Antai Ana Minita Te Atua Ni Boong Aikai?
“Ara konabai boni mairoun te Atua. Bon te Atua ae e anganira te kona n riki ba [minita] n te Berita ae e Bou.”—2 I-KORINTO 3:5, 6, BK.
1, 2. Tera tabeia Kristian ni kabane ake a maiu n te moan tienture, ao tera te bitaki are e a riki iai?
N TE MOAN tienture C.E., Kristian ni kabane a buokanibwai ni karaoan te uota ae kakawaki—ae baeia ibukin tataekinan te euangkerio. A bane ni kabiraki, ao a riki bwa minita ibukin te berita ae boou. Tabeman mai buakoia a mwiokoaki ni bwaai tabeua riki irarikin tabeia anne, n aron te anga reirei inanon te ekaretia. (1 I-Korinto 12:27-29; I-Ebeto 4:11) Iai uotaia kaaro ae rawawata inanon aia utu. (I-Korote 3:18-21) Ma a bane ni buoka karaoan te mwakuri ae kakawaki ae tataekinan te rongorongo. N te taetae n Erene are e koreaki iai te Baibara ni Kristian, te uota aei e taekinaki bwa te di·a·ko·niʹa—ae te beku, ke te mwakuri ni minita.—I-Korote 4:17.
2 Ngke e a tabe ni bwakanako te tai ao iai te bitaki are e a riki. E a rikirake te koraki aika a aranaki bwa mataniwi n Aro, ake a taua te kabwaia ibukin tataekinan te rongorongo ibon irouia. (Mwakuri 20:30) Te koraki aika mataniwi n Aro aikai bon te koraki ae e karako mwaitiia mai buakoia aomata ake a arania ibon irouia bwa Kristian. Ma angiin te koraki aikai aika aongkoa Kristian ngaiia, a bon tii atongaki bwa kaain te Aro. E ngae ngkai a reireiaki kaain Aaro bwa iai tabeia ae a riai ni karaoia, n aron te bwaintangira ibukin boutokaaia mataniwi n Aro, ma angiia a riki bwa taan ongora n akea te bwai ae a karaoia ae kaineti ma tataekinan te rongorongo.
3, 4. (a) A kanga aomata aika kaaini Krititentom n riki bwa minita? (b) Antai minita ni Krititentom, ao bukin tera bwa e kaokoro aroia Ana Tia Kakoaua Iehova iai?
3 Mataniwi n Aro a taku bwa minita ngaiia (ae nako man te taeka ae minister, ae raira te taeka n Ratin ae di·aʹko·nos, “ae te toro”).a Ibukin karaoan te nakoa aei, a kareke beeba mani kuura aika ririeta ke aia tabo n reirei Aaro, ao a katauaki bwa minita iai. E taku The International Standard Bible Encyclopedia: “N angiin te tai, taeka aika ‘kataua’ ao ‘te katauaki,’ a taekina te nakoa ae kaokoro are e reke irouia minita ke berebitero ake a rinanon waaki ake a baireaki irouia kaain aia botaki, ao e nanona anganakia te mwaaka n tataekina te Taeka ke n anga taian takaramentu, ke ni karaoi ni kauoua.” Antai ae e katauia minita? E taku The New Encyclopædia Britannica: “N ekaretia ake a tautaekanaki irouia ebikobo ni karokoa ngkai, te minita ae katauia aomata tabeman bwa minita, bon te ebikobo. N aia ekaretia kaain te Aro ni Presbyterian, a katauaki minita irouia minita aika tautaekana te ekaretia.”
4 Mangaia are n ana ekaretia Krititentom, e kauarerekeaki mwaitiia aomata ake a anganaki te kakabwaia ae te riki bwa te minita. Ma tiaki ngaia ae e karaoaki irouia Ana Tia Kakoaua Iehova. Bukin tera? Ibukina bwa bon tiaki ngaia are e karaoaki n te ekaretia ni Kristian n te moan tienture.
Antai Raoi Ana Minita te Atua?
5. N aron are e kaotaki n te Baibara, antai naba aika a beku n aroia minita?
5 N aron are e taekinaki n te Baibara, taan taromauria Iehova—ake a mena i karawa ao ake i aon te aonnaba—boni minita ni kabane. A beku ibukin Iesu anera. (Mataio 4:11; 26:53; Ruka 22:43) A kanakoaki naba anera bwa a na “buokiia akana a riai ni kamaiuaki.” (Ebera 1:14, BK; Mataio 18:10) Bon te minita Iesu. E kangai: “N ai aron naba Natin te aomata, ae e aki roko ba e na karekeia ana tabonibai, ma e roko ba e na tabonibai.” (Mataio 20:28, BK; I-Rom 15:8) Kioina ngke taan rimwin Iesu a riai n “tou mwini mwanekana,” bon tiaki te bwai ae kamimi ngkai a riai naba n riki bwa minita.—1 Betero 2:21.
