“Ukoukora Iehova Ao Korakorana”

“Ba a biribiri matan Iehova ni kabuta aonaba ni kabane, ba E na kaotia ba E korakora i bukiia akana a moa n eti nanoia nako Ina.”​—2 RONGORONGO 16:9.

1. Tera te mwaaka, ao tera aron kabonganana irouia aomata?

TE MWAAKA e kona n nanoni bwaai aika mwaiti, n aron te mwaaka n tautaeka ae mena iroun te aomata, ke te konaa ni kairia aomata; te kona ni karaoi bwaai tabeua ke ni kamwakura te bwai teuana; te korakora n te itera n rabwata. E aki raoiroi rongorongoia aomata ni kaineti ma kabonganan te mwaaka. Lord Acton, ae te tia koroi rongorongon te aonnaba, e taekina ae kangai ni kaineti ma aroia taan tautaeka ni kabongana te mwaaka: “E kabuakaka [te aomata] te mwaaka, ao te mwaaka ae tabwanin raoi e kabuakaka [aron te aomata] ni kabane.” Rongorongon te aonnaba ae ngkai e onrake ni katoto aika a kaota koauan ana taeka Lord Acton. Inanon te ka 20 n tienture, a a tia aomata ‘n taua aroia aomata . . . ni karekea oini kaiia iai,’ n te aro ae korakora riki nakon ae mai imwaina. (Te Minita 8:9) Taan tautaeka aika babakanikawai a a tia ni kabongana mwaakaia n te aro ae rangi n riao, ao a kamateia aomata aika mirion ma mirion mwaitiia. E bon rangi ni karuanikai te mwaaka ae aki tauaki arona n te tangira, te wanawana, ao te kaeti taeka ae riai.

2. Kabwarabwara bwa e a kanga n reitaki kabonganan te mwaaka iroun Iehova, ma aroarona riki tabeua.

² N tiaki aroia aomata aika mwaiti, te Atua e aki toki ni kabongana mwaakana ibukin karaoan ae raoiroi. “Ba a biribiri matan Iehova ni kabuta aonaba ni kabane, ba E na kaotia ba E korakora i bukiia akana a moa n eti nanoia nako Ina.” (2 Rongorongo 16:9) Iehova e bairea raoi aron kabonganan mwaakana. Te taotaonaki n nano, e taua aron karokoan ana motikitaeka te Atua i aoia aomata aika buakaka, bwa e aonga n reke aia tai n raraoma ma n rairaki. Te tangira e kairia bwa e na kaoota taai i aoia aomata n aekaia nako—akana a raoiroi ao akana a aki raoiroi. N tokina, te kaeti taeka ae riai e na kairia bwa e na kabongana mwaakana ae akea tiana ni kamauna iai teuare iai irouna te mwaaka ni kona ni kamateia aomata, are Tatan te Riaboro.​—Mataio 5:44, 45; Ebera 2:14; 2 Betero 3:9.

3. Bukin tera bwa ti riai n onimakina te Atua ngkai moan te mwaaka ngaia?

³ Mwaakan Tamara are i karawa ae kamimi, boni ngaia bukina ae ti na onimakina ana berita ao korakorana ni kona ni kamanoira. E namakina mweeraoina te tei ae uarereke ae mena ibuakoia aomata ake e aki kinaia, ngkana e taua bain tamana, kioina ngke e ataia bwa tamana e na aki kariaia karaoan ae buakaka nakoina. N aron anne, Tamara are i karawa, ae e “mwaka ni kamaiua te aba,” e na kamanoira man te kabuanibwai ae e na teimatoa n aki toki ngkana ti nakonako ma ngaia. (Itaia 63:1; Mika 6:8) Ao kioina ngkai te Tama ae raoiroi ngaia, Iehova e aki toki ni kakoroa bukin ana berita. Mwaakana ae akea tiana e kakoaua bwa ‘ana taeka e na reke konana n are e kanakoa nako iai.’​—Itaia 55:11; Tito 1:2.

4, 5. (a) Tera ae riki ngke te Uea ae Ata e onimakina raoi Iehova? (b) Tera ae kona n riki ngkana ti onimakina te ibuobuoki mairouia aomata bwa a na katoki ara kangaanga?

