E Karaoaki Ngkai Nanon te Atua?

“Ke e iraki nanom i aon te aba n ai arona i karawa.”​—Mataio 6:10, BK.

A MATAKU ma te maaku ae korakora Julio ma Nei Christina ngke a a tabe n urarake aman natiia ni karokoa mateia, imwin rebwetauan aia kaa ngke e a okaki nako iroun temanna te tia kabuti kaa ae koro ni manging. E reke anaakin natiia are te kaniman, ae Marcos, mai buakon te urarake arei, ma e a bueetata rabwatana n te aro are e a tiku n teimatoa ni mwakamwaka. Ai bon ruaiwa ana ririki te tei aei, ao e a bon rangi n taonaki tamana n te rawawata ae korakora. E kataia ni kabebetea nanona ma kaain ana utu n taeka aikai: “Ti riai n ataia bwa aio nanon te Atua, e ngae ngkana tao e raoiroi ke e buakaka.”

A a mwaiti aika titeboo aia iango ma aio, ngkana a kaaitara ma te kabuanibwai ae aron aei. A iangoa ae kangai; ‘Ngkana e korakora mwaakan te Atua ao e mutiakinira, nanona ngkanne bwa ngkana iai te bwai ae e riki, e riki ibukin kakabwaiara n itera tabeua, e ngae ngke e rangi ni matoatoa ataakin nanon aei iroura.’ Ko kakoauaa te iango aei?

Te iango ae bwaai aika riki aika raraoi ke tao a buakaka, aika a bane ni kaotiota nanon te Atua, e aanaki man ana taeka Iesu are atongaki bwa ana Tataro te Uea are mwaneweaki mai eta. Tiaki te koaua bwa e tabe ni karaoaki ae boraoi ma nanon te Atua i karawa ngkai? Ngkana ti tataro ni kangai, “Ke e iraki nanom i aon te aba,” tiaki te koaua bwa ti kakoauaa iai bwa bwaai aika riki i aon te aba a boraoi ma nanon te Atua?

A mwaiti aomata aika a nanououa n te iango aei. N aia iango ao e kabwarabwaraki iai te Atua, bwa e aki mutiakin aia namakin aomata ake e karikiia. A titiraki ni kangai: ‘E na kanga te Atua ae tatangira n tangiria bwa a na karawawataki aomata aika a aki karaoa ae kairua?’ ‘Ngkana ngaia bwa e tangirira te Atua bwa ti na karekei reireiara man bwaai aika karawawata aika riki nakoira, tera ngkanne reireiara mai iai?’ Tao bon anne ae ko namakinna ni kaineti ma aei.

E korea ae kangai ai tarin Iesu ae te tia rimwina ae Iakobo ni kaineti ma te itera aei: “Ngkana e kaririaki temanna, ao e na tai kangai, I kaririaki mairoun te Atua: ba E aki konaki te Atua ni kaririaki ni baika bubuaka, ao E aki kariria temanna.” (Iakobo 1:13) Tiaki nibwan baika bubuaka te Atua. Mangaia are e kateretereaki raoi n aei, bwa bwaai ni kabane aika a riki i aon te aba ni boong aikai, bon tiaki nanon te Atua. E taekinaki naba n te Baibara nanoia aomata, nanon te botannaomata, ao ai nanon naba te Riaboro. (Ioane 1:13; 2 Timoteo 2:​26; 1 Betero 4:3) Ko kariaia ngkanne ae te bwai are e riki ngkoa nakoia ana utu Julio ma Nei Christina, bon tiaki nanon Tamara ae tatangira are i karawa?

Mangaia are tera are e nanonna Iesu ngke e reireinia ana abotoro bwa a na tataro ni kangai: “Ke e iraki nanom”? Te koaua bwa bon tii te bubutii nakon te Atua bwa e na ibuobuoki n itera tabeua, ke e bon reireinira Iesu bwa ti na tataro ibukin bwaai aika kakawaki riki ao n raraoi, ae te bitaki are a kona ni kaantaningaia aomata ni kabane? Ti na nenera riki ana taeka te Baibara i aon aei.

[Picture Credit Lines n iteraniba 3]

Car: Dominique Faget-STF/AFP/Getty Images; child: FAO photo/B. Imevbore