Tara Te Tia Karaoi Mwakuri Aika Kamimi!

“Tei moa, ao iangoi ana makuri te Atua aika kamimi.”​—IOBI 37:14.

1, 2. Tera te bwai ae kamimi ae e a tibwa kuneaki n 1922, ao tera aroaroia aomata iai?

A A TIA n uaia n ibuobuoki i nanon ririki aika mwaiti ni kakaaea te bwai ae kakawaki teuana, temanna te tia rabakau n te keniken ibukin kakaaean bwaai ni kawai i aan tano, ao temanna te toka ae kaain Engiran. Ao ngkanne, n Nobembwa 26 1922, n te tabo ae tanoata taekana ae Aia Mwarua Uea are a tataunaki iai uean Aikubita aika taiani barao, te tia rabakau n te keniken ibukin kakaaean bwaai ni kawai i aan tano ae Howard Carter, ao Lord Carnarvon, a kunea te kaniwanga are a kamani kakaaea​—ae ruanimaten Barao Tutankhamen. Ngke a a roko n te mataroa ae karauaki ni kainaki raoi ao a uunna ni kabwangabwangaa. Ao ngkanne, e a karina te taura te nenea Carter i nanon te bwangabwanga arei man tara nanona.

² Imwina riki e kabwarabwara ni kangai Carter: “Ngke e a roko nanon te Toka ae Carnarvon n aki kona n tataninga riki, ao e a titirakinai ni kangai: ‘Iai te bwai ae ko noria ke akea,’ ai aron ae I a kuri n aki kona n taetae ngke I a kaeka, ‘Eng, bwaai aika kamimi.’” Mai buakon kaubwai aika ngaa ma ngaa mwaitiia i nanon te rua ni mate anne, ao e kuneaki naba iai te bwaoki ni mate ae karaoaki man te koora. Tao ko a tia n nori “bwaai aika kamimi” aikai tabeua, n taian taamnei ke ngkana ko neweaba n auti ake a kawakinaki iai bwaai nikawai aika kakawaki. Ma e ngae ngkana a rangi ni kamimi bwaai aikai, ma tao bon akea irekerekeia ma anuani maium. Mangaia are ti bia iangoi riki bwaai tabeua aika kamimi ake a na reitaki ma maium ao a na bongana naba nakoim.

3. E ngaa te tabo are ti kona ni kunea iai rongorongon mwakuri aika kamimi ake a na manena nakoira?

³ N aron anne, iangoa te mwaane ae e maiu rimoarimoa, ae te aomata ae kakannato riki nakoia taian aekita, taan takaakaro, ke taiani bwanuea. E atongaki naba bwa te kabanea ni kakannato mai buakoia kaain Mainiku. Ko na boni bae ni kinaa arana​—ae Iobi. E koreaki bokin te Baibara teuana ae bwanin n taekana. Ma e ngae n anne, iai raoraona temanna ae te rorobuaka ae arana Eriu, ae e nora riain kaetan aron Iobi. N aron anne, e taku Eriu bwa Iobi e a riaon ae riai n arona ni mutiakinna i bon irouna, ao ni mutiakinia naba aomata ake a mena i rarikina. N Iobi mwakorona 37, ti nori reirei riki tabeua iai aika a raraoi mani kawanawana te aba, aika a manena nakoira n tatabemanira nako.​—Iobi 1:1-3; 32:1–33:12.

4. Tera ae kaira Eriu bwa e na taekina ana kaungaunga ae koreaki n Iobi 37:14?

⁴ Aomata ake teniman ake aongkoa raoraon Iobi a karaui ni katereterei bwaai ake a taku bwa e a tia ni bure iai Iobi n ana iango ke n ana mwakuri. (Iobi 15:1-6, 16; 22:5-10) E taotaona nanona Eriu n tataninga tian te kakarabakau aei. Ao ngkanne, e taetae ma te ataibwai ao te rabakau. A mwaiti ana taeka aika raraoi, ma nora te reirei ae kakawaki riki aei: “Iobi, ko na ongora n aei: Tei moa, ao iangoi ana makuri te Atua aika kamimi.”​—Iobi 37:14.

