Bukin Tera bwa Ko Beku Iroun te Atua?

Te uea temanna ae e maaka te Atua rimoa, e reireina natina ni kangai: “Ko na ata Atuan tamam, ao ko na toro i Rouna n te nano ae moan te raoiroi ao n te tamnei ae kan toro i Rouna.” (1 Rongorongo 28:9) E teretere bwa Iehova e tangiria ana toro bwa a na beku irouna ma nanoia ni kakaitau ma n tatangira.

TI KUKUREI ngaira aika kaain Ana Tia Kakoaua Iehova, ni kaotia bwa a onrake nanora n te kani kakaitau ngke a moan kabwarabwaraki ana berita te Baibara nakoira. Ni katoa bong ti reiakin bwaai aika boou aika a reitaki ma ana kaantaninga te Atua. Ngke e tabe n rikirake ara atatai ibukin Iehova, ao e a kakorakoraki riki iai nanora ni kani beku irouna “n te nano ae moan te raoiroi ao n te tamnei ae kan toro i Rouna.”

A mwaiti aomata aika a riki bwa kaain Ana Tia Kakoaua Iehova aika a teimatoa ni beku iroun Iehova ma te kimwareirei ae bati, ni karokoa tokini maiuia. Ma Kristian tabeman, a moanna raoi ni bebeku, ma imwin tabeua te tai, a mwaninga taekan bwaai aika raraoi ake a kairira bwa ti na beku iroun te Atua. E a tia n riki anne iroum? Tai rawawata iai ngkana ngaia anne. Ko boni kona ni manga kaoka kimwareireim are e a tia ni bua ngkai. N te aro ra?

Iangoi Kakabwaia ake A a tia n Reke Iroum

Te moan bwai, iaiangoi kakabwaia ake ko katoa bong ni karekei mairoun te Atua. Iangoi bwaai n tituaraoi aika raraoi mairoun Iehova: bwaai ake e kariki aika kakaokoro nako​​—⁠aika a kakabwaiaki iai aomata ni kabaneia n aki ongeia bwa tera aroia ke mwaitin kaubwaiia​—te amwarake ao taiani moi ake e katauraoi, marurungin rabwatam, ataakin te koaua man te Baibara iroura, ao ae e moamoa riki, te bwai n tituaraoi are Natina. Matena, e kauka te kawai nakoim bwa ko kona iai ni beku iroun te Atua ni mataniwin nanom ae itiaki. (Ioane 3:16; Iakobo 1:17) Ngkana ko kabatiaa iaiangoan raoiroin te Atua, ao e na kabatiaki riki tangirana iroum. Ngkanne, nanom e na kairiko bwa ko na beku irouna ibukin kan kaotan am kaitau nakoina ibukin bwaai ni kabane ake e a tia ni karaoi. Akea te nanououa bwa ko na namakina are e namakinaki iroun te tia areru, are e korea ae kangai: “Iehova, a bati am makuri aika kamimi aika Ko karaoi, ma nanom aika kaeti nako ira. A aki konaki ni baireaki ni warekaki nako Im . . . a maiti riki nakon aika konaki ni warekaki.”​—Taian Areru 40:5.

Taeka aikai a koreaki iroun Tawita, are te aomata are e nori naba kangaanga inanoni maiuna. Ngke e ataei riki, e bati ana tai Tawita ni kakioaki nako ngke te Uea ae buakaka ae Tauro ma ana tautia a kataia ni kamateia. (1 Tamuera 23:7, 8, 19-23) Bon iai naba bwaai tabeua ake e mamaara iai Tawita, ake e kaitara ma ngaai. E kaotii bwaai aikai ni kabane n te ka 40 n Areru: “Ba a otabaniniai taiani kai aika akea warekaia. A oai au bure, ma ngaia ae I aki kona n tara rake; A maiti riki nakon iran atuu.” (Taian Areru 40:12) Eng, bon iai ana kangaanga Tawita, ma e aki konaaki iai. E katuua ana iango i aon kakabwaia ake e a tia ni karekei mairoun Iehova e ngae ngke e taonaki naba ni kangaanga tabeua, ao e noria iai bwa a mwaiti riki kakabwaiana nakon mwaitin ana kangaanga.

Ngkana ko taonaki n oin am kangaanga ke ko namakina aki-taum ni bwaai tabeua, e raoiroi ngkana ko tei moa ma n iangoi kakabwaia ake a a tia n reke iroum, n aron are e karaoia Tawita. Akea te nanououa bwa am kaitau ibukin kakabwaia aikai ake a kairiko rimoa bwa ko na katabua maium nakon Iehova; ao manga iaiangoan bwaai aikai e kona ni buokiko ni manga kunea te kimwareirei are e bua mairoum ma ni kakoaua raoi bwa am beku iroun te Atua e a boto i aon te nano ni kani kakaitau.

