A A Raarikin Riki Aomata Aika Maiu ni Kainnano
“Akea te botannaomata ae na teimatoa ni korakora ao ni kukukurei, ngkana a mwaiti mai buakoia kaaina aika raarikin ao a kananoanga.”
AIKAI ana taeka te tia tikona kaubwain te aba ao te tia rabakau ae arana Adam Smith, ake e taekin n te ka-18 n tienture. A a mwaiti aomata aika kakoauaa bwa bwaai ake e taekin teuaei, a bon riiriki ni boong aikai. E rikirake naba ni korakora te kakaokoroaki i marenaia aomata aika kaubwai ma aika raarikin. I Biribin, teuana te katenimwakoro mai buakon te botannaomata iai, ae a maiuakina ae kee i aan $1 (n Amerika) ni katoa bong, ae te mwaiti ni mwane are e kona n reke irouia taani mwakuri n aaba aika kaubwai i nanon tabeua te miniti. E taku te Human Development Report 2002 are katauraoaki man te United Nations, bwa “5 te katebubua mwaitiia aomata aika rangi ni kaubwai mai buakoia aomata n te aonnaba, aika karerekea te mwaiti ni mwane ae 114 te tai okiokin rakana nakon are a karerekea te koraki ake a rangi n raarikin aika 5 te katebubua mwaitiia.”
E ngae ngkai iai tabeman aika a boni kona ni karekei bwaai aika kainnanoi ibukin maiuiia, ma a bon rangi ni mwaiti riki aika maeka n tiaki oin abaia ao n akea naba etina i aan te tua, ike a kona ni katei iai aia auti aika tiaki toro n auti aika kai bwaka. Iai naba tabeman aika rangi ni kananoanga riki nakoia aikai, bwa a maeka i rarikin kawai ao a wene i aontano i aoni kaatibooti. A a mwaiti mai buakoia aika kakorakoraiia ni karekei maiuiia n aanga ake a kona ni karekei iai, n aron ae a kibeurii turam ni maange ni kakaaei kanaia iai, a tabeki uota aika tinebu, ke a kookoka te aenikaa n rikorikoi iai tiin, bwatoro ke beebwa aika kona ni manga kaokaki nakoia taani karaoi ao ma ni karekea te mwane ae rangi n uarereke maiai.
E aki tii reke te kakaokoro i marenaia aomata aika kaubwai ao aika raarikin n aaba aika tabe n rikirake n aron ae e taekinna Bangken te Aonnaba ni kangai: “E nonoraki n aaba nako taabo aika uarereke ake a mena iai aomata aika maiu ni kainnano.” E ngae ngke a kaubwai tabeman i buakoia kaain Bangladesh ao Amerika, ma bon iai naba ake a kakorakoraia ni mwakuri ibukin boon kanaia ae tau, ke mwengaia. Te New York Times, e taekina kanoan ana ribooti te Census Bureau n te ririki 2001 n te United States, are oti iai bwa e a rikirake ni korakora riki ngkai te kaokoroaki i marenaia kaubwai ma raarikin i Amerika n aroni maiuiia. E taku bwa e reke irouia “aomata aika rangi ni kaubwai i aon Amerika aika uabwi te katebubua mwaitiia mai buakoia aomata nako, iteran aia karekemwane aomata ni kabane n te ririki ae nako . . . ao 3.5 te katebubua, e reke irouia aomata aika maiu ni kainnano.” Titeboo aroia aomata n aei ke e kona ni buakaka riki n aaba ake tabeua. E ribootinna Bangken te Aonnaba bwa tao 57 te katebubua man te botannaomata n te aonnaba aika maiuakina ae kee i aan $2 n te bongina.
Ni kakorakoran riki te kangaanga aei, ao n te ririki 2002, mirion ma mirion mwaitiia aomata aika a karawawataki ibukin taekaia kaain te tautaeka ake a kananououa aron rikiia ni kaubwai. E ngae ngke akea te bwai ae karaoaki ae e aki eti i aan te tua, ma a mwaiti aika namakinna bwa mataniwin kambwana aika taekinaki n te maekatin ae arana Fortune, a rangi n riao aia karekemwane n te aro are a kaakeai bongaia aomata ake i rarikiia.” N iangoan te bwai ae riki ngkai n te aonnaba, a kona ni mimi tabeman, ngkai iai aomata aika e kona n reke irouia te mwane ae rangi ni mwaiti ae aki kaantaningaki rekena, e ngae ngke a mwaiti aika a maiu ni kainnano.
E na Teimatoa n Aki Toki te Maiu ni Kainnano?
E aki nanonaki n aei bwa akea ngkai ae kataia n iangoa katokan kainnanoia aomata aika raarikin. A a bon tia ni karaoi aia kai-ni-baire taani mwakuri n tautaeka ao botaki n ibuobuoki tabeua ibukin iangoan bitakin te aro aei. Ma e ngae n anne, ao a teimatoa ni kabwara nano mwin waaki aikai. E taku te Human Development Report 2002 bwa “a mwaiti aaba aika a rikirake riki n raarikin i nanon ririki aika 10, 20, ao n taabo tabeua, 30 te ririki n nako, e ngae ngke a mwaiti aomata aika bwakuaku ake a kakorakoraia ni karaoiroa te kangaanga anne.”
Ai akea ngkai aia kaantaninga aomata aika raarikin? Ti kaoko bwa ko na wareka te kaongora are imwin aei ma n iangoi taeka n rabakau aika kona n ibuobuoki ngkai, ao n ikotaki naba ma aanga n ibuobuoki aika tao ko tuai ni karekeiango i aoia.