“Temanna Ae Uarereke” E A Tia N Riki Bwa “Tenga”
“Ane e na riki ba tenga temanna ae uarereke, ao temanna ae karako e na riki ba te botanaomata ae korakora.”—ITAIA 60:22.
1, 2. (a) Bukin tera bwa e rabuna te aonnaba te ro ngkai? (b) E a kanga ana ota Iehova ni kaootaia ana aomata teutana imwin teutana?
“E NA RABUNA aonaba te ro, ao e na rabuniia kaain te aonaba te rotongitong: ma E na oti Iehova i aom, ao e na noraki naba mimitongina i aom.” (Itaia 60:2) Taeka aikai a kabwarabwara raoi aron te aonnaba aei man 1919 ni karokoa ngkai. E a rawa Krititentom ni butimwaea te kanikina ae kaota menan Iesu Kristo ma aomata ma mwaakana n uea, bwa boni ngaia “Ootan te aba.” (Ioane 8:12; Mataio 24:3) Ibukin ‘korakoran unin’ Tatan, ae mataniwiia “taan taua aron te ro aei,” te ka 20 n tienture bon te tai are e a korakora riki iai te iowawa ao te kabuanibwai, n te aro ae tuai man noraki man ngke a moan riki aomata ni karokoa ngkai. (Te Kaotioti 12:12; I-Ebeto 6:12) Angiia aomata a roo ni kaineti ma bwaai n taamnei.
2 Ma e ngae n anne, bon iai te ota ae kaotaki n taai aikai. E “oti” mimitongin Iehova i aoia ana toro, ae te nikira aika kabiraki, aika taan tei i aon te aonnaba, ibukin te “aine” are i karawa. (Itaia 60:1) E moamoa riki ma ngke a kainaaomataki man te tautoronaki i Baburon n 1919, ae te koraki aikai a kaotiota mimitongin te Atua nakoia aomata, ao a ‘kaoti aia ota imataia aomata.’ (Mataio 5:16) Man 1919 n ua 1931, e a tabe ni korakora riki ootan te Tautaeka n Uea, ngke te koraki aikai a kaakeai iango aika a reitaki ma Aaro ni Baburon. A kekerake mwaitiia nakon ngaa ma ngaa, ngke Iehova e kakoroa bukin ana berita aei: “N na bon ikotiia nikiraia Iteraera; N na kakia n te tabo ae ti teuana n ai aroia tibuni Botira: a na bati ni karongoa ngkai a bati aomata n ai aron te nanai i nanon aia tawana n amarake.” (Mika 2:12) N 1931, e a kateretereaki bwa mimitongin Iehova e a mena i aoia ana aomata ngke a butimwaea te ara ae Ana Tia Kakoaua Iehova.—Itaia 43:10, 12.
3. E a kanga ni kateretereaki bwa ootan Iehova e na kaootaia aomata tabeman riki, irarikiia taani kabiraki?
3 E na kaootaia nikiran te “nanai ae uarereke” Iehova n tii ngaiia? (Ruka 12:32) E na aki. Te Taua-n-Tantani ae bwain Tebetemba 1 1931, e kotea te koraki teuana. N ana kabwarabwara ae raoiroi i aon Etekiera 9:1-11, e kaotia bwa te mwaane ae iai irouna te anto ae ana bwai te tia koroboki ae e taekinaki ni kiibu akanne, e tei ibukin te nikira ae kabiraki. Antai aika a kanikinaeaki ramaia iroun te “aomata” arei? “Tiibu tabemang,” aika a kaantaninga te maiu are aki toki i aon te aonnaba ae te baretaiti. (Ioane 10:16; Taian Areru 37:29) N 1935, te koraki aika “tiibu tabemang” aikai, a kinaaki bwa “te koraki ae uanao . . . mai buakoia botanaomata ni kabaneia,” ae e noraki n ana miitara te abotoro Ioane. (Te Kaotioti 7:9-14) Man 1935 n uaa ngkai, e bati ni katuuaki ikoikotakiia kaain te koraki ae uanao.