⁴ Bukin tera ngkai moan te kakawaki ae ti na kamatoai nanora bwa ti na aki mwaninga taekan aron Tamara are i karawa ni kona ni kamanoira? Ibukina bwa ti kona n taonaki n taiani bwai aika a riki, ma ni mwaninga nako n aron ara tabo ni mweeraoi ni koaua. E noraki aei n ana katoto te Uea ae Ata, are te mwaane are e tataneiai ni mwiokoa Iehova. Inanon ana tai n Uea Ata, aia taanga ni buaka kaain Itiobia ae kaainaki irouia tautia aika teuana te mirion mwaitiia, e a roko ni buakana Iuta. Ata e ataia bwa a korakora riki aia taanga ni buaka aiana, mangaia are e tataro ni kangai: “Iehova, akea temanna n ai arom ni buobuoka te aba, i marenan ae korakora ma ae akea korakorana: Iehova ae Atuara, Ko na buokira; ba ti onimakiniko, ao ti a roko n eka nako te koraki ae bati aei n aram, Iehova, bon Atuara Ngkoe; e na aki kataea am kai te aomata.” (2 Rongorongo 14:11) E kariaia ana bubutii Ata Iehova, ao e angana te tokanikai ae korakora.

⁵ Ma ngke e a tia ni kakaonimaki ni bebeku inanon ririki aika mwaiti, e a manga nanououa Ata n aron mwaakan Iehova ni kakamaiu. Ibukin totokoan buakanakia iroun ana taanga ni buaka te tautaeka n uea are i Iteraera meang, e a manga bubutii buokana mairoun Turia. (2 Rongorongo 16:1-3) E ngae ngke e kamanoaki Iuta mairoun Iteraera n te mwane ni kamaraato are e anga Ata nakon Uean Turia ae Ben-atata, ma ana boraraoi Ata ma Turia e kaota aki onimakinan Iehova irouna. Te burabeti are Anani e kaitaraa n titirakinna ni kangai: “Tiaki te taanga ae ababaki I-Itiobia ma taian Rubim, ma kaa-ni-buaka ma taan toka i aoia aoti aika maiti kurikuri? ma ngke ko onimakina Iehova, ao E anga ngaiia nako nanoni baim?” (2 Rongorongo 16:7, 8) E ngae n anne, ma e rawa ni butimwaea boaakina anne Ata. (2 Rongorongo 16:9-12) Ngkana ti kaitaraki ma kangaanga tabeua, ti bia aki onimakina aia ibuobuoki aomata. Ma ti na kaotiota onimakinan te Atua iroura, bwa n tokina, ti na maneang ngkana ti onimakinia aomata.​—Taian Areru 146:3-5.

Kakaea te Mwaaka ae E Angangan te Aba Iehova

6. Bukin tera ngkai ti riai n “ukoukora Iehova ma korakorana”?

⁶ Iehova e kona ni kakamwaakaia ana toro, ao e kona naba ni kamanoiia. Te Baibara e kaungaira bwa ti na “ukoukora Iehova ma korakorana.” (Taian Areru 105:4) Bukin tera? Ibukina bwa ngkana ti karaoi bwaai ni korakoran te Atua, mwaakara anne e na kabonganaki n te aro ae e na karika te kakabwaia, ao tiaki te kabuanibwai, nakoia aomata. Bon akea te katoto ae raoiroi riki n aron aei nakon ana katoto Iesu Kristo, are e karaoi kakai aika bati ni “mwakan te Atua.” (Ruka 5:17) Iesu e kona ni kabongana maiuna bwa e aonga n riki ni kaubwai, n tanoata taekana, ke te uea ae moan te mwaaka. (Ruka 4:5-7) E aki karaoa anne, ma e kabongana te mwaaka are e anganaki mairoun te Atua ni kataneiaia aomata ao n reireinia, ni buokia, ao ni kamaiuia man aorakiia. (Mareko 7:37; Ioane 7:46) Ai raoiroi ra te katoto aei nakoira!

7. Tera te aroaro ae kakawaki ae ti karikirakea inanora ngkana ti karaoi bwaai ni korakoran te Atua, ao ti aki onimakina oin korakorara?

