroun te Atua.—Mataio 24:3; 25:31, 32.
18. Tera ae na riki nakoira ngkana ti kakoroi baera nako iroun Iehova ae te Atua?
18 Ti a tabe ngkai n tirobaeaki iroun te Atua. Ti bon tangiri bwaai n taamnei, ke e a tia ni mamaara ara itoman ma te Atua ngkai, ibukina bwa ti a tia ni kariaia kairakira ni bwain te aonnaba aei? (1 I-Korinto 2:10-16; 1 Ioane 2:15-17) Ngkana ti ataei ke ti a kara, ma ti na karaoa ara kabanea n raoiroi ni kakukureia nanon ara tia Karikiriki ae Kakannato. Ngkana ti ongeaba iroun Iehova ma n ira nanon ana tua, ao ti na rarawa nakon bwain te aonnaba aei ae nang roko n tokina, aika akea manenaia. Ao ngkanne, ti kona ni kaantaninga reken te maiu are aki toki n te waaki ae boou are e beritanaki iroun te Atua. (2 Betero 3:13) Ai raoiroi ra bwaai aika a mena imataia aomata aika a kakoroi raoi baeia nako iroun te Atua!
Ko na Kanga ni Kaekaa?
◻ Bukin tera ngkai ko na aki taekinna bwa akea manenani bwaai ni kabane?
◻ Bukin tera ngkai te Kristian ae e ataei riki e riai n tataro ma n iangoa raoi ana beku iroun te Atua?
◻ Baikara booki aika e na aki rangi ni manena ‘kabatiaan te reirei’ mai iai?
◻ Tera ‘baeia nako aomata’?
[Taamnei n iteraniba 32]
Tiaki nanona bwa akea maneni bwaai ni kabane irouia aomata aika a beku iroun Iehova
[Taamnei n iteraniba 31]
N tiaki aroia booki aika mwaiti aika a karaoaki n te aonnaba aei,ana Taeka te Atua e kamaiu ma ni manena