4. Antai “uea” ao “botanaomata” aika a taekinaki n Itaia 60:3?
4 Te mwakuri n ikoikoti aei e a taekinaki n ana taetae ni burabeti Itaia ngke e kangai: “Ao botanaomata a na kawara ootam, ao uea a na kawara raneanean otim.” (Itaia 60:3) Antai “uea” aika a taekinaki ikai? Nikiran te koraki aika 144,000 mwaitiia n ikotaki naba ma Iesu Kristo, aika a na uaia n ababa n te Tautaeka n Uea i karawa, ao a a tia ni kaira te mwakuri ni kaotioti are e karaoaki. (I-Rom 8:17; Te Kaotioti 12:17; 14:1) Ni boong aikai, a mwaiti riki kaain “botannaomata,” aika aomata aika a kaantaninga te maiu i aon te aonnaba, aika a kawara Iehova bwa a na reiakinaki irouna, ao a kaoia aomata tabemwaang bwa a na karaoa naba anne, nakon mwaitiia nikiran te koraki aika kabiraki, aika tii tabeua tenga ngkai.—Itaia 2:3.
Ana Toro Iehova Aika A Ingainga Nanoia
5. (a) Baikara koaua aika a kaotia bwa e tuai ni kerikaki ingaingan nanoia ana aomata Iehova? (b) Aaba ra aika a nora te rikirake ae moanibaan te raoiroi inanon 1999? (Nora te tiate ae mena n iteraniba 17 nakon 20 n Te Taua-n-Tantani n te taetae n Imatang ibukin Tianuare 1 2000.)
5 Ai ingainga ra nanoia ana tia Kakoaua Iehova ake a kaotioti n te ka 20 n tienture! Ao e ngae ngkai a rikirake kangaanga, ma e aki kerikaki ingaingan nanoia ngkai e a kaan n roko te ririki 2000. A bon nanona raoi ana tua Iesu ae kangai: “Kakiritiania botanaomata ni kabaneia.” (Mataio 28:19, 20) E a reke te mwaiti ae boou ibukia taan ua rongorongo ibukin te euangkerio inanon te kabanean ririki ni mwakuri n te ka 20 n tienture, ae 5,912,412. A kabanea mwaitin aia tai ae kamimi, ae 1,144,566,849 te aoa, ni maroro ma aomata tabemwaang iai ibukin te Atua ao ana kaantaninga. A okiokiria aomata aika a kan ongora n te mwaiti ae 420,047,796, ao a kairi reirei n te Baibara n aki kabooaki, ma aomata aika 4,433,884 mwaitiia. Ai raoiroira ingaingan nanoia ni mwamwakuri iai!
6. Tera te babaire ae boou ibukia bwaiania, ao e kanga aron butimwaeana?
6 N Tianuare are nako, te Rabwata n Tautaeka e katanoata te bitaki ni mwaitin aia aoa bwaiania. A mwaiti aomata aika a karekea aia tai iai n ira te mwakuri n regular ke n auxiliary bwaiania. N aron anne, inanon moan namwakainan te ririki ae 1999 aika aua, mwaangan te Totaieti n te Netherlands e ribootinna bwa e okioki mwaitiia aomata aika a karina araia ibukin karaoan te mwakuri n regular bwaiania, aua te tai, nakon te mwaiti are e a reke n te ririki are imwaina. E roko te rongorongo aei mai Ghana: “Man ngke e bitaki aia aoa bwaiania, e a tabe ni kekerake riki mwaitiia regular bwaiania.” Inanon te ririki ni mwakuri ae 1999, mwaitiia bwaiania ni katobibia te aonnaba e a roko n te mwaiti ae 738,343—ae te kaotioti ae kamimi ae kaota te nano ni “bati ni kani karaoi mwakuri aika raraoi.”—Tito 2:14.
7. E a kanga Iehova ni kakabwaia aia mwakuri korakora ana toro?
7 E a tia Iehova ni kakabwaia te mwakuri ae korakora aei? Eng. E kangai rinanon Itaia: “Kaeka matam n taratara nako, ao noria: a bane ni botaki, a nako im: a na roko natim mwaane man taabo ake a raroa, ao a na rarikinaki natim aine.” (Itaia 60:4) ‘Nati mwaane’ ao ‘nati aine’ aika kabiraki ake a a tia n ikotaki, a teimatoa ngkai ni beku iroun te Atua ma te ingainga n nano. Ao ngkai, ana tiibu tabemwaang Iesu a tabe n ikotaki nako rarikiia ‘nati mwaane’ ao ‘nati aine’ aika natin Iehova aika kabiraki, n aaba ao abamwakoro aika 234 mwaitiia.
