Titiraki Mairouia Taani Wareware
Tera ae nanonaki n te bwabetito ibukiia maate?
Ngke e korea taekan te kautaki nako karawa te abotoro Bauro, ao e korea iai te kibu teuana ae rangi ni kakannongora. Ti wareka ae kangai n te Baibara: “A na aera ake a babetitoaki i bukiia maate? Ngkana a bon aki manga uti maate, ao a aera ngkai a babetitoaki naba i bukiia?” Te Baibara ni Katorika e raira te kibu aei ni kangai: “Tera bongaia akana a babetitoaki i bukia mate? Ngkana arona ba a bon aki mangauti mate, ao tera bongan aia makuri akana a babetitoaki i bukia?”—1 I-Korinto 15:29, BK.
Te koaua bwa e nanonna Bauro, ae a na bwabetitoaki aomata aika maiu ibukia te koraki ake a a tia ni mate, aika tuai ni bwabetitoaki? Ngkana a tii taraaki rairai aika kaotaki i eta ao rairai tabeua, a kona tabeman n iangoia bwa boni ngaia are nanonaki iai. Ma e kaokoro te ota ae reke ngkana a neneraki raoi kiibu aikai ao taeka n Erene nikawai ake e kabonganai Bauro. E nanonna Bauro bwa a bwabetitoaki ke a butimwaea te aeka ni maiu ae e na toki n te mate ae ai aron maten Kristo, are nanona bwa a na kakaonimaki ni karokoa mateia. Imwina, ao a na kautaki nakon te maiu n taamnei, n aron naba are reke iroun Iesu.
E boutokaki te kabwarabwara aei n te Baibara. E korea ana reta Bauro nakoia kaain Rom ni kangai: “Kam aki ataira ngaira aika ti babetitoaki nako nanoni Kristo Iesu ba ti babetitoaki naba nako nanoni matena?” (I-Rom 6:3) N ana reta Bauro are e koreia nakoia I-Biribi, ao e bon taekina iai nanona ni kangai: “I kani buoka [marakin Kristo], ma ni katotongnga i nanoni matena, ba I aonga ni kona ni mangauti naba mai buakoia mate.” (I-Biribi 3:10, 11, BK) E katereterea ikai Bauro, bwa e reitaki anuani maiun te tia rimwin Kristo ae kabiraki ma te teimatoa ni kakaonimaki i aani kataaki, te kaaitara ma te mate n te bong ae koraki, ao n tokina ai bon te mate ibukin te aro ni kakaonimaki, ae e na rimwiaki n te manga-uti nako karawa.
E kakawaki ataakin ae kiibu aika a a tia n taekinaki aikai, ao n ikotaki naba ma kiibu riki tabeua aika a taekina te mate ni kaineti ma aomata aika bwabetitoaki, a taekinia aomata aika maiu ake a kaman tia ni bwabetitoaki n te ran, ma tiaki aomata ake a a tia ni mate. E tuangia naba raona ni Kristian aika kabiraki Bauro ni kangai: “Kam taunaki ma Ngaia n te babetito, are kam a manga kautaki iai ma Ngaia n onimakinan ana makuri te Atua, are kautia mai buakoia maate.”—I-Korote 2:12.
Te taeka n Erene ae hy·per, are e rairaki nakon te taeka ae “i bukiia” ni kibun te Baibara ae te 1 I-Korinto 15:29; e kona naba n nanonaki iai “bwa a aonga.” Ibukini kaboraoan aei ma kibun Baibara riki ake tabeua, e a rairaki te kibu aei n te Baibara ae te New World Translation of the Holy Scriptures ni kangai: “Tera bongaia akana a bwabetitoaki bwa a aonga n riki bwa maate? Ngkana arona ba a na aki manga uti mate, ao tera bongaia ngkai a a bwabetitoaki bwa a aonga ni mate?”