Teuare Karaoi Mwakuri Aikai

5. Tera naba ae e irekereke ma “ana mwakuri te Atua aika kamimi” ake a taekinaki iroun Eriu?

⁵ Taraia bwa e aki taku Eriu bwa Iobi e riai ni mutiakina bon taekana, taekan Eriu, ke te aomata riki temanna. E wanawana Eriu ngke e kaunga nanon Iobi​—ao ngaira naba​—bwa ti na mutiakini ana mwakuri Iehova ae te Atua aika kamimi. N am iango, baikara bwaai aika nanonaki n te kibu n taeka ae “ana makuri te Atua aika kamimi”? Kioina ngkai a mwaiti bwaai aika ko riai ni mutiakin, n aron marurungim, te mwane ibukin mweeraoim, bwaai aika a na riki nakoim nakon taai aika imwaim, am utu, raoraom ni mwakuri, ao kaain rarikim, bukin tera bwa ko riai naba ni mutiakina ana mwakuri te Atua? E teretere bwa ana mwakuri Iehova ae te Atua aika kamimi a reitaki ma rabakauna ao mwaakana i aon bwaai aika karikaki aika a otabwaninira. (Neemia 9:6; Taian Areru 24:1; 104:24; 136:5, 6) Ibukin katereterean raoi te iango aei, ao tara te reirei teuana ae taekinaki n te boki ae Iotua.

6, 7. (a) Baikara mwakuri aika kamimi ake a karaoaki iroun Iehova n aia bong Mote ao Iotua? (b) E na tera arom iai ngke arona bwa ko nora teuana mai buakon taiani mwakuri aikai ake a karaoaki n aia tai Mote ao Iotua?

⁶ Iehova e uoti rekenikai nako Aikubita rimoa, ao ngkanne, e a manga karaurea te Nama are Uraura bwa e aonga ni kairiia tibun Iteraera rimoa Mote, nakon te inaaomata. (Te Otinako 7:1–14:31; Taian Areru 106:7, 21, 22) Iai naba te rongorongo ae aekan anne ae karakinaki n Iotua mwakorona 3. Te tia onea mwin Mote are Iotua, e mwiokoaki bwa e na kairiia ana aomata te Atua bwa a na rinanon moa te karaanga teuana ao a a nakon naba te Aba ni Berita. E kangai Iotua: “Kam na tabuingkami, ba E na karaoi kamimi Iehova ningabong i buakomi.” (Iotua 3:5) Baikara bwaai ni kamimi aikai?

⁷ Te rongorongo e kaotia bwa Iehova e a manga bwenaua naba te ran are e tuka kawaia, are te Karaanga are Ioretan, bwa a aonga ni kona n riaon te tano ae mau, mwaane, aine, ao ataei aika ngaa ma ngaa mwaitiia. (Iotua 3:7-17) Ngkana ti mataku ni karaurean ranin te karaanga ao ngke a manga bane n ri nukana aomata n akea te kabuanibwai ae riki irouia, ao a na bae n anaaki nanora ni kamimin mwakuri aikai! E a kaotaki iai mwaakan te Atua i aon bwaai aika karikaki. Ma e ngae n anne​—n ara tai ae ti maiu i nanona ngkai​—bon iai naba bwaai aika kamimi n aron anne. Ibukin ataakin tabeua mai buakon bwaai aikai, ao bukina ae ti riai ni mutiakinia, ao taiaoka n iangoa Iobi 37:5-7.

8, 9. Baikara mwakuri aika kamimi ake a taekinaki n Iobi 37:5-7, ao bukin tera ngkai ti riai n iaiangoi taekan bwaai aikai?

⁸ E kangai Eriu: “E karebwea te ba te Atua ni bwanana n te aro ae kamimi; E karaoi baika ababaki, aika ti aki konai n atai.” Tera are e iangoia Eriu ni kaineti ma aron te Atua ni karaoi bwaai “n te aro ae kamimi”? Eriu e taekina te tino ao bwakan te karau. Bwaai aikai a na bae n tuka ana mwakuri te tia ununiki n ana tawana, ma n anganna ana tai ma bukina, are e nang kona n iangoa iai ana mwakuri te Atua. Tao ngkana tiaki taan ununiki ngaira, ma ti kona n rotaki naba ni bwakan te karau ke te tino. Ni kaineti ma te tabo ae ti maeka iai, te tino ao te karau a kona naba n tuki mwakuri aika ti kani karaoi. Ti kakarekea ara tai n iangoia bwa antai ae moani kariki bwaai aika kamimi aikai, ao tera ae e nanonaki iai? Ko a tia ni karaoa anne?

