Te Baibara E Kona n Ibuobuoki Nakon Am Mare
E KARIOI iango aika raraoi te taeka ae ‘mare’ irouia tabemwaang. Ma e karekea te uruakinnano irouia tabeman. E bwaebwaeti ni kangai temanna te buu-te-aine, “Titeboo ma I namakinna bwa I a tia ni buu-raure ngkai. E riki aei ibukina bwa I a aki tatabeakinaki ao I a boni kikitanaki naba n taai nako.”
Tera ae e karika iraraureia aomata aika uoman ake a a tia ngkoa ni berita bwa a na tangiriia ma n nabenabeakinia i bon irouia? Bukina teuana, bwa e a boni karako otaia i aon bwaai aika a irekereke ma te mare. E korea ae kangai temanna te tia kareke-rongorongo i aon te waaki ni kuakua, “Ti a boni mare naba n akea reireiara moa iai.”
Kakoauan ae tii tabeman aika a karekea te atatai i aon te mare, e noraki n te kakaae ae kairaki iroun te botaki ae The National Marriage Project, ae karaoaki n te kuura ae te Rutgers University i New Jersey, i Amerika. E korea ae kangai te tia kairiri n te kakaae aei: “A bati i buakoia ake a kaea te reirei aika a ikawairake irouia kaaro aika e aki kakukurei aia mare ke a a tia ni buu-raure. A ataia raoi bwa aekakira te mare ae aki-nakoraoi, ma a aikoa rangi ni mataata ngkanne n taamnein te mare ae raoiroi. Tabeman a kona n tii kabwarabwaraa te mare ae raoiroi ni kangai, ‘boni kaitaraan raoi are e riiriki irouia au karo.’”
Te koaua bwa a aki rereke n te kangaanga Kristian ni kaineti ma aia mare? Tiaki ngaia anne. Ni koauana, tabeman Kristian n te moan tienture, a kainnanoa te reirei ae matoatoa ae a na aki “iangoa te raure” n aia mare. (1 I-Korinto 7:27, BK) E ataaki bwa a na boni kai reke n te kangaanga aomata aika mareaki aika aki-kororaoi, ma e a tia n reke te ibuobuoki iai. A kona ni kanakoraoa aia reitaki buu-mwaane ao buu-aine, ngkana a iri nanon ana reirei te Baibara.
E koaua bwa e bon aki tii karaoaki te boki ae te Baibara ibukin kairan te mare. Ma kioina ngkai e kairaki koreana iroun Teuare e moani karaoa te mare, ti kona ngkanne ni kaantaningai ana reirei nako bwa a na rangi n ibuobuoki iai. E taekina ae kangai Iehova rinanon te burabeti ae Itaia: “Bon Iehova ae Atuam Ngai, ae I reireiko arom ae ko na kabaia iai, ae I kaiririko i nanon te kawai ae riai ba ko na nakonako iai. Ko bia kaman iri nanon au tua nako! ao ai aron te karanga raun nanom iai, ao ai aron naoni marawa am raoiroi.” —Itaia 48:17, 18.
E a tia ni manga moanna ni koerikaaki te tangira are e a tia ngkoa n reke i marenam ma kaainnabam? Ko a namakinna bwa ko a mwanetaati n te mare ae akea te tangira iai? E taku temanna te buu-te-aine ae 26 ana ririki n tekateka n taanga ma buuna: “E boni kangaanga kabwarabwaran te maraki are e a tia n reke man te aeka n reitaki aei. E bon teimatoa rikina n taai nako.” N onean mwin are e nang bwara naba nanom n am mare, bukin tera bwa ko aki kataia moa ni kanakoraoia? E na kaotaki nakoia buu-mwaane ao buu-aine n te maroro are imwina, aron ana reirei te Baibara ni kona ni buokiia n te itera ae kakawaki teuana, ae taekan kani kakoroan nanon am berita.