Onimakina Iehova ae te Atua ni Koaua

Ko a tia n tararake nako karawa n te tairiki ae akea iai te nang ao n nori itoi aika rangi ni mwaiti kurikuri? N am koaua, a kanga n riki?

NI BUNGIN te ariki n te tairiki, kaanga a taetae taian itoi nakon Uean Iteraera rimoa ae Tawita, ao a kairia bwa e na korea ae kangai: “A tataekina mimitongin te Atua taiani karawa; ao a kaotiota ana makuri baina taian itoi.” (Taian Areru 19:1) Eng, e riai riki “n anganaki” te tia Karikiriki “te neboaki ma te karineaki ma te mwaka,” ma tiaki te karikibwai.​—Te Kaotioti 4:11; I-Rom 1:25.

“Ane katei bwaai ni kabane bon te Atua,” e taekina anne te Baibara. (Ebera 3:4) Te Atua ni koaua, ‘ae Iehova arana, bon tii Ngaia Teuare Moan te Rietata i aonnaba ni bane.’ (Taian Areru 83:18) Ao bon tiaki te Atua ni kakekewe. E taku ana taeka Iesu Kristo ni kaineti ma Tamana are i karawa, ae Iehova: “E koaua Teuare kanakomaiai.”​—Ioane 7:28.

Iehova, ae te tia Kakoroi Bukin Ana Kaantaninga

Aran te Atua ae kaokoro, ae Iehova, e oti n te Baibara n Ebera n te mwaiti ae kaania 7,000 te tai. Arana anne are e a kaotia raoi iai bwa bon te Atua ni koaua ngaia. E kangai nanon aran te Atua, “E Karaoia bwa E na Riki.” E kaotia Iehova ae te Atua bwa boni ngaia te tia Kakoroi Bukin ana kaantaninga. Ngke e titirakina te Atua Mote bwa antai arana, ao Iehova e kamataataa nanona n te aro aei: “Ae Ngai ae boni Ngai.” (Te Otinako 3:14) Ana rairai Rotherham i aon aei e kangai: “N na bon Riki bwa te bwai ae I tangiria.” E kakoroa bukin ana iango Iehova, ke e riki bwa te bwai are e tangiria ni kaineti ma karaoan ana kaantaninga ao ana berita bwa ooi ni bwai. E bati nakoana n aron te tia Karikiriki, te Tama, te Uea ae Moan te Rietata, te tia Kawakinia Aomata, Iehova Tabaota, te tia Ongo tataro, te tia Motikitaeka, te tia Reirei ae Kakannato, ao ai te tia Kamaiu.​—Taani Motiki-taeka 11:27; Taian Areru 23:1; 65:2; 73:28; 89:26; Itaia 8:13; 30:20; 40:28; 41:14.

Bon tii te Atua ni koaua ae kona n aranaki n te ara ae Iehova, bwa aomata a aki kona ni koaua raoi bwa e na bon nakoraoi aia babaire. (Iakobo 4:13, 14) Bon tii Iehova naba ae kona ni kangai: “Aron te karau ma te tinoo ngkai a bwabwaka mai karawa, ma n aki okiria, ma a teboka aontano, ma n anganna te kariki ma te kaue, ma n angan te tia ununiki te uaa, ao ae amamarake te amarake; ao ai aron naba au taeka ae oti nako mai wiu: e na aki okirai ni matebuaka, ma e na boni karaoa ae I tangiria, ao e na reke konana n are I kanakoa nako iai.”​—Itaia 55:10, 11.

E teimatoa Iehova ni waakina nako ana kaantaninga n akea te nanououa iai, n te aro ae te bwai ae aki taraa ni koaua irouia aomata, e boni koaua irouna. E a maan imwin mateia Aberaam, Itaaka, ao Iakobo, ma e a manga taekinia Iesu ni kangai: “[Iehova bon] tiaki Atuaia ake a mate, ma bon Atuaia ake a maiu: ba a bane ni maiu i bukina.” (Ruka 20:37, 38) Tamanuea aika kakaonimaki aika teniman aikai a a tia ni mate, ma akea te nanokokoraki ni kaineti ma ana kaantaninga te Atua ibukin kautakiia, n te aro are e a arania iai bwa a boni maiu naba. Kaokan maiuia tooro aika a kakaonimaki aikai e aki kangaanga iroun Iehova, n aron naba are e aki kangaanga karikan te moani mwaane mani bubun aontano.​—Karikani Bwaai 2:7.

E a manga kaota riki te katoto teuana te abotoro Bauro i aon kakoauan are te Atua e boni kona ni kakoroa bukin te bwai are e kaantaningaia. N te Baibara, e aranaki Aberaam bwa “tamaia botanaomata aika bati.” (I-Rom 4:16, 17) Ngke e tuai ni kariki Aberam, ao e a kamani bita arana Iehova nakon Aberaam, ae nanona “Tamaia te Koraki ae Uanao.” E boni kakoroa nanon te ara aei Iehova ngke e karaoa te kakai ni kaoka te mwaaka ni kakariki nakon Aberaam are e a kara, ao buuna ae e a unaine ae Nei Tara.​—Ebera 11:11, 12.