⁹ Ti wareka te rongorongo ae kakawaki n Iobi mwakorona 38 ae Iehova ae te Atua e tabeka naba te iango ae aron anne, ngke e tabeki titiraki aika manena nakon Iobi. E ngae ngke e tabeki moa titiraki aikai ara tia Karikiriki nakon Iobi, ma e teretere bwa bon iai naba irekerekeia ma ara kaantaninga, maiura, ao taai aika a mena imwaira. Mangaia are ti na noria bwa tera ana titiraki te Atua, ma n iangoa ae nanonaki iai. Eng, ti na karaoa are e kaungaira Iobi 37:14 bwa ti na karaoia.

10. Tera aron rotakira n ae riai n rongorongon Iobi mwakorona 38, ao baikara titiraki ake a riki mai iai?

¹⁰ E moan taekina ae kangai te mwakoro 38: “Ao Iehova E kaeka Iobi mai nanon te ukeukenanti, ao E kangai, Ai antai teuae karoa te taetae ni kawanawana te aba n taeka aika akea te ataibwai iai? Ko na kabaea nukam ngkai n ai aron te mwane; Ba N na titirakiniko, ao ko na tuangai.” (Iobi 38:1-3) N aron anne, e a kaweneaki iai aan te maroro. E buokaki Iobi iai bwa e na kaeta ana iango bwa e aonga n ataia ae e tei i matan te tia Karika te iuniweeti, ao e na bae n anganna taekan aroarona. E raoiroi naba ngkana ti bane ni karaoa anne ngaira ma aomata aika maiu ngkai. Ngkanne, te Atua e a manga maroroakin bwaai tabeua ake titeboo ma ake e taekin Eriu. “Ko mena ia ngke I moa ni kawene aan aonaba? Tuangai, ngkana tao ko ataibwai. Ai antai ae motika bukini baireana, ngkana tao ko ataia? Ao antai ae bairea te kora i aona? A kainakoaki bouana i aon tera? Ao ai antai ae kawenea atibuni maninganingana?”​—Iobi 38:4-6.

11. Baikara koaua aika a riai ni kamataataki nakoira man Iobi 38:4-6?

¹¹ E mena iia Iobi​—ao ngaira naba ti mena iia​—ngke e riki te aonnaba? Boni ngaira taani korotaamnei aika ti karaoa katoton te aonnaba, ao ngkanne ti a manga bairea abwakina kaanga, n te kai ni baire? Bon tiaki! A bon tuai naba n riki aomata n te tai arei. E titiraki ni kangai te Atua ngke kaanga e kabotaua ara aonnaba ma te auti teuana: “Ai antai ae kawenea atibuni maninganingana”? Ti ataia bwa raroan te aonnaba man taai e bon tau, n te aro are ti aonga ni maiu raoi iai. Ao e tau naba buburan te aonnaba. Ngkana e na bubura riki ara aonnaba, ao te kaeti ae te hydrogen ngkanne e na bon aki kona n otinako mai rarikin te aonnaba, ao akea te bwai ae e na kona ni maiu i aon te aonnaba. E teretere bwa bon iai temanna ae e “kawenea atibuni maninganingana” ni nnena ni koaua. E riai ni kamoamoaki Iobi iai? Ke tao boni ngaira? Ke Iehova ae te Atua?​—Taeka N Rabakau 3:19; Ieremia 10:12.

Antai te Aomata ae E Kona ni Kaeka?

12. Tera ae ti kairaki bwa ti na iangoia, n te titiraki ae kuneaki n Iobi 38:6?

¹² E titiraki naba te Atua ni kangai: “A kainakoaki bouana i aon tera?” Tiaki te koaua bwa e raoiroi te titiraki aei? Tao ti a taneiai n ongongora taekan te bwai are e aki ongongo taekana Iobi​—ae taekan ana katikitiki te aonnaba​—ae te gravity. Angiina mai buakora, a ataia bwa ana katikitiki taai ae reke man rabwatana ae bubura kaei e kateimatoa ara aonnaba ni nnena, ae kaanga a kaiinakoaki bouana iai. Ma e ngae n anne, antai ae e mataata raoi n ana katikitiki te aonnaba aei?

13, 14. (a) Tera ae riai ni kakoauaki ibukin ana katikitiki te aonnaba? (b) Tera arora ae riai ngkai ti a ataa ae taekinaki n Iobi 38:6?