⁷ Irarikin anne, ngkana ti karaoi bwaai n ‘te konaa ae e anganira te Atua,’ ti na buokaki iai bwa ti na kananorinanoira. (1 Betero 4:11) Aomata aika a kakaea te mwaaka ibon ibukiia a rikirake ni kainikatonga. Te katoto n aron anne bon te Uea n Aturia ae Etara-aton are e kamoamoa ni kangai: “I mwaaka ngai, moan te maaka ngai, . . . te toa n aomata ngai.” Ni kaitara ma anne, Iehova e “rinei bwain aon te aba aika mamara . . . ba E na kamaamai baika korakora.” Mangaia are ngkana e kamoamoa te Kristian ni koaua, ao e riai ni kamoamoa iroun Iehova, bwa e ataia bwa bwaai ake e karaoia a aki karaoaki n oin korakorana. ‘Kananorinanoira i aani bain te Atua’ e na karika te karietataki ni koaua.​—1 I-Korinto 1:26-31; 1 Betero 5:6.

8. Tera te moan bwai ae ti riai ni karaoia ngkana ti tangira karekean te mwaaka mairoun Iehova?

⁸ Ti na kanga ni kona ni karekea te korakora mairoun te Atua? Te moani bwai, ti riai ni bubutii rekena iroura, n te tataro. Iesu e kakoaua nakoia taan rimwina bwa Tamana e na anga te taamnei ae raoiroi nakoia aomata aika a bubutii rekena irouia. (Ruka 11:10-13) Iangoia bwa a kanga ni kakorakoraki iai taan rimwin Kristo ngke a rineia bwa a na ira riki nanon te Atua nakon iran nanoia mataniwi n Aro ake a tuangia bwa a na aki manga kaotioti ibukin Iesu. Ngke a tataro ni bubutii reken te ibuobuoki mairoun Iehova, ao e kaekaki aia tataro ae nako man nanoia ni koaua arei, ao te taamnei ae raoiroi e kakorakoraia bwa a na teimatoa n tataekina te euangkerio n aki mamaaku.​—Mwakuri 4:19, 20, 29-31, 33.

9. Taekina te kauoua ni bwai ae e kona n reke mai iai te kakorakoraki n taamnei, ao taekina te katoto man te Baibara ae kaota aron manenan anne.

⁹ Te kauoua, ti kona ni karekea korakorara n taamnei man te Baibara. (Ebera 4:12) E noraki mwiin mwaakan ana taeka te Atua n ana bong te Uea ae Iotia. E ngae ngkai uean Iuta aei e a tia ni kamaunai bouannanti man te aba, ma ngke e karina ni kuneaki ana Tua Iehova n te tembora, e a kairaki nanona iai bwa e na kakorakora riki ana waaki ni kaitiaka te aba.a Imwin warekan te Tua nakoia aomata iroun Iotia, te botannaomata ae bwanin arei e karaoa te berita ma Iehova, ao e a manga waakinaki te waaki-kaua ae korakora riki iai kamaunan taromaurian bouannanti man te aba. Ana waaki ae raoiroi Iotia e nakoraoi, bwa “a kabane ana bong n aki kitana iran nanon Iehova.”​—2 Rongorongo 34:33.

10. Tera te katenua n aro ae ti kona ni karekea te korakora mairoun Iehova iai, ao bukin tera bwa moan te kakawaki te aro anne?

¹⁰ Te katenua, ti kona ni kakorakoraki iroun Iehova rinanon te iraorao ma Kristian. Bauro e kaungai nanoia Kristian bwa a na kaei botaki ni katoa tai, bwa a aonga ni “karika te tangira ma makuri aika raraoi” ao te uaia ni kaunganano imarenara. (Ebera 10:24, 25) Ngke e kainaaomataki Betero man te karabuti n te kakai, ao e tangiria n iraorao ma tarina, mangaia are e a nakon ana auti tinan Ioane Mareko, ike “a botaki n tataro iai aomata aika bati.” (Mwakuri 12:12) Te koaua bwa a kona ngaia n tatabemaniia nako n tiku n oin aia auti n tatataro. Ma a rineia bwa a na botaki n tatataro ma ni kaungai nanoia imarenaia inanon tain te kangaanga arei. Ngke Bauro e a kaan n roko n tokin mwanangana nako Rom are rangi n ananau ma ni karuanikai, e botaki ma taari tabeman i Buteori, ao imwina riki e kaitiboo ma te korakina ake a mwananga ni butimwaia. Tera ana kaantaninga iai? “Ngke e noriia [ake a mwananga ni butimwaia], ao e katituaraoa te Atua, ao e kabebetea nanona.” (Mwakuri 28:13-15) E kakorakoraki ngke e manga iraorao ma raoraona ni Kristian. Ti a kakorakoraki naba n te iraorao ma raoraora ni Kristian. Ngkana iai iroura te inaaomata ao te kona n iraorao imarenara ao, ti aki riai ni kataia n nakonako n tii ngaira i aon te kawai ae wariki ae nakon te maiu.​—Taeka N Rabakau 18:1; Mataio 7:14.