6. E a kanga Iesu ni kaotia bwa taan rimwina a riai n riki bwa minita?
6 E taekina ae kangai Iesu nakoia taan rimwina teutana te tai imwain waerakena nako karawa: “Nako ni kakiritiania botanaomata ni kabaneia, ni babetitoiia nako nanon aran te Tama ma te Nati ma te Tamnei are Raoiroi; n reireiia ba a na kabane baike I tuangngkami n tauu.” (Mataio 28:19, 20) Taan rimwin Iesu a riai n riki bwa taani kairia aomata tabeman bwa a na rimwin Iesu—are nanona boni minita ngaiia. Ao ngkanne, ake a karaoaki irouia bwa taani manga rimwin Iesu, a na reireiaki bwa a na tou mwin bwaai ni kabane ake e tuatua Iesu, n ikotaki naba ma te tua ibukin te nako ni kakiritiania aomata. Te tia rimwin Iesu Kristo ni koaua, ngkana te mwane ke te aine, ke te ikawai ke te tei, ma e na bon riki naba bwa te minita.—Ioera 2:28, 29.
7, 8. (a) Baikara kiibu ake a kaotia bwa Kristian ni koaua ni kabane bon taiani minita? (b) Baikara titiraki ake a tabekaki ni kaineti ma katauakia minita?
7 N aron aei, ni bongin Bentekota 33 C.E., taan rimwin Iesu ni kabane ake a botaki n te tai anne, aika mwaane ao aine, a buoka aron kaotiotan “ana makuri te Atua aika kamimi.” (Mwakuri 2:1-11) Irarikin anne, e korea ae kangai te abotoro Bauro: “Ba e riki n raoiroi te aomata n te onimaki ae i nanona, ao e kamaiuaki n te kaotioti ae e taekinna.” (I-Rom 10:10, BK) Bauro e aki taekin taeka aikai nakoia mataniwi n Aro aika e uarereke mwaitiia, ma “nakoia ake a mena i Rom ni kabaneia, ake a tangiraki iroun te Atua.” (I-Rom 1:1, 7) N aron anne, “ake a itiaki ake i Ebeto, ma aomata ake a onimakina Kristo Iesu” a riai n ‘nangoi waeia n te tauraoi are e reke n Euangkerion te raoi.’ (I-Ebeto 1:1; 6:15) Ao aomata ni kabane ake a ongora warekan te reta nakoia I-Ebera a riai n ‘taua kaotan tauani bukin aia kaantaninga ba e na aki nanokokoraki.’——Ebera 10:23.
8 Ma n ningai te tai are e na riki bwa te minita iai te aomata? N taekana teuana, n ningai te tai are e na katauaki iai? Ao antai ae e na katauia?
Katauakin te Aomata bwa te Minita——N Ningai?
9. E katauaki n ningai Iesu bwa te minita, ao iroun antai?
9 Ibukin ataakin ae n ningai te tai are a na katauaki iai aomata bwa minita, ao antai ae e na katauia, ao nora ana katoto Iesu Kristo iai. E aki karekea ana beeba ae bubura man ana tabo n reirei te Aro ae e kakoaua bwa te minita ngaia, ao e aki katauaki bwa te minita iroun te aomata temanna. Bukin tera ngkanne ngkai ti kona n taku bwa bon te minita ngaia? Ibukina bwa a kakoroaki raoi irouna, ana taeka Itaia ake a kairaki iroun te Atua: “E mena Tamnein Iehova i aou, ba E kabirai ba N na tataekina te euangkerio.” (Ruka 4:17-19; Itaia 61:1) Bon akea te nanououa bwa taeka aikai a kaotia bwa e mwiokoaki Iesu n tataekinan te euangkerio. Iroun antai? Kioina ngkai taamnein Iehova ae e kabiria ibukin karaoan te mwakuri aei, e teretere bwa e katauaki Iesu iroun Iehova ae te Atua. E riki n ningai aei? E ruonaki Iesu n taamnein Iehova ngke e babetitoaki. (Ruka 3:21, 22) Mangaia are e katauaki raoi n te tai are e babetitoaki iai.