“Makuri Aika Raraoi ni Bane”
8. Baikara “mwakuri aika raraoi” ake a tabe ni karaoi, Ana Tia Kakoaua Iehova?
8 Iai baeia Kristian ni kabaneia ibukin tataekinan te rongorongo ae raoiroi ibukin te Tautaeka n Uea, ao ibukin buokaia aomata aika a kan ongora, ao n riki bwa taani kakairi iroun Iesu. Ma a ‘kataeaki nangia nakoni mwakuri aika raraoi ni bane.’ (2 Timoteo 3:17) Mangaia are a kaota mwamwannanoia ma n tangiriia aia utu, a akoakoia iruwa, ao a kawaria aoraki. (1 Timoteo 5:8; Ebera 13:16) Ao taan ibuobuoki aika a aki kabooaki, a buoki mwakuri n aron katean Maneaba n Uea—ae te mwakuri naba ae e karaoa te kaotioti nakoia aomata. Ngke e kateaki te tabo ni botaki teuana i Togo, te mataniwi temanna n te Aro n tang teuana ae mena n te tabo anne, e tangiria n ataia bwa a kanga Ana Tia Kakoaua Iehova ni kona ni katea oin aia tabo ni botaki, ma aia ekaretia a riai ni kabooia taani kateitei ibukin katean aia tabo! E ribootinaki mai Togo bwa e rangi n raoiroi mwiin katean Maneaba n Uea aika raraoi, n te aro ae aomata tabeman a kataia ni kabooa aia auti n taabo aika ua kaan ma taabo ike a na kateaki Maneaba n Uea iai.
9. Tera are a karaoia Ana Tia Kakoaua Iehova ngkana iai kabuanibwai ake a rootii taabo tabeua?
9 N taai tabetai iai riki te aeka ni mwakuri ae raoiroi ae kainnanoaki. A mwaiti aaba n te ririki ni mwakuri are nako, ake a rekenako n taiani kabuanibwai, ao n taai aika mwaiti, boni kaain Ana Tia Kakoaua Iehova aika a moan roko iai ni karaoa te ibuobuoki. N aron anne, e bubura mwakoron te aba ae Honduras ae e kabuanibwai n te angibuaka are e aranaki bwa Hurricane Mitch. E waekoa mwaangan te Totaieti iai ni katei taian komete aika a na bairea aron waakinan te ibuobuoki. Taani Kakoaua i Honduras ao n aaba aika mwaiti a bwaintangirai taiani kunnikai, amwarake, bwainaoraki, ao bwaai tabeua riki aika a kainnanoaki ibukin te maiu. Taian Regional Building Committee a kabongana rabakauia ni manga katei auti aika a uruaki. E aki maan ao tarira ake a rootaki n te kabuanibwai anne a buokaki bwa a na manga okiri aroia ni maiu ae a tataneiai ni kakaraoi. I Ecuador, Ana Tia Kakoaua Iehova a buokia taria ngke a uruaki auti tabeua n te ieka ae korakora. Ngke e a tia ni mataku n raoiroin bairean aia mwakuri n ibuobuoki, e kangai ana taeka te bwakuaku n te tautaeka temanna: “A rangi ni bati bwaai aika raraoi ake N na kona ni karaoi, ngkana arona bwa I kona ni kamwakuria te koraki aikai! A riai n reke aomata n ai aromi n taabo nako n te aonnaba.” Mwakuri aika raraoi aikai a karekea kamoamoan Iehova ae te Atua, ao e kaota aron manenan riki “tangiran te Atua [iroura], nakoni bwaai ni kabane.”—1 Timoteo 4:8.
A “Kiba Mai n ai Aron te Nang”
10. E ngae ngkai e tabe ni uarereke riki mwaitiia taani kabiraki, ma bukin tera bwa e a korakora riki tataekinan aran Iehova n te tai aei, nakon are mai imwaina?
10 E titiraki ngkai Iehova: “Antai aikai aika kiba mai n ai aron te nang, ao n ai aroia naba taobe nakoni mataroani neia? A na boni kaantaningaai aba-makoro, ao a na roko moa kaibuken Taretiti, ba a na uotiia mai natim mai kiraroa . . . Ao ane a na katei am nono ianena, ao a na toro i roum aia uea.” (Itaia 60:8-10) A butimwaea moa ‘kaotiotakin mimitongin’ Iehova ‘natina aika mwaane’ aika Kristian aika kabiraki. Ao imwina, a roko naba “ianena”ae te koraki ae uanao, aika a kakaonimaki ni buokia taria aika kabiraki, ma ni kakairi irouia n tataekinan te rongorongo ae raoiroi. Mangaia are e ngae ngkai e tabe ni kerikaki mwaitiia taani kabiraki, ma e korakora riki n te tai aei, tataekinan aran Iehova ni katobibia te aonnaba.