A Kona n Ibuobuoki Bobotaki ake A Karaoaki n te Ekaretia

Irarikin iaiangoan raoiroin Iehova ibon iroura, ti riai naba n iraorao ma raoraora ni Kristian. E kaungaunga te katoa tai n iraorao ma mwaane, aine, ao aomata aika ataei riki, ake a tangira te Atua ao a matoatoa nanoia ni kani beku irouna. Aia katoto e kona ni kaungaira bwa ti na beku ma nanora ni kabane iroun Iehova. Menara n te Maneaba n Uea e kona ni kaungai naba nanoia.

Te koaua bwa ngkana ti oki n te bakantai man te mwakuri ae matoatoa, ke ngkana iai te bwara n nano iroura ibukin te kangaanga ke te mamaara teuana, ao e aki bebete iangoan manga kaean te botaki n te Maneaba n Uea. N taai n aron aikai, tao ti riai ni kaaintoaira ma ni ‘kaikoaka rabwatara’ bwa ti aonga n ongeaba n te tua ae ti riai ni bobotira ma raora ni Kristian.​—1 I-Korinto 9:26, 27; Ebera 10:23-25.

Ngkana e a riki anne iroura, e riai bwa ti na taku iai bwa ti aki rangi n tangira Iehova? Tiaki ngaia. Kristian ake a ikawai n te onimaki rimoa ake a tangira raoi te Atua, a riai naba ni kakorakoraiia ni kakaraoa nanon te Atua. (Ruka 13:24) Te abotoro Bauro bon te Kristian ae ai aron anne. E taekina aroarona ni kangai: “Ba I ata te bwai ae raoiroi ba e aki maeka i nanou, ae i nanon rabatau: ba bon ae i rou te kani karaoia, ma e aki reke i rou karaoan ae raoiroi. Ba te raoiroi ae I kani karaoia ao I aki karaoia: ma te buakaka ae I aki kani karaoia ao I boni karaoia.” (I-Rom 7:18, 19) Ao e kangai nakoia kaaini Korinto: “Ba ngkana I tataekina te euangkerio, ao akea kamoamoau iai; ba I bon aki kona n aki tataekinna. . . . Ba ngkana I karaoa aei ni kani karaoia, ao e reke au bwai: ma ngkana I karaoia n aki kani karaoia, ao I mwiokoaki n te nakoa aei.”​—1 I-Korinto 9:16, 17.

N aroia aomata aika mwaiti ibuakora, bon iai aroaron Bauro tabeua aika bubure ake a tuuka nanona ni kani karaoa ae raoiroi. Ma e kakorakoraiia ni buaka aroaro aikai, ao e tokanikai iai n angiin te tai. Te koaua bwa e aki karaoa anne n oin korakorana Bauro. E korea ae kangai: “I boni konai bwaai ni kabane ni karaoi iroun Teuare kakorakoraai.” (I-Biribi 4:13) Iehova, are ngaia are e kakorakora Bauro, e na kakorakorako naba bwa ko aonga ni karaoa ae raoiroi, ngkana ko butiia bwa e na buokiko. (I-Biribi 4:6, 7) Mangaia are ‘kakorakorako ibukin te onimaki,’ ao e na kakabwaiako Iehova.​—Iuta 3.

Tiaki nanona bwa ko na buaka n tii ngkoe. Iai n aia ekaretia Ana Tia Kakoaua Iehova, unimwaane ni Kristian aika ikawai n te onimaki, ake a nanomwaka n te ‘buaka ibukin te onimaki,’ ake a tauraoi ni buokiko. Ngkana ko kawara te unimwaane ni bubutii buokam, e na kataia n ‘taetae ni kabebetea nanom.’ (1 I-Tetaronike 5:14) Tiana bwa e na riki n ai aron “te ne ni katantan man te ang, ma ni kamanomano man te karau.”​—Itaia 32:2.

“Te Atua bon te tangira,” ao e tangiriia ana toro bwa a na beku irouna ibukina bwa a tangiria. (1 Ioane 4:8) Ngkana e riai ni manga kaboouaki am tangira ibukin te Atua, ao karaoa ae riai bwa e aonga n reke iroum, n aron are e taekinaki i eta. Ko na kukurei ngkana ko karaoa anne.