10. E a kanga ni ‘katauaki’ te minita ni Kristian?
10 Tera aroia taan rimwin Iesu ake a maiu n te moan tienture? Nakoaia ae minita ngaiia e reke naba mairoun Iehova. E kangai Bauro: “Ara konabai boni mairoun te Atua. Bon te Atua ae e anganira te kona n riki ba [minita] n te Berita ae e Bou.” (2 I-Korinto 3:5, 6, BK) E kanga Iehova ni katauia taan taromauria bwa minita? Iangoa ana katoto Timoteo are e aranaki iroun Bauro bwa “ana minita te Atua n euangkerioni Kristo.”——1 I-Tetaronike 3:2.
11, 12. E a kanga Timoteo n rikirake nakon te nakoa ni minita?
11 Taeka nakon Timoteo aikai a buokira bwa ti na ota n aron rikina bwa te minita: “Ma ko na tai toki n tauu bukini baikana ko reireiaki, akana ko taku ba a koaua, ngkai ko ataiia ake a reireiniko baikanne; ao ngkai ko ataia ba ma ngke te merimeri ngkoe, ao ko ata te Baibara ae moan te raoiroi, ae konako ni kawanawanako ni kamaiuko n onimakinani Kristo Iesu.” (2 Timoteo 3:14, 15) Aan ana onimaki Timoteo ae e na kairia bwa e na kaotioti nakoia aomata, bon te atatai i aon te Baibara. Bon tii te wareware ibon irouna ae e tau iai? Tiaki. Timoteo e kainnanoa buokana bwa e aonga ni karekea te atatai ae eti irouna ao te ota ibukin bwaai n taamnei ake e wareki taekaia. (I-Korote 1:9) Mangaia are e anaaki nanon Timoteo bwa e na ‘kakoaua.’ Kioina ngke e a kaman ataa te Baibara ma ngke e “merimeri,” e reireiaki moa iroun tinana ao tibuna, bwa tao tamana bon tiaki kaain te onimaki.——2 Timoteo 1:5.
12 Ma e bati riki ae reitaki ma karikan Timoteo bwa te minita. Te bwai teuana, e kakorakoraki riki ana onimaki n te iraorao ma Kristian inanon ekaretia ake e uakaan ma ngaia. Ti kanga n ataia? Ibukina bwa ngke e moan kaitiboo ma Timoteo Bauro, te ataei ni mwaane aei e “kamoamoaki . . . irouia taari ake a mena i Rutetera ao i Ikonio.” (Mwakuri 16:2) Irarikin anne, ni boong akekei taari tabeman a kororeta nakoia ekaretia tabeua bwa a aonga ni kakorakoraia riki taari iai. Ao a kakawaraki irouia mataniwi bwa a aonga ni kateimatoaki riki iai. Bwaai n ibuobuoki aikai a buokiia Kristian bwa a na rikirake riki n tangiran bwaai n taamnei n aron Timoteo.——Mwakuri 15:22-32; 1 Betero 1:1.
13. N ningai te tai are e katauaki iai bwa te minita Timoteo, ao bukin tera bwa ko na taekinna bwa e aki toki iai rikirakena n tangiran bwaai n taamnei?
13 Ibukin ana tua Iesu ae koreaki ni Mataio 28:19, 20, ti kona ni kakoauaa bwa ana onimaki Timoteo e kairia bwa e na katotonga aron Iesu ma ni babetitoaki. (Mataio 3:15-17; Ebera 10:5-9) E kaotaki iai aron korakoran nanon Timoteo ni kani kakoroa bukin katabuani maiuna ni kabane nakon te Atua. E a riki bwa te minita Timoteo ngke e babetitoaki. Mai imwin te tai anne, maiuna, korakorana, ao bwaai ni kabane ake a mena irouna a riki bwa ana bwai te Atua. Boni kanoan ana taromauri ae kakawaki aei, ae “te beku ibukin te Atua.” Ma Timoteo e aki motirawa ngkai e a tia n riki bwa te minita. E teimatoa ni karikirakea riki tangiran bwaai n taamnei, ao e a riki bwa te minita ni Kristian ae wanawana. E rikirake n aron aei Timoteo ibukina bwa e rangi ni kaania ana iraorao ma Kristian aika wanawana n aron Bauro, e kakaraoa ana ukeuke n reirei ibon irouna, ao e ingainga nanona ni kan tataekina te rongorongo.——1 Timoteo 4:14; 2 Timoteo 2:2; Ebera 6:1.