Ibukina bwa e anganaki Iesu Kristo te mwaaka ae bati ma te kona n tautaeka, e bon aki toki n tataekin bwaai aika a koaua ake a bon aki kona ni karaoi aomata. E ngae ngke e a tia ni mate raoraona ni kaan ae Rataro, ma e taku Iesu nakoia ana reirei: “E matu Rataro are raora; ma I a nako, ba N na kautia.” (Ioane 11:11) Bukin tera bwa e taekina te aomata ae e a tia ni mate Iesu bwa e matu?

Ngke e a roko Iesu n ana kaawa Rataro ae Betania, e kawara te ruanimate ao e tua bwa e na uotaki nako te atibu are e mena i matana. E kangai ana taeka imwin ana tataro ni kabaibati: “Rataro, ooti mai.” A bane n taraa te ruanimate aomata ake a mataku, ngke e a “oti nako teuare mate, ao a kabaeaki baina ao waena n te kunnikai; ao e kabaeaki matana n te kaoanimaono.” Imwin anne e a manga kangai Iesu: “Kabara, ao kanakoa.” (Ioane 11:43, 44) E kauta Rataro Iesu ngke e kaoka te maiu nakon te mwaane ae e a tia ni mate i nanon abong! E aki kamangaoa te koaua Kristo ngke e taekina raoraona arei bwa e matu. Ma ni kaineti ma Iehova ao Iesu, maten Rataro titeboo ma e matu irouia. Eng, Iesu ma Tamana are i karawa a bon tabeakini bwaai aika koaua.

E Kona ni Kakoroi Bukin Bwaai ake Ti Kaantaningai, Iehova

Tera te kaokoro i marenaia bouannanti aika mwamwana te aba, ao te Atua ni koaua! Taan taromauri bouannanti a kairua ngkai a taku bwa iai mwaakani bwaai aikai ni buokia. E ngae ngke a bati ni karineaki bouannanti, ma a aki kona ni kamwakaaki riki iai. N te itera teuana, Iehova ae te Atua e kona n arania ana toro ake a a maan ni mate bwa a maiu, bwa e kona ni manga kaoka te maiu nakoia. “Te Atua ni koaua Iehova,” ao e aki kona ni mwamwanaia ana aomata.​—Ieremia 10:10.

Ai kakukureira ataakin ae n ana tai Iehova ae e na roko, maate ake a uringaki irouna a nang boni kautaki ao a nang maiu! (Mwakuri 24:15) Eng, te manga-uti e irekereke ma kaokan aroaroni maiun te aomata rimoa nakoina. Uringan anuani maiuia maate ao kautakiia, e aki kangaanga iroun te tia Karikiriki, are akea tian wanawanana ma mwaakana. (Iobi 12:13; Itaia 40:28) Kioina ngkai e bati n tatangira Iehova, e na kabongana ana ururing ae kororaoi ni kaoka iai maiun te mate nakon te baretaiti n te aonnaba aei, n ikotaki ma anuani maiuia ngkoa, are imwain mateia.​—1 Ioane 4:8.

Ngkai e a kaan tokin ana aonnaba Tatan, e rangi ni kakukurei te maiu ae mena i mwaiia te koraki ake a onimakina te Atua ni koaua. (Taeka N Rabakau 2:21, 22; Taniera 2:44; 1 Ioane 5:19) E taekina ae kangai te tia areru nakoira: “Ai ti teutana riki, ao akea naba te aomata ae buakaka: . . . Ma a na abana te aba akana nimamanei; ao a na kukurei ni kabatian te raoi.” (Taian Areru 37:10, 11) Mwakuri ni kakeru ao te buakaka a nang riki bwa bwaai ni kawai. E na taabangaki te kaeti taeka ae riai, ao a nang akea kangaanga aika a irekereke ma te mwane. (Taian Areru 37:6; 72:12, 13; Itaia 65:21-23) E na mauna te kairiribai ae boto i aon kakaokoron aroia aomata, aia reeti, ao aia baronga. (Mwakuri 10:34, 35) Te buaka ao bwaai ni buaka a nang akea. (Taian Areru 46:9) N te tai anne “ane maeka iai e na aki kangai, I aoraki.” (Itaia 33:24) A nang bane ni kororaoi kukureia ao n rangi ni marurung naba. (Te Kaotioti 21:3, 4) E nang waekoa n riki bwa te bwai ae koaua te baretaiti i aon te aonnaba. Bwa bon ana kaantaninga Iehova!

Eng, kaantaninga ni kabane man te Baibara a nang waekoa ni kakoroaki bukiia. Bukin tera bwa ti na kariaia mwamwanakira ni bwaai aika a taromauriaki n te aonnaba aei, ngkai ti kona n onimakina raoi Iehova? E tangiriia “aomata ni kabaneia ba a na kamaiuaki, ma ni karekea atakin te koaua.” (1 Timoteo 2:3, 4) Ti na bon aki kabanea ara tai ma korakorara nakoni bwaai aika aki koaua, aika kanoan te waaki n te maiu aei ma bwaina nako aika a taromauriaki irouia aomata, ma ti na karikirakea ara atatai i aon taekan te Atua ni koaua, ao n onimakinna ma nanora ni kabane.​—Taeka N Rabakau 3:1-6; Ioane 17:3.

[Taamnei n iteraniba 6]

E boni matu Rataro n taraana iroun Iehova ao Iesu

[Taamnei n iteraniba 7]

E na waekoa n riki bwa te bwai ae koaua te baretaiti i aon te aonnaba