11. Taekin taai tabeua are e kainnanoaki riki iai “te mwaka ae moan te korakora.”

¹¹ Rinanon te tataro ni katoa tai, te reirei n ana Taeka te Atua, ao te iraorao ma raoraora n onimaki, ti na “korakora iroun te Uea, ao ni korakorani mwakana.” (I-Ebeto 6:10) Akea te nanououa bwa ti bane ni kainnanoa “te korakora iroun te Uea.” Tabeman a ituaki n aoraki aika korakora, tabeman riki a rootaki ni kangaangan te kara ke ni maten raoia ni mare. (Taian Areru 41:3) Tabeman riki a bainikirinaki irouia buia ae tiaki kaain te onimaki. Kaaro, ao e moamoa riki kaaro aika akea raoia ni mare a kona n namakina te nimamate ngke a mwakuri ni kamaiuia aia utu ma ni kaikawaia natiia. Kristian aika ataei riki a kainnanoa te kakorakoraki bwa a aonga ni kaitara ma te kaririaki irouia raoraoia bwa a aonga n rawa nakon te mamanging ao te wene ni bure. Akea te aomata ae riai ni wimakiiki ni butiia Iehova bwa e na anganna te “mwaka ae moan te korakora” ae na buokia n nanomwaaka i aon kangaanga aikai.​—2 I-Korinto 4:7.

“E Angangania Akana Nimamate te Kona”

12. Tera aron Iehova ni kateimatoaira n te mwakuri ni minita ni Kristian?

¹² Irarikin anne, Iehova e angania ana toro te korakora ngkana a kakaraoa aia mwakuri ni minita. Ti wareka ae kangai n ana taeka ni burabeti Itaia: “E angangania akana nimamate te kona; ao E kabatiai korakoraia akana aki konamaki. . . . ma e na manga reke te korakora irouia akana kaantaninga Iehova; a na mwemwe rake ni baiia ni kiba n ai aroia ikare; a na biribiri, ao a na aki kua; a na nakonako, ao a na aki nimamate.” (Itaia 40:29-31) Te abotoro Bauro e karekea te mwaaka ae buokia ni kakoroa bukin ana mwakuri ni minita. E uaana ana mwakuri ni minita iai. E korea ae kangai nakoia Kristian ake i Tetaronike: “E aki roko ara euangkerio i roumi n ti te taetae, ma e roko naba n te mwaka, ao iroun te Tamnei are Raoiroi.” (1 I-Tetaronike 1:5) Tataekinan te rongorongo ao te anga reirei irouna e mwaaka ni kona ni karika te bitaki ae korakora inanoni maiuia aomata ake a ongora irouna.

13. Tera ae kakorakora Ieremia bwa e na botumwaaka i aan te kairiribai?

¹³ Ngkana ti kaitara ma aomata aika a aki tabe ma te rongorongo, aika a mena n ara tabo—ae te tabo ae tao ti a bati n okioki ni mwamwakuri iai n aki bati n uaa ara mwakuri—ao a kona ni bwara nanora iai. E namakina te bwara n nano naba Ieremia ibukin te kairiribai, te kakaniko, ao te aki kani bwerengaki ae e kaitara ma ngaia. “N na aki manga taekinna [te Atua], ma n aki manga taetae n arana,” e taku ibon irouna. Ma e aki kona ni kainababu. Ana rongorongo e a riki bwa kaanga “te ai ae ura ae kainaki i nanon [rina].” (Ieremia 20:9) Tera ae kamwaakareireia bwa e na kaitara ma te kairiribai ae korakora? “E memena Iehova i rou n ai aron temanna ae korakora ae kakamaku,” e taku Ieremia. (Ieremia 20:11) Ataakin kakawakin ana rongorongo ao mwiokoana ae reke mairoun te Atua, e kaira Ieremia bwa e na butimwaea kaungan nanona iroun Iehova.

