Aia Ribooti Taan Ua Rongorongo Ibukin Te Tautaeka N Uea

Tebokan Koraan te Koaua i Chile

N REREUAN Chile meang, e kona n aki bwaka te karau inanon ririki aika mwaiti. Ma ngkana e a boni bwaka te karau, ao te tano are mauteretere ma ni kiriatibu arei e a manga onikaki nakon te tano ae rabunaki n taiani bwariko n uee aika kirimatamata. Taan neweaba man taabo nako n te aba arei a katikaki nanoia ni kan mataku n te bwai ae kamimi aei.

Ma iai te bwai ae kamimi ae kakannongora riki ae e tabe n riki ngkai ibuakoia kaain Chile. Ranin te koaua man te Baibara e tabe n raanga nako tabon te aba anne ni kabane, ao a mwaiti aomata aika raoiroi aika a taraa n “uee,” ma n riki bwa taan rimwin Iesu Kristo. Te anga teuana ae kabonganaki ibukin kabutan ranin te koaua bon rinanon te tarebon. Rongorongo aikai a kaotii uaa aika raraoi ake a reke man tataekinan te rongorongo n te aro aei.

• Te bwaiania temanna ae arana Nei Karina e butiaki bwa e na karaoa te kaotioti n te runga n aono, ae na kaota aron tataekinan te rongorongo rinanon te tarebon. Ma Nei Karina, e tuai ma ni karaoa te aekaki ni mwakuri anne mai imwaina. Ibukin kaungaan nanona bwa e na karaoa te kaotioti anne n te runga, te unimwaane temanna ma buuna a manga maroro ma Nei Karina, ni kaotii reirei tabeua n aron tataekinan te rongorongo rinanon te tarebon. A kaunga naba nanona bwa e na tataro ni bubutii buokana mairoun Iehova iai. E karaoa anne, ao n tokina e iangoia bwa e na kataia ni kabongana te tarebon.

Nei Karina e rinea nambwan te tarebon teuana are e mena n te kaawa teuana ae e uakaan ma ngaia. E a kaekaaki iroun te tia kaeka te tarebon, ao maikanne are e a reke iai kabwarabwaran bukin ana tarebon Nei Karina. E butimwaea te rongorongo te tia kaeka te tarebon, ao a baireia bwa a na manga taetae imwin tenibong. Manga okiran te aomata anne rinanon te tarebon e karekea uaana ae te reirei n te Baibara are e kabonganaki iai te boki ae Tera ae E Tangiria Mairoura te Atua? Mai imwin anne, a nakoraoi aia reirei ao a kakannongora, ao Nei Karina e a tia ni kanakoi booki tabeua nakon neierei ake a na kaekai ana titiraki.

• Nei Bernarda e kareke tai ni kaotioti nakon te mwaane are e kairua n orea nambwan ana tarebon. E aki un iai Nei Bernarda, ma e kaotia bwa boni ngaia kaain Ana Tia Kakoaua Iehova, ao e anga nanona bwa e kukurei n ibuobuoki. E a reke te maroro iai, ao e kakauongo te mwaane arei ngke e kabwarabwara neiei bwa e na kanga ana Tautaeka n Uea te Atua ni katoka te ribuaka n te tai ae e a kaan rokona ngkai. Te mwaane arei e angan Nei Bernarda nambwan ana tarebon, ao e manga tataetae neierei ma teuaei rinanon te tarebon. Ngke a manga maroro n te taina, e wareka nakoina te mwakoro teuana man te boki ae te Knowledge That Leads to Everlasting Life. E kan ataia teuaei bwa e na kanga ni karekea oin ana boki, ao Nei Bernarda e kanakoa ana boki teuana n ikotaki ma te Baibara nakoina. E baireaki kawaran teuarei iroun te tari-te-mwaane ae uakaan ma ngaia, ao are e a tabe ngkai te tari aei n “teboka” te “aroka” ae e tabe n rikirake aei.

Eng, ibuakon tanon te aonnaba ae e aki tangiri bwaai n taamnei aei bon iai koraa aika a raba, ao a kai rikirake ngkana a kawaraki n anganaki ranin te koaua ae kakamaiu. Ngaa ma ngaa mwaitiia aomata aika taka aika a “rikirake” ma n “uee,” ao n riki bwa taani beku iroun Iehova ae te Atua aika kakaonimaki.​—Itaia 44:3, 4.