14. Ni boong aikai, e a kanga te aomata ae e ‘raoiroi nanona ibukin te maiu are aki toki’ n rikirake n riki bwa te minita?
14 Ni boong aikai, ao katauakia aomata ibukin te mwakuri ni minita ni Kristian ai bon tii te arona naba. Te aomata are e ‘raoiroi nanona ibukin te maiu are aki toki’ e buokaki moa bwa e na ataa te Atua ao ana kaantaninga rinanon te reirei n te Baibara. (Mwakuri 13:48) E reiakina aron kamanenan ana reirei te Baibara inanoni maiuna, ao aron te tatataro ae iai nanona nakon te Atua. (Taian Areru 1:1-3; Taeka N Rabakau 2:1-9; 1 I-Tetaronike 5:17, 18) E iraorao ma raao n onimaki tabeman, ao e kabonganai bwaai n ibuobuoki ao babaire ake a karaoaki iroun “te toro ae kakaonimaki ae wanawana.” (Mataio 24:45-47; Taeka N Rabakau 13:20; Ebera 10:23-25) Mangaia are e a rikirake riki inanon te babaire ibukin waakinan te reirei nakoina.
15. Tera ae riki ngkana e babetitoaki te aomata? (Nora naba te kabwarabwara ae i nano.)
15 Imwin tabeua te tai, te aomata are e reirei n te Baibara e a rikirake tangiran Iehova ae te Atua irouna ma te onimaki ae korakora n te karea ni kaboomwi ai ngaia are e a tangiria ni katabua maiuna ni kabane nakon Tamana are i karawa. (Ioane 14:1) E a katabua maiuna n ana tataro ibon irouna, ao e a babetitoaki ibukin kaotiotana nakoia aomata bwa e a tia ni katabua maiuna. Babetitoana boni katauakina bwa te minita, ibukina bwa n te tai anne e a boni kinaaki iai bwa te toro ae katabuaki, ae te di·aʹko·nos, are ana bwai te Atua. E riai n teimatoa ni kaokoro ma te aonnaba. (Ioane 17:16; Iakobo 4:4) E a tia n anga boni ngaia bwa te ‘karea ae maiu, ae itiaki, ae tangiraki iroun te Atua,’ ao e tauraoi ni karaoi bwaai ni kabane ake a kaantaningaki mairouna n akea te bwai teuana ae e na rawa iai. (I-Rom 12:1)b Bon ana minita te Atua ngaia, ao e katotonga aron Kristo iai.
Tera te Mwakuri ni Minita ni Kristian?
16. Tera taben Timoteo, kioina ngkai te minita ngaia?
16 Tera ae reitaki ma ana mwakuri ni minita Timoteo? Bon iai tabena aika kaokoro, kioina ngkai raoraon Bauro ni mwamwananga ngaia. Ao ngke e a riki Timoteo bwa te unimwaane, e a kakorakoraa n anga reirei ao ni kakorakoraia raona ni Kristian. Ma kanoan ana mwakuri ni minita ae kakawaki riki, bon tataekinan te euangkerio ao kakiritianakia aomata, n aron naba are a karaoia Iesu ao Bauro. (Mataio 4:23; 1 I-Korinto 3:5) E tuanga Timoteo Bauro ni kangai: “Ma ko na kamarurungko n taua baangim nakoni bwaai ni kabane, ko na taona nanom nakoni marakim, ko na karaoa ana makuri te tia taekina te euangkerio, ko na kakororaoa nakoam.” (Ara bwai man reireiti)——2 Timoteo 4:5.
17, 18. (a) Baikara beeku tabeua ake a kona n reke irouia minita aika Kristian? (b) Tera aron kakawakin tataekinan te rongorongo nakon te minita ae te Kristian?
17 Ai bon titeboo naba ma aroia minita aika Kristian ni boong aikai. A karaoa te beku ibukia aomata, ae te mwakuri n tataekina te rongorongo, ae kairia aomata nakon te kamaiuaki ae e boto i aon ana karea ni kaboomwi Iesu, ao a reireinia aomata aika nimamanei bwa a na taboa aran Iehova. (Mwakuri 2:21; 4:10-12; I-Rom 10:13) A kakoaua man te Baibara bwa te Tautaeka n Uea bon tii ngaia te anga are e na toki iai karawawatakia aomata, ao a kaotia naba bwa e na raoiroi riki maiuia aomata ngkai ngkana a maiuakina ana reirei te Atua. (Taian Areru 15:1-5; Mareko 13:10) Ma te minita ae te Kristian e aki taekina tii katokan aia kangaanga natannaomata rinanon te reirei ni Kristian. Ma e reirei bwa ‘tangiran te Atua e karika te kaantaninga ae raoiroi ibukin te maiu aei ao ae e na roko.’——1 Timoteo 4:8.