Te Mwaaka ni Kakammaraki ao te Mwaaka ni Kakamaiu

14. (a) Tera aron mwaakan te newe? (b) Taekin katoto tabeua aika a kaota aron te urubwai ae kona ni karikaki iroun te newe.

¹⁴ Tiaki nanona bwa te mwaaka ni kabane ae mena iroura e a roko mairoun te Atua. N te katoto teuana, iai mwaakan te newe ni kona ni kakammaraki, ma e kona naba ni kakamaiu. “A mena te mate ma te maiu ni mwakan te newe,” e reirei Toromon. (Taeka N Rabakau 18:21) Mwin ana maroro ae kimototo Tatan ma Nei Ewa e kaota aron korakoran te kabuanibwai ae kona ni karikaki n te taetae nikawai. (Karikani Bwaai 3:1-5; Iakobo 3:5) Ngaira naba ti kona ni kariki kabuanibwai aika korakora n newera. Taeka aika kabuakaka marikan te ataeinaine temanna e kona ni kairia bwa e na taonaki n te aoraki ae te anorexia. Manga atongan te taeka ae uarao n akea te iango moa e kona n urua te iraorao ae maan taina. Eng, e riai n tauaki aron te newe.

15. Ti na kanga ni kona ni kabongana newera ni kateimatoa ma ni kamaiuia aomata?

¹⁵ Ma te newe e kona ni kateimatoa ao e kona n urubwai naba. E kangai te taeka n rabakau n te Baibara: “Bon iai ane barantiko n ai aron ewaran te aba n te kabaang: Ma bon te mauri neweia akana wanawana.” (Taeka N Rabakau 12:18) Kristian aika wanawana a kabongana mwaakan te newe ni kabebetea nanoia aomata aika rawawata ke aika e a mate raoraoia ae tangiraki. Taeka aika kaota te atataiaomata a kona ni kaungai nanoia kaain te roro-n-rikirake ake a tabe ni buakana kaririakiia irouia raoraoia. Te newe ae wanawana e kona ni manga kakoaua nakoia taari-mwaane ao taari-aine aika kara bwa a boni kainnanoaki ma n tangiraki. Taeka aika akoi a kona ni kabebetea nanoia aomata aika aoraki. Ao ae kakawaki riki, ti kona ni kabongana newera n tataekina te rongorongo ae mwaaka ae taekan te Tautaeka n Uea nakoia aomata ni kabane ake a na ongora. Bon iai iroura te kona n tataekina ana Taeka te Atua, ngkana ti nano iai. E kangai te Baibara: “Tai taua te bwai ae raoiroi mairouia akana e riai anganakiia, Ngkana e kona baim ni karaoia.”​—Taeka N Rabakau 3:27.

Te Aro ae E Riai ni Kabonganaki te Mwaaka iai

16, 17. Ngkana a kabongana mwaakaia ake a anganaki iroun te Atua, a kanga unimwaane, kaaro, bu-mwaane ao bu-aine ni kona ni katotonga Iehova iai?

¹⁶ E ngae ngkai moan te mwaaka Iehova, ma e tautaekana te ekaretia n te tangira. (1 Ioane 4:8) A katotonga arona anne mataniwi ni Kristian aika a mwamwannanoa ana nanai te Atua n te tangira—ni kabongana mwaakaia n te aro ae raoiroi ao tiaki n te aro ae aki riai. Te koaua bwa n taai tabetai mataniwi a riai ni “kaeta, boaiia, ao kaungaiia” aomata, ma a riai ni karaoaki bwaai aikai “ma te taotaonannano n tai nako, ao te nano ni kan reireinia.” (2 Timoteo 4:2, BK) Mangaia are unimwaane a aki toki n iaiangoi ana taeka te abotoro Betero ake e koroi nakoia aomata aika a mwaaka n te ekaretia: “Kawakina te nanai ae e muiokoaki iroumi, ma te nano ni kukurei n ai aron nanon te Atua, ao tiaki i bukin te tebonaki; karaoia i bukin te nano ni kani ibuobuoki, ao tiaki i bukin te karekearo. Tai karawawata ami tautaeka i aoia akana kam muiokoaki ba kam na kawakinia, ma kam na anga te kakairi ae e raoiroi nakon te nanai.”​—1 Betero 5:2, 3, BK; 1 I-Tetaronike 2:7, 8.