¹³ Te boki teuana are e a tibwa boretiaki ae e atuna The Universe Explained, e kaotia bwa ‘ana katikitiki te aonnaba bon te korakora ae a ataa riki taekana aomata nakon korakora ni kabane, ma e ngae n anne, bon te bwai ae e uarereke riki iai te kamataata i aona.’ E reitia ni kangai: “N taraakina, ana katikitiki te aonnaba e mwananga i nanon te akea ngkai naba, n akea raoi kawaina are e kona ni buti iai. Ma i nanon ririki aika a tibwa nako, taan rabakau n te physics a moanna n taekinna bwa tao e kona ni mwananga ana katikitiki te aonnaba n ai aron te nao i nanoni kawai aika a karaoaki mani bwaai aika uarereke aika aranaki bwa gravitons . . . Ma e tuai n ataaki raoi bwa bon iai bwaai aikai ke akea.” Iangoa nanon te kabwarabwara anne!

¹⁴ E a rikirake te rabakau n aonnaba i nanon 3,000 te ririki ma ngke e moan tabeki titiraki aikai Iehova nakon Iobi. Ma e ngae n anne, ti aki kona ngaira, ao a aki kona naba taan rabakau n te physics ni kabwarabwara raoi aron ana katikitiki te aonnaba ae e kateimatoa butin te aonnaba ni kawaina ae eti raoi, ae nnena ae riai ibukin kanakoraoan naba maiura ikai. (Iobi 26:7; Itaia 45:18) Ti aki taekin bwaai aikai ngkai bwa aongkoa ko na kakorakorako n neneri bwaai aika kamimi ni kabane ake a irekereke ma ana katikitiki te aonnaba. Ma iangoan aei, ae tii teuana mai buakon ana mwakuri te Atua aika kamimi, e riai n rota aron iangoan te Atua iroura. Ko bon tei ni kuba n rabakauna ao ataibwaina, ao ko ataia ngkai bwa bukin tera bwa ti riai ni kabatiaa riki ara reirei i aon ana kaantaninga?

15-17. (a) Tera ae katuuaki taekana n Iobi 38:8-11, ao baikara titiraki aika a riki mai iai? (b) Tera ae e riai ni kakoauaki ibukin te atatai i aon taiani marawa ao nneia i aon te aonnaba aei?

¹⁵ E reita nako ana tititiraki te tia Karikiriki ni kangai: “Ao ai antai ae oa rarikini marawa n taiani mataroa, ngke e raanga nako, n ai arona ngke tao e oti nako mai nanon te biroto; Ngke I karaoa te nang ba rabunana, ao te rotongitong ba te kunnikai ae ninirana, ao I tuangnga au moti, ao I katei kaini kamatoani kainakina ma mataroa, ao I kangai, Ko na roko ikai, ma tai ke mai riki; ao a na toki ikai naom aika kainikatonga?”​—Iobi 38:8-11.

¹⁶ Ooakin marawa e irekereke ma taian aba aika bubura, taiani marawa, ao te ora ma te iabuti. Ai maan ra ngkai aomata n taratarai ma n neneri bwaai aikai? Bon i nanon ririki aika ngaa ma ngaa mwaitiia​—ma e a korakora riki nenerakina n te tienture are e a tibwa nako. Tao ko kona n taku bwa angiin bwaai aika a kona n ataaki ibukin bwaai aikai, a a bon tia n ataaki ngkai. Ma n te ririki aei ae 2001, tera ae ko na kunea ngkana ko neneri taekan bwaai aikai, ni kabonganai booki aika a mena n auti n tangoboki aika a bubura n te aonnaba aei, ke ngkana ko ukeuke n te Internet ni kakaaei iai rongorongo aika a tibwa kuneaki?

¹⁷ Ko kona n nori taeka aikai n te boki teuana ae rangi n ataaki: “Bairean tian taian aba aika a bubura ao kabin marawa aika a mena i aon te aonnaba, ao tein aon te aba, boni bwaai aika a rangi ni kangaanga aika a kaman neneri ma n iaiangoi, taan rabakau n aonnaba.” Ngke e a tia n taekina anne te encyclopedia, ao e a manga taekin reirei aika aua, aika tao a koaua, ma e taekinna bwa kabwarabwara aikai bon tii tabeua mai buakon “iango aika mwaiti ake a tuai ni kabwaataki raoi.” N aron ae ko bon ataia, iango n aron aikai, bon “iango aika a aki bati bwaai ni kakoaua iai, n te aro are e tuai ni kona ni katiaaki raoi kabwarabwarakiia.”