11. (a) Tera ae teimatoa ni waaki nako ngkai, ao tera uaana inanon 1999? (b) Baikara aaba aika e korakora iai mwaitiia aomata ake a babetitoaki inanon 1999? (Nora te tiate n iteraniba 17 nakon 20 n Te Taua-n-Tantani n te taetae n Imatang ibukin Tianuare 1 2000.)
11 Ibukin anne, mirion ma mirion mwaitiia aomata ngkai a roko “n ai aroia naba taobe nakoni mataroani neia,” ni kakaea kamanoakiia inanon te ekaretia ni Kristian. Ngaa ma ngaa mwaitiia aomata aika a ikotaki ni katoa ririki, ao e a uki te mataroa ibukia aomata aika a mwaiti riki. E kangai Itaia: “Ao a na uki nako naba mataroam n te bong ae koraki; e na aki kainaki ni ngaina ao ni bong; ba a aonga n uoti nako im aia bwaikoraki botanaomata aomata.” (Itaia 60:11) N te ririki are nako, 323,439 mwaitiia aomata aika a babetitoaki ibukin kaotan tian katabuani maiuiia nakon Iehova, ao e a tuai naba ni kain te mataroa. A tabe n roroko iai “bwaai aika tatangiraki aika aia bwai botanaomata ni kabaneia,” ae taekan te koraki ae uanao. (Akai 2:7) Akea te aomata ae e kan kitana te ro ae e kanakoaki mai iai. (Ioane 12:46) A bia aki kabuaa tangiran te ota irouia, te koraki aikai!
Ninikoria ni Kaitara ma te Kairiribai
12. A kanga aomata aika a tangira te ro n tia ni kataia n tiringa te ota?
12 Akana a tangira te ro a riba ana ota Iehova. (Ioane 3:19) Tabeman a kataia n tiringa te ota anne. Tiaki te bwai ae e aki kaantaningaki aei. Bwa Iesu naba, are boni ngaia “te Oota ni koaua, are kaotaia aomata ni kabaneia,” e kakanikoaki, e riribaki, ao n tokina, e kamateaki irouia kaain abana. (Ioane 1:9) Inanon te ka 20 n tienture, a a tia naba Ana Tia Kakoaua Iehova ni kakanikoaki, ni karabutinaki, ni katabuaki aia mwakuri, ma ni kamateaki naba, ngkana a tabe ni kakaonimaki ni kaotiota ana ota Iehova. Inanon ririki aikai, taani kairiribai a moanna ni kabutii taiani kewe rinanon botaki ni kanakobwana, ibukia aomata aika a kaotiota ana ota te Atua. Tabeman a tangiria aomata bwa a na kakoaua bwa Ana Tia Kakoaua Iehova bon te katei n Aro ae kakamaaku, ae riai n tauaki ke ni katabuaki aia mwakuri. A a tia n tokanikai iai taani kairiribai aikai?
13. Tera uaan kaotan te koaua ibukin ara mwakuri nakoia botaki ni kanakobwana, n te aro ae riai?
13 A aki. Ngke e riai, Ana Tia Kakoaua Iehova a a tia naba ni kawari botaki ni kanakobwana ni kabwarabwarai raoi bwaai. Ibukin anne e a taabangaki boreetiakin aran Iehova n taian nuutibeba ao maekatin, ma ni katanoataki n te rerio ao te TV. Te waaki aei e a kariki uaa aika raraoi man tataekinan te rongorongo. N aron anne, i Denmark, te kaongora i aon te TV e maroroakina te boto n iango ae “Bukin tera bwa e tabe ni kerikaki aia onimaki kaain Denmark.” Irarikiia kaain Aaro tabeua, a maroroakinaki naba iai kaain Ana Tia Kakoaua Iehova. Imwina riki, te aine temanna are e nora te kaongora anne e kangai: “E rangi n teretere bwa antai ae e mena irouia taamnein te Atua.” E moanaki te reirei n te Baibara ma ngaia.
