Aia Ribooti Taan Ua Rongorongo Ibukin Te Tautaeka N Uea

E Karauaki Nanona ni Kainnanona ni Bwaai n Taamnei

CYPRUS bon te abamwakoro ae mena i meangin mainikun te Mediterranean Sea. N taai ake a karakinaki n te Baibara, e rangi ni kinaaki te aba ae Cyprus ibukin te buraati ao te kai ae moan te raoiroi ae rereke mai iai. Bauro ma Barenaba a tataekina rongorongon te Tautaeka n Uea iai ni moan mwanangaia ni mitinare. (Mwakuri 13:4-12) Ni boong aikai, e a teimatoa naba te euangkerio ni buokia aomata aika mwaiti aika kaain Cyprus. E bon noraki koauan aei ni maiun Lucas, ae te mwaane ae 40 tabun ana ririki ni maiu. E karaki ni kangai teuaei:

“I bungiaki i nanon te utu ae itiman naati iai, ao ti maeka n te tabo ae a kaikawaaki kao iai. I a kaman kakani wareboki boni ma ngke I uarereke. Te boki ae I rangi n tatangiria riki bon te Baibara ni Kristian n Erene ae uarereke tiaaitina. Ngke ai tebwina au ririki ni maiu, ti a katea te kurubu ae uarereke mwaitin kaaina ngai ma raoraou ake tabeman, ibukin reiakinan te Baibara. Ma e aki teimatoa ni maan, bwa tabeman kaain te kaawa ake a ikawai riki a aranira bwa aomata aika kabwaoua te koaua.

“Imwina riki, ngke I a kaaea te reirei n te United States, e a reke au tai iai ni kaitiboo ma aomata aika a kakaokoro nako aia Aro. E a manga kaungaaki nanou iai n tangiran bwaai n taamnei. I kabanei boong aika mwaiti n neneri taekan Aaro aika kakaokoro nako n te tabo n tangoboki n au kura ae rietata. I boni kakawari naba Aaro tabeua, ma e ngae n anne e bon aki naba rau nanou ni kainnanou ni bwaai n taamnei.

“Ngke e a bane au reirei, ao I a oki rikaki nako Cyprus, ao I a karekea au mwakuri ae nakoau iai boni mataniwin te tabo n tutuo ae reitaki ma te kuakua. E kakawarai n au tabo ni mwakuri te unimwaane temanna ae arana Antonis, ae ngaia temanna kaain Ana Tia Kakoaua Iehova. Ma e ataaki naba kawarau irouna, irouia kaain te Aro ae te Greek Orthodox Church.

“E aki maan, ao e a kawarai te tia rabakau n te Aro temanna, ao e reireinai bwa N na aki manga maroro ma kaain Ana Tia Kakoaua Iehova. Kioina ngkai I a kaman reireinaki ma ngke I uarereke bwa te Aro ae te Greek Orthodox Church bon te Aro ni koaua, I a ongo irouna, ao I a aki butimwaea kawarakiu iroun Antonis, ao I a moanna ni maroro i aon te Baibara ma te tia rabakau n te Aro aei. I kawari naba ana tabo te Aro aika mwaiti ake i aon Cyprus. I boni mwananga naba nako meangin Kuriti ao I kawara te Maunga ae Athos, ae iangoaki bwa te maunga ae tabu riki irouia kaain Aaro ni Kristian aika Orthodox. Ma e ngae n anne, a bon aki kaekaki naba au titiraki i aon te Baibara.

“Ngkanne, I a tataro nakon te Atua ni butiia bwa e nang buokai ni kakaaea te koaua. E aki maan imwina, ao e a manga kawarai naba Antonis n au tabo ni mwakuri, ao I a kanamakinna bwa tao ai kaekakin au tataro. Ngaia are I a katoka kaitiboou ma te tia rabakau n te Aro arei, ao I moanna n reirei n te Baibara ma Antonis. I a teimatoa n ririkirake, ao n Okitobwa 1997, I a kaotia are I a tia ni katabua maiuu nakon Iehova ngke I a babetitoaki n te ran.

“N te moan tai, a rangi ni kaitaraai buu ao natira aika aine ake a a ikawai riki, aika 14 ao 10 aia ririki ni maiu n te tai arei. Ma ibukin au kairiri ae raoiroi, e a reke ana iango buu bwa e nang kaea te botaki teuana n te Maneaba n Uea. E rangi n anaaki nanona iai n aia akoi taani Kakoaua, ao tabeakinana irouia. Ma e anaaki riki nanona n aroia ni kakabongana te Baibara. Ibukin anne, buu ao natira aine aika uoman ake a ikawai riki, a a butimwaea naba te reirei n te Baibara ma Ana Tia Kakoaua Iehova. Ko kona n iangoa aron kukurein nanou ngke a bane ngaiia teniman ni babetitoaki n te Bwabwaro n Aono ae “Ana Taeka ni Burabeti te Atua,” n 1999!

“Eng, e karauaki nanou ni kakaaean te koaua irou. N te tai aei, ara utu ae bwanin n ikotaki ma buu ao natira aika aman a katiteuanaki n taromaurian Iehova n te aro ae eti.”