18. Tera tokin te iango ae ko a kairaki nako iai imwin iangoan Iobi 38:8-11?

¹⁸ Tiaki te koaua bwa e kaotaki iai aron manenan titiraki ake ti wareki n Iobi 38:8-11? Te koaua bwa tiaki ngaira aika ti riai ni kamoamoaki ibukin bairean waaki aikai i aon ara buraneti aei. Bon tiaki ngaira ake ti kamena namwakaina ni nnena n te aro are n angiin te tai te katikitiki mai iai e na karika te iabuti ao te ora, ao e na aki riaon mataniwin te aba ke ni bwaroira naba. Ko ataia bwa antai ae karaoi bwaai aikai, bon teuare te tia Karaoi mwakuri aika kamimi.​—Taian Areru 33:7; 89:9; Taeka N Rabakau 8:29; Mwakuri 4:24; Te Kaotioti 14:7.

Angan Iehova Kamoamoana ae Riai

19. Taeka ni kario ake a mena n Iobi 38:12-14 a kaira ara iango nakon koaua ra ibukin ara aonnaba aei?

¹⁹ Bon tiaki naba aomata aika a bairea aron minominon te aonnaba, are e taekinaki n Iobi 38:12-14. Minominon te aonnaba e karika otin­taai n te karangaina ae e kona n rangi n tamaroa taraakina. Ngke e a bwakarake taai, a noraki teiraoin rabwatan bwaai aika a mena i aon ara aonnaba, n ai aron otin te kanikina imwin kabonganaan te bwai ni kanikina i aon te bokaboka iroun te tia karaomangko. Ngkana ti iangoa aron butin te aonnaba, ao ti na bae ni mimi n ataakin ae e aki rangi ni butimwaaka nakon ae riai, ae te bwai ae ti ataia bwa e na karika te kabuanibwai. Ao e aki rangi n iremwe butina n te aro are a maan riki taiani ngaina ao boong, ao e a riki iai te kabuebue ke te mwaitorotoro ae rangi ni korakora, n te aro are a aikoa kona ni maiu aomata iai. N etina, ti riai ni kukurei ngkai te Atua, ao tiaki aomata, ake a bairea aron butin minominon te aonnaba.​—Taian Areru 148:1-5.

20. Tera arom ae ko na karaoia ni kaineti ma titiraki ake a tabekaki n Iobi 38:16, 18?

²⁰ Iangoia ngkai bwa aongkoa e a manga titirakiniko riki te Atua ni kangai: “Ko a tia n rin i nanoni koburaken taari? Ao ko a tia n nakonako n taabo ake a nano ake i marawa?” E aki kona naba ni kaekaa raoi anne te aomata ae te tia rabakau ni bwaini marawa! “Ko ata rababan aonaba ke ko aki? Tuangai, ngkana tao ko atai baikai ni kabane.” (Iobi 38:16, 18) Ko a tia ni kawara aban nako te aonnaba, ke tao angiina? Kawaran taabo aika tamaroa ao bwaai aika kamimi i aon te aonnaba ni kabane a kona ni katabea maiuia aomata i nanon ririki aika iraua? Ao ai kamimi ra taai aika reke ibukin karaoan anne irouia aomata!

21. (a) Titiraki ake a tabekaki n Iobi 38:19 a kona ni karika iangoan aia koaua taan rabakau ae e ngaa iai? (b) Koaua ibukin te oota a riai ni kairira bwa ti na karaoa tera?