18 Te koaua bwa angiia minita a beku naba n aroaro aika kakaokoro, ao e kona ni kaokoro iai aron te Kristian temanna ma temanna. A mwaiti ake iai tabeia n aia utu. (I-Ebeto 5:21–6:4) Unimwaane ao tooro ni minita a mwiokoaki ni bwaai tabeua inanon te ekaretia. (1 Timoteo 3:1, 12, 13; Tito 1:5; Ebera 13:7) A mwaiti naba Kristian aika a ibuobuoki ni katean Maneaba n Uea aika boou. Tabeman a anganaki te kakabwaia ae rine ae te kona ni mwakuri n ana auti ni Beta-era te Watch Tower Society. Ma minita aika Kristian ni kabane, a buoka aron tataekinan te euangkerio. Akea temanna ae e na aki karaoa te mwakuri aei. Boni buokan te mwakuri aei ae e kaotia imataia aomata bwa te aomata bon te minita ni Kristian ni koaua.
Ana Kaantaninga te Minita ae te Kristian
19, 20. Tera te kaantaninga ae riai ni karikirakeaki irouia minita aika Kristian?
19 Angiia minita ni Krititentom a kaantaningaia bwa a na karineaki n te aro ae kaokoro, ao a kabonganai nakoa n aron “te minita” ke “te tama.” Ma te minita ae te Kristian e ataia bwa bon tii Iehova ae e tau ni karineaki n aron anne. (1 Timoteo 2:9, 10) Akea te minita ae te Kristian ae tangiria ni karietataki n aron anne, ke e tangiri nakoa aika kaokoro. (Mataio 23:8-12) E ataia bwa nanon te taeka ae di·a·ko·niʹa bon “te beku.” Te weabe ae reitaki iai e kakabonganaki n te Baibara n taai tabetai n taekina te beku ae karaoaki nakoia aomata, n aron te mwakuri n touati. (Ruka 4:39; 17:8; Ioane 2:5) E ngae ngkai e rine riki aron kabonganana ni kaineti ma te mwakuri ni minita ni Kristian, ma te di·aʹko·nos bon te toro.
20 Mangaia are akea te minita ae te Kristian ae e riai n taku ibon irouna bwa e rangi ni kakannato. Minita aika Kristian ni koaua——n ikotaki naba ma minita ake a anganaki beeku aika kaokoro n te ekaretia—a boni bane n nanorinano. E kangai Iesu: “Ane kani kakanato i buakomi ao ke e riki ba ami toro ao ane kan riki ni moami ao e na riki ba ami kaaunga.” (Mataio 20:26, 27) Ngke e kaota te nano ae e riai ni karikirakeaki irouia taan rimwina, Iesu e teboki waeia, are ana mwakuri te kaaunga ae te kabanea ni mangori. (Ioane 13:1-15) Ai nanorinanora te beku anne! Mangaia are minita aika Kristian a nanorinano ni beku iroun Iehova ae te Atua ao Iesu Kristo. (2 I-Korinto 6:4; 11:23) A nanorinano ngke a beku ibukia raoraoia. Ao ngkana a tataekina te rongorongo, a tatangiria ni beku ibukia raoraoia n aomata aika aki onimaki.——I-Rom 1:14, 15; I-Ebeto 3:1-7.
Te Nanomwaaka n te Mwakuri ni Minita
21. Tera kaniwangan Bauro ibukin nanomwaakana n te mwakuri ni minita?
21 E kainnanoa te nanomwaaka Bauro bwa e aonga n teimatoa n nakoana ae te minita. E tuangia kaaini Korote bwa e bon rinanon kangaanga aika bati ngke e tataekina te euangkerio nakoia. (I-Korote 1:24, 25) Ibukina bwa e nanomwaaka iai, a mwaiti aomata ake a butimwaea te euangkerio ao a riki naba bwa minita. A karikaki bwa natin te Atua ao tarin Iesu Kristo, ao a anganaki te kaantaninga ae a na riki bwa taamnei ma ni mena i rarikina i karawa. Ai raoiroira te kaniwanga ane e nako man te nanomwaaka anne!