14. Tera te bwai ae a na kamaamaaeaki iai taani kairiribai ma ni kairoroaki bwa a na ataia?
14 A ataia Ana Tia Kakoaua Iehova bwa a na ribaaki irouia aomata aika mwaiti. (Ioane 17:14) E ngae n anne, ma a kakorakoraki n ana taetae ni burabeti Itaia: “A na nako im ni katorobubua natiia akana karawawatako rimoa; ao a na bane ni bobaraki i rarikin nanoni waem akana ribaiko rimoa; ao a na atongko ba Ana kawa Iehova, Ae ana Tion Atuaia Iteraera ae Tabu.” (Itaia 60:14) A na kamaamaaeaki taani kairiribai aikai, ni kairoroaki bwa a na ataia bwa a tabe ni kairiribai ma te Atua. Ao antai ae kona n tokanikai n te buaka anne?
15. A kanga Ana Tia Kakoaua Iehova ni “mamma rannimammaia botanaomata,” ao e a kanga ni kaotaki aei n aia mwakuri n anga reirei ao n tataekina te euangkerio?
15 E beritanna naba Iehova ni kangai: “N na karikiko ba te bwai ae moan te raoiroi ae akea tokina, . . . Ko na mamma rannimammaia botanaomata, ma ni mamma naba rannimammani banibania uea: ao ko na ataai ba bon am tia kamaiu Ngai ae Iehova.” (Itaia 60:15, 16) Eng, Iehova bon te tia Kamaiuia ana aomata. Ngkana a onimakinna raoi, a na teimatoa n “akea tokina.” Ao a na “mamma rannimammaia botanaomata,” n te aro ae a na kabonganai aia bwaai ibukin boutokoan te taromauri ae itiaki. N aron anne, kabonganan taian kombiuta ao rabakau aika boou ibukin te itoman n te aro ae riai, e buoka aron boreetiakin Te Taua-n-Tantani aika a tiiteboo kanoaia n tii teuana te tai, n taetae aika 121 mwaitiia, ao te Awake! n taetae aika 62. Iai te bwai ni mwakuri ae kamwakuraki i aon te kombiuta ae karaoaki ibukin buokan rairan te Baibara ae te New World Translation nakon taetae aika boou. Te rairai aei e karika te kimwareirei ae korakora. Ngke e kabutaki te rairai i aon te Baibara n Erene ni Kristian n te taetae ni Croatia n 1999, ngaa ma ngaa aomata aika a tangi ni kimwareirei iai. E kangai te tari-te-mwaane temanna ae e a kara: “I rangi ni maan n tataninga te Baibara aei. I a kona ngkai ni mate bwa e a rau nanou!” E a birirake mwaitin mwakoron te Baibara ae te New World Translation ke bokina ae tabwanin raoi ake a a tia ni kabutaki ngkai, nakon 100 tabun te mirion, n taetae aika 34 mwaitiia.
Kaetieti Ibukin te Aroaro ni Maiu ae Riai
16, 17. (a) E ngae ngkai e kangaanga karaoana, ma bukin tera bwa moan te kakawaki bwa ti na kawakina ana kaetieti Iehova ibukin te maiu ae riai? (b) Tera te rongorongo ae kaotia bwa kaain te roro-n-rikirake a kona n rawa ni kabarekaki irouia kaain te aonnaba?
16 E kangai Iesu: “Ane kakaraoa ae buakaka ao e ribaa te oota.” (Ioane 3:20) Ma n te itera teuana, akana a teimatoa ni mena inanon te ota, a tangiri ana kaetieti Iehova ibukin te aroaro ni maiu ae riai. E kangai Iehova rinanon Itaia: “A na bane naba n raoiroi am aomata.” (Itaia 60:21a) E kona ni kangaanga kawakinan kaetieti ibukin te maiu ae riai, ibuakon te aonnaba are e a taabangaki iai te wene ni bure, te kewekewe, te matai ni kanibwaibwai, ao te kainikatonga. N aron anne, e rikirake riki kaubwaia aaba tabeua, ao e kai anaaki nanon te aomata ni kaean te kaubwai. Ma e reirei ni kangai Bauro: “Ma akana kani bwaibwai a bwaka n te kaririaki ma te ao-ni-katatai ma taiani kaibabaru aika bati aika nanobaba aika kamaraki, aika kaiinakoia aomata n te tiringaki ma te kamateaki.” (1 Timoteo 6:9) Ai kananokawaki ra ngkana te aomata temanna e rangi n tabetabe ni waakina ana bitineti, n te aro ae e kaakea bongan bwaai aika kakawaki riki, n aron te iraorao ma Kristian, te beku ibukin te Atua, kaetieti ibukin te aroaro ni maiu ae riai, ao tabena ibukin ana utu!