²¹ Tarai naba titiraki aika nano ake a mena n Iobi 38:19: “E nga kawain te tabo ae e maeka iai te oota, ao te ro, e nga nena?” Tao ko a tia n ataia bwa i nanon te tai ae maan, e taekinaki bwa te oota e buti n ai aron te nao, n aroia naao aika uarereke aika ti kona n nori n te nama. Ao ngkanne, n 1905, Albert Einstein e kabwarabwara ae te oota, e mwakuri n ai aron te korakora ae kamwakorokoroaki nakon bwaai ke bakete aika uangingi. Anne ae e toki iai iaiangoana? E titiraki ni kangai te encyclopedia ae e a tibwa karaoaki n taai aikai: “Te oota titeboo ma te nao, ke ma bwaai aika uangingi?” E kaeka: “N taraana, e aki kona [te oota] n riki n ai aron kabotau aika uoua aikai, ibukina bwa a rangi ni kaokoro [naao ma bwaai aika uangingi]. Te kaeka ae eti riki, bwa e aki kona n taekinaki ae te oota bon te bwai teuana mai buakon bwaai aika uoua aikai.” Ma ti teimatoa n namakina te kabuebue ae roko man te riringa (n aaro aika ti noria ao aika ti aki noria), e ngae ngkana aomata a tuai ni kona ni kabwarabwara raoi taekan ana mwakuri te Atua aei. Ti kang amwarake ao ti ikeikena te ea, aika bwaai aika riki man aia mwakuri aroka imwin kamaiuaia n te oota. Ti kona ni wareware, n nori mataia aomata aika a tangiraki iroura, n taratara bungin taai, ao bwaai aika mwaiti riki n aron aikai. Ao ngkai ti kakaraoi bwaai aikai, tiaki te koaua bwa ti riai ni kakaitau ibukin ana mwakuri te Atua aika kamimi?​—Taian Areru 104:1, 2; 145:5; Itaia 45:7; Ieremia 31:35.

22. Tera aroaron Tawita rimoa ni kaineti ma ana mwakuri te Atua aika kamimi?

²² Ti na neneri ana mwakuri Iehova aika kamimi, bwa e aonga ni kona n anaaki nanora iai ke ti na maaku ke ni mimi? Tiaki ngaia anne. Te tia areru rimoa e kakoaua bwa a aki kona n ataaki ma ni kabwarabwaraki taekan ana mwakuri te Atua aika kamimi ni kabane. E korea ae kangai Tawita: “Iehova, a bati am makuri aika kamimi aika Ko karaoi, . . . Ngkana I kani kaoti baikai ma n taekin, ao a maiti riki nakon aika konaki ni warekaki.” (Taian Areru 40:5) Ma e bon aki nanonaki iai bwa e na aki taekin mwakuri aika kamimi aikai. E kakoaua aei Tawita ni korakoran nanona ae kaotaki n Taian Areru 9:1: “N na katituaraoa Iehova n nanou ni kabanea; N na kaoti am makuri aika kamimi ni kabane.”

23. Tera aroarom ngkai ni kaineti ma ana mwakuri te Atua aika kamimi, ao ko na kanga ni buokiia aomata tabemwaang?

²³ Tiaki te koaua bwa a riai naba n ringaki nanora n aron anne? Tiaki te koaua bwa mimira n ana mwakuri te Atua aika kakannato e riai ni kairira bwa ti na tataekina taekana, taekan ana mwakuri nako, ao mwakuri ake e nang karaoi? E mataata te kaeka iai​—ti bon riai n “tataekina neboakina i buakoia botanaomata, ao ana makuri aika kamimi i buakoia aomata ni kabaneia.” (Taian Areru 96:3-5) Eng, ti kona ni kaota nanora n nanorinano n te kakaitau ibukin ana mwakuri te Atua aika kamimi, n te aro ae ti na tataekini rongorongona ake ti a tia n reiakin nakoia aomata tabemwaang. E ngae ngkana aomata a ikawairake i buakon te natannaomata ae kakewea te tia Karikiriki, ma arora n taetae nakoia n te aro ae kaunga ao ni kakauongo e kona ni kauka nanoia nakon ataakin te Atua. Ao irarikin anne, e kona ni kairiia bwa a na kan reirei ma ni beku iroun teuare ‘kariki bwaai ni kabane,’ ae te tia Karaoi mwakuri aika kamimi, ae Iehova.​—Te Kaotioti 4:11.

Tera Am Kaeka?

• Te kaungaunga ae koreaki n Iobi 37:14 e kairiko bwa ko na iangoa ana mwakuri ra te Atua?

• Baikara bwaai tabeua ake a kateretereaki n Iobi mwakorona 37 ao 38 ake a aki kona ni kabwarabwaraki raoi irouia taan rabakau n te aonnaba?

• Tera am kaantaninga ibukin ana mwakuri te Atua aika kamimi, ao tera ae ko a kairaki nako iai bwa ko na karaoia?

[Taamnei n iteraniba 27]

Antai ae ooa marawa ma ni kateimatoa ni nnena?

[Taamnei n iteraniba 27]

Antai ae e a tia ni kawari taabo ni kabane i aon te aonnaba aika tamaroa, ake a karikaki iroun te Atua?