22, 23. (a) Bukin tera bwa minita aika Kristian ni boong aikai a kainnanoa te nanomwaaka? (b) Baikara uaa aika raraoi aika a reke man nanomwaakaia Kristian?
22 Aomata aika ana minita ni koaua te Atua ni boong aikai a kainnanoa naba te nanomwaaka. A mwaiti mai buakoia aika a katoa bong ni kekeiaki ngkai a aoraki ke a karawawataki ibukin rokon te kara. E korakora aia mwakuri kaaro——aika e mwaiti mai buakoia aika akea raoia——ibukin kaikawaaia natia. A ninikoria ataein te reirei n rarawa n rootaki ni kariri ake a otabaninia. A mwaiti Kristian ake a kaitara ma kangaanga aika korakora n aron aki taun aia tianti. Ao a mwaiti aika a bainikirinaki ke a karawawataki ibukin bwaai aika riki inanon boong aikai aika “kamamate”! (2 Timoteo 3:1) Eng, ana minita Iehova ni boong aikai ae e a kaani koro onoua te mirion mwaitiia, a botii bwanaia ma ana taeka te abotoro Bauro ae kangai: “Ti kaotira ba ana minita te Atua ngaira aika raoiroi, ni bwaai nako, n te nanomwaka ae bati.” (2 I-Korinto 6:4) Ma e ngae n anne, ao a bon aki bwara nanoia iai minita aika Kristian. A riai ni kamoamoaki ibukin nanomwaakaia.
23 Ao n aron are e riki iroun Bauro, te nanomwaaka e kariki uaa aika rangi n raraoi. N nanomwaakara, ti kateimatoa iai ara iraorao ae kaan ma Iehova, ao ti kakukureia nanona iai. (Taeka N Rabakau 27:11) Ti kakorakora ara onimaki, ao ti kairiia aomata tabeman riki bwa a na rimwin Kristo, ao e kamwaitaki mwaitia kaain te botaki n itaritari ni Kristian iai. (1 Timoteo 4:16) Iehova e a tia ni kateimatoaia ana minita ma ni kakabwaiaia inanon boong aika kaitira aikai. Ibukin anne, kabanean mwaitiia kaain te koraki aika 144,000 a a tia n ikotaki ngkai, ao mirion ma mirion riki mwaitiia aomata ake a onimakina raoi reken te maiu are aki toki n te baretaiti i aon te aonnaba. (Ruka 23:43; Te Kaotioti 14:1) Bon te koaua, bwa te mwakuri ni minita ni Kristian boni kaotan raoi ana nanoanga Iehova. (2 I-Korinto 4:1) Ti bia bane n iangoia bwa te bwai ae kakawaki, ma ni kakukurei bwa uaan te mwakuri ni minita aei e na teimatoa n aki toki.——1 Ioane 2:17.
[Kabwarabwara ae nano]
a Te taeka ae “riikan,” ae te tia mwakuri n te ekaretia, e nako man te taeka n Erene ae di·aʹko·nos.” Inanon ekaretia ike a kona aine n riki bwa riikan, a aranaki bwa riikan-aine.
b E ngae ngkai I-Rom 12:1 e kaineti raoi ma Kristian aika kabiraki, ma te iango ae kaotaki iai e kaineti naba nakoia “tiibu tabemang.” (Ioane 10:16) Tiibu aikai a ‘reitiia ma Iehova bwa a na beku irouna ao a na tangira aran Iehova, bwa a aonga n riki bwa ana toro.’——Itaia 56:6.
Ko Kona ni Kabwarabwara?
• Tera tabeia are a ibuobuoki iai Kristian ni kabane ake a maiu n te moan tienture?
• N ningai te tai are e katauaki te aomata bwa te minita ni Kristian, ao antai ae e na kataua?
• Tera te iango ae e riai ni karikirakeaki irouia minita aika Kristian?
• Bukin tera ngkai te minita ae te Kristian e riai n nanomwaaka i nanon ana tai ni boo ma kangaanga?
[Taamnei n iteraniba 29]
E reireiaki taekan ana taeka te Atua Timoteo ma ngke e merimeri. E katauaki bwa te minita ngke e babetitoaki
[Taamnei n iteraniba 30]
Te babetito boni bannan katabuani maiun te aomata nakon te Atua, ao e kanikinaea katauakin te aomata bwa te minita
[Taamnei n iteraniba 32]
A kukurei ni beku minita aika Kristian