Titiraki Mairouia Taani Wareware
E riai ngkana ti tataro nakon te Atua ao ti aki atong taeka aika ai aron “i nanon aran Iesu”?
E kaotia te Baibara bwa Kristian aika tangiria ni kawara Iehova n te tataro, a riai n rinanon aran Iesu. E tuangia taan rimwina ni kangai Iesu: “Akea ae e nakon te Tama ngkana e aki rirou.” E a manga taku riki: “Ao te bai nako ane kam na bubuti n arau, ao N na karaoia, ba e aonga n neboaki te Tama i nanon te Nati. Ngkana kam butiai te bai teuana n arau, ao N na karaoia.”—Ioane 14:6, 13, 14, BK.
Ni kaineti ma nakoan Iesu ae rangi ni kaokoro aei, e kangai te Cyclopedia of Biblical, Theological, and Ecclesiastical Literature: “Bon tii te Atua ae ti riai n tataro nakoina ma ti na rinanon Iesu Kristo ae te tia Raoi. Taian tataro nakoia aomata aika tabu ke anera, bon akea maneia ao a rangi ni bure ma ni kamatauninga naba. Taromauriaia aomata aika karikaki e ngae ngkai a kakannato, bon titeboo ma taromaurian bouannanti, ao e rangi ni katabuakaki n ana tua te Atua.”
Ma tera, ngkana iai temanna ae namakina kakabwaiana n te bwai teuana ao e a tii kangai naba, “Ko rabwa Iehova,” ao e aki atonga “i nanon aran Iesu”? E bure aei? Tiaki n taai nako. Ngkana arona bwa iai te Kristian ae kaitiboo ma te kangaanga ae karuanikai ao e karina n takarua ni kangai: “Buokai, Iehova!” Te Atua e na bon aki rawa ni buoka ana toro ae aki atong taeka aika “i nanon aran Iesu.”
E riai n ataaki bwa te takarua n tii ngaia, bon tiaki te tataro nakon te Atua. N aron anne, ngke e motika taekan Kain Iehova ibukina ngke e tiringa tarina are Abera, ao e kangai Kain: “E korakora riki kaiu nakon ae I kona n taotaona nanou nako iai. Noria, Ko a tia ni kakioai nako n te bong aei mai aontano; ao N na karabaki nakoni matam; ao N na riki ba te tia mumun ao te tia tiotio nako i aonaba; ao aio arou rimwi ba ane I reke i rouna ao e na kamateai.” (Karikani Bwaai 4:13, 14) E ngae ngke e kaineta ana bwaebwaeti Kain nakon Iehova, ma e boni boto kakaiina i aon tangin nanona n te bwai ae rawawata are e riki imwin karaoan te bure.
E tuangira naba te Baibara ni kangai: “E rawa te Atua nakoia akana kainikatonga, ma E angania akana nanorinano te akoaki.” Wetean Teuare Moan te Rietata ni bakanrerei, n aron ae wetean te aomata n aki akaka e na kaotia bwa akea te karinerine iai. (Iakobo 4:6; Taian Areru 47:2; Te Kaotioti 14:7) Bon akea naba ara karinerine ngkana ti ataa ana Taeka te Atua ibukin nakoan Iesu, ma ti aki kaotia n ara tataro ae ti ataa Iesu Kristo.—Ruka 1:32, 33.
Tiaki nanona bwa iai aron tein te tataro ae e kaantaningaia Iehova ngkana ti na tataro. Te bwai ae rangi ni kakawaki iai bon raoiroin nanon te aomata. (1 Tamuera 16:7) N te moan tienture C.E., temanna tautian Rom ae arana Korenerio e “aki toki n tataro nakon te Atua.” Korenerio bon te Tientaire ae tuai ni korotobibiaki, ao e tuai naba ni katabua maiuna nakon Iehova. E ngae ngke tao e aki tatataro i nanon aran Iesu, ma a ‘roko i eta ana tataro bwa kanuringana i matan te Atua.’ Bukin tera? Ibukina bwa “e katai naano Iehova” ao e nora Korenerio bwa e “kakarinea ma ni mamaka te Atua.” (Mwakuri 10:2, 4, BK; Taeka N Rabakau 17:3) Imwin reken ana atatai Korenerio ibukin “Iesu are te I-Natareta,” e roko te taamnei ae raoiroi irouna, ao e riki ngaia bwa te tia rimwin Iesu ae babetitoaki.—Mwakuri 10:30-48.
Ni bon etina, a aki riai aomata ni baireia bwa aeka n tataro raa aika a na ongoraeaki iroun te Atua. Ngkana e a burenibwai naba temanna te Kristian n taetae nakon te Atua n te taina ao e mwaninga ni kabongana te taeka ae “i nanon aran Iesu,” bon akea bukina ae e riai n taku bwa e bure. E atai arora ni kabane Iehova ao e kani buokira. (Taian Areru 103:12-14) Ti kona ni kakoauaa bwa ngkana ti onimakina “Natin te Atua . . . , ngkana ti bubuti te bwai teuana n ai aron nanona, ao E bon ongo i roura.” (1 Ioane 5:13, 14) Ma ngkana a tataro Kristian ni koaua i mataia aomata tabemwaang, a riai ni kaota ataakin nakoan Iesu ni kaineti ma ana kaantaninga Iehova, n aron are kaotaki n te Baibara. Ao a ongeaba n aroia ni karinea Iesu n aia tataro nakon te Atua rinanona.