¹⁷ Kaaro ao bu-mwaane a mwiokoaki naba n te mwaaka mairoun Iehova, ao te mwaaka aei e riai ni kabonganaki ibukin buokaia, karikirakeaia, ao kawakinaia aomata. (I-Ebeto 5:22, 28-30; 6:4) Ana katoto Iesu e kaotia bwa e kona ni kabonganaki te mwaaka n te aro n tangira. Ngkana e raoiroi aron waakinan te reirei ma te katuaeakaki, a aki kona ni bwara nanoia ataei. (I-Korote 3:21) A kakorakoraki riki aia mare taanga ngkana bu-mwaane aika Kristian a waakina mwaakaia n tautaeka n te aro n tangira, ao aine a rangi ni karinea atuia ae buia, ao a aki kataia n riaon ana babaire te Atua ibukin te mwaaka are a anganaki, ma ni kataia n toka i aoni buia ke n tangiria bwa e na iraki nanoia n taai nako.​—I-Ebeto 5:28, 33; 1 Betero 3:7.

18. (a) Ti na kanga ni kona ni katotonga Iehova n aron taotaonakin nanora nakon te un? (b) Aomata ake iai te mwiokoaki irouia, a riai ni karikirakea tera inanoia aomata ake a mwiokoaki bwa a na tararuaia?

¹⁸ Akana iai te mwaaka irouia n te utu ao n te ekaretia a riai n tarataraia raoi bwa a na taona unia, kioina ngkai te un e aki kona ni karika te tangira, ma e karika te maaku. E kangai te burabeti are Naum: “E iremwe n un Iehova, ao e korakora mwakana.” (Naum 1:3; I-Korote 3:19) Te kona n taona nanora nakon te un e kaota aron korakoran te aomata, ma iran nanon una e kaota mamaarana. (Taeka N Rabakau 16:32) E riai n uaiakinaki karikirakean tangiran Iehova, tangiraia aomata, ao tangiran reirei aika raraoi—inanon te utu ao inanon te ekaretia naba. Te tangira bon te bwai ni kabaebae ae korakora riki, ao te bwai ae korakora riki ae kairia aomata bwa a na maiuakina te raoiroi.​—1 I-Korinto 13:8, 13; I-Korote 3:14.

19. Tera te taeka ni karau nano ae taekinaki iroun Iehova, ao tera arora ae ti riai ni karaoia iai?

¹⁹ Ataakin Iehova e nanona naba ataakin mwaakana. E kangai Iehova rinanon Itaia: “Ko aki ataia? ko aki ongo? E aki nimamate te Atua ae akea tokina, ae Iehova, ae te tia Karaoi tabon aonaba, ao E aki kua naba.” (Itaia 40:30) Akea tian mwaakan Iehova. E na aki kitanira ngkana ti onimakinna ao ti aki tii onimakinira ibon iroura. E kamataata ae kangai nakoira: “Ko na tai maku, ba I mena i roum; tai kuba, ba bon Atuam Ngai: N na kakorakorako; ao N na buokiko naba; eng, N na kateimatoako n angaatain au raoiroi.” (Itaia 41:8) Tera arora ae riai ngkai e mwamwannanoira ma te tangira? N ai aron Iesu, ti bia kabongana mwaakara ae ti anganaki iroun Iehova ni buokia ao ni kateimatoaia aomata iai. Ti bia taua aron newera n te aro ae e na kakamaiuia aomata, ao tiaki ni kakammarakia. Ao ti bia teimatoa ni kamarurungira n te aro n taamnei, n nene raoi n te onimaki, ma ni kakorakoraki riki ni mwaakan ara tia Karikiriki ae Kakannato ae Iehova ae te Atua.​—1 I-Korinto 16:13.

[Kabwarabwara ae nano]

Ko Kona ni Kabwarabwara?

• Tera aron Iehova ni kabongana mwaakana?

• Tera aaro tabeua aika ti kona iai ni karekea iroura te mwaaka mairoun Iehova?

• Tera te aro ae e riai ni kabonganaki mwaakan te newe iai?

• E na kanga te mwiokoaki iroun te Atua ni kona n riki bwa te kakabwaia?

[Taamnei n iteraniba 15]

Iesu e kabongana te mwaaka mairoun Iehova ibukin buokaia aomata

[Taamnei n iteraniba 19]

Bon iai iroura te kona n tataekina ana Taeka te Atua ngkana ti nano iai