17 E kona ni kangaanga riki kawakinan kaetieti aika riai irouia kaain te roro-n-rikirake, kioina ngkai a mwaiti ataei aika a irekereke ma kabonganakin drug n te aro ae aki riai, ao te wene ni bure. I Suriname, te ataeinaine ae 14 ana ririki ni maiu e kawaraki n ana kuura n reirei iroun te ataeinimwaane ae bobotonimwaane ae raona n reirei ae e tuanga bwa a na wene ni bure. E rawa iai neierei, ao e kabwarabwara bwa te Baibara e katabui bwaai aikai itinanikun te mare. Ataeinaine tabeman n te kuura anne a kakanikoa neierei, ao a kataia ni kairoroia bwa e na bita ana iango, ngke a taekinna bwa aomata ni kabaneia a kan wene ni bure ma teuarei. Ma e matoatoa nanon te ataeinaine arei n ana koaua. Tabeua te wiiki imwin anne, e kuneaki iroun te ataeinimwaane arei manin te aoraki ae te HIV, ao e a bwaka n rangi n aoraki. E kukurei te ataeinaine arei ngke e ongeaba n ana tua Iehova ae ‘rarawa nakon te wene ni bure.’ (Mwakuri 15:28, 29) A kukurei Ana Tia Kakoaua Iehova ni kamoamoa taekaia kaain te roro-n-rikirake aika a mena ibuakoia, aika a teimatoa ibukin te eti. Aia onimaki, ao aia onimaki tamaia ao tinaia, e ‘neboa’—ke e karinea—aran Iehova ae te Atua.—Itaia 60:21b.
E A Uota te Rikirake Iehova
18. (a) Tera te bwai ae kakannato ae e a tia ni karaoia ibukia ana aomata Iehova? (b) Baikara bwaai aika a kakoaua bwa e na teimatoa te rikirake, ao tera te kaantaninga ae moanibaan te raoiroi ae mena imwaia aomata aika a teimatoa ni mena inanon te ota?
18 Eng, Iehova e kaootaia ana aomata, e kakabwaiaiia, e kairiia, ao e kakorakoraiia. A a tia n nora kakoroan bukin ana taeka Itaia aikai, inanon te ka 20 n tienture: “Ane e na riki ba tenga temanna ae uarereke, ao temanna ae karako e na riki ba te botanaomata ae korakora: N na barekia ni bongina Ngai ae Iehova.” (Itaia 60:22) Man te koraki ae e karako mwaitiia n 1919, e a rikirake n rake riki nako “tenga, temanna ae uarereke.” Ao e tuai n toki te rikirake anne! N te ririki are nako, 14,088,751 mwaitiia aomata ake a kaea te Kauring ibukin maten Iesu. A mwaiti ibuakoia aika tiaki taani Kakoaua aika mwamwakuri. Ti kukurei ngke a kaea te kauring ae kakawaki aei, ao ti kaungai nanoia bwa a na teimatoa ni kaania riki te ota. E korakora te oota are e teimatoa ni kaootaia aomata iai Iehova. E uki naba ngkai te mataroa nakon ana botaki. A bia kamatoa nanoia bwa a na memena n ana oota Iehova aomata ni kabaneia. Ai raoiroi ra kakabwaia aika a reke mai iai ngkai! Ao ai korakora ra te kimwareirei ae na reke mai iai nakon taai aika imwaira, ngkana a na bane bwaai aika karikaki ni karaoiroa Iehova ma ni kakatonga ni mimitongina ae korakora!—Te Kaotioti 5:13, 14.
Ko Kona ni Kabwarabwara?
• Antai aika a kaotiota mimitongin Iehova inanon boong aika kaitira aikai?
• Tera ae kaotia bwa e tuai ni kerikaki ingaingan nanoia ana aomata Iehova?
• Baikara mwakuri aika raraoi tabeua aika a tabe ni kakaraoi Ana Tia Kakoaua Iehova?
• E ngae ngkai e korakora te kairiribai, ma tera te bwai ae ti t
[Taamnei n te iteraniba 16]
Ti kukurei bwa Iehova e a teimatoa ni kauka te mataroa nakoia aomata aika a tangira te ota
[Taamnei n te iteraniba 16]
A teimatoa aomata m roroko nakom